Nyi Wapwa Mukwa-Kushimbika Musolola Ngwe Ukwete Tachi

1. Yika muyihasa kusoloka ku mulimo wetu hanji ku shikola?

KUCHI wakwivwa nyi longi-ni-mukwenu hanji mukwa-mulimo-ni-mukwenu makuhula hakutwala ku yize wafuliela? Shina wakwivwa uli? Anji a kuli yetu che twakwivwa. Alioze yihula ya mutapu au, yakutukwasa kunyingika yize mutu wacho akunyonga ni kutwaha uhashi wa kwambujola sango jipema. Alioze ha mashimbu amwe, atu kakuhula yuma yacho mu mutapu uze kuwalitele. Yino kuyishi kutukomwesa. Atu anji kakwivwa sango ja mahuza hakutwala ku yize twafuliela. (Yili. 28:22) Chikwo nawa, tuli ha “matangwa a kusula,” haze atu anji keshi kulivwashana ni akwo; nawa “yilianyi.”—2 Timo. 3:1, 3.

2. Mumu liaka twatamba kupwa akwa-kushimbika?

² Hanji mulihula ngwe: ‘Kuchi munguhasa kulihumikiza muze umwe anazange kuzwela ha umwe lusango wa mu Mbimbiliya?’ Unanyingika yize muyihasa kukukwasa? Kushimbika muchihasa kukukwasa. Mutu yoze washimbika, keshi kulivutula ni kawashi. Alioze, kakuhasa kulihumikiza chipwe muze mamwihia chakuhona kunyingika chize makumbulula. (Yishi. 16:32) Alioze, yino yili yashi kuhanjika yikalu kulinga. Mba kuchi muhasa kupwa mutu yoze washimbika? Kuchi muhasa kukumbulula ni umbovu muze umwe mahamika ha yize wafuliela? Nyi uli chisemi wa lunga hanji wa pwo, kuchi muhasa kukwasa ana je akalile ufulielo wo ni kushimbika? Yino ye mutulilongesa ha mutwe uno.

CHIZE MUHASA KUPWA MUKWA-KUSHIMBIKA

3. Mumu liaka mutuhasa kwamba ngwetu, kushimbika chili kusolola tachi hi kuhona tachi ko? (2 Timoteu 2:24, 25)

³ Kupwa mukwa-kushimbika kuchalumbunukine kuhona tachi. Kushimbika chili chitanga cha atu waze akwete tachi. Tunafupiwa kusolola tachi, mba tuhwime mbunge muze tunapalika mu umwe ukalu. Kushimbika chili chihanda cha “muhuko wa spiritu.” (Ngala. 5:22, 23) Liji lia Ngregu lize akulumbununa ngwo “kushimbika,” kapwile ni kulizachisa hali tuvwalu a muyambu waze te akukwata ni kwapita. Hanyima lia kwapita, tuvwalu jacho te keshi kuneha mbwanja, alioze te kakununga ni tachi jo. Mba yika mutwamba hali yetu? Kuchi mutuhasa kusolola chitanga chino, aku nawa tuli ni tachi? Kutwatambile kuchilinga ukawetu, twatamba kulemba ha kwita spiritu ya Zambi ni ukwaso wenyi mba tupwe ni chitanga chino chipema. Kuli yilweza yinji yize yinasolola ngwo, chili chashi kulilongesa kupwa akwa-kushimbika. Mandumbu jetu anji, kalihumikijile muze atu akwo apwile ni kwasosomba. Kahanyine uchela upema kuli waze apwile ni kwamona. (Tanga 2 Timoteu 2:24, 25.) Yika muyihasa kukukwasa mba kushimbika chipwe chitanga chilemu ku mwono we?

4. Yika yakwashile Izake kupwa mukwa-kushimbika?

⁴ Mu Mbimbiliya muli yilweza yinji yize yinasolola ngwo, kushimbika chili chitanga chilemu chinji. Tutalenu chilweza cha Izake. Muze ayile ni kutwama mu chifuchi cha Ngerare, enyembo yenyi A-Filistea yaputuka kumuvwila chipululu; chocho yajika mashima eswe a meya waze ngamba ja tato ashimine. Alioze, shimbu alitachike no hanga afunge mashima jenyi, Izake ni asoko jenyi yalukila ku chihela cha kusuku; koko yafula mashima akwo nawa. (Uputu. 26:12-18) Alioze A-Filistea yamba nawa ngwo, mashima waze afulile kali ni wo. Chipwe chocho, Izake nihindu yalihumikiza. (Uputu. 26:19-25) Mba kuchi Izake apwile ni kuhasa kuhwima mbunge chipwe muze akwo te akumusosomba? Pundu lume, iye katalile ha chilweza cha yisemi jenyi; chocho yalilongesa yuma yinji kuli tato Apalahama yoze te wakuneha sambukila ni kuli naye Sara, yoze wapwile ni “spiritu ya uhumikizo ni kulikehesa.”—1 Petu. 3:4-6; Uputu. 21:22-34.

5. Chilweza chika chinasolola ngwo, yisemi mahasa kulongesa ana jo apwe akwa-kushimbika?

⁵ Yisemi, ni yenu munuhasa kulongesa ana jenu hanga apwe ni chitanga chino cha kushimbika. Talenu chilweza cha Maxence, yoze uli ni miaka 17. Ku shikola ni mu mulimo wa kwambujola, iye kapwile ni kuliwana ni atu waze te akwete ufwatulo. Alioze yisemi jenyi kasolwele uhumikizo, chocho yamulongesa kupwa mukwa-kushimbika. Yisemi jenyi yamba ngwo: “Maxence kanyingikine ngwenyi, chili chashi kuneha mbwanja muze amwe matusosomba. Alioze mutu yoze ukwete tachi, kakuhwima mbunge.” Hachino, kushimbika yichipwa chitanga chilemu ku mwono wa Maxence.

6. Kuchi kulemba muchitukwasa kupwa akwa-kushimbika?

⁶ Yika mutulinga nyi umwe matusosomba ha kuhanjika yuma yipi hali Yehova hanji ha Mbimbiliya? Mutuhasa kulemba kuli Yehova ha kumwita spiritu ni mana, hanga yitukwase kuhwima mbunge. Mba yika mutulinga nyi kutwakumbulwile ngwe chize te twatamba kukumbulula? Mutuhasa kulemba cheka ni kutesa yize mutulinga kulutwe nyi umwe matwihia. Nyi twachilinga, Yehova matwaha spiritu yisandu ni kutukwasa kuhwima mbunge muze umwe matusosomba.

7. Yika muyitukwasa kunyingika yize mutuhanjika ni yize mutulinga muze amwe matusosomba? (Yishima 15:1, 18)

⁷ Versu jinji mu Mbimbiliya, mujihasa kutukwasa kuhanjika kanawa ni kuhwima mbunge muze akwetu matusosomba. Spiritu yisandu muyihasa kutukwasa kwiwuluka Yisoneko yacho. (Yoa. 14:26) Chakutalilaho, shimbi jize tunawane mu mukanda wa Yishima, mujihasa kutukwasa tupwe ni kulihumikiza. (Tanga Yishima 15:1, 18.) Mukanda uno, wakutukwasa nawa kumona ulemu wa kusolola kushimbika muze amwe matusosomba.—Yishi. 10:19; 17:27; 21:23; 25:15.

KUCHI MALINJEKELA AKUTUKWASA KUSHIMBIKA?

8. Mumu liaka twatamba kunyonga kanawa shimbu kanda tukumbulula mutu yoze unambe yuma yipi ha yize twafuliela?

⁸ Malinjekela no mahasa kutukwasa. (Yishi. 19:11) Mutu yoze ukwete malinjekela, kakuhasa kuhwima mbunge muze umwe mahamika ha yize afuliela. Yihula yimwe akutuhula yapwa ngwe liwe linene lize songo lialio linasoloka helu lia meya. Mumu liaka tunambe chocho? Mumu nyi mutu matuhula yimwe hanji mahamika ha yize twafuliela, chili chikalu kunyingika nyonga lize atuhulila yuma yacho. Kashika, shimbu kanda tukumbulula chili chilemu kwiwuluka ngwetu, kutwanyingikine yize yatwala mutu wacho kutuhula chocho.—Yishi. 16:23.

9. Kuchi Ngideone asolwele malinjekela ni kushimbika muze akumbulwile malunga A-Eframe?

⁹ Talenu chize Ngideone akumbulwile muze malunga A-Eframe afupile kulimika nenyi. Ayo kazangile kunyingika mumu liaka Ngideone kakaasanyikine, hanga no ase jita ni akwa-kole ja A-Izalele. Mba nyonga lika chamwenemwene liaatwalile kuhanjika ni ufwatulo upwahaze? Yeswayo yatwalile kulinga chocho, nihindu Ngideone kasolwele malinjekela. Iye kafupile kunyingika mumu liaka malunga jacho apwile ni kumuvwila uli, chocho yaakumbulula kanawa. Mba yika yalingiwileko? Mbimbiliya yakwamba ngwo: “Utenu wa malunga jacho yiutepuluka.”—Kuyu. 8:1-3.

10. Yika muyitukwasa kunyingika chize mutukumbulula atu waze anahamika ha yize twafuliela? (1 Petulu 3:15)

¹⁰ Longi-ni-mukwetu ku shikola chipwe mukwa-mulimo-ni-mukwetu mahasa kutuhula ngwenyi, mumu liaka twatamba kwononokena shimbi ja mu Mbimbiliya? Muze tunakumbulula, mutusa tachi tukalile yize twafuliela, aku nawa mutusolola vumbi ha nyonga lia yoze watuhula. (Tanga 1 Petulu 3:15.) Shimbu tumone chihula chacho ngwe kanatwase mikuta, chili chilemu kuchimona ngwe uhashi wa kunyingika yize mutu wacho akulemesa chinji ku mwono wenyi. Chipwe ngwe iye matuhula ni nyonga lieswalio, nihindu yetu twatamba kukumbulula ni uhumikizo hamwe ni kushimbika. Kumbululo lietu mulihasa kumukwasa anyonge kanawa ha chikuma chacho. Chipwe ngwe mutu wacho matenuka hanji matwamba yuma yipi, nihindu yetu twatamba kuhwima mbunge.—Roma 12:17.

11-12. (a) Yika twatamba kunyonga chitangu shimbu kanda tuchikumbulula yimwe yihula yikalu? (Tala nawa chizulie.) (b) Hanyima lia kunyingika kanawa chikuma chacho, kuchi mutuhasa kukumbulula mutu wacho?

¹¹ Umwe yoze twakalakala nenyi hanji mazanga kunyingika mumu liaka kutushi kulinga chiwanyino cha tangwa lia kusemuka. Muchilita kulihula ngwe: Shina iye kananyongo ngwo, yetu kutushi kusa mashimbu a kulivwisa kuwaha? Nyi hanji kananyongo ngwe kuhona kulichinga no chakupihisa mashimbu apema a yiwanyino yize o akulinga ku mulimo? Mutuhasa kumuchichimieka mumu lia kulihulumba hali akwo ni ha usepa uze watwama ku mulimo, ni kumulweza ngwo, ni yetu twakuzanga kukalakala mu chihela chize atu eswe akulivwa kanawa. Nyi twachilinga, mututepulula kusakalala cha mukwa-mulimo-ni-mukwetu, hanji nawa mutwazulula pito lia kuhanjika nenyi ha yize Mbimbiliya yakulongesa hakutwala ku chiwanyino cha tangwa lia kusemuka.

¹² Chino mutuhasa kuchilinga nawa muze mukusoloka yuma yize muyineha mbwanja. Chakutalilaho, hanji umwe yoze walilongesa nenyi ku shikola; mamba ngwenyi, Yela ja Yehova katamba kwalumuna nyonga lio hakutwala ku utumwa. Shina iye kanambe chocho, mumu kanyingikine kanawa Yela ja Yehova? Nyi kali ni sepa hanji usoko yoze wakulinga utumwa? Shina iye kakunyonga ngwo, yetu twakuvwila kole atu waze akulinga utumwa? Hanji muchilita kumulumbunwina ngwo, yetu twakulihulumba hali atu eswe; nawa ni vumbi lieswe tunanyingika ngwetu, hita mutu kali ni ulite wa kusakula yize malinga.b (1 Petu. 2:17) Muhasa kumulweza yize Mbimbiliya yakwamba ni chize kukaula shimbi jamo chakutunehena uwahililo ku mwono.

13. Kuchi muhasa kukwasa mutu yoze wakunyonga ngwe chishi ni ulemu kufuliela muli Zambi?

¹³ Nyi mutuhanjika ni mutu yoze unahamika ha chimwe chikuma, kutwatambile kunyonga ngwetu tunanyingika chize chinamutwale kunyonga chocho. (Titu 3:2) Chakutalilaho, yika mulinga nyi longi-ni-mukwenu mamba ngwenyi, kuchishi ni ulemu kufuliela muli Zambi? Shina hazehene munyonga lume ngwe iye kakufuliela ha longeso lia kwamba ngwo, yuma yalitangile yene; nawa kanalinyingika kanawa? Hanji iye kanahanjika wika yize evwile chakuhona kunyonga kanawa ha chikuma chacho. Shimbu uputuke lusango wa kwamba ngwo yuma yalitangile yene, hana kuli longi-ni-mukwenu chuma chize manyonga hanyima. Hanji muhasa kumusolwela umwe lusango wa yitangiwa ha jw.org. Ha tangwa likwo, muhasa kuhanjika ha chikuma hanji chinema chize iye awana ha site jw.org. Kusolola vumbi lia mutapu au, chakukwasa atu kuzanga kulilongesa yuma yinji hakutwala ku Mbimbiliya.

14. Kuchi Niall azachishile site yetu hanga akwase longi-ni-mukwo kunyingika ngwo, yize atu akwamba hali Yela ja Yehova yili ya mahuza?

¹⁴ Mukweze avuluka ngwo Niall, kazachishile site jw.org hanga asolole ngwo, yize atu akwamba hali Yela ja Yehova yili ya mahuza. Yamba ngwenyi: “Umwe longi-ni-mukwetu te kakungwamba ngwenyi, yami chishi kutayiza ciência mumu nakutayiza mukanda uze asonekene kuli atu shimbu ngufuliele ha yuma yize ciência yakwamba.” Amu longi wacho kakazangile kupanjika chipwe hakehe yize iye te anambe kumulweza, chocho Niall yamwita hanga anjile ha jw.org ni kutala ha chikuma, “Ciência ni Mbimbiliya.” Kulutwe, Niall yanyingika ngwenyi longi wacho kanjilile ha site, haliapwila te kanazange kuhanjika nenyi chinji hakutwala ku yitangiwa. Yino muyihasa kulingiwa ni kuli yetu.

KWASA ASOKO JE

15. Kuchi yisemi mahasa kukwasa ana jo kukumbulula ni kushimbika muze umwe mahamika ha yize afuliela?

¹⁵ Yisemi mahasa kukwasa ana jo hanga anyingike chize makumbulula ni uhumikizo muze amwe maahamika ha yize afuliela. (Tia. 3:13) Yisemi amwe kakuchilinga ha mashimbu a uwayilo wa mu usoko. Ayo kakulilongesa yuma yize muyihasa kusoloka ku shikola, ni kulinga yimweso ya chize ana mahasa kukumbulula. Kakulongesa ana jo chize mahasa kukumbulula ni kushimbika hanga akwase akwo azange kunyingika yuma yinji.—Tala mushete “Lilongese Hamwe ni Usoko We.”

16-17. Kuchi kulianga kulilulieka muchihasa kukwasa akweze?

¹⁶ Kulianga kulilulieka, muchihasa kukwasa akweze kulumbununa kanawa yize afuliela kuli akwo, ni kupwa ni shindakenyo ngwo yize afuliela mu Mbimbiliya yalita. Chikuma “Yize Akweze Akuhula” ha site jw.org, hali yikuma yinji yize muyihasa kukwasa akweze. Yikuma yino kakuyilinga hanga yikwase akweze kukolesa ufulielo wo ni kulilulieka hanga ahane makumbululo mu maliji jo ene. Nyi asoko malilongesa yikuma yino hamuwika, eswe mahasa kunyingika chize makalila ufulielo wo ni kushimbika ni kukwasa atu hanga azange kulilongesa Mbimbiliya.

¹⁷ Mukweze avuluka ngwo Matthew, kanalumbununa chize yikuma yino yamukwashile. Mu uwayilo wo wa mu usoko, Matthew ni yisemi jenyi te kakuhengwola chikuma chize muchihasa kusoloka ku shikola. Mwene yamba ngwenyi: “Te twakunyonga ha yikuma yize alongi-ni-akwetu mahasa kunguhula, mba himutuhengwola chize munguhasa kwakumbulula. Muze nanyingikine ulemu wa kufuliela mu Mbimbiliya, yingupwa ni hamu lia kuhanjika; nawa yichipwa chashi kukumbulula akwetu ni uhumikizo muze te akunguhula hakutwala ku ufulielo wami.”

18. Yika mukanda wa A-Kolosu 4:6 unatulongesa?

¹⁸ Tunanyingika ngwetu, kulumbununa wika chimwe chikuma, kuchichi kutwala atu hanga achitayize. Alioze kuhanjika ni vumbi hamwe ni kushimbika muchihasa kukwasa. (Tanga A-Kolosu 4:6.) Kuhanjika ha yize twafuliela, chili ngwe kukonga konda kuli mutu mukwo. Mutuhasa kuyikonga hakehe hanji ni tachi. Nyi kutwakongele konda yacho ni tachi, muchipwa chashi mukwetu kuyanda ni kuputuka kwasa. Chizechene nawa, nyi mutuhanjika ni vumbi ni kushimbika, atu mazanga kutupanjika ni kununga kuhanjika ni yetu. Tunanyingika ngwetu, nyi mutu mazanga kuzwela hanji kuhanjika yuma yipi ha yize twafuliela, kutwatambile kununga ni kuhanjika nenyi hanji kukumbulula yize ahula. (Yishi. 26:4) Alioze, hi atu eswe ko akusolola yitanga yacho. Kanji-kanji, atu anji kakutupanjika.

19. Yika muyihasa kutukwasa kushimbika muze tunakalila ufulielo wetu?

¹⁹ Kupwa mukwa-kushimbika chili chuma chilemu ku mwono wa mutu. Eta kuli Yehova hanga akukwase ununge ni kupwa mutu yoze washimbika muze muzanga kukumbulula mutu yoze unakusosomba, hanji yoze unahanjika yuma yipi ha yize wafuliela. Nyingika ngwe kumbululo lie lipema, mulihasa kukwasa hanga nuhone kuzwela. Chikwo nawa, kukumbulula ni vumbi ni kushimbika, muchihasa kukwasa atu amwe kuzanga kutupanjika ni kwalumuna manyonga jo hali yetu ni ha Mbimbiliya. Lilulieke hanga ukalile yize wafuliela, alioze “chilinge ni kulihumikiza cheswe ni vumbi.” (1 Petu. 3:15) Kashika, echa kushimbika chisolole ngwe ukwete tachi!