Twalilongesa Yuma Yinji Kuli Longeshi Wetu Munene

YIZE NALILONGESELE KULI YISEMI JAMI

Ku songo lia miaka 1950, yisemi jami kakatukile ku Itália ni kwalukila ku Kindersley, mu Saskatchewan, Canadá. Ha kupalika cha mashimbu akehe, ayo yalilongesa umwenemwene, chocho umwenemwene yiupwa chuma chilemu chinji ku mwono wetu. Nguneuluka muze te nguchili kanuke, napwile ni kupalikisa mashimbu anji mu mulimo wa kwambujola hamwe ni yisemi jami. Kashika nakwamba mu miselo ngwami, naputukile mulimo wa “pionelu wa shimbu likehe” ni miaka nake!

Yisemi yami kapwile yiswale; chipwe chocho, kapwile chilweza chipema ha kwecha kulinga yuma yimwe hanga alihane chinji mu mulimo wa Yehova. Ngwe chilweza, ha 1963 o kalanjishile yikumba yo yinji hanga awane mbongo ja kulinga najo wenyi wa kuya ku kukunguluka cha mambonge cha hashi weswe mu Pasadena, Califórnia, Estados Unidos. Ha 1972 yitwalukila mu mbonge ya Trail, Colúmbia Britânica, mu Canadá. Mba tuhete ku mbonge yacho, te twakwenda quilômetros 1,000. Twayile mu mbonge yacho hanga tukwase atu waze akuhanjika Italiano. Tata kapwile ni kulinga mulimo wa kukomba ni kululieka yuma mu limwe loja. Iye te kakulituna uhashi wa kumunyinyisa ku mulimo wenyi hanga alihulikile chinji mu mulimo wa Yehova.

Yami ni anakwetu atatu twakusakwilila chinji ha chilweza chipema chize yisemi jetu atuhele. Ayo e anguhele fumbo litangu mu mulimo wa Yehova ni kungulongesa chuma chize chishi kuvulama ku mwono wami weswe, ngwo: Nyi nasa Wanangana wa Zambi ha chihela chitangu, Yehova mangufunga.​—Mateu 6:33.

KUPUTUKA MULIMO WA SHIMBU LIESWE

Ha 1980, nalimbachile ni Debbie, umwe ndumbu mupema chinji yoze wapwile ni kulihana chinji mu mulimo ya Yehova. Yituzanga kunjila mu mulimo wa shimbu lieswe. Chocho, ha kupalika cha tukweji atatu kukatuka haze twalimbachile, Debbie yaputuka mulimo wa pionelu wa shimbu lieswe. Ha kupalika cha mwaka umuwika wa umbachiso wetu, yitwalukila mu chimwe chikungulwila chikehe muze te munafupiwa ukwaso, chocho ni yami yinguputuka mulimo wa pionelu.

Ha kupalika cha mashimbu, uwahililo wetu yiuteputuka, chocho yituzanga kukatuka ku chihela chacho. Alioze chitangu, yituhanjika ni kalayi wa mbonge. Iye yahanjika ni yetu ni zango lieswe, alioze yatulweza pundu ngwenyi: “Sali limwe, kapinda yoze nunapalika kanakatuka kuli yenu ene. Nunalihulikila chinji ha kapinda wacho. Alioze nyi nwalihulikila ha yuma yipema, munupwa ni uwahililo.” Chiyulo chino, te che tunafupu lume. (Samu 141:5) Yitukaula chiyulo chacho kafuji-fuji, mba yitumona ngwetu twapwile ni yuma yinji yipema. Atu anji mu chikungulwila kazangile kulingila chinji Yehova, akweze ni mandumbu a mapwo waze te alimbata ni malunga hi Yela ja Yehova ko. Lino liapwile longeso lilemu chinji kuli yetu. Yitulilongesa kumona yuma yipema mu mulimo wacho ni kujikijila muli Yehova ngwetu, matukwasa kunyongonona mu kapinda mweswawo masoloka ku mwono wetu. (Mika 7:7) Yituputuka kuwahilila cheka, chocho yuma yipema ku mwono wetu.

Alongeshi a ku shikola yetu yitangu ya pionelu te hanakalakala ku yifuchi yikwo. Ayo yatusolwela foto ni kulianyina ni yetu yiwape ni yipikalo yize apalikile muze te anakalakala mu yifuchi yacho. Chino yichitutwala kuzanga mulimo wa mishionaliu, chocho yitutesa kunjila mu mulimo wacho.

Mba tumanunune yize twatesele, ha 1984, yitwalukila ku Quebec mu chikungulwia cha limi lia Francês. Kukatuka ku Colúmbia Britânica ndo ku chihela chacho hatwama quilômetros 4,000. Chikwo nawa, te twatamba kwijilila ni mianda yaha ni limi liaha. Twapwile nawa ni kapinda wa mbongo. Ha shimbu limwe, yuma yakulia yize twapwile nayo yapwile wika tamba jize te akutwaha kuli umwe njimi yoze wapwile ni kusanda munda wenyi hanyima mba ni yetu mutusanda. Debbie kapwile ni kuteleka tamba jacho mu mu mutapu walisa nawa te jakuyema chinji! Chipwe ngwe twapalikile mu kapinda, nihindu twalingile yize mutuhasa hanga tunyongonone ni uwahililo. Twapwile nawa ni shindakenyo ngwetu, Yehova kanatufungu.​—Samu 64:10.

Tangwa limwe yatusanyika ku telefone, te kutushi ni kuchishimbwila. Chocho yatulweza hanga tuye ni kukalakala ku Mbetele ya ku Canadá. Hachino, chipwe ngwe twevwile kuwaha ha kutusanyika, nihindu twanenganyanyine nawa. Alioze yitutayiza kuya ku Mbetele. Muze twaheteleko, yituhula ndumbu Little Kenneth wa mu Komite ya Mutango ngwo: “Mba yika mutulinga nyi ngwe matusanyika ku shikola ya Ngiliate?” Iye yakumbulula ngwenyi: “Kanda nulipikala! Nyi ngwe manusanyika, mutukamona yize mutukalinga.”

Yino ye yalingiwileko lume ha kupalika cha poso yimuwika. Yami ni Debbie yatusanyika ku shikola ya Ngiliate. Kashika, twatambile kukwata chiyulo. Ndumbu Little yatulweza ngwenyi: “Chiteli cheswacho munusakula, ha mashimbu amwe munuhasa kwivwa usona wa chiteli chize kunwakasakwile. Kukushi chiteli chahiana chikwo, Yehova mahasa kuwahisa yeswe yaali.” Yitusakula kuya ku Ngiliate, alioze ha kupalika cha miaka yitumona ngwetu, yize ndumbu Little ambile yapwile yamwenemwene. Maliji jacho twapwile ni kwalweza kuli mandumbu akwo waze no apwile ni kupalika mu chikuma ngwe chizechene yetu twapalikile, cha kusakula chiteli chize malinga mu mulimo wa Yehova.

MWONO WA MISHIONALIU

Tunakawahilila ha kupwa mukachi ka alongi 24 a kalasa 83 wa Ngiliate. Shikola yacho, yinakalingiwila ku Brooklyn, New York, ha Abril 1987. Ndumbu Ulysses Glass ni ndumbu Jack Redford e apwile alongeshi jetu. Tukweji jacho atano kapalikile ni kawashi, chocho yituhwisa shikola ha 6 Setembro, 1987. Hanyima lia shikola, yatutuma ku Haiti hamwe ni John ni Marie Goode.

Mishionaliu a Ngiliate te keshi kwatuma nawa ku Haiti chize ha mwaka 1962, kukatuka haze ahumine mishionaliu a kasula mu chifuchi chacho. Ha kupalika cha poso jitatu hanyima lia kuhwisa shikola, yami ni mukwetu-pwo yituya ni kukalakala mu Haiti. Chikungulwila chetu chapwile ni akwa-kwambujola 35 nawa chapwile ku milundu. Te tuchili akweze, kwapwile yuma yinji yize te twatamba kulilongesa, nawa te twatwama ukwawetu ku zuwo lia mishionaliu. Atu a ku chihela chacho kapwile yiswale, chikwo nawa, anji te kanyingikine kutanga. Ha mashimbu jacho, mu Haiti mwapwile ni kulingiwa tukundukundu, jita, atu kapwile ni kulimika ni nguvulu ni kuchiza mwata wa chifuchi ha wata.

Ku Haiti, twalilongesele yuma yinji kuli mandumbu jetu ajama ku ufulielo a malunga ni a mapwo. Ayo kapwile ni kupalika mu yikipalo yinji, alioze te kakuzanga Yehova ni mulimo wa kwambujola. Ndumbu umwe wa pwo kashinakaji te kanyingikine kutanga, chipwe chocho te kanyingika yisoneko 150 yize apwile ni kupachikila mu manyonga. Yuma yize yapwile ni kusoloka ku chihela chacho, yapwile ni kututwala tuzange chinji kwambujola sango ja Wanangana wa Zambi ngwo, we wika muukahwisa milonga ya atu eswe hano hashi. Twakuwahilila chinji ha kumona chize amwe a kuli alongi jetu a Mbimbiliya apwile mapionelu a shimbu lieswe, mapionelu alipwila ni makulwana a mu chikungulwila.

Muze Napwile mu Haiti, yingunyingika Trevor, umwe mukweze mishionaliu wa mu yingeleja Mormon. Ha yisuho yimwe, te twakuhanjika hakutwala ku Mbimbiliya. Ha kupalika cha yimwe miaka, chakuhona kushimbwila yingutambula umwe mukanda uze angusonekenene. Ha mukanda wacho, iye yamba ngwenyi: “Ngunazange kukulweza ngwami, mangupapachisa ha kukunguluka cha mbonge chize mutupwa nacho! Ngunazange kufuna ku Haiti hanga kukalakale ngwe pionelu walipwila ku chikela chizechene napwile muze te nguchili mishionaliu wa yingeleja ya Mormon.” Yino ye alingile lume ha miaka yinji hamwe ni mukwo-pwo.

EUROPA​—KUSULAHO ÁFRICA

Katutumine hanga tukalakale sali limwe lia Europa muze nguvulu echele kukanjisa mulimo wetu wa kwambujola. Ha 1992 yituheta ku Ljubljana, Eslovênia, hakamwihi ni kuze yisemi jami akolelele muze te kanda achalukila ku Itália. Jita te muyichinunga mu Iugoslávia. Mbetele ya mu Áustria ku Viena, ya mu Croácia ku Zagreb ni ya mu Sérvia ku Belgrado, te yakusongwela mulimo wa kwambujola ku chihela chacho. Haliapwila hita chifuchi hichapwa ni Mbetele.

Kupwa mu chifuchi chacho, chatutwalile kulilongesa limi liaha ni mianda yaha. Atu a ku chifuchi chacho te kakwamba ngwo, “Jezik je težek,” maliji waze analumbunuka ngwo: “Limi liapwa likalu.” Maliji wano kapwile amwenemwene! Twakomokene ha kumona ushishiko wa mandumbu jetu, matayiza kwalumuka chize chalingiwile mu ululikiso wa Yehova, nawa twamwene chize iye aawahishile. Cheka nawa, twamwene chize Yehova akululamisa yuma ni zango ha shimbu lialita. Twalilongesele yuma yinji muze twapwile mu Eslovênia. Chikwo nawa, yuma yize twaliangile kulilongesa yatukwashile kunyongonona mu yipikalo yize twapalikile ku Eslovênia.

Alioze kwalumuka chikwo te chinakundama. Ha 2000, yatutuma ku Costa de Marfim, mu África Ocidental. Alioze mumu lia jita, ha Novembro 2002, yituchinyina mu Serra Leoa. Jita yacho yambachile miaka 11 mba yihwe. Chapwile chikalu kuhichika Costa de Marfim ku tachi. Alioze yuma yize twalilongesele kunyima yatukwashile kupwa ni uwahililo.

Twalihulikilile hali atu waze te anazange kulilongesa umwenemwene ni hali mandumbu jetu a malunga ni a mapwo, waze anyongonwene ha miaka yinji ya jita. Ayo kapwile yiswale, alioze kazangile kulianyina ni akwo yize apwile nayo. Umwe ndumbu wa pwo kahanyine mazalo kuli Debbie, muze iye alitunyine kwatambula ndumbu wacho yamba ngwenyi: “Ha mashimbu a jita mandumbu a ku yifuchi yikwo kanakatukwasa, kashika wano kali mashimbu waze ni yetu twatamba kukwasa akwetu.” Hitunatesa kwimbulula chilweza cho.

Twafunyine ku Costa de Marfim, alioze mbwanja ya akwa-mafwefwe yiyineha cheka nawa upupilo. Kashika ha Novembro 2004, yatuchinyisa mu yimwe helicóptero, yize hita umwe ambachile wika mala ya 10 kilu. Twapombele hashi ha ufuku umuwika mu chilombo cha maswalele a mu França, mukwachako yatutwala ku Suíça. Muze twahelele ku Mbetele ha muchima ufuku, mandumbu a ku mutango ni alongeshi a Shikola ya Kulilongesa Milimo ya mu Ululikiso hamwe ni mapwo jo, yatutambula kanawa ni kutukangayika, yatwaha kulia cha kahia ni chocolate ya mu Suíça. Yino yatukwachile chinji ku mbunge.

Katutumine ha shimbu likehe ku Gana, mba kulutwe muze jita yatepulukile yitufuna mu Costa de Marfim. Zango lia mandumbu jetu liatukwashile kukumba kusakalala ni kwalumuka cha chiteli chetu. Yami ni Debbie tunatayiza ngwetu zango lia mandumbu jetu liakusoloka mu ululikiso weswe wa Yehova. Chipwe chocho kutushi kushimbwila ngwetu, kweswako mutuya zango liacho matusolwelalio mu mutapu umuwika ni kulelesa yize mandumbu jetu matulingila. Kwamba pundu, mashimbu jacho akalu, kapwile ngwe fumbo kuli yetu.

KU ORIENTE MÉDIO

Ha 2006 yatutumina mukanda kukatuka ku chishina chinene uze wasolwele ngwo twatambula chiteli chaha. Ha chisuho chino, yatutuma ku Oriente Médio. Cheka nawa, te twatamba kulilongesa limi liaha ni mianda yaha. Twanyingikile ngwetu mutulilongesa yuma yinji ku chihela chacho, kuze kwapwile ni kulingiwa mbwanja mu yuma ya mafwefwe ni ya mayingeleja. Twazangile chinji kalisa wa malimi yoze wapwile mu yikungulwila. Chipwe ngwe mandumbu kapwile a ku minyachi yeka ni yeka, nihindu kapwile alinunga mumu lia kukaula usongwelo wa Yehova. Twapwile ni kukomoka mandumbu jetu ha kumona chize apwile ni kukumba ni hamu yihungumiona kukatuka kuli asoko jo, alongi-ni-akwo, ni kuli akwa-milimo-ni-akwo.

Ha 2012 twayile ha kukunguluka chalipwila mu Tel Aviv, Israel. Chino chapwile kukunguluka chitangu chinene chize atu ja Yehova alingile mu chifuchi chacho chize ha Pentekoste 33 M.J. Kukunguluka chacho kutushi kuchivulama!

Ha miaka yacho, yatutuma hanga tuye ni kukalakala ku chifuchi chize mulimo wetu uli wakukanjisa. Twambachile yimwe mikanda, yituya ni kwambujola ni ha kukunguluka cha mbonge chize apwile ni kulinga mu yizavu yikehe-yikehe. Twapwile ni kumona maswalale waze ali ni mata ni kufunga majila sali ni sali, alioze twapwile ni kulivwa mu ufunge upema mumu twapwile ni kwenda ni amwe mandumbu a ku yihela yacho.

KUFUNA MU ÁFRICA

Ha 2013 yitutambula chiteli chalisa cha kuya ku Mbetele ya Congo Kinshasa, chimwe chifuchi chipema, alioze chikwete uswale unji nawa mwakulingiwa chinji jita. Ku uputukilo twambile ngwetu: “Twanyingika África; kashika kutuchi kupinda chinji.” Alioze kwapwile yuma yinji yize te twatamba kulilongesa, chipi-chipi muze twapwile ni kulinga wenyi ku yihela kuze kukwakapwile matapalo ni yau yipema. Twamwene yuma yinji yipema mu chifuchi chacho. Ngwe chilweza, mandumbu jetu kapwile ni kunyongonona ni uwahililo chipwe ngwe te kanapalika mu kapinda wa mbongo. Ayo te kakuzanga chinji kwambujola ni kusa tachi hanga aye ku kukunguluka cha chikungulwila ni cha mbonge. Twamwene chize Yehova awahishile mulimo wa Wanangana. Miaka yize twalinga mu mulimo wa shimbu lieswe mu Congo, yatulongesa yuma yilemu ni kutwaha masepa waze apwa asoko jetu.

Ku songo lia mwaka 2017, yitutambula chiteli chikwo chakuya ku África do Sul. Ku Mbetele jeswe twakalakala, yino ye Mbetele yinene. Muze twaheteleko, yatwaha milimo yize te kutwanyingikine. Cheka nawa, kwapwile yuma yinji yize te twatamba kulilongesa, alioze yuma yize twalilongesele kunyima yatukwashile. Twakuzanga chinji kunyingika mandumbu jetu a malunga ni a mapwo ashishika waze akunyongonona ha miaka yinji. Chikwo nawa, chakupema chinji kumona chize usoko wa Mbetele wakukalakala ni kulinunga chipwe ngwe kali a ku minyanchi yeka ni yeka. Chakupwa chashi kumona chize Yehova anawahisa atu jenyi ni sambukila mumu lia kuzala utu waha ni kukaula shimbi ja Mbimbiliya.

Ha kupalika cha miaka, yami ni Debbie twatambula yiteli yinji yipema, twejilila ni mianda yeka ni yeka ni kulilongesa malimi aha. Ha yisuho yimwe yuma kuyakapwile yashi, alioze mashimbu eswe twapwile ni kumona zango lia Yehova kupalikila mu ululikiso wenyi ni muli mandumbu jetu a hashi heswe. (Samu 144:2) Tuli ni shindakenyo ngwetu, fumbo lize twatambula mu mulimo wa shimbu lieswe, liatukwasa kupwa tuvumbi apema a Yehova.

Nakusakwilila chinji ha yeswe yize yisemi jami angulongesele, ha ukwaso wa mukwetu-pwo ni ha yilweza yipema ya mandumbu jetu ha hashi eswe. Muze yami ni mukwetu-pwo tunashimbwila chifuchi chaha, tunazange kununga ni kulilongesa yuma yinji kukatuka kuli Longesgi wetu Munene.