MUTWE WA KULILONGESA 18
MWASO 65 Tunungenu Lume!
Mandumbu Jetu Akweze—Imbululenu Marku ni Timoteu
“Tweya ni Marku, mumu kakungukwasa chinji mu mulimo.”—2 TIMO. 4:11.
YIZE MUTULILONGESA
Mutumona chize chilweza cha Marku ni Timoteu, muchihasa kukwasa mandumbu jetu akweze apwe ni yitanga yize muyaakwasa hanga alingile chinji akwo.
1-2. Yika kachi yakwikile Marku ni Timoteu kulihana chinji mu mulimo wa Yehova?
AKWEZE, shina nunazange kulihana chinji mu mulimo wa Yehova ni kukwasa chikungulwila? Tuli ni shindakenyo ngwetu ye nunazange. Twakuwahilila chinji ha kumona mandumbu jetu akweze waze akulihana hanga alingile akwo. (Samu 110:3) Hanji kuli yena chinakukalila kuchilinga. Shina wakukakajana kulihana chinji mu mulimo wa Yehova mumu kuushi kunyingika chize chino muchikwata ku mwono we? Nyi hanji walituna chimwe chiteli mumu lia kunyonga ngwo kuuchi kuchilinga kanawa? Yena kuushi mutu mutangu yoze unalivu chocho.
2 Marku ni Timoteu no kapalikile mu yuma yino. Alioze, o kakechele woma hanji kuhona yinyingi yinji, yaakwike kulihana chinji mu mulimo wa Yehova. Muze Paulu ni Mbarnabe asanyikine Marku hanga aye mu wenyi wa mishionaliu, chakusoloka ngwe, Marku ni naye te katwama mu zuwo lipema chinji. (Yili. 12:12, 13, 25) Iye yahichika usoko wenyi hanga alihane chinji mu mulimo wa kwambujola. Chitangu, iye yalukila ku Andiakia, mba hanyima yaya hamuwika ni Paulu ni Mbarnabe ku yihela yikwo ya kusuku. (Yili. 13:1-5) Timoteu neye, kota te katwama ni yisemi jenyi muze amusanyikine kuli Paulu hanga aye nenyi mu wenyi mu mulimo wa kwambujola. Mumu lia kupwa mukweze ni kuhona yinyingi yinji, Timoteu kachi kanyongene ngwe kakajamine chinji ha kulinga mulimo wacho. (Tala nawa 1 A-Korindu 16:10, 11 ni 1 Timoteu 4:12.) Alioze, iye yatayiza kuya ni Paulu, chocho yapwa ni uwahililo unji ku mwono mumu lia kulingila Yehova.—Yili. 16:3-5.
3. (a) Kuchi tunanyigika ngwetu, Paulu te kakulemesa Marku ni Timoteu? (2 Timoteu 4:6, 9, 11) (Tala nawa yizulie.) (b) Yihula yika mutukumbulula ha mutwe uno?
3 Marku ni Timoteu, kazukile yinyingi ni kulilongesa kulinga yuma yinene-yinene muze te achili chinji akweze. Paulu te kakulemesa chinji akweze wano. Kashika, muze anyingikine ngwenyi te kwasala hakehe amushihe, iye yeta hanga akweze jacho aye ni kumutala. (Tanga 2 Timoteu 4:6, 9, 11.) Yitanga yika Paulu amwene kuli Marku ni Timoteu? Kuchi akweze Akwa-Kristu mahasa kwimbulula Marku ni Timoteu? Kuchi yiyulo ya zango ya Paulu, muyihasa kukwasa akweze Akwa-Kristu musono?
Paulu kapwile ni kulemesa chinji Marku ni Timoteu mumu lia kutayiza yiteli yinene muze te achili akweze (Tala paragrafu 3)b
IMBULULA MARKU HA KULIHANA CHINJI HANGA UKWASE AKWENU
4-5. Kuchi Marku asolwele ngwenyi kalihanyine hanga akwase akwo?
4 Kulita ni umwe mukanda, kulingila akwetu muchihasa kulumbunuka kukilikita chinji hanga twakwase chipwe muze muchisoloka ngwe chikalu kuchilinga. Marku kali chilweza chipema ha chikuma chino. Iye kota kanenganyanyine chinji ni kupihilila muze Paulu alitunyine kuya nenyi mu wenyi ukwo wa mishionaliu. (Yili. 15:37, 38) Alioze, yino kuyakamukwikile kununga ni kulihana chinji hanga alingile mandumbu jenyi.
5 Marku yaya ni kukalakala ku chihela cheka hamwe ni musonyenyi Mbarnabe. Ha kupalika cha miaka 11, muze Paulu apwile mu zuwo lia ususu ku Roma, nawa te anafupu ukwaso, Marku yaya ni kumukwasa. (Fwilim. 23, 24) Ukwaso uno wapwile ulemu chinji kuli Paulu, kashika ambile hali Marku ngwenyi, kapwile “chishina chinene cha utakamiso.”—Kolo. 4:10, 11.
6. Kuchi Marku ayukile ha kupalikisa mashimbu anji ni mandumbu waze apwile ni yinyingi yinji? (Tala maliji mushi lia lifwo.)
6 Marku kapalikishile nawa mashimbu anji hamwe ni Akwa-Kristu akwo waze te akwete ufulielo ukolo, chocho neye yapwa ni yinyingi yinji. Ngwe chilweza, hanyima lia kupalikisa amwe mashimbu ni Paulu mu Roma, iye yaya ku Babilonia ni kukalakala ni Petulu, chocho usepa wo yiukola chinji. Kashika Petulu avulukile Marku ngwenyi, “mwanami.” (1 Petu. 5:13) Muze apwile ni kukalakala hamuwika, kota Petulu kalwezele mukweze Marku yuma yinji hakutwala ku mwono wa Yesu ni mulimo wenyi wa kwambujola, mba hakupalika cha mashimbu, Marku yasoneka yuma yacho mu Evanjelu yize yakumbata jina lienyi.a
7. Kuchi ndumbu Seung-Woo embulwile chilweza cha Marku? (Tala nawa chizulie.)
7 Marku te kakulihana chinji mu mulimo wa Yehova, nawa te kakupalikisa mashimbu hamwe ni mandumbu waze apwile ni yinyingi yinji. Kuchi muhasa kwimbulula chilweza cha Marku? Hanji unazange kulihana chinji mu mulimo wa Yehova, ha kupwa kavumbi hanji mukulwana mu chikungulwila. Alioze, ndo haliapwila kanda uchipwa ni yiteli yacho. Nyi yino ye yinalingiwa kuli yena, kanda uhonga, lihumikize ni kufupa majila akwo akulingila Yehova ni chikungulwila. Tutalenu yize yalingiwile kuli Seung-Woo, yoze haliapwila uli mukulwana mu chikungulwila. Muze apwile mukweze, iye te kakulitesa chinji ni akwo. Akweze akwo kaliangile kutambula yiteli iye ka. Seung-Woo kapwile ni kunyonga ngwenyi kamuvulama, chocho yaputuka kunenganyana. Kulutwe, yalweza makulwana a mu chikungulwila chize te akulivwa. Umwe mukulwana yamukolweza hanga alingile akwo yize mahasa, chipwe ngwe ayo kechi kumona yuma yipema yize analingi. Seung-Woo yakaula chiyulo chacho, chocho yaputuka kukwasa mandumbu waze apwile tushinakaji, hamwe ni waze te akufupa ukwaso wa kuya ku kukunguluka. Muze akwiuluka mashimbu jacho, yamba ngwenyi: “Nanyingikine pundu yize chinalumbunuka kulingila akwetu. Namwene nawa ngwami, kulingila akwetu chakuneha uwahililo unji.”
Mumu liaka chili chipema akweze kupalikisa mashimbu ni mandumbu waze ali ni yinyingi yinji? (Tala paragrafu 7)
IMBULULA TIMOTEU HA KULIHULUMBA HALI AKWENU
8. Mumu liaka Paulu asakwile Timoteu hanga aye no mu wenyi? (A-Fwilipu 2:19-22)
8 Paulu kafupile amwe mandumbu a hamu, waze te maya no mu wenyi ku mbonge kuze amuhungumionene. Chitangu, iye yasakula Saila yoze te wakulingila Yehova ha miaka yinji. (Yili. 15:22, 40) Hanyima, yasanyika Timoteu hanga alichinge no mu wenyi wacho. Mba mumu liaka Paulu asakwile Timoteu? Chikuma chimwe chize anakamusakwila chapwile lufuma mupema yoze apwile nenyi. (Yili. 16:1, 2) Chikwo nawa, iye te kakulihulumba chinji hali atu.—Tanga A-Fwilipu 2:19-22.
9. Yika yinasolola ngwo Timoteu kapwile ni kulihulumba hali mandumbu jenyi?
9 Chize haze aputukile kwenda ni Paulu, Timoteu yasolola ngwenyi, kakulihulumba chinji ha upeme wa akwo kuhiana wa iye mwene. Kashika Paulu amuhichikile mu Mberea, hanga atakamise tumbaji aha. (Yili. 17:13, 14) Ha shimbu liacho, Saila neye kapwile mu Mberea, kashika Timoteu kalilongesele yuma yinji ku chilweza chenyi. Ha kupalika cha mashimbu, Paulu yatuma Timoteu ukawenyi ku Tesalonika hanga atakamise mandumbu mu mbonge yacho. (1 Tesa. 3:2) Ha miaka 15 yahachileho, zango lia Timoteu hali mandumbu jenyi yilikola chinji. Kashika ha mashimbu amwe, iye te ‘kakulila hamwe ni waze analila.’ (Roma 12:15; 2 Timo. 1:4) Kuchi akweze Akwa-Kristu mahasa kwimbulula Timoteu?
10. Kuchi ndumbu Woo Jae alilongesele kulihulumba chinji hali akwo?
10 Ndumbu Woo Jae, kalilongesele chize malihulumba chinji hali akwo. Ku ukweze wenyi, iye te keshi kuhanjika chinji ni mandumbu waze te hapwa tushinakaji. Kapwile ni kwameneka ha kukunguluka, alioze te keshi kusa mashimbu hanga ahanjike no. Mba umwe mukulwana wa mu chikungulwila, yakolweza Woo Jae hanga apwe ni kulianga kuhanjika ni mandumbu jacho ha kwalweza yize iye akuzanga hali ayo. Mukulwana wacho yamulweza nawa hanga apwe ni kunyonga ha lusango yoze ndumbu anahanjika nenyi mazanga. Woo Jae yakaula chiyulo chacho. Musono, iye kali mukulwana wa mu chikungulwila. Mwene yamba ngwenyi: “Haliapwila, nakuhasa kuhanjika ni mandumbu a miaka yalisa. Chakupema chinji kunyingika mandumbu jami ni kunyingika kapinda yoze anapalika. Chino chakungukwasa kumona majila a kwakwashilamo.”
11. Kuchi akweze mahasa kuzanga mandumbu jo mu chikungulwila ni kulihulumba chinji hali ayo? (Tala nawa chizulie.)
11 Mandumbu jetu akweze, ni yenu munuhasa kulilongesa kuzanga akwenu ni kulihulumba chinji hali ayo. Muze nuli ha kukunguluka, hanjikenu ni mandumbu a miaka ni minyachi yalisa. Ahulenu chize ali, ni kwapanjika kanawa. Nyi nwachilinga, munumona chize munuhasa kwakwasa. Ngwe chilweza, hanji mununyingika ngwenu, amwe mandumbu alimbata waze hapwa tushinakaji, kanafupu ukwaso wa chize makalakala ni aplicativo JW Library®. Hanji mununyingika nawa ngwenu, ayo keshi ni ndumbu yoze matuhuka no mu munda. Shina munuhasa kulinga yimwe hanga nwakwase ha yikuma yino? Nyi munulihana hanga nukwase mandumbu jenu, munupwa chilweza chipema mu chikungulwila.
Mandumbu akweze mahasa kukwasa chikungulwila mu majila eka ni eka (Tala paragrafu 11)
YIYULO YA PAULU MUYIHASA KUKUKWASA
12. Yika akweze mahasa kulinga mba ayuke ha yiyulo yize Paulu ahanyine kuli Timoteu?
12 Paulu kahanyine yiyulo yipema kuli Timoteu, yize yamukwashile kuwahilila ni kulingila kanawa Yehova. (1 Timo. 1:18; 2 Timo. 4:5) Nyi uli mukweze, ni yena yiyulo yacho muyihasa kukukwasa. Mu mutapu uka? Ha kutanga mikanda yaali yize Paulu asonekenene Timoteu ngwe yena ayisonekenene, ni kumona chize mukaula yiyulo yacho ku mwono we. Tutalenu yimwe yilweza.
13. Yika muyikukwasa kulihana chinji kuli Yehova?
13 “Sako tachi hanga upwe ni chako chakuwayila Zambi.” (1 Timo. 4:7b) Chako cha kuwayila Zambi yika chinalumbunuka? Maliji wano kanalumbunuka kulihana chinji kuli Yehova ni nyonga lia kulinga yuma yize muyimuvwisa kuwaha. Yetu kutushi kusemuka ni chitanga chino, kashika twatamba kulikolweza hanga tupwe nacho. Mba kuchi mutuhasa kuchilinga? Liji lia Ngregu lize akulumbununa ngwo ‘kusa tachi,’ kanji-kanji, te kakulitalikisa hali akwa-kuzomboka waze akulifumba chinji hanga aye ku chimwe kuzomboka. Mba akumbe mu kuzomboka chacho, ayo mafupiwa kulihana chinji ni kwecha kulinga yuma yimwe. Ni musono nawa, twatamba kusa tachi hanga tweche yuma yimwe, mba tuhase kukolesa usepa wetu ni Yehova.
14. Yika twatamba kwiuluka muze tunatange Mbimbiliya? Hana chilweza.
14 Chuma chimwe twatamba kusa tachi hanga tulinge, chili kutanga Mbimbiliya matangwa eswe. Alioze twatamba kwiuluka ngwetu, chikuma chize twakutangila Mbimbiliya chili kukundama kuli Yehova. Ngwe chilweza, muze wakutanga lusango wa Yesu ni mukweze mukwa-kuyula, yika wakulilongesa hali Yehova? (Marku 10:17-22) Mukweze wacho kapwile ni kutayiza ngwenyi, Yesu mwe Mesaya, alioze kakapwile ni ufulielo wa kulihana hanga apwe kambaji kenyi. Chipwe chocho, Yesu ‘yamuzanga chinji’ ni kuhanjika nenyi kanawa. Yino yinasolola ngwo, Yesu kazangile hanga mukweze wacho akwate chiyulo cha mana. Chikwo nawa, Yesu kasolwele zango lize Yehova apwile nalio hali mukweze wacho. (Yoa. 14:9) Muze unapukuna ha lusango yono, nyonga ha yize yakulingiwa ku mwono we ni kulihula ngwe: ‘Yika natamba kulinga hanga ngukolese usepa wami ni Yehova ni kulingila chinji akwetu?’
15. Mumu liaka chili chilemu akweze kupwa ni yitanga yipema? Hana chilweza. (1 Timoteu 4:12, 13)
15 “Pwako chilweza kuli akwa-kushishika.” (Tanga 1 Timoteu 4:12, 13.) Tunanyingika ngwetu, Paulu kakolwezele Timoteu hanga alulieke utotombo wa kutanga ni kulongesa kanawa. Alioze kamukolwezele nawa hanga apwe ni yitanga yipema ngwe, zango, ufulielo ni kulinanga. Mumu liaka? Mumu yitanga yipema, yakuhanjika chinji kuhiana maliji. Nyonga ngwe makwaha chiteli cha kulinga pande ha kukunguluka, jize jinahanjika hakutwala ku kwokesa zango lietu mu mulimo wa kwambujola. Muchipwa chashi kulinga pande jacho, nyi wakulihana chinji mu mulimo wa kwambujola. Mandumbu mazanga kukaula yize wahanjika nyi o kananyingika ngwo, uli chilweza chipema ha yize walongesa.—1 Timo. 3:13.
16. (a) Ha yikuma yika yitano yize mukweze Mukwa-Kristu mahasa kupwa chilweza chipema? (b) Kuchi mukweze mahasa kupwa chilweza chipema “mu kuhanjika”?
16 Ha 1 Timoteu 4:12, Paulu kanasolola yikuma yitano yize mukweze Mukwa-Kristu mahasa kupwa chilweza chipema. Nyi muchilita, linga longeso lia wika hanji kuhengwola hita chikuma. Ngwe chilweza, shina unazange kupwa chilweza chipema “mu kuhanjika”? Nyi chocho, nyonga chize muhasa kukolweza akwenu ni maliji je. Nyi watwama hamuwika ni yisemi je, shina muchilita kwachichimieka ha yisuho yinji mumu lia yize akukulingila? Hanyima lia kukunguluka, shina muchilita kuhanjika ni umwe ndumbu yoze walinga chihanda hanji pande ni kumuchichimieka ha chimwe chikuma chize wazanga? Shina muchilita kupwa ni kuhana makumbululo ha kukunguluka mu maliji je? Nyi muusa tachi hanga upwe chilweza chipema mu kuhanjika, mandumbu eswe mamona kutatuka che ku ufulielo.—1 Timo. 4:15.
17. Yika muyikwasa mukweze Mukwa-Kristu kumanununa yize hanatese ku ufulielo? (2 Timoteu 2:22)
17 “China usolo wa ukweze, alioze fupa ululi.” (Tanga 2 Timoteu 2:22.) Paulu kakolwezele Timoteu hanga achine usolo uze te muuhasa kupihisa yize atesele ku ufulielo hanji kupihisa usepa wenyi ni Yehova. Hanji munyingika ngwe yuma yimwe chipwe ngwe hi yipi ko, nihindu yinakumbate mashimbu waze te muhasa kulinga yuma ya ku ufulielo. Ngwe chilweza, achinyonga ha mashimbu waze wakupalikisa ha kuta ni kutala yiheho, kunjila ha internet, hanji kulinga yiheho yikwo nawa. Shina muhasa kusa mashimbu jacho hanga ulingile chinji Yehova ni kukwasa akwenu? Muhasa kulihana hanga ukwase kululieka Zuwo lia Wanangana, hanji kukwasa mulimo wa kwambujola ni matemba. Nyi walinga milimo yino, muhasa kupwa ni masepa waze makukwasa kumanununa yize hiunatese ku ufulielo.
MUYUKA YUMA YINJI HA KULIHANA HANGA ULINGILE AKWENU
18. Mumu liaka mutuhasa kwamba ngwetu Marku ni Timoteu kapwile ni mwono upema chinji?
18 Marku ni Timoteu, kechele kulinga yuma yimwe hanga alihane chinji mu mulimo wa Yehova. Kulinga chino, chaakwashile kuwahilila ni kupwa ni mwono upema. (Yili. 20:35) Marku kayile wenyi ku yihela yinji ya kusuku ni nyonga lia kukwasa mandumbu jenyi. Iye kasonekene nawa lusango mupema chinji hakutwala ku mwono wa Yesu ni mulimo wenyi wa kwambujola. Timoteu kakwashile Paulu kusa yikungulwila yaha ni kukolweza mandumbu. Yehova kamwene tachi jize Marku ni Timoteu asele hanga alihane mu mulimo wenyi, chocho iye yawahilila chinji.
19. Mumu liaka mandumbu jetu akweze atamba kukaula yiyulo yize Paulu ahanyine kuli Timoteu, yika mazuka nyi machilinga?
19 Twakuhasa kumona zango lize Paulu apwile nalio hali sepa lienyi Timoteu, ha mikanda yize amusonekenene. Mikanda yacho, yakusolola zango linene lize Yehova ali nalio hali yenu akweze. Iye kanazange hanga nuwahilile, kashika, senu tachi nukaule yiyulo yino ya Paulu ni kulihana hanga nulingile akwenu. Nyi nwachilinga, munuwahilila chinji haliapwila ni kushimbwila mwono wamwenemwene uze uneza kulutwe.—1 Timo. 6:18, 19.
MWASO 80 Esekenu Numone Ngwenu Yehova Mupema
a Petulu kapwile mukweze wakanyama, kashika ahashile kulweza Marku hakutwala ku mwono wa Yesu mu mutapu walita. Kashika kota Evanjelu ya Marku yikwete yuma yakusolola chize Yesu alivwile ni yize apwile ni kulinga ha yuma yimwe.—Marku 3:5; 7:34; 8:12.
b ULUMBUNWISO WA CHIZULIE: Marku kanakwase Paulu ni Mbarnabe mu wenyi wa mishionaliu. Timoteu kanawahilila muze anameneka chimwe chikungulwila hanga akolweze ni kutakamisa mandumbu.