Mutuhasa Kuzuka Yiwape ya Mutolo ya Sakatanga Wetu

Zambi kalakenyene kuli profeta Apalahama ngwenyi, umwe wa ku munyachi wenyi te maneha yiwape hali “mavungu eswe a hashi.” (Uputukilo 22:18) Mutu wacho iya?

Hakupalika cha miaka 2,000, Zambi yahana ndundo kuli Yesu hanga alinge yikomokeso yinji muze apwile hano hashi. Yesu kapwile wa ku munyachi wa Apalahama, hachino, yikomokeso yize Yesu alingile yasolwele pundu ngwo, chilakenyo cha Zambi chize alingile ni Apalahama cha kuwahisa mavungu te muchimanunuka kupalikila muli Yesu.—A-Ngalashia 3:14.

Atu waze amwene yikomokeso ya Yesu, kapwile ni shindakenyo ngwo, kali wakusakula kuli Zambi hanga awahise atu. Yikomokeso yacho yinasolola nawa yize Yesu makalinga hanga amanunune yilakenyo ya Zambi. Mutumona chize yikomokeso ya Yesu yasolwele yitanga yipema yize apwile nayo.

Keke—Yesu yawuka mieji.

Tangwa limwe umwe mukwa-mbumba yeta kuli Yesu hanga amuwuke. Yesu yamukwata ni kumwamba ngwenyi: “Ngunapale. Hazehene mbumba yiyihwa.”—Marku 1:40-42.

Chihanyi—Yesu yalisa mbunga.

Yesu kakazangile hanga atu atwame ni zala. Chocho ha yisuho yaali, iye yalinga yikomokeso yakwokesa mbolo ni yishi hanga alise tununu a tununu twa atu. (Mateu 14:17-21; 15:32-38) Hanyima lia kulia, eswe yakuta nawa yikusala kulia chikwo.

Kenda—Yesu yahindwisa afu.

Yesu kanakevwila keke umwe tuliwa yoze wasalile ukawenyi muze mwanenyi wa wika afwile, chocho Yesu yahindwisa mwana wacho.—Luka 7:12-15.