KUCHI MUTUHASA KUKUMBA KOLE?

1 | Ehuka Katonde

Yize Mbimbiliya Yakulongesa:

“Zambi keshi katonde. Alioze mu mavungu eswe [mweswe] yoze wakumuvwila woma, wakulinga ululi, kakupemena kuli iye.”—YILINGA 10:34, 35.

Yize Chisoneko chino Chinalumbunuka:

Yehovaa Zambi keshi kupatwila atu mumu lia chifuchi cho, vungu, chikowa hanji munyachi wo. Alioze, iye kakulihulikila ha yize tuli nayo mu mbunge. Kwamba pundu, “atu kakutala ku kusoloka cha haze, alioze Yehova kakutala ku mbunge.”—1 Samuele 16:7.

Yize Muhasa Kulinga:

Kutuchi kuhasa kunyingika atu ngwe chize Zambi ananyingika, alioze mutuhasa kwimbulula Zambi ha kwehuka kusolwela akwetu katonde. Eseka kumona chize hita mutu apwa, hi ngwe chizavu ko. Nyi wamona ngwe unapu ni manyonga api hakutwala kuli akwenu, mumu lia munyachi wo hanji kuze akatukile, lemba kuli Zambi ni kumwita hanga akukwase kwehuka manyonga jacho. (Samu 139:23, 24) Nyi mulemba kuli Yehova ni kumwita hanga akukwase kwehuka katonde, muhasa kupwa ni shindakenyo ngwe iye mapanjika kulemba che ni kukukwasa.—1 Petulu 3:12.

a Yehova lili jina lia Zambi.—Samu 83:18.

“Yami te kanda nguchitwama kama kanawa ni yindele chipwe kulia ku mazuwo jo . . . Haliapwila ngunalingi chihanda cha usoko wa Yehova.”—TITUS

Sango ja ku Mwono—TITUS

Kakumbile Kole

Titus kapwile wa mu chizavu cha yingulungulu waze te akulimika ni shimbi jize te jakusolola katonde. Iye yamba ngwenyi: “Twapwile ni kuya ku yihela kuze te keshi kutayiza atu alaa, ngwe ku mazuwo akunwina walwa, hotel, hanga tunehe mbwanja.” Titus mwene yatayiza ngwenyi, iye te kakulinga yuma yacho mumu lia kole. Yamba nawa ngwenyi: “Muze te nakuzwela ni umwe mutu chipwe ngwe kali lunga hanji pwo, yami mwe te nakulianga kulamba mutu wacho.”

Titus kalumwine mwono wenyi, muze aputukile kulilongesa Mbimbiliya ni Yela ja Yehova. Muze atangile Mbimbiliya, iye yaputuka kwalumuna manyonga jenyi. Chuma chize chamukwachile chinji ku mbunge, chili chilakenyo cha kulutwe lia matangwa chinambe ngwo, “kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka.” —Usolwelo 21:3, 4.

Ku uputukilo, Titus kasele tachi jinji hanga eche kuvwila akwo kole. Iye yamba ngwenyi: “Chapwile chikalu chinji kwalumuna manyonga jami ni yuma yize te nakulinga.” Alioze kayukile chinji muze atangile mukanda wa Yilinga 10:34, 35, haze hanambe ngwo, Zambi keshi katonde.

Mba yika azukile? Mwene yamba ngwenyi: “Yingupwa ni shindakenyo ngwami, Yela ja Yehova kali mu uwayilo wamwenemwene, ayo te kakulisolwela zango lia mwenemwene chipwe ngwe kali ni chikowa chalisa nawa a ku minyachi yalisa. Chipwe muze te kanda achingupapachisa ngwe Chela cha Yehova, umwe ndumbu chindele wa muchikungulwila yangusanyika ku zuwo lienyi hanga tulie hamuwika. Tangwa liacho nakomokene chinji. Yami te kanda nguchitwama kama kanawa ni yindele chipwe kulia ku mazuwo jo. Haliapwila ngunalingi chihanda cha usoko wa Yehova.”