Jina Lia Zambi Iya?

Nyi muzanga kunyingika umwe mutu, chuma chitangu chize muhula chili chino, “Jina lie iya?” Nyi muhula Zambi chihula chino, kuchi iye makumbulula?

“Yami Yehova. Lie jina liami lienalio.”​—Izaia 42:8.

Shina hiunevu kama jina lino? Kota ka, mumu akwa-kulumbununa Mbimbiliya anji kakazachishile chinji jina lia Zambi mu Mbimbiliya jimwe. Ayo, kanji-kanji kalichijilemo ni kusalakanyisamo chisanyiko, ngwe “MWENE.” Alioze, jina lia Zambi te liakusoloka yisuho 7,000 mu yisoneko ya Mbimbiliya yitangu mu limi lia Hepreu. Jina liacho kakulisoneka ni sona jiwana mu limi lia Hepreu, ngwe chize linasoloka hano YHWH hanji JHVH, nawa chize ku mashimbu akunyima kakulilumbununa mu Chokwe ngwo, “Yehova.”

Jina lia Zambi liakusoloka mu Yisoneko ya Hepreu, nawa tunaliwana ha Mbimbiliya jinji

MUMU LIAKA JINA LIA ZAMBI LILI LILEMU?

Jina lino lili lilemu chinji kuli Zambi mwene. Kukushi niumwe yoze wahanyine jina lino kuli Zambi; iye mwene mwe walisakwile. Yehova kanambe ngwenyi: “Lino lie jina liami, ndo ku miaka ya mutolo. Ni chino muchipwa chiwulwiso chami ndusu yisemuko yeswe.” (Kutuhuka 3:15) Mu Mbimbiliya, jina lia Zambi linasolokamo yisuho yinji kuhiana yisanyiko yenyi yikwo, ngwe Mukwa-Ndundo-Jeswe, Tata, Mwene, hanji Zambi, nawa kuhiana majina ja atu ngwe, Apalahama, Mose, Ndawichi, hanji Yesu. Chikwo nawa, Yehova kanazange hanga atu anyingike jina lienyi. Mbimbiliya yinambe ngwo: “Akanyingike ngwo, yena wika uli ni jina lia Yehova, uli mwe Chitunda Helu lia hashi heswe.”—Samu 83:18.

Jina lia Yehova lili lilemu chinji kuli Yesu. Mu yilemba yize akuvuluka ngwo, Yilemba ya Tata yetu hanji ya Mwene wetu, Yesu kalongesele tumbaji jenyi hanga alembe kuli Zambi ni maliji wano: “Jina lienu lipwe lisandu.” (Mateu 6:9) Yesu mwene kalembele kuli Zambi ngwenyi: “Tata, chichimieka jina lie.” (Yoano 12:28) Kuchichimieka jina lia Zambi chapwile chuma chilemu chinji ku mwono wa Yesu, nawa chikuma chino che chamutwalile kulemba ngwenyi: “Naanyingikishine jina lie, mungukaanyingikisalio.”—Yoano 17:26.

Jina lino lili lilemu chinji kuli waze ananyingika Zambi. Ku mashimbu akunyima, atu ja Zambi te kananyingika ngwo, ufunge ni ulamwino wo te unatale ha jina lia Zambi. “Jina lia Yehova liapwa kaposhi mukolo; mukwa ululi machinyinamo mba mamufungila mwilu.” (Yishima 18:10) “Mweswe masanyika ha jina lia Yehova kumakamupulula.” (Joele 2:32) Mbimbiliya yinasolola ngwo, jina lia Zambi te lie mulisolola waze akumulingila. “Mumu mavungu kakwenda vungu lieswe mu jina lia zambi yalio, alioze yetu mutwenda mu jina lia Yehova Zambi yetu ku miaka yeswe ya mutolo.”—Mika 4:5; Yilinga 15:14.

YIZE JINA LINO LINASOLOLA

Jina lino linasolola utu wa Zambi. Akwa-kulilongesa amwe kakwamba ngwo, jina Yehova linalumbunuka ngwo “Iye Kakulinga Yeswe Yize Yili mu Manyonga Jenyi.” Yehova Zambi kahanyine ulumbunwiso wa jina lienyi, muze iye ahanjikile ni Mose hakutwala kuli iye mwene ngwenyi: “Nguli Chize Nguli.” (Kutuhuka 3:14) Jina lia Zambi linasolola yuma yinji, hi wika ko kupwa Sakatanga yoze watangile yuma yeswe. Jina lino linasolola uhashi uze iye ali nawo wa kulinga yuma yeswe yize mazanga ha yitangiwa yenyi, ni kupwa yize anazange hanga amanunune upale wenyi. Chipwe ngwe yisanyiko yimwe yinasolola chiteli cha Zambi, chiyulo, hanji ndundo jenyi, alioze jina lienyi Yehova, lie wika linasolola chize iye apwa, ni yize iye mahasa kupwa.

Jina lia Zambi linasolola zango lienyi hali yetu. Jina lia Zambi linasolola ngwo, iye kakuzanga yitangiwa yenyi yeswe, hamwe ni yetu. Chikwo nawa, amu Zambi anazange hanga tunyingike jina lienyi, chino chinasolola ngwo, iye kanazange hanga tumunyingike. Mumu iye hanakwate chiyulo cha kutulweza jina lienyi, chipwe ngwe kutwakamuhulilelio. Yino yeswe yinasolola ngwo, Zambi kazangile hanga tumumone ngwe umwe zambi yoze uli kusuku ni yetu, alioze kanazange hanga tumumone ngwo, kali Mutu wamwenemwene yoze mahasa kupwa sepa lietu.—Samu 73:28.

Kuvuluka jina lia Zambi chakusolola ngwo twakumuzanga. Ngwe chakutalilaho, twakulweza mutu yoze unazange kupwa sepa lietu hanga atusanyike ha jina lietu. Kuchi mutwivwa ni mutu wacho malituna kutusanyika ha jina lietu? Ha kupalika cha mashimbu, yena mufupa kunyingika nyi mutu wacho kanazange lume kupwa sepa lie. Ni Zambi neye che anazange. Yehova kalwezele atu jina lienyi, nawa kakutukolweza hanga tulizachise. Nyi twalinga chino, mutusolola ngwetu, tunazange kukundama kuli iye. Mumu iye kakumona waze akunyonga “ha jina lienyi.”—Malakia 3:16.

Nyi tunazange kunyingika kanawa Zambi chili chilemu kunyingika jina lienyi. Alioze kutwatambile kunyingika wika jina lienyi. Twatamba nawa kunyingika Utu wenyi ni chize apwa.