Yehova Kakulemesa Tuvumbi Twenyi Waze Alikehesa

1. Kuchi Yehova akwivwa hali akwa-kulikehesa? Lumbununa.

YEHOVA kakuzanga akwa-kulikehesa. Hachino, atu waze akulikehesa ni mbunge yeswe e mahasa kupwa masepa jenyi. Chikwo nawa, kuli iye ‘akwa kulizelula kusuku akwasa chinyingi.’ (Samu 138:6) Yetweswe tunazange kuvwisa Yehova kuwaha ni kuyuka zango lienyi. Chino muchitukwasa kupwa akwa-kulikehesa.

2. Yihula yika mutukumbulula ha mutwe uno?

² Ha mutwe uno, mutukumbululaho yihula yino yitatu: (1) Kulikehesa yika chinalumbunuka? (2) Mumu liaka twatamba kupwa akwa-kulikehesa? (3) Ha mashimbu aka muchihasa kupwa chikalu kulikehesa? Ngwe chize mutumona ha mutwe uno, kulikehesa chakuvwisa Yehova kuwaha nawa chakutuyukisa.—Yishi. 27:11; Iza. 48:17.

KULIKEHESA YIKA CHINALUMBUNUKA?

3. Kulikehesa yika chinalumbunuka?

³ Mutu yoze walikehesa keshi kulimona ngwe kahiana akwo nawa keshi kulizata. Mbimbiliya yinasolola ngwo, mutu yoze walikehesa kananyingika ngwenyi, Yehova kali munene kumuhiana nawa kakulemesa akwo. Mutu yoze walikehesa kananyingika ngwo akwo kamuhiana ku yimwe.—Fwili. 2:3, 4.

4-5. Mumu liaka mutu yoze unasoloka kumeso ngwe kalikehesa kuchalumbunukine lume ngwo kalikehesa?

⁴ Atu amwe kakusoloka kumeso ngwe kalikehesa. Ayo hanji kakwivwa sonyi mumu lia chize akolele, nawa hanji kakusolola vumbi mumu lia minyachi yo. Alioze mu mbunge yo mahasa kupwa akwa-kulizata. Chipwe chocho, ha mashimbu amwe masolola chize apwa ku mbunge yo.—Luka 6:45.

⁵ Chikwo nawa, atu waze akusoloka ngwe keshi woma wa kuhanjika nawa akwamba yeswayo manyonga, kuchalumbunukine lume ngwo kakulizata. (Yoa. 1:46, 47) Chipwe chocho, atu jacho katamba kukeya hanga ahone kujikijila chinji ha uhashi wo. Hachino, chipwe waze akwivwa sonyi ni waze keshi woma wa kuhanjika, eswe katamba kusa tachi hanga apwe ni kulikehesa cha ku mbunge.

6. Kulita ni mukanda 1 A-Korindu 15:10, yika twalilongesa ha chilweza cha postolo Paulu?

⁶ Tutalenu chilweza cha postolo Paulu. Iye kamuzachishile chinji kuli Yehova ha kuputuka yikungulwila yaha mu mambonge eka ni eka. Muchihasa kupwa ngwe, iye kakalakalile chinji mu mulimo wa kwambujola kuhiana apostolo akwo a Yesu. Chipwe chocho, Paulu kakalilemesene kuhiana mandumbu jenyi. Ni kulikehesa cheswe, yamba ngwenyi: “Ami nguli mukepe wahiana eswe a kuli apostolo, chatelele akanguvuluke ngwo, postolo, mumu yami nahungumionene chikungulwila cha Zambi.” (1 Kori. 15:9) Hachino, Paulu yamba ngwenyi, usepa wenyi ni Yehova wapwile hamukunda wa chawana cha vumbi lia Zambi, hi hamukunda wa yitanga yenyi ko hanji yuma yipema yize alingile. (Tanga 1 A-Korindu 15:10.) Paulu kahanyine chilweza chipema cha kulikehesa. Muze asonekene mukanda wenyi kuli A-Korindu, iye kakalinangamishine, chipwe ngwe amwe mu chikungulwila kapwile ni kumuyenga.—2 Kori. 10:10.

7. Kuchi ndumbu yoze te anyingika chinji asolwele ngwo kali mukwa-kulikehesa? Hana chilweza.

⁷ Tuvumbi anji a Yehova kakuwana utakamiso ha sango ja ku mwono ja Ndumbu Karl Frederick Klein, yoze wapwile mu Chizavu cha Tusongo. Ha sango jenyi, Ndumbu Karl ni kulikehesa cheswe yatayiza kapinda yoze apalikile ku mwono wenyi weswe. Chakutalilaho, ha mwaka 1922, iye yambujola ku zuwo ni zuwo ha chisuho chitangu. Alioze chino chapwile chikalu kuli iye, chocho yalinga miaka yaali chakuhona kwambujola ku zuwo ni zuwo. Kulutwe, muze apwile ku Mbetele, Karl yafungila umwe ndumbu chikulikuli ku mbunge mumu lia kumwaha chiyulo. Chikwo nawa, yayiza matachi mba kulutwe yahinduka. Chipwe chocho, iye katambwile yiteli yinji mu ululikiso. Haliapwila achinyonga: chipwe ngwe ndumbu Karl te kamunyingika chinji, ni kulikehesa cheswe kakevwile sonyi ja kutayiza tupalia twenyi kumeso ja atu eswe! Kashika, mandumbu anji akwiwuluka zango lia Ndumbu Karl ni sango ja ku mwono wenyi.b

MUMU LIAKA TWATAMBA KUPWA AKWA-KULIKEHESA?

8. Kuchi 1 Petulu 5:6 unatukwase hanga tunyingike ngwetu kulikehesa chakuvwisa Yehova kuwaha?

⁸ Yetu twakusa tachi hanga tupwe akwa-kulikehesa mumu kulikehesa chakuvwisa Yehova kuwaha. Postolo Petulu kachisolwele zwalala. (Tanga 1 Petulu 5:6.) Ha kuhanjikila maliji a Petulu, umwe mukanda wetu unambe ngwo: “Kulizata chili ngwe ulembe. Yuma yize yakwiza ku kulizata kuyapwa yipi chinji. Chitanga chino, muchihasa kulingisa mutu yoze ukwete utotombo unji ahone kupwa ni ulemu kuli Zambi. Chikwo nawa, kulikehesa chakulemesa mutu kumeso ja Yehova chipwe ngwe kali mutu wangwaza. . . . Zambi makuwahisa mumu lia kulikehesa che.”c Shina kuli chuma chipema kuhiana kuvwisa Yehova kuwaha?—Yishi. 23:15.

9. Kuchi kulikehesa cha kutukwasa hanga tulikate ni akwetu?

⁹ Kuchizako kuvwisa Yehova kuwaha, kulikehesa cha kutuyukisa chinji. Kulikehesa cha kukwasa atu akwo alikate ni yetu. Mba unyingike mumu liaka, achilise mu chihela cha akwenu. (Mateu 7:12) Shina muwahilila kulikata ni mutu yoze wakulikwachilila ha nyonga lienyi chakuhona kutayiza nyonga lia akwo? Chikwo nawa, shina hi chipema ko kulikata ni mandumbu waze akusolola ‘keke, zango lia undumbu, vumbi ni kulikehesa’? (1 Petu. 3:8) Nyi twakuzanga kulikata ni atu amutapu au, ni yetu twatamba kulikehesa hanga no alikate ni yetu.

10. Kuchi kulikehesa chakutukwasa kukumba yipikalo ku mwono wetu?

¹⁰ Kulikehesa nawa chakutukwasa tukumbe yipikalo ku mwono wetu. Ha mashimbu amwe, mutuhasa kumona yuma yize tunanyongo ngwetu kuyalitele. Mwanangana Solomone yamba ngwenyi: ‘Hinamona tupinji mendela ha tuvwalu shimbu mianangana menda hashi ngwe tupinji.’ (Chilu. 10:7) Atu waze akwete utotombo unji nihindu keshi kutambula ulemu uze atela. Alioze ha mashimbu amwe, atu waze akwete utotombo ukehe e akulemesa chinji. Chipwe chocho, Solomone yamba ngwenyi, twatamba kutayiza mwono chize uli, kutwatambile kwivwa kupihia mumu lia yuma yipi yize yinalingiwa ku mwono wetu. (Chilu. 6:9) Nyi mutupwa akwa-kulikehesa, acho mututayiza yize yinalingiwa ku mwono wetu, hi yize ko twakunyonga.

HA MASHIMBU AKA MUCHIHASA KUPWA CHIKALU KULIKEHESA?

11. Yika twatamba kulinga muze matwaha chiyulo?

¹¹ Hita tangwa tukwete uhashi unji wa kusolola kulikehesa chetu. Tutalenu yimwe yilweza. Chitangu muze matwaha chiyulo. Muchilita kunyingika ngwo, mutu wacho nyi katwaha chiyulo, chinalumbunuka ngwo chuma chize twalinga kuchalitele lume. Ha mashimbu jacho, chuma chitangu hanji mutulinga chili kulituna chiyulo chacho chipwe kuyenga yoze watwaha cho. Alioze, nyi chamwenemwene twakulikehesa, mutusa tachi hanga tutayize chiyulo chize atwaha.

12. Kulita ni Yishima 27:5, 6, mumu liaka kusakwilila muze umwe matwaha chiyulo? Hana chilweza.

¹² Mukwa-kulikehesa kakusakwilila muze mamwaha chiyulo. Tutalenu chimwe chilweza: Achinyonga ngwe uli mu Zuwo lia Wanangana. Hanyima lia kuhanjika ni mandumbu anji, umwe wa kuli ayo makusanyika kutenga ni kukulweza ngwenyi: “Uli ni chimwe chuma ha mazo.” Kwamba pundu, muwivwa sonyi. Alioze, shina kuuchi kusakwilila ndumbu wacho mumu lia kukutoweza? Yena te muwivwa kuwaha nyi umwe kalianganga kukulweza ngwo uli ni chuma ha mazo! Chizechene nawa, nyi umwe ndumbu mapwa ni hamu lia kutwaha chiyulo chize te tunafupiwa, twatamba kulikehesa ni kumusakwilila. Twatamba kumona ndumbu wacho ngwe sepa lietu, hi ngwe mukwa-kole wetu ko.—Tanga Yishima 27:5, 6; Ngala. 4:16.

13. Kuchi mutuhasa kulikehesa muze akwetu matambula yiteli mu chikungulwila?

¹³ Muze akwetu matambula yiteli mu chikungulwila. Jason umwe mukulwana wa mu chikungulwila yamba ngwenyi: “Ha mashimbu amwe, muze nakumona akwetu maaha yiteli, nakulihula ngwami mumu liaka ami keshi kungwaha.” Shina hiunalivu kama ngwe ndumbu yono? Kufupa yiteli mu ululikiso wa Yehova hi chipi ko. (1 Timo. 3:1) Alioze, twatamba kufunga mbunge yetu. Nyi kutwakeyele, mutuhasa kwecha kulizata chikole mu mbunge yetu. Chakutalilaho, ndumbu umwe hanji maputuka kunyonga ngwenyi, iye wika mwe uli ni uhashi wa kulinga umwe mulimo mu chikungulwila. Hanji pwo lia umwe ndumbu manyonga ngwenyi: ‘Mukwetu-lunga kali ni uhashi unji wa kulinga mulimo uno kuhiana ndumbu nganji!’ Nyi chamwenemwene twakulikehesa, kutuchi kupwa ni spiritu yino ya kulizata.

14. Yika twalilongesa ha chilweza cha Mose muze anakalianyina chiteli chenyi ni akwo?

¹⁴ Mutuhasa kulilongesa yuma yinji ha chilweza cha Mose. Mose te kakulemesa chinji chiteli chenyi cha kusongwela vungu lia Izalele. Mba kuchi Mose evwile muze Yehova asakwile malunga akwo hanga akalakale hamwe nenyi? Iye kakevwile chipululu. (Kwa. 11:24-29) Iye nawa kalikehesele muze anakalianyina ni akwo chiteli chize apwile nacho cha kupatwila atu. (Kutuhu. 18:13-24) Mose kakalemesene chinji chiteli chenyi kuhiana atu. Iye kanyingikine ngwenyi, kukalakala hamwe ni akwo ha kupatwila A-Izalele, muchikwasa mulimo wende kanawa. Chino chili chilweza chipema chize twatamba kwimbulula. Tunyingikenu ngwetu, nyi tunazange hanga Yehova atuzachise kutwatambile kulemesa utotombo wetu, alioze twatamba kulikehesa. Twiwulukenu ngwetu, chipwe ngwe “Yehova kanangama hindu kakutala hali akwa kulikehesa.”—Samu 138:6.

15. Yika yalumukine ku mwono wa mandumbu anji?

¹⁵ Muze yimwe muyalumuka ku mwono wetu. Ha miaka yapalika, mandumbu anji waze te halinga miaka yinji ha milimo yo, kaehele milimo yeka. Chakutalilaho, ha mwaka 2014, tulayi a mambonge ni mapwo jo kechele mulimo wacho, yaaha mulimo ukwo wa shimbu lieswe. Kukatuka ha mwaka wacho, ululikiso yiwamba ngwo tulayi a mbonge nyi makumbanyisa miaka 70 mecha mulimo wacho. Nawa ngwo, mandumbu waze ali tusongo a yizavu ya makulwana nyi makumbanyisa miaka 80 no mecha mulimo wacho. Chikwo nawa, ma Mbetelita anji kaachijile ha milimo yo yaatuma ngwe mapionelu. Mandumbu akwo waze apwile mu mulimo wa shimbu lieswe, kechele mulimo wacho hamukunda wa misongo, yiteli mu usoko ni yikuma yikwo nawa.

16. Kuchi mandumbu jetu akusolola kulikehesa muze yimwe yakwalumuka ku mwono wo?

¹⁶ Anji a kuli mandumbu jacho, kuchakapwile chashi kwijilila ha yize yalumukine ku mwono wo. O te hanalingi miaka yinji ha milimo yacho, nawa te kakuyizanga chinji. Muze atambwile yiteli yaha, ha mashimbu jacho amwe kevwile ngwe “kafwisa.” Alioze, hakupalika cha mashimbu o yejilila ni yiteli yo yaha. Mumu liaka? Mumu mandumbu jacho kakuzanga chinji Yehova kuhiana. Ayo kananyingika ngwo, kalihanyine kuli Yehova hi ku umwe mulimo ko hanji chiteli. (Kolo. 3:23) Kakuwahilila kununga ni kuwayila Yehova ni kulikehesa cheswe, chipwe ngwe maaha mulimo weswawo. O kakukunjika yipikalo yo yeswe kuli Yehova, mumu kananyingika ngwo iye kakwafunga.—1 Petu. 5:6, 7.

17. Mumu liaka chili chipema kukaula chiyulo cha Mbimbiliya cha kulikehesa?

¹⁷ Twakusakwilila chinji ha kunyingika ngwetu, Mbimbiliya ya kutukolweza hanga tupwe akwa-kulikehesa. Nyi twapwa akwa-kulikehesa, chino muchitukwasa nawa muchikwasa akwetu. Mutuhasa kukumba yipikalo ku mwono wetu. Chahiana ulemu, mutukundama kuli Tata yetu wa mu malilu, Yehova. Cho kuwaha ha kunyingika ngwo, Yehova chipwe ngwe kali “Chitunda Mukwa kunangama,” nihindu kakuzanga ni kulemesa tuvumbi twenyi waze alikehesa!—Iza. 57:15.