Muhasa Kusakula Chize Mwono we Muukapwa Kulutwe lia Matangwa

Ha miaka 3,500 kunyima, Yehova kalwezele kuli atu waze te akumuwayila yize atamba kulinga mba apwe ni mwono upema kulutwe lia matangwa, iye yamba ngwenyi: “Hinasa kumeso jenu mwono ni kufwa, chiwape ni shingo, kashika, tongolenu mwono hanga nupwe ni mwono, ni yenu ni ana jenu.”—Shimbi Yamuchiali 30:19.

Ha mashimbu jacho, atu te katamba kukwata chiyulo chalita mba te apwe ni mwono upema. Chipwe musono ni yetu che twatamba kulinga. Mba yika twatamba kulinga hanga tupwe ni mwono upema kulutwe lia matangwa? Mbimbiliya yinambe ngwo: “Mukuzanga Yehova Zambi yenu, mukuzeya ku liji lienyi.”—Shimbi Yamuchiali 30:20.

KUCHI MUTUHASA KUZANGA YEHOVA NI KUZEYELA LIJI LIENYI?

LILONGESE MBIMBILIYA: Mba uzange Yehova, chitangu watamba kulilongesa hakutwala kuli iye kupalikila mu Mbimbiliya. Nyi walilongesa chinji Mbimbiliya mumona ngwo Yehova kali Zambi wa zango, chikwo nawa kanazange yuma yipema hali yena. Iye ‘kakukufunga’ kashika kanazange hanga ulembe kuli iye. (1 Petulu 5:7) Mbimbiliya yinalakenya ngwo, nyi wasa tachi hanga ukundame kuli Zambi ni “iye kumakakundama kuli” yena.—Tiangu 4:8.

KAULA KU MWONO WE YUMA YIZE UNALILONGESA: Musolola ngwo unapanjika Zambi ha kukaula yiyulo yenyi ya mana yize yili mu Mbimbiliya. Nyi walinga chino “muwahisa jila ye; chocho yuma ye muyiwaha.”—Yoshua 1:8.