MWONO WA AKWA-KRISTU

**Zachisa Mukanda, Wahilila ku Mwono ku Miaka Yeswe! mu Munda**

Tunawahilila chinji ha kupwa ni mikanda yaha yakusongwela nayo malongeso a Mbimbiliya! Tunalembe kuli Yehova hanga awahise tachi jetu ja kutayisa tumbaji anji. (Mat 28:18-20; 1Ko 3:6-9) Kuchi mutuhasa kuzachisa yikwata yino yaha?

Mukanda Wahilila ku Mwono ku Miaka Yeswe!, unasolola jila yaha ya kusongwelamo malongeso a Mbimbiliya, kaula usongwelo uno muze unalilulieka hanga usongwele malongeso a Mbimbiliya.a

Tanga malongeso ni kushimutwina yihula
Tanga yisoneko yili ni yilayi ngwo “tanga,” nawa kwasa longi anyingike chize mahasa kuyikaula
Solola yinema ni kuyishimutwina, nawa hula yihula yize yili ha mukanda
Hwisa hita longeso ha tangwa limuwika

Muze uli mu munda, chitangu hana kamukanda kuli mutu hanga unyingike nyi kanazange kulilongesa. (Tala mushete, “Chize Muhana Kamukanda Wahilila ku Mwono ku Miaka Yeswe! ha Kulitakana Chitangu.”) Muze muhwisa kulilongesa ni longi kamukanda, nyi mazanga kununga, mwehe mukanda hanga ununge ni kulilongesa nenyi ha longeso 04. Nyi wakulilongesa ni longi mukanda Yika Mbimbiliya Muyihasa Kutulongesa? hanji mukanda Nunga mu Zango lia Zambi, muhasa kuputuka kulilongesa nenyi mukanda Wahilila ku Mwono ku Miaka Yeswe! ni kumusolwela haze munuputukila.

Mandumbu jacho kanazachisa mukanda “Wahilila ku Mwono ku Miaka Yeswe!” hanga asongwele longeso lia Mbimbiliya kuli lunga wacho ku zuwo lienyi.

SOLOLA CHINEMA, TUNAKUTAMBWISA HA LONGESO LIE LIA MBIMBILIYA, MBA NUKUMBULULE YIHULA YINO:

Yika alongi malilongesa ha mukanda uno waha?
Mumu liaka watamba kusolola chinema chino kuli alongi aha?
Yika muhasa kukolweza longi hanga anunge ni kulinga?—Tala yikuma yinambe ngwo, “Lihulikile ha Ulemu wa Hita Longeso ni Yize Mulinga”

a UTOWEZO: Chipwe ngwe chili kuli yena mwene nyi mushindakenya ha yikuma yinambe ngwo, “Hengwola Nawa” muze unalilongesa ni longi, nihindu ha kulilulieka sako mashimbu hanga utale yinema hanji kutanga mikanda yize yiliho. Chino muchikukwasa ulumbunune kanawa ni kukwasa longi ye. Mukanda uze mutuzachisa ha telefone ni ha tablet muupwa ni link ya yinema ni mikanda yikwo.

LIHULIKILE HA ULEMU WA HITA LONGESO NI YIZE MULINGA
	MALONGESO	LIHULIKILE HA ULEMU WA LONGESO	YIZE LONGI MALINGA
1	01-12	Tala chize Mbimbiliya muyihasa kukukwasa ni chize muhasa kunyingika Mwenyayo	Kolweza longi ye hanga atange Mbimbiliya, alulieke longeso lienyi, ni kukunguluka
2	13-33	Tala yize Zambi alingile hali yetu ni uwayilo uze akutayiza	Kolweza longi hanga ahanjike ni akwo hakutwala ku umwenemwene ni kupwa mukwa-kwambujola
3	34-47	Nyonga ha yize Zambi anazange hanga tuvumbi twenyi alinge	Kolweza longi ye hanga alihane kuli Yehova ni kumupapachisa
4	48-60	Nyingika chize mununga mu zango lia Zambi	Longesa longi ye chize mahasa kunyingika chipi ni chipema, ni kukola ku ufulielo