Kuchi Kulemba Muchihasa Kukukwasa?

Muze musongo ukalu wakwachile Pamela, yafupa ukwaso wa mandotolo. Chikwo nawa, yalemba kuli Zambi hanga amwehe tachi ahase kunyongonona mu kapinda wacho. Shina kulemba chamukwashile?

Iye Yamba ngwenyi: “Muze te ananguwuka musongo wa câncer, napwile ni kwivwa woma unji. Alioze muze nalembele kuli Yehova Zambi, yingulihumikiza ni kuputuka kunyonga kanawa. Nakwivwa yikola mashimbu eswe, alioze, kulemba chakungukwasa hanga ngupwe ni nyonga lialita. Muze atu akunguhula ngwo, ‘kuchi uli?’ Nakwakumbulula ngwami, chishi kanawa, alioze nguli ni uwahililo.”

Kutwatambile kushimbwila wika muze musongo ukalu muutukwata mba tulembe. Yetu eswe twakupinda ni yipikalo yeka ni yeka, kanji-kanji twakufupiwa ukwaso mba tuyikumbe. Shina kulemba muchihasa kutukwasa?

Mbimbiliya yinambe ngwo: “Mbila chiteli che hali Yehova, iye makakukolesa.” (Samu 55:22) Maliji wano, kali a utakamiso. Mba kuchi kulemba muchihasa kutukwasa? Muze mulemba kuli Zambi mu jila yalita, iye makwaha yize unafupiwa hanga ukumbe kapinda we.—Tala mushete unambe ngwo, “Chize Kulemba Muchihasa Kukukwasa.”

Chize Kulemba Muchihasa Kukukwasa

Muupwa ni sambukila ku mbunge

“Kwita chenu akachinyingike kuli Zambi. Mba sambukila ya Zambi, yize yakuhiana kunyonga cheswe, muyikafunga mbunge jenu ni kunyonga chenu muli Kristu Yesu.” (A-Fwilipu 4:6, 7) Muze mulemba kuli Zambi ni mbunge yeswe ni kumulweza yipikalo ye, iye makukwasa kulihumikiza ni kukumba kanawa yipikalo yacho.

Muupwa ni mana a kuli Zambi

“Nyi kachi umwe wa kuli yenu mahona mana, akete kuli Zambi, yoze wakuhana kuli eswe ni kuvungumuna, mba kumakamwaha-o ni kuchokana chakuhi.” (Tiangu 1:5) Nyi tunasakalala, chakupwa chikalu kukwata yiyulo yipema. Nyi mulemba hanga wite mana, Zambi mahasa kukwiwulula shimbi jipema jili mu Liji lienyi Mbimbiliya.

Muupwa ni tachi nawa mutakama

“Kunahasa kulinga yuma yeswe muli yoze wakunguhashisa.” (A-Fwilipu 4:13) Amu Yehova ali Zambi Mukwa-Ndundo-Jeswe, mahasa kukwaha tachi jize unafupiwa hanga ukumbe kapinda we hanji kukukwasa unyongonone mu yeseko. (Izaia 40:29) Mbimbiliya nawa yakuvuluka Yehova ngwo, “Zambi ya kulembejeka cheswe.” Iye mahasa kutulembejeka “mu lamba lietu lieswe.”—2 A-Korindu 1:3, 4.