“Paulu Yasakwila Kuli Zambi Nawa Yajikiza mu Mbunge”

Muze chikungulwila cha ku Roma chevwile ngwo, Paulu te kaneza, amwe mandumbu yenda wenyi wa 64 a tando hanga aye ni kumupatwiza. Kuchi Paulu evwile ha zango lize mandumbu wano asolwele? “Muze Paulu waamwene, yasakwila kuli Zambi, yajikiza mu mbunge.” (Yi 28:15) Chipwe ngwe Paulu mwe wapwile ni kutakamisa yikungulwila, alioze ha mashimbu waze te ali mu zuwo lia ususu mandumbu kamutakamishine chinji.—2Ko 13:10.

Musono tulayi a mbonge kakuya mu yikungulwila yinji hanga atakamise mandumbu. Ngwe tuvumbi eswe a Zambi, no kakupwa ni yipikalo ngwe, kuhonga, kuzakalala, ni kulema mu mbunge. Tangwa lize kalayi wa mbonge ni mukwo-pwo meza mu chikungulwila chenu, yika mulinga hanga watakamise, ni ‘kuliwahisa hamuwika’?—Ro 1:11, 12.

• 

  Kukwasa ha kukunguluka cha kuya mu munda. Muze mandumbu akulikolweza hanga aye ni kwambujola ha poso yalipwila mu chikungulwila cho, chino chakutakamisa kalayi wa mbonge. (1Te 1:2, 3; 2:20) Muhasa kukalakala ngwe pionelu wa shimbu likehe ha kakweji yoze manumeneka. Yena muhasa kulihana hanga ukalakale ni kalayi wa mbonge hamwe ni mukwo-pwo mu munda hanji muze unayi kusongwela longeso lia Mbimbiliya. Ayo kakuzanga kukalakala ni mandumbu alisa, ngwe akwa-kwambujola aha ni waze kanda achinyingika kwambujola kanawa.

• 

  Kuzumbula ngeji. Yena muhasa kumutambula ku zuwo lie hanji kumwaha kulia? Nyi mutwazumbula, mutusolola ngwetu, twakwazanga. Ayo keshi kushimbwila yuma yinji.—Lu 10:38-42.

• 

  Apanjike nawa kaula usongwelo ni yiyulo yo. Tulayi a mbonge, ni zango lieswe kakutukwasa hanga tumone chize mutuhasa kulilulieka kanawa mu mulimo wa Yehova. Ha mashimbu amwe, ayo mahasa kukwaha chiyulo chikalu. (1Ko 5:1-5) Ayo kakwivwa kuwaha muze twakwononokena ni kukaula usongwelo wo.—Hep 13:17.

• 

  Asakwilile. Lweza kalayi wa mbonge ni mukwo-pwo chize wakuyuka ha tachi jize ayo akulinga. Muhasa kuchilinga hakuhanjika no, chipwe ha kwasonekena mukanda.—Kol 3:15.