MWONO WA AKWA-KRISTU

Tupwenu ni Yitanga Yisandu Ngwe ya Yehova

Yehova Zambi kahanyine kuli atu shimbi hakutwala ku yitanga yipi ni yipema. Chakutalilaho, iye kambile ngwenyi, umbachiso watamba kupwa wika wa pwo ni lunga. (Mateu 19:4-6, 9) Yehova kakuvwila lwaji mutapu weswe wa utanji. (1 Kori. 6:9, 10) Iye katwehele shimbi ja chize twatamba kuzala ni kulilulieka, shimbi jacho jakuhandununa atu jenyi ni akwa-mavungu.—Shimbi 22:5; 1 Timo. 2:9, 10.

Musono, atu anji keshi kutayiza shimbi ja Yehova. (Roma 1:18-32) Ayo kakukaula yitanga ya hano hashi hakutwala ku chize atamba kuzala ni kulilulieka, nawa ni kutwama cho. Anji kakulemesa yitanga yo yipi ni kukekuna atu waze akwete yitanga yipema.—1 Petu. 4:3, 4.

Yetu Yela ja Yehova, ni hamu lieswe twatamba kusa tachi hanga tukaule shimbi ya Zambi ya kupwa ni yitanga yisandu. (Roma 12:9) Kuchi mutuhasa kuchilinga? Mutuhasa kuchilinga ha kufupa kunyingika yize Zambi akutayiza. Twatamba nawa kupwa ni yitanga yipema ku mwono wetu. Chakutalilaho, ha kusakula mazalo jetu hanji kulilulieka, mutuhasa kulihula ngwetu: ‘Shina yuma yize nasakula yinalite ni shimbi ja Yehova nyi ja hano hashi? Shina mazalo jami ni kuliluliela chami chakungusolola ngwo nguli mukwa-Kristu? Nyi tunazange kutala chimwe chinema mutuhasa kulihula ngwetu: Shina Yehova kakutayiza chinema chino? Yitanga yika chinema chino yinasolola? Shina kusakula chami cha yiheho muchihasa kupihisa yitanga yami? (Samu 101:3) Shina chino muchihasa kutalingisa usoko wami hanji atu akwo?’—1 Kori. 10:31-33.

Mumu liaka chili chilemu kukaula shimbi ja Yehova? Kwasala hakehe hanga Yesu anongese atu eswe waze akulinga yuma yipi nawa hanga ahwise lamba lieswe. (Eze. 9:4-7) Alioze, makapulwila waze akulinga upale wa Zambi. (1Yo 2:15-17) Kashika, tunungenu ni kukaula shimbi ja Yehova hanga waze mamona ndako yetu yipema ni no ahalise Zambi yetu.—1 Petu. 2:11, 12.

Yika munguhasa kulinga nyi mazalo ni kulilulieka chami kuchishi kulita ni shimbi jisandu ja Zambi?

TALA CHINEMA CHAKWAMBA NGWO, PWAKO SEPA LIA YEHOVA—LUNGA UMUWIKA NI PWO UMUWIKA, MBA UKUMBULULE YIHULA YINO:

Mumu liaka chili chipema kutwama kulita ni shimbi ja Yehova?
Mumu liaka yisemi atamba kulongesa ana jo shimbi jisandu ja Yehova muze achili twanuke?
Kuchi akweze ni tushinakaji mahasa kukwasa atu hanga ni no ayuke ha upeme wa Zambi?