Pwako ni Nyonga lia Zambi Hakutwala ku Kunwa Walwa

PUNDU lume, wakusakwilila ha yawana yeswe yize Yehova akuhele, kuchingako chawana cha ulite uze uli nawo wa kusakula chize muzachisa yawana yacho. Kulita ni Mbimbiliya, vinyu neyo yili chawana cha Yehova, kashika yakwamba ngwo: “Mbolo kakuyitenga ha kuseha, ni vinyu kuyakuwahisa mwono.” (Chilu. 10:19; Samu 104:15) Alioze kota hiunanyingika ngwe atu amwe kakwete mulonga wa kunwa walwa. Chikwo nawa, kulita ni chifuchi hanji mianda, atu kali ni manyonga alisa hakutwala ku kunwa walwa. Mba yika muyihasa kukwasa Mukwa-Kristu kukwata chiyulo chipema hakutwala ku kunwa walwa usasu?

Chipwe ngwe twatwama hanji tukwete mianda yeswayo, nihindu twatamba kufuliela ha yiyulo ya Zambi. Nyi twachilinga, mutuwahilila ku mwono.

Ngwe chize wakumona, hashi eswe atu anji kakunwa chinji nawa ha yisuho yinji. Amwe kakuzanga kunwa walwa usasu mumu lia kuwaha chize akwivwa. Akwo kakunwa hanga ahone kulipikala chinji ha milonga yo. Ku yihela yimwe, mutu yoze wakunwa chinji kakumumona ngwe mukolo hanji ngwe mupema.

Kulisa ni atu jacho, Akwa-Kristu kakuyuka mumu kali ni usongwelo wa Sakatanga wo. Chakutalilaho, Yehova kakutulweza lamba lize liakwiza ha kunwa ni kuzengewa. Ha Yishima 23:29-35 mutuhasa kutangaho hakutwala kuli mutu yoze chizengi ni lamba lize liakwiza hanyima lia kunwa.a Daniel, umwe mukulwana wa mu chikungulwila mu Europa, kanewuluka chize mwono wenyi wapwile shimbu te kanda achililongesa hali Yehova ni kukaula yiyulo yenyi. Yamba ngwenyi: “Yami te nakunwa chinji, ha mukunda wa chino, yingukwata yiyulo yipi. Yuma yize yalingiwile ku mwono wami kuyakapwile yipema. Kashika ndo musono, muze nakunyonga ha yuma yacho chishi kulivwa kanawa.”

Kuchi mutuhasa kukwata yiyulo yipema hakutwala ku kunwa walwa ni kwehuka lamba lize liakwizako? Twatamba kecha hanga kunyonga cha Zambi chisongwele yiyulo yetu.

Mutuhengwola yize Mbimbiliya yakwamba hakutwala ku walwa usasu ni mumu liaka atu amwe akuunwa.

YIZE MBIMBILIYA YAKWAMBA HAKUTWALA KU WALWA USASU

Mbimbiliya kuyishi kwamba ngwo, chili chipi kunwa walwa ni kutesa. Alioze yakwamba ngwo, chili chipema kunwa vinyu. Mukanda wa Chilumbununyi 9:7, unambe ngwo: “Yako ukalie mbolo ye ni uwahililo, nwako vinyu ye ni mbunge ya chiseke.” Ha mashimbu amwe, Yesu te kakunwa vinyu ni tuvumbi akwo ashishika a Yehova no che te akulinga.—Mateu 26:27-29; Luka 7:34; 1 Timo. 5:23.

Mbimbiliya yakusolola ngwo kuli kalisa munene ha kunwa walwa ni kutesa ni ha kunwa ni kuzengewa. Yinambe pundu ngwo: “Kanda nuzengewa ni vinyu.” (Efwe. 5:18) Yinambe nawa ngwo: “Akwa-kuzengewa . . . kechi kahinga Wanangana wa Zambi.” (1 Kori. 6:10) Twamona pundu ngwetu, Yehova keshi kuzanga kunwa walwa ni kuhianyisa ni uzengi. Shimbu twimbulule yize akulinga atu waze twasulangana no, yetu twakukwata yiyulo kulita ni yize yakupemena Zambi.

Atu amwe kakunyonga ngwo mahasa kunwa walwa unji kechi kuzengewa. Alioze yino yili ponde yinene. Mbimbiliya yakwamba pundu ngwo, “akwa-kunwa vinyu yinji” mahasa kulinga yuma yinji yipi ni kuvulumuna Yehova. (Titu 2:3; Yishi. 20:1) Yesu neye katowezele ngwenyi, “kunwanwa” chinji walwa muchihasa kukwika mutu kunjila mu chifuchi chaha. (Luka 21:34-36) Mba, yika muyihasa kukwasa Mukwa-Kristu kwehuka lamba lize mulihasa kwiza ku kunwa walwa?

MUMU LIAKA WAKUNWA WALWA?

Muchipiha chinji kwecha mianda ya kuze twakolelele yisongwele nyonga lietu hakutwala ku kunwa walwa. Yetu Akwa-Kristu, twatamba kulinga yuma yize muyivwisa Yehova kuwaha chipwe hakutwala ku kulia ni kunwa. Kulinga chino, muchitukwasa kusolola mana. Mbimbiliya yinatwiwulula ngwo: “Chipwe munulia, chipwe mununwa, hanji munulinga chuma cheswacho, lingenu yuma yeswe hanga nuhalise Zambi.” (1 Kori. 10:31) Nyonga ha yihula ni ha shimbi jino ja mu Mbimbiliya:

Shina nakunwa walwa hanga akwetu anguzange? Kutuhuka 23:2 unambe ngwo: “Kanda ukakaula mbunga.” Hano, Yehova te kanatoweza A-Izalele hanga ahone kukaula atu waze akwehuka shimbi jenyi. Utowezo uno unatale ni hali yetu musono. Nyi ngwe twecha akwetu hanga atusongwele hakutwala ku kunwa walwa, chino muchihasa kututwala tusosoloke kuli Yehova ni ku shimbi jenyi.—Roma 12:2.

Shina nakunwa walwa hanga ngulisolole kuli akwetu ngwo nguli mukolo? Ku minyachi yimwe, kunwa walwa unji kakuchitayiza nawa hi chipi ko. (1 Petu. 4:3) Alioze tala chiyulo chize tunawane ha 1 A-Korindu 16:13, ngwo: “Lenu, jikizenu mu ufulielo, lingenu ngwe malunga, takamenu.” Shina walwa muuhasa lume kukwasa mutu atakame? Nyonga lino hi liambwende ko. Walwa muuhasa kutwala mutu ahone kunyonga kanawa, ni kuhona kukwata yiyulo yipema. Kashika, kunwa walwa unji shimbu chipwe chilayi cha tachi chili chilayi cha ulelu. Izaia 28:7 unambe ngwo, atu waze akulikwachilila chinji ku kunwa walwa kakulishiha ene.

Tachi jamwenemwene jize jakwiza kuli Yehova jinachingi ‘kujikiza ni kumana nguu ku ufulielo.’ (Samu 18:32) Mutuhasa kuchilinga mashimbu eswe ha kusa tachi hanga tukwate yiyulo yize muyitukwasa kufunga usepa wetu ni Yehova. Yesu kasolwele tachi jacho muze apwile hano hashi, atu anji te kakumuvumbika mumu kapwile ni hamu ni kulinga yuma yize yalita.

Shina nakunwa walwa hanga nguchine milonga yami? Umwe mukwa-kwimba masamu kasonekene ngwenyi: “Hakachi ka kulumbama cha manyonga jami muchima, kulembejeka che [Yehova] chakunguwahisa.” (Samu 94:19) Kashika, nyi ngwe unasakalala mumu lia yimwe, fupa ukwaso wa Yehova hi wa walwa ko. Jila yipema ya kuchilingila yili kulemba kuli Yehova. Mandumbu anji hanafupu ukwaso kuli mandumbu waze ajama ku ufulielo, chino chaakwashile. Kwamba pundu, kunwa walwa ni nyonga lia kukumba yimwe yipikalo muchihasa kutwala mutu ahone tachi ja kulinga yuma yalita. (Hoze. 4:11) Daniel yoze hitwatongola kulu, yamba ngwenyi: “Yami napwile ni kumona lamba mumu lia kusakalala ni manyonga akulilamikiza, kashika te nakunwa walwa hanga ngukumbe kapinda wacho. Alioze milonga yami yiyoka chinji, yingutokesa masepa ni ulemu uze atu apwile ni kungwaha.” Mba yika yakwashile Daniel? Mwene ngwenyi: “Nanyingikine ngwami, chuma ngunafupiwa chili kupwa ni Yehova sali liami hi walwa ko. Hi kusongo, yinguhasa kukumba yipikalo yami.” Kwamba umwenemwene, Yehova kali sali lietu hanga atukwase chipwe muze yipikalo yetu muyisoloka ngwe kuyishi musulo.—Fwili. 4:6, 7; 1 Petu. 5:7.

Nyi ngwe wakunwa walwa, muchilita kutesa yisuho yize muunwa ni kulihula ngwe: ‘Shina umwe mu usoko hanji sepa hanahanjika ni yami ha chize nakunwa walwa?’ Nyi wamba ngwe ewa, chino chili chilayi chize chinasolola ngwo, unapu ni ndako yipi ya kunwa walwa yize yena mwene kanda uchinyingika. ‘Shina haliapwila ngunanu walwa unji kuhiana kunyima?’ Mutu unapalika mu yuma ya mutapu au hanji kanda achipwa ni ndako yipi ya kunwa chinji walwa, alioze kulutwe mahasa kupwa nayo. ‘Shina nakuhasa kutwama amwe matangwa chakuhona kunwa walwa?’ Nyi wakumona ngwe chili chikalu, acho walwa hiwakupwisa ndungo. Ha chikuma chino hanji muchilita kufupa ukwaso wa akwa-kutala ha chikuma cha walwa hanga akukwase kukumba kapinda wacho.

Mumu lia milonga yize muyihasa kwiza ku kunwa walwa, amwe kakutesa kwecha kunwa walwa. Akwo keshi kunwa walwa mumu keshi kuzanga kupwa chawo. Muchipema chinji kuli yetu kuvumbika chiyulo cha mutu ni mutu ha kuhona kwamba akwetu yuma yipi.

Hanji hiunatese unji wa walwa uze muunwa. Hanji nawa muhasa kutesa yisuho yize muunwa hanji kamuwika ha poso hanji ukehe wika muze unali. Amwe hanatesa mutapu wa walwa uze manwa. Chakutalilaho, kunwa wika vinyu hanji cerveja ni kulita chakuhona kuchinga ni walwa ukwo usasu. Nyi watesa yuma yino muchipwa chashi kuyikaula muze mupwa ha kunwa walwa. Mukwa-Kristu wajama yoze hanatese kulu yuma yino, katambile kwivwa sonyi ha yize akwo manyonga.

Chili nawa chilemu kunyonga hali akwetu. A-Roma 14:21 unambe ngwo: “Chili chipema kulitwamina kulia yifwo, chipwe kunwa vinyu, hanji kulinga chuma chimwe chize muchihasa kutalingisa ndumbwe.” Kuchi muhasa kukaula chiyulo chino? Ha kusolola zango. Nyi munyingika ngwe ndumbu umwe matalinga muze makumona unanu walwa, kutala chichi kupema kulitwamina kunwa mumu lia ndumbwe? Kulinga chino, musolola zango ni vumbi ha yize akwenu akunyonga ha kufupa kufumbuka cha akwenu hi cha yena mwene ko.—1 Kori. 10:24.

Chikwo nawa, muchihasa kupwa ngwe nguvulu hanase shimbi hakutwala ku kunwa walwa, mba Mukwa-Kristu katamba kwononokena shimbi yacho. Chakutalilaho, shimbi jacho mujihasa kutala ha miaka yize mutu atamba kupwa nayo mba anwe walwa, hanji kuli shimbi yize yinakanjisa mutu kwendesa mashinyi chipwe makina jikwo muze hanwa kulu.—Roma 13:1-5.

Yehova hanatwehe yawana yipema chinji, chimwe cha ku yawana yacho chili utuswilo wa kusakula chize mutuzachisa yawana yacho. Yino nawa yinatale ha yize mutusakula kulia ni kunwa. Pundu lume, twakusakwilila chinji ha chawana cha kusakula yetwene yize mutuzanga, nawa tunazange kusolola usakwililo wetu ha kukwata yiyulo yize muyivwisa Yehova kuwaha.