Kuchi Muhasa Kulemba mba Zambi Akwivwe?

LEMBA KULI YEHOVA ZAMBI MU JINA LIA YESU

“Cheswacho munwita kuli Tata mu jina liami, kumakanwahacho.”—Yoano 16:23.

Maliji wano a Yesu kanasolola ngwo, Yehova kanazange hanga tulembe kuli iye, kazangile hanga tumulembe kupalikila muli tuponya, asandu, angelo hanji tulamba twetu waze hanafu, alioze mu jina lia Yesu Kristu. Muze twakulemba kuli Zambi mu jina lia Yesu, twakusolola ngwetu, tunalemesa yize Yesu alingile hali yetu. Yesu kambile ngwenyi, “Niumwe meza kuli Tata shina ni yami.”—Yoano 14:6.

LEMBA NI MBUNGE YESWE

“Zukwilenu mbunge jenu kumeso jenyi.”—Samu 62:8.

Muze tunalembe kuli Yehova, tuhanjikenu nenyi ngwe tata ya Zango. Shimbu tufunyine-funyine maliji, hanji tutange yilemba mu mukanda, twatamba kuhanjika nenyi ni vumbi ni mbunge yeswe.

LEMBA KULITA NI UPALE WA ZAMBI

“Nyi kachi mutwita chuma chimwe cha kulita ni upale wenyi, aye matwivwa.”—1 Yoano 5:14.

Yehova Zambi kakutulweza yize makatulingila ni yize anazange hanga tumulingile kupalikila mu Mbimbiliya. Mba Zambi atayize yilemba yetu, twatamba kulemba kulita ni “upale wenyi.” Mba tulinge chino, twatamba kulilongesa Mbimbiliya hanga tumunyingike kanawa. Nyi twalinga chino, Zambi mevwa yilemba yetu.

MUMU LIAKA TWATAMBA KULEMBA?

Lemba Hanga Wite Yize Unafupiwa. Mutuhasa kulemba kuli Zambi hanga twite yuma yize tunafupiwa, ngwe, kulia, mazalo ni zuwo. Mutuhasa nawa kumwita atwehe mana tukwate yiyulo yipema ni kutwaha tachi hanga tunyongonone mu yipikalo. Mutuhasa kwita nawa ufulielo, ukonekeno ni ukwaso kuli Zambi.—Luka 11:3, 4, 13; Tiangu 1:5, 17.

Lembelako Akwenu. Yisemi a zango kakuwahilila muze ana jo akulizanga. Yehova neye kanazange hanga ana jenyi waze atwama hano hashi alizange umwe ni mukwo. Chili chipema kulembela yoze twalimbata nenyi, asoko, ana ni masepa jetu. Tiangu kasonekene ngwenyi, ‘lilembelenu umwe ni mukwo.’—Tiangu 5:16.

Pwako ni Kusakwilila. Mbimbiliya yinambe hakutwala kuli Sakatanga yetu ngwo: “Walingile yipema, wanuhele vula wa mwilu ni tukweji a kwima mihuko, nikuzalisa mbunge jenu ni kulia ni chiseke.” (Yilinga 14:17) Nyi mutunyonga ha yeswe yize Zambi hanatulingila, muchitukwasa hanga tumusakwilile mu yilemba. Kwamba pundu, mutuhasa kusolola nawa ngwetu twakusakwilila Zambi ha kumwononokena.—A-Kolosu 3:15.

PWAKO CHIHUMIKIJI NAWA NUNGA NI KULEMBA

Ha mashimbu amwe, twakunenganyana nyi Zambi kakumbulwile kawashi yilemba yetu. Shina mutuhasa kunyonga ngwetu, Zambi keshi kulihulumba hali yetu? Kwamba pundu, ka! Tutalenu yimwe yilweza yize yinasolola ngwo, twatamba kununga ni kulemba.

Steve Yoze twatongolanga ha mutwe utangu yamba ngwenyi: “Nyi chakanungine ni kulemba, kachi natokesele uwahililo wami.” Mba yika yamukwashile? Muze aputukile kulilongesa Mbimbiliya, yamona ulemu wa kununga ni kulemba. Iye yamba nawa ngwenyi, “Nakulemba kuli Zambi ni kusakwilila ha ukwaso weswe uze anguhele kuli masepa jami. Haliapwila ngunawahilila chinji ku mwono wami.”

Mba yika mutwamba hali Jenny, yoze wambile ngwenyi Zambi keshi kwivwa yilemba yenyi hamukunda wa yuma yipi yize alingile? Iye yamba ngwenyi: “Yinguliumba kuli Zambi hanga angukwase kunyingika mumu liaka nakulivwa ngwe kuchishi ni ulemu.” Kuchi chino chamukwashile? Iye yamba ngwenyi: “Kulemba changukwashile ngulimone ngwe chize Zambi akungumona. Changukwashile nawa ngunyongonone.” Mba yika ayukile? Yawezela nawa ngwenyi: “Kulemba changukwashile kunyingika ngwami, Zambi kwali, kali mukwa-zango kanda sepa liami, yoze mapwa hamwe ni yami mashimbu eswe, ni kungukwasa nyi mungununga ni kumwononokena.”

Tutalenu nawa chilweza cha Isabel. Muze akile ufumba, mandotolo yamulweza ngwo, mwanenyi te masemuka chitonji. Kevwile yinyengo yinji. Atu amwe yamulweza hanga achize ufumba wacho. Iye yamba ngwenyi: “Nevwile yikola yinji ku mbunge.” Mba yika alingile? Yamba ngwenyi: “Yingulemba chinji kuli Zambi hanga angukwase.” Ha kupalika cha matangwa yasema mwana wa lunga, yamwaha jina lia Gerard, mwana wacho yasemuka lume chitonji. Shina Isabel kamwene chize Zambi akumbulwile yilemba yenyi? Ewa! Mu mulali uka? Iye yamba nawa ngwenyi: “Muze nakumona mwanami yoze uli ni miaka 14 mawahilila ku mwono wenyi chipwe ngwe kali chitonji, nakumona ngwami, iye kali kumbululo lia yilemba yami nawa kali chiwape chize Yehova Zambi anguhele.”

Yilweza yino yinatukwase tunyonge ha yize mukwa kwimba Masamu asonekene ngwenyi: “Yehova yena hiwevwa chize yimbovu akuzanga, hiwajikijisa mbunge jo. Hiwasela twitwi lie kuapanjika.” (Samu 10:17) Yikuma yino yeswe yinatukolweza hanga tununge ni kulemba!

Mu Mbimbiliya muli yilemba yinji ya Yesu. Yilemba yize twanyingika chinji, yili yize alongesele tumbaji twenyi. Yika mutuhasa kulilongesa ha yilemba yacho?