Tuvumbi Twa Yehova Kakuzanga Ululi

1. Mu cheseko chika Yosefwe apalikile, nawa yika iye alingile?

YOSEFWE mwana wa Yakomba, kapalikile mu chimwe cheseko chikalu. Pwo umwe yamulweza ngwenyi: “Tweya upombe ni yami.” Pwo wacho kapwile pwo lia mwata wenyi, Potifwa. Yosefwe yalituna kulinga yize amwichile kuli pwo wacho. Mutu umwe musono mahasa kulihula ngwenyi, ‘Mumu liaka Yosefwe ehukile cheseko chacho?’ Potifwa te keshi ku zuwo. Chikwo nawa, Yosefwe kapwile ndungo ku zuwo lienyi, kashika pwo wacho te mahasa kupinjisa mwono wenyi nyi malituna yize iye te anazange. Chipwe chocho, Yosefwe yalituna kulisumbakenya nenyi. Mumu liaka? Mwene yamba ngwenyi: “Kuchi munguhasa kulinga ungulungulu upwa haha nikuvulumuna Zambi?”—Uputu. 39:7-12.

2. Kuchi Yosefwe anyingikine ngwenyi kulinga utanji chili kuvulumuna Zambi?

² Kuchi Yosefwe anyingikine ngwenyi, utanji uli “ungulungulu” unene kumeso ja Zambi? Shimbi ya Mose yize yapwile ni kwamba ngwo “kanda ukalinga utanji,” kayisonekene muze te hikwapalika miaka kuhiana kulakaji aali. (Kutuhu. 20:14) Amu Yosefwe anyingikine kanawa Yehova, chino chamukwashile kunyingika chize Iye akumona yitanga ya upangala. Chakutalilaho, Yosefwe kanyingikine ngwenyi, Yehova kalingile ulo hanga mupwe wika lunga ni pwo. Iye nawa kota kevwile chize Yehova akwashile kakulwila wenyi Sara ha yisuho yaali hanga ahone kumulinga yuma yipi. Rebeka pwo lia Izake neye kapalikile mu ponde yacho, alioze Yehova yamufunga. (Uputu. 2:24; 12:14-20; 20:2-7; 26:6-11) Ha kupukuna ha yuma yacho, Yosefwe yanyingika chuma chize chapwa chipema ni chipi kumeso ja Zambi. Amu Yosefwe te akuzanga Yehova, kashika asele tachi jinji hanga alinge yize te Yehova akushimbwila hali iye.

3. Yika mutulilongesa ha mutwe uno?

³ Shina wakuzanga ululi? Kwamba pundu, wakuuzanga. Alioze yetu eswe tuli yihenge, kashika nyi kutwakeyele mutuhasa kupwa ni manyonga waze akwa-hashi ali no hakutwala ku ululi. (Iza. 5:20; Roma 12:2) Ha mutwe uno, mutulilongesaho yize ululi unalumbunuka ni yize mutuyuka nyi twauzanga. Nawa mutulilongesa yikuma yitatu yize muyitukwasa kuzanga chinji shimbi ja Yehova.

ULULI YIKA UNALUMBUNUKA?

4. Nyonga lika lipi atu anji akwete hakutwala ku ululi?

⁴ Muze atu akunyonga hali mukwa-ululi, anji kakunyonga hali mutu yoze wakulizata, wakuyenga akwo hanji yoze wakulimona ngwo kahiana akwo. Alioze, Zambi keshi kuzanga yitanga yino yipi. Muze Yesu apwile hano hashi, iye kahishile yitanga ya mangana a mayingeleja a ha matangwa jenyi ha kulisela ene shimbi jo ja ululi. (Chilu. 7:16; Luka 16:15) Mutu yoze wakulinga yize Yehova akwamba ngwenyi yalita, iye keshi kunyonga ngwo kahiana akwo.

5. Kulita ni Mbimbiliya, ululi yika unalumbunuka? Hana yilweza.

⁵ Ululi wapwa chitanga chipema chinji. Mu maliji akehe, ululi unalumbunuka kulinga yuma yize Zambi akwamba ngwenyi yalita. Mu Mbimbiliya, maliji waze akuzachisa ha “ululi” kakusolola nyonga lia kutwama kulita ni shimbi ja Yehova. Chakutalilaho, Yehova kambile kuli akwa-kulinga mingoso ngwenyi, katamba kuzachisa “pezu jinalite.” (Shimbi 25:15) Liji lia Hepreu lize alumbunwine ngwo “pezu jinalite” mulihasa kulumbunuka nawa “ululi.” Hachino, niumwe mukwa-Kristu kanazange kupwa mukwa-ululi kumeso ja Zambi, katamba kulinga mingoso yenyi ni ululi. Mutu yoze wakuzanga ululi, keshi kuzanga kumona akwo maalinga yuma ya uhenge. Mba evwise Yehova kuwaha, mutu yoze wakuzanga ululi kakunyonga ha chize Yehova mamona yiyulo yize makwata.—Kolo. 1:10.

6. Mumu liaka mutuhasa kujikijila ha shimbi ja Yehova hakutwala ku chipi ni chipema? (Izaia 55:8, 9)

⁶ Mbimbiliya yakusolola ngwo, Yehova kali Chishina cha ululi. Kashika akwamba ngwo, kuli iye ‘kwe kwatwama umwenemwene.’ (Jere. 50:7) Amu ali Sakatanga yetu, Yehova wika mwe uli ni ulite wa kutesa chipi ni chipema. Mumu lia uhenge, ha mashimbu amwe kutushi kuhasa kunyingika chipi ni chipema. Yehova kananyingika kanawa chipi ni chipema, mumu iye mungunu. (Yishi. 14:12; tanga Izaia 55:8, 9.) Alioze, amu Zambi atutangile mu chano chenyi, mutuhasa kutwama kulita ni shimbi jenyi ja ululi. (Uputu. 1:27) Yino ye twakuzanga kulinga. Kashika, zango lietu kuli Yehova liakututwala hanga tumwimbulule kulita ni uhashi wetu.—Efwe. 5:1.

7. Mumu liaka twatamba kukaula shimbi jize jalita? Lumbununa.

⁷ Twakuyuka chinji ha kukaula shimbi ja Yehova hakutwala ku chipi ni chipema. Mumu liaka tunambe chocho? Achinyonga yize te muyilingiwako, nyi hita banco muyitesa shimbi jo ene hakutwala ku ulemu wa mbongo. Nyi chino muchilingiwa, yuma kuyichi kwenda kanawa. Chikwo nawa, nyi mandotolo mahona kwononokena shimbi hakutwala ku chize atamba kuwuka, mieji amwe mahasa kufwa. Chochene, kukaula jila yalita yakulingilamo yuma chakukwasa atu ni kufunga mwono wo. Chizechene nawa, kukaula shimbi ja Zambi hakutwala ku chipi ni chipema chakutufunga.

8. Yiwape yika makayuka atu waze akuzanga kulinga yuma yalita?

⁸ Yehova kakuwahisa atu waze akusa tachi hanga atwame kulita ni shimbi jenyi. Kashika analakenya ngwenyi: “Akwa ululi kumakazuka chifuchi; kumakatwamamo ku miaka ya mutolo.” (Samu 37:29) Muhasa kunyonga chize atu eswe makapwa alinunga, ni sambukila hamwe ni uwahililo muze makatwama kulita ni shimbi ja Yehova? Yehova kanazange hanga ukapwe ni mwono wacho. Pundu lume, kuli yuma yinji yipema yize muyitutwala kuzanga ululi! Mba kuchi mutuhasa kukolesa zango lietu ha chitanga chino? Tutalenu yikuma yitatu yize mutuhasa kukaula.

KOLESA ZANGO LIE HA KUKAULA SHIMBI JA YEHOVA

9. Yika muyitukwasa kuzanga ululi?

⁹ Chikuma 1: Zanga Mwenya shimbi. Mba tuzange ululi, twatamba nawa kuzanga Mutu yoze wasele shimbi ja chipi ni chipema. Kashika nyi twazanga chinji Yehova, mutuzanga nawa kutwama kulita ni shimbi jenyi ja ululi. Tutalenu chimwe chilweza: Nyi Alama ni Eva kazangile Yehova, kachi o kakehukile shimbi yize aehele.—Uputu. 3:1-6, 16-19.

10. Yika Apalahama alingile mba anyingika kanawa kunyonga cha Yehova?

¹⁰ Kwamba umwenemwene, yetu kutwazangile kulinga uhenge ngwe uze alingile Alama ni Eva. Alioze, mba twehuke uhenge wacho, twatamba kununga ni kulilongesa hakutwala kuli Yehova, kuzanga yitanga yenyi ni kusa tachi hanga tunyingike chize akunyonga. Nyi twachilinga, mutuzanga chinji Yehova. Tutalenu chilweza cha Apalahama. Iye kazangile chinji Yehova. Kashika, chipwe muze chapwile chikalu kunyingika yiyulo ya Yehova, nihindu iye yononoka. Chikwo nawa, Apalahama kanyingikine kanawa Yehova. Chakutalilaho, muze evwile ngwo Yehova manongesa Sondome ni Ngomora, ku uputukilo Apalahama kevwile woma ngwo “Chisopa-milonga wa akwa hashi eswe” te monwona akwa-ululi hamwe ni yihenge. Kuli Apalahama, yino te kuyalitele, kashika ni kulikehesa cheswe yahula Yehova yihula yinji. Yehova yamupanjika ni uhumikizo weswe. Mba Apalahama yanyingika ngwenyi, Yehova kakuhengwola mbunge ya hita mutu, nawa ngwenyi Iye keshi konwona akwa-ululi hamwe ni yihenge.—Uputu. 18:20-32.

11. Kuchi Apalahama asolwele ngwenyi kakuzanga Yehova ni kumufuliela?

¹¹ Yuma yize Apalahama ahanjikile ni Yehova hakutwala ku kunongesa cha Sondome ni Ngomora, yamukwashile chinji. Hachino, yaputuka kuzanga chinji Yehova kuhiana kunyima. Alioze kulutwe, Apalahama yapalika mu chimwe cheseke chikalu chize chasolwele nyi te kakujikijila muli Yehova. Yehova kamwichile hanga ahane mwanenyi Izake ngwe chitapo. Alioze ha chisuho chino, Apalahama te hanyingika kanawa Yehova, kashika kuchakafupiwile nawa kumuhula. Apalahama yalinga yize Yehova amwichile. Chipwe chocho, achinyonga ha yikola yize evwile muze te analilulieka hanga alinge yize Yehova amwichile! Apalahama kota kanyongene chinji ha yize alilongesele hali Yehova. Iye kanyingikine ngwenyi, Yehova kechi kuhasa kulinga chuma cha uhenge hanji chakuhona zango. Kulita ni yize Paulu ambile, Apalahama kanyingikine ngwenyi, Yehova te kali ni uhashi wa kuhindwisa mwanenyi Izake. (Hepre. 11:17-19) Tunanyingika nawa ngwetu, Yehova kalakenyene ngwenyi Izake te mapwa tato ya limwe vungu, alioze ha shimbu liacho Izake te kanda apwa ni ana. Apalahama kazangile Yehova, kashika apwile ni kumufuliela ngwenyi malinga yuma ya ululi. Chipwe ngwe chapwile chikalu, nihindu ufulielo wenyi yiumukwasa kwononoka.—Uputu. 22:1-12.

12. Kuchi mutuhasa kwimbulula Apalahama? (Samu 73:28)

¹² Kuchi mutuhasa kwimbulula Apalahama? Ngwe Apalahama, twatamba kununga ni kulilongesa hakutwala kuli Yehova. Nyi twachilinga, mutukundama kuli iye ni kumuzanga chinji. (Tanga Samu 73:28.) Shimbi yetu ya mbunge muyipwa yakufumba hanga tunyonge ngwe Yehova. (Hepre. 5:14) Hachino, nyi umwe mutu matwita hanga tulinge chimwe chuma chize kuchalitele, mutulituna. Nawa kutuchi kulinga chuma nichimwe chize muchivwisa Yehova yikola ku mbunge ni kupihisa usepa wetu ni iye. Yika muyitukwasa kusolola nawa ngwetu twakuzanga ululi?

13. Kuchi mutuhasa kufupa ululi? (Yishima 15:9)

¹³ Chikuma 2: Sako tachi hanga uzange ululi hita tangwa. Ngwe chizechene twakusa tachi hanga tufumbe mujimba utatuke, twatamba nawa kusa tachi hanga tuzange shimbi ja ululi ja Yehova. Chino chashi kuchilinga, mumu Yehova hi mukalu ko, nawa keshi kushimbwila hanga tulinge yize kutuchi kuhasa. (Samu 103:14) Kanatulweze ngwenyi “kakuzanga mukwa kukaula ululi.” (Tanga Yishimi 15:9.) Nyi twatesa kulinga yimwe mu ululikiso wa Yehova twakununga ni kusa tachi hanga tuyilinge. Yino ye yakulingiwa nawa ha kufupa ululi. Yehova matukwasa kusenya kulutwe ni kululieka yitanga yetu ha kupalika cha mashimbu.—Samu 84:5, 7.

14. “Chikwiko cha utale cha ululi” yika, nawa mumu liaka twatamba kuchizala?

¹⁴ Yehova kanatulweze ngwenyi, kukaula shimbi jenyi ja ululi hi chikalu ko. (1 Yoa. 5:3) Mumu shimbi jenyi jakutufunga nawa twakufupiwa ufunge wacho. Shina tunewuluka mazalo a utale waze postolo Paulu alumbunwine? (Efwe. 6:14-18) Ha mazalo jacho, chihanda chika chakufunga mbunge ya swalale? Chili “chikwiko cha utale cha ululi,” chize chinalumbunuka shimbi ja ululi ja Yehova. Ngwe chizechene chikwiko cha utale chakufunga mbunge ya swalale, shimbi ja Yehova nejo jakufunga mbunge yetu hanji ngwetu, utu wetu wa muchima. Kashika, chili chilemu kusa chikwiko cha ululi ha mazalo je a utale!—Yishi. 4:23.

15. Kuchi muhasa kuzala chikwiko cha utale cha ululi?

¹⁵ Kuchi muhasa kuzala chikwiko cha utale cha ululi? Muhasa kuchilinga ha kukaula shimbi ja Zambi mu chiyulo cheswacho mukwata hita tangwa. Muze unakwate chiyulo cha yize muhanjika, miaso yize unazange kwivwa ni yinema yize unazange kutala hanji mikanda yize unazange kutanga, watamba kulihula ngwenyi: ‘Yika ngunase mu mbunge yami? Shina yuma yino muyingukwasa kupwa ni utayizo wa Yehova? Nyi hanji yinasolola yuma yize Yehova keshi kuzanga ngwe utanji, upupilo, chipululu ni kuzo?’ (Fwili. 4:8) Nyi musakula kulinga yuma yize Yehova akuzanga, mufunga mbunge ye ku yuma yipi.

16-17. Kuchi Izaia 48:18 unatwehe shindakenyo ngwetu, mutuhasa kutwama kulita ni shimbi ja Yehova ku miaka yeswe?

¹⁶ Shina wakulihulumba nyi muhasa kutwama kulita ni shimbu ja Yehova tangwa ha tangwa, mwaka ha mwaka? Tutalenu chilweza chize Yehova anazachisa ha Izaia 48:18. (Tanga.) Yehova kanatulakenya ngwenyi, ululi wetu muuhasa kupwa ngwe “mikanya ya kalunga-lwiji.” Achinyonga ngwe uli kusesa lia kalunga-lwiji unatale mikanya yinalikaula yize kuyishi kuhwa. Ha chikuma chino, shina muhasa kushimbwila ngwo limwe tangwa mikanya yacho muyimana? Ka! Mumu liaka? Mumu unanyingika ngwe, mikanya yacho yakulikaula ha miaka yinji, kuyichi kuhwa, muyinunga.

¹⁷ Ululi we muuhasa kupwa ngwe mikanya ya kalunga-lwiji! Mu mutapu uka? Nyi unazange kukwata chimwe chiyulo, chitangu watamba kupukuna ha yize Yehova anazange hanga ulinge. Hanyima, mba mukwata chiyulo chacho. Chipwe ngwe chiyulo chacho chikalu chinji, nihindu Tatenu wa zango makukwasa hanga ununge ni kukaula shimbi jenyi ja ululi hita tangwa.—Iza. 40:29-31.

18. Mumu liaka kutwatambile kupatwila akwetu kulita ni yize twakunyonga?

¹⁸ Chikuma 3: Echa Yehova atese nyi yize akwenu akulinga yalita nyi ka. Muze tunase tachi hanga tutwame kulita ni shimbi ya Yehova, twatamba kwecha kupatwila akwetu ni kwehuka ulembekese. Shimbu tupatwile akwetu kulita ni yize twakunyonga ngwo yalita, twatamba kwiwuluka ngwetu Yehova mwe “Chisopa-milonga wa akwa hashi eswe.” (Uputu. 18:25) Yehova katuhele chiteli chakupatwila akwetu. Kashika Yesu ambile ngwenyi: “Kanda nupatwila akwenu, mba o kechi kanupatwila.”—Mateu 7:1.b

19. Kuchi Yosefwe asolwele ngwenyi kakujikijila ha upatwilo wa Yehova?

¹⁹ Tutalenu nawa chilweza cha Yosefwe lunga washishika. Iye kehukile kupatwila akwo chipwe ngwe o kamulingile upi. Ayayo kamukwachile yamulanjisa mu undungo ni kwonga tato ngwo Yosefwe kafwa. Hakupalika cha miaka, Yosefwe yaliwana ni asoko jenyi. Amu apwile ni wata ha mashimbu jacho, iye te mahasa kupatwila mandumbu jenyi ni kwafunyishina upi uze amulingile. Mandumbu jenyi kevwile woma ngwo Yosefwe maalinga upi, chipwe ngwe o kalikonyekene ni mbunge yeswe ha yize alingile. Alioze Yosefwe yaalweza ngwenyi: “Kanda nwivwa woma te yami nguli mu chitwamo cha Zambi?” (Uputu. 37:18-20, 27, 28, 31-35; 50:15-21) Ni kulikehesa cheswe Yosefwe yanyingika ngwenyi, Yehova wika mwe wapwile ni ulite wa kupatwila mandumbu jenyi.

20-21. Kuchi mutuhasa kwehuka kulipwisa yetwene akwa-ululi?

²⁰ Ngwe Yosefwe, twatamba kuhichika upatwilo mu moko ja Yehova. Chakutalilaho, ha mashimbu amwe kutushi kuhasa kunyingika yize yakutwala mandumbu jetu mba alinge yuma ngwe yize alingile ayayo ja Yosefwe. Yetu kutuchi kuhasa kunyingika yize yili ku ma mbunge jo, Yehova wika mwe unayinyingika. (Yishi. 16:2) Yehova kakuzanga atu a mutapu weswe. Kashika, kanatukolweza hanga ‘tutohese mbunge jetu.’ (2 Kori. 6:13) Nyi twachilinga, mutuzanga mandumbu jetu eswe a ku ufulielo chakuhona kwapatwila.

²¹ Chino chinalumbunuka nawa ngwo, kutwatambile kupatwila atu waze hi Yela ja Yehova ko. (1 Timo. 2:3, 4) Shina muhasa kupatwila usoko we yoze hi Chela cha Yehova ko, ha kumwamba ngwe: “Au kechi keza kalilongesa umwenemwene?” Ka, mumu nyi wachilinga, acho unalizate ni kulipwisa mukwa-ululi. Yehova kananungu ni kuhana uhashi kuli “atu eswe” hanga alikonyeke. (Yili. 17:30) Twiwulukenu mashimbu eswe ngwetu, kulipwisa yetwene akwa-ululi chili chipi kumeso ja Yehova.

22. Mumu liaka twatamba kununga ni kuzanga ululi?

²² Kuzanga shimbi ja Yehova ja ululi muchihasa kutukwasa kuwahilila ni kukwasa akwetu hanga akundame kuli yetu ni kuli Zambi. Kashika, tunungenu ni kwivwa ‘usona wa ululi, ngwe zala ni pwila tunevu.’ (Mateu 5:6) Tunyingikenu ngwetu, Yehova kakumona tachi jize twakusa nawa kakuwahilila ha kutumona tunalingi yuma yalita. Muze atu hano hashi ananungu ni kulinga yize kuyishi ululi, yetu tusenu tachi hanga tulinge yuma ya ululi! Twiwulukenu ngwetu, “Yehova kakuzanga akwa ululi.”—Samu 146:8.