Pwako Pionelu

Twakuzachisa ni mana tachi jetu, muze twakulihulikila ku yuma ya ku ufulielo. (1Ko 9:26) Kutesa yize mutulinga ku ufulielo, muchitukwasa hanga tuzachise kanawa mashimbu akehe waze asalako, shimbu songo lia chifuchi chino chipi kanda lichiza. (Efw 5:15, 16) Mu uwayilo wenu wa mu usoko, shina munuhasa kulitesa yize munulinga ku ufulielo ha mwaka wa milimo uze muwizaho? Chikuma chili ha mukanda uno wa kuzachisa ha kukunguluka muchikukwasa kunyingika yize muhasa kwita mu yilemba ni kuyilinga.—Tia 1:5.

Chakutalilaho, nyi eswe mu usoko malitesa, shina umwe wa kuli ayo mahasa kupwa pionelu wa shimbu lieswe? Nyi kuushi ni shindakenyo hakutwala ku chize muhasa kukumbanyisa maola waze akwita, hanjika ni mapionelu waze anapalika mu kapinda wacho. (Yis 15:22) Chikwo nawa, muhasa kwihujola umwe pionelu muze nunalinga uwayilo wenu wa mu usoko. Nyi muchilita, linga umwe katalilo yoze makukwasa. Nyi hiunakalakala ngwe pionelu ku mashimbu akunyima, tala nyi uli ni mashimbu hanga ukalakale nawa cheka.

Shina mu usoko wenu muli umwe mutu yoze mahasa kukalakala ngwe pionelu wa shimbu likehe ha kakweji umuwika hanji tukweji anji? Nyi kuushi ni tachi jinji, muhasa kupwa pionelu wa shimbu likehe ha kukalakala hakehe hita tangwa mu mulimo wa kwambujola. Nyi kuushi ni mashimbu anji, mumu wakukalakala poso yeswe ku mulimo we hanji unalilongesa ku shikola, muhasa kusakula kakweji yoze uli ni matangwa akunanga hanji uli ni poso jitano. Soneka ha katalilo we shimbu lize muputuka kukalakala ngwe pionelu wa shimbu likehe ni chize mukalakala.—Yis 21:5.

SOLOLA CHINEMA, PWENU AKWA-HAMU . . . PIONELU, MBA NUKUMBULULE CHIHULA CHINO:

• Yika chilweza cha pangi Aamand chinatulongesa hakutwala ku zango lia Yehova ni chize akufunga waze akulihana mu mulimo wa pionelu?