Mandumbu Aali Anjila mu Chizavu cha Tusongo
HA 5 OUTUBRO, 2024, katwanga mutambi walipwila ha kukunguluka cha ha mwaka: Ndumbu Jody Jedele ni ndumbu Jacob Rumph, Kaatongola hanga anjile mu chizavu cha tusongo cha Yela ja Yehova. Mandumbu wano kakukalakalila Yehova ni ushishiko ha miaka yinji.
Jody Jedele ni mukwo-pwo, Damaris
Ndumbu Jedele kasemukinyine ku Missouri, U.S.A, nawa kamulelele mu umwenemwene. Iye ni asoko jenyi, kapwile ku chihela kuze kwapwile akwa-kwambujola akehe. Mumu lia chino, iye yalinyingika ni mandumbu a ku yifuchi yeka ni yeka waze apwile kuya ku chihela chacho, hanga akwase mulimo wa kwambujola. Zango ni kulinunga cho chamukwachile chinji ku mbunge, chocho yamupapachisa ha 5 Outubro, 1983. Iye te kakuzanga chinji kwambujola, kashika muze ahwishile shikola, yaputuka kukalakala ngwe pionelu wa shimbu lieswe ha Setembro, 1989.
Muze te anayi ni kukola, ndumbu Jedele ni mwanakwo wa pwo, kapwile ni kwatwala kuli yisemi jo hanga aye ni kumeneka Mbetele. Chino chaakwashile kutesa hanga muze makola akaye ni kukalakala ku Mbetele. Ha Setembro, 1990, ndumbu Jedele yaputuka kukalakala ku Mbetele ya Wallkill. Mulimo wenyi utangu wapwile kukalakala ku Chipatulo cha Kukomba, mba ha kupalika cha amwe mashimbu, yamwaha mulimo wa kukalakala ku Chipatulo Chatala ha Yuma ya Uukiso.
Ha mashimbu jacho, kwapwile yikungulwila ya Espanhol hakamwihi yize te yinafupiwa ukwaso wa mandumbu. Chocho ndumbu Jedele yaya ni kukwasa chimwe cha ku yikungulwila yacho, ni kulilongesa limi lia Espanhol. Ha kupalika cha shimbu likehe, yalinyingika ni ndumbu Damaris, umwe pionelu wa shimbu lieswe. Chocho, yalimbata ni kuya chimuwika ku Mbetele.
Ha 2005, yaakatuka ku mbetele ni kuya ni kufunga yisemi jo. Ha shimbu liacho, o yaputuka mulimo wa pionelu wa shimbu lieswe. Ndumbu Jedele te kakukwasa ngwe longeshi ku Shikola ya Mulimo wa Pionelu, chikwo nawa te kakukalakala mu Chipatulo cha Akwa-kutala yuma ya Shipitali ni mu Chipatulo chatala ha milimo ya Akwa-kutunga.
Ha 2013, ndumbu Jedele ni mukwo-pwo, yaasanyika cheka ku Mbetele hanga akalakale ku mulimo wa kutunga ku Warwick. Chize haze, ayo yaputuka nawa kukalakala ku Patterson ni Wallkill. Ndumbu Jedele, te kakukalakala mu Chipatulo cha Kufunjeka ni Kutunga, ni Chipatulo cha Sango ja Shipitali. Ha Março 2023, yamutongola apwe chikwashi mu Chipatulo cha Serviço. Muze akwiuluka yiteli yino yeswe apwa nayo, yamba ngwenyi: “Muze mutambula chiteli chaha, mashimbu amwe mulivwa ngwe kuuchi kuhasa. Alioze watamba kwiuluka ngwe, nyi mujikijila muli Yehova, iye makupwisa cheswacho mazanga.”
Jacob Rumph ni mukwo-pwo, Inga
Ndumbu Rumph kasemukinyine mu California, U.S.A. Ku wanuke wenyi, naye kazeyele ku ufulielo. Alioze chipwe chocho, iye kapwile ni kumulongesa umwenemwene wa mu Mbimbiliya. Chikwo nawa, mwaka ha mwaka, Rumph kapwile ni kuya ni kumeneka kako yoze neye wapwile Chela cha Yehova wajama ku ufulielo. Iye kamukwashile kuzanga umwenemwene, kashika muze apwile ni miaka 13, yeta hanga aputuke kumulongesa umwenemwene. Ha 27 Setembro, 1992, muze te achili mukweze, yamupapachisa. Kulutwe, naye yakola cheka ku ufulielo, nawa asoko jenyi eswe yaputuka kujama chinji ku ufulielo mba yaapapachisa.
Ku ukweze wenyi, ndumbu Rumph te kakumona chize mapionelu akuwahilila. Kashika muze ahwishile shikola, iye yaputuka kukalakala ngwe pionelu wa shimbu lieswe ha 1995. Ha 2000, yalukila ku Equador kuze te kunafupiwa ukwaso wa akwa-kwambujola. Koko, yalinyingika ni ndumbu Inga, umwe pionelu yoze wakatukile ku Canada, chocho ha shimbu likehe, yaalimbata. Ayo yatwama mu yimwe mbonge yikehe ya mu Equador muze mwapwile akwa-kwambujola akehe. Musono, muli chikungulwila chize chinajame ku ufulielo.
Ha kupalika cha amwe mashimbu, ndumbu Rumph ni mukwo-pwo, yaatongola ngwe mapionelu alipwila, kulutwe yaatuma mu mulimo wa kumeneka yikungulwila. Ha 2011, yaasanyika ku shikola ya Ngiliate mu kalasa 132. Muze ahwishile kalasa, yaatuma ku yihela yeka ni yeka, ni kukalakala mu yiteli yeka ni yeka, ngwe ku Mbetele, mu mulimo wa mishionaliu ni kumeneka yikungulwila. Ndumbu Rumph kapwile nawa ni chiwape cha kukalakala ngwe longeshi ku Shikola ya Akwa-kwambujola Wanangana.
Mumu lia musongo wa COVID-19, ndumbu Rumph ni mukwo-pwo yaafuna cheka mu Estados Unidos. Ayo kaasanyikine ku Mbetele ya Wallkill kuze ndumbu Rumph atambwile fumbo lia kukalakala mu Chipatulo cha Serviço. Muze fumbo liahwile, yaatuma ku Mbetele ya Equador, kuze akalakalile mu Komite ya Mutango. Ha 2023, yaatuma ku Warwick. Ha Janeiro, 2024, ndumbu Rumph yamutongola hanga akalakale ngwe chikwashi wa mu Komite ya Serviço. Muze akunyonga ha yiteli yeswe yize apwa nayo, yamba ngwenyi: “Twalilongesa ngwetu, hi chihela ko chize twakukalakalila chakupwisa mulimo wetu ulemu, alioze atu waze twakukalakala no.”
Tunasakwilila chinji ha milimo yize mandumbu wano akulinga, ‘tunungenu ni kulemesa atu ngwe wano.’—Fwili. 2:29.