Umwenemwene Hakutwala ku Wanangana wa Zambi
Yesu kalongesele tumbaji twenyi hanga alembe ngwo: “Tata nuli mu malilu, jina lienu lipwe lisandu. Wanangana wenu wize. Upale wenu ulingiwe hashi chizechene ngwe unalingiwa mwilu.” (Mateu 6:9, 10) Wanangana wa Zambi yika? Yika wanangana uno muukalinga? Mumu liaka twatamba kwita mu yilemba yetu hanga wize?
Yesu kali Mwanangana wa mu Wanangana wa Zambi.
Luka 1:31-33: “Mukamuluka jina lienyi, Yesu. Iye kumakapwa munene, makamuvuluka ngwo, Mwana wa Mwe Chitunda; Mwene Zambi kumakamwaha nguja ya tato Ndawichi; iye kumakayula akwa zuwo lia Yakomba ndo ku miaka ya mutolo; wanangana wenyi kuuchi kahwa.”
Chuma chilemu chinji chize Yesu alongesele chapwile sango lipema lia Wanangana.
Mateu 9:35: “Yesu yaya ni kujingajinga ku membo eswe, ni ku yihunda yeswe, nikulongesa mu masunangonga jo, nikwambujola sango lipema lia wanangana, nikuwuka misongo yeswe ni weji weswe mukachi ka atu.”
Yesu kahanyine chilayi kuli tumbaji twenyi hanga chakwase kunyingika kwiza cha Wanangana.
Mateu 24:7: “Mumu akwa vungu limwe makakatukila akwa vungu likwo, ni akwa wanangana umwe makakatukila akwa wanangana ukwo; kumukukapwa tupunga ni yilungo ni minyiko kweka ni kweka.”
Musono tumbaji twa Yesu kanambujola sango ja Wanangana hashi heswe.
Mateu 24:14: “Sango lino lipema lia wanangana kumakaliambujola mu yifuchi yeswe ya hashi mukukapwa shindakenyo ku mavungu eswe, mba hohene songo kumulikeza.”