Kuzanga Zambi ni Mwenyembo—Chize Mutuhasa Kuchilinga

Chipwe ngwe akwa-Kristu keshi kwashinjila kukaula Shimbi ja Mose, nihindu shimbi jaali jinene ja—kuzanga Zambi ni kuzanga enyembo jetu—jakusolola yize Yehova anazange hali yetu. (Mat 22:37-39) Zango liacho kulichi kwiza liene chipwe kulihinga. Twatamba kusa tachi hanga tupwe nalio. Kuchi mutuhasa kuchilinga? Jila yimwe yilemu yili kutanga Mbimbiliya matangwa eswe. Nyi twahengola yuma yinji ya utu wa Zambi ngwe chize anausolola mu Yisoneko, mutumona “upeme wa Yehova.” (Sam 27:4) Nyi twalinga chino, zango lietu hali iye mulioka nawa mutupwa ni manyonga ngwe a iye. Chino muchitukolweza kukaula shimbi ja Zambi, hamwe ni shimbi yakusolwela akwetu zango. (Yo 13:34, 35; 1Yo 5:3) Tutalenu yikuma yitatu yize muyitukwasa hanga tuwahilile ha kutanga Mbimbiliya:

• Nyonga ha yize unatange, nawa lihulikileho. Nyonga ngwe ni yena he uli. Yika muhasa kumona, kwivwa, kuhumbika? Kuchi atu waze apwileho evwile?

  

• Tanga Mbimbiliya mu majila alisa. Tala chize muhasa kukaula majila jacho: Tanga ni liji mwilu, chipwe kukaula maliji akukopa mu chisaji. Nawa muhasa kutanga hakutwala kuli atu waze anatongola mu Mbimbiliya hanji yikuma shimbu ukaule kapitulu ni kapitulu. Chakutalilaho, muhasa kuzachisa Apêndice A7 hanji B12 ha Tradução do Novo Mundo hanga utange hakutwala kuli Yesu. Tanga kapitulu mweswe yoze anatongola ha chisoneko cha tangwa. Tanga Mbimbiliya kulita ni chize ayisonekene.

  

• Nyingika kanawa yize unatange. Kutanga chipwe kapitulu umuwika ha hita tangwa ni ushindakenyo weswe hamwe ni kupukuna ha yize unatange chili chipema kuhiana kutanga tupitulu anji hanga uhwise kutanga Mbimbiliya. Hengwola chize amululieka. Mutale mu yimako-yimako. Zachisa mapa ni referências marginais. Hengwola yikuma yize kuso kunyingika kanawa. Nyi muchilita zachisa mashimbu wowene hanga upukune ha yize unatange.