MUTWE WA KULILONGESA 51
MWASO 132 Hi Twapwa Mujimba Umuwika
Chize Munuhasa Kululieka Umbachiso Uze Muuhalisa Yehova
“Yuma yeswe yikalingiwe mu jila yalita chakuhona chizungo-zungo.”—1 KORI. 14:40.
YIZE MUTULILONGESA
Mutumona chize waze anazange kulimbata mahalisa Yehova ha tangwa lia umbachiso wo.
1-2. Yika Yehova anashimbwila ha tangwa lia umbachiso wenu?
SHINA nuli asandungi, nunalulieka umbachiso? Nyi chenacho, wano kali mashimbu apema chinji a ku mwono wenu. Kota nunalihulikila ha kululieka yuma ya ha tangwa liacho lilemu chinji. Yehova neye kanawahilila chinji. Iye kanazange hanga nuwahilile ni umbachisoa wenu ni kupwa ni mwono upema kulutwe lia matangwa.—Yishi. 5:18; Mwaso 3:11.
2 Chili chilemu chinji kuhalisa Yehova ha tangwa lia umbachiso, mumu iye katela. Mumu liaka twatamba kuchilinga? Nawa kuchi mutuhasa kuchilinga? Mutwe wa longeso lino, kanakaululieka hanga ukwase waze analilulieka hanga alimbate. Alioze yiyulo yize mutuwana ha mutwe uno, muyikwasa yetu eswe kuhalisa Yehova muze mutupwa ha umbachiso ni muze waze anazange kulimbata matwita twaehe chimwe chiyulo hakutwala ku chize malulieka umbachiso wo.
MUMU LIAKA UMBACHISO WENU WATAMBA KUHALISA YEHOVA?
3. Muze asandungi analulieka umbachiso yika atamba kukaula nawa mumu liaka?
3 Lunga ni pwo waze analulieka umbachiso wo, katamba kuululieka kulita ni shimbi ja Yehova jize jili mu Mbimbiliya. Mumu liaka? Mumu Yehova mwe watungile ulo. Iye mwe walingile ulo utangu ha kununga Alama ni Eva ngwe lunga ni pwo. (Uputu. 1:28; 2:24) Kashika asandungi muze analulieka umbachiso, katamba chitangu kukaula yiyulo ya Yehova yize muyimuhalisa.
4. Chuma chika muchihasa kutwala asandungi ahalise Yehova ha tangwa lia umbachiso wo?
4 Chuma chikwo chize muchinutwala kulemesa Yehova muze nunalulieka umbachiso wenu, chili: Yehova kali Tatenu wa mu malilu nawa sepa lienu mupema chinji. (Hepre. 12:9) Kashika, yenu kunuchi kuzanga kulinga chuma nichimwe ha tangwa liacho hanji ha tangwa likwo, chize muchivwisa kupihia Yehova. (Samu 25:14) Muze nwakunyonga ha yuma yeswe yize Yehova hanalingi ni yize akunulingila, shina kunwanyongene ngwenu tangwa lia umbachiso wenu, liatamba kumuhalisa?—Samu 116:12.
KUCHI MUNUHASA KUHALISA YEHOVA HA TANGWA LIA UMBACHISO WENU?
5. Kuchi Mbimbiliya muyihasa kukwasa waze anazange kulimbata alulieke kanawa umbachiso wo?
5 Mbimbiliya kuyishi kusolola unji wa shimbi jize waze anazange kulimbata atamba kukaula ha tangwa lia umbachiso wo. Kashika waze analulieka ulo, mahasa kuulinga kulita ni uhashi wo, kulita ni mianda ya kuze atwama hanji kulita ni yuma yize ayo akuzanga. Alioze Akwa-Kristu amwenemwene, katamba kwononokena shimbi ja nguvulu hakutwala ku ulo. (Mateu 22:21) Kwamba umwenemwene, muze waze anazange kulimbata akukaula shimbi ja Yehova, kakuhalisa Yehova ni kumuvwisa kuwaha. Hachino, yiyulo yika ayo atamba kwiuluka?
6. Mumu liaka chili chilemu kuli waze anazange kulimbata kukaula shimbi ja nguvulu jinatale ha umbachiso?
6 Ononokenenu shimbi ja nguvulu. (Roma 13:1, 2) Mu yifuchi yinji, waze anazange kulimbata katamba kukaula shimbi jimwe ja nguvulu jinatale ha umbachiso. Waze anazange kulimbata katamba kunyingika yize nguvulu akufupa ku chihela chize ayo atwama. Nyi kunwanyingikine kuze munuhasa kuwana sango hakutwala ku yikuma yino, hulenu makulwana a mu chikungulwila hanga anukwase.b
7. Kuchi watamba kupwa umbachiso wa Akwa-Kristu?
7 Sako shindakenyo ha yize muyikalingiwa ha umbachiso. (1 Kori. 10:31, 32) Umbachiso wenu watamba kusolola muhuko wa spiritu ya Zambi, shimbu usolole spiritu ya hano hashi. (Ngala. 5:19-26) Kulita ni shimbi ja mu Mbimbiliya jinatale ha wata wa mu usoko, sandungi mwe watamba kusa shindakenyo hanga chiwanyino chacho chikapwe cha uwahililo nawa chalinanga. Yika muyihasa kumukwasa kuchilinga? Asandungi anji kakusakula kwalingila pande ja umbachiso jize jakukatuka mu Mbimbiliya. Muze pande jacho akujilinga ni zango ni vumbi, jakukwasa eswe anyingike ngwo, ulo uli chawana cha Yehova. Pande jacho nawa jakukwasa waze akupwa ha kukunguluka chacho, alemese chiwanyino chacho. Kashika muze asandungi anji akunyonga ha chikuma chino, o kakusakula hanga pande jacho ajilingile mu Zuwo lia Wanangana. Nyi munuzanga hanga pande jenu ja umbachiso ajilingile mu Zuwo lia Wanangana, nwatamba kulianga kutuma umwe mukanda ku chizavu cha makulwana a mu chikungulwila.
8. Nyi ngwe munukalinga chiwanyino ha tangwa lia umbachiso wenu kuchi munuhasa kusa shindakenyo ngwenu chiwanyino chacho muchikahalisa Yehova? (A-Roma 13:13)
8 Tanga A-Roma 13:13. Nyi munutesa kulinga chimwe chiwanyino ha tangwa lia umbachiso wenu, yika munuhasa kulinga hanga chiwanyino chacho chihone kupwa ni spiritu ya hashi? Liji lia Ngregu analumbununa ngwo “yiwanyino ya chimbangwinya,” yinachingi kuzengewa ni chizungo-zungo cha miaso yize akwimbisa ni kuhianyisa ndo ha muchima ufuku. (Tala “yiwanyino ya chimbangwinya,” ha nota mu Mbimbiliya ya estudo ha A-Roma 13:13.) Nyi munuzanga kuhana walwa ha umbachiso wenu, nyongenu ha yize munuhasa kulinga hanga niumwe ahone kunwa chinji.c Nyi munukembisa miaso, nwatamba kukokolola volume hanga atu waze makapwaho ahase kuhanjika. Munuhasa kulianga kwivwa miaso yize munukembisa ni kutala sona jacho hanga nukahone kutalingisa akwenu.
9. Yika asandungi atamba kusa shindakenyo hakutwala ku yiheho yize makasa ha tangwa lia umbachiso?
9 Shina nunatese nukasolole yinema, yizulie yenu hanji yiheho yikwo nawa? Hanji umwe yoze nwasanyikanga ha chiwanyino chenu, mazanga kuhanjika amwe maliji hakutwala kuli asandungi. Yuma ngwe yino, muyihasa kuneha chiseke ha tangwa lia umbachiso. Chipwe ngwe munukalinga yuma yeswayo ha tangwa liacho, nihindu nwatamba kusa shindakenyo ngwenu, yuma yeswe muyikapwa yipema. (Fwili. 4:8) Lihulenu ngwenu: ‘Shina yize mutukalinga muyikasolola vumbi hali atu?’ ‘Muyikalemesa umbachiso?’ Chahiana ulemu, ‘shina muyikahalisa Yehova?’ Kwamba umwenemwene, kulinga yuma yize muyivwisa atu kuwaha hi chipi ko, alioze nwatamba kukeya hanga yuma yacho yihone kupwa yize muyitwala atu anyonge ha yuma ya utanji. (Efwe. 5:3) Nyi asoko jenu hanji masepa mafupa kuhanjika yimwe ha mashimbu a chiwanyino, senu shindakenyo ngwenu ayo kananyingika kanawa yize atamba kwamba ni yize atamba kulinga.
10. Mumu liaka waze anazange kulimbata atamba kupwa akwa-kulikehesa muze analulieka umbachiso wo? (1 Yoano 2:15-17)
10 Pwako mukwa-kulikehesa. (Tanga 1 Yoano 2:15-17.) Yehova kakuwahilila chinji muze tuvumbi twenyi akumuhalisa shimbu alihalise ene. Kashika, Mukwa-Kristu yoze walikehesa keshi kukisa mbongo jinji hanji kusolola yuma yeswe yize alinayo ha tangwa lia umbachiso. Yika munuyuka ha kulinga umbachiso washi? Tutalenu chilweza cha Mike, wa ku Noruega. Iye yamba ngwenyi: “Yetu kutwakatambwile mikuli, chino chatukwashile kununga mu mulimo wetu wa upionelu. Umbachiso wetu wapwile washi, alioze chikalu kuuvulama.” Tabitha, umwe ndumbu wa pwo wa ku Índia yamba ngwenyi: “Yetu tunakehuka kusakalala chinji mumu umbachiso wetu wapwile washi, twapwile ni yuma yikehe ya kululieka nawa kutwakapwile ni mashimbu a kulihangujola.”
Ku chihela kweswako nuli, umbachiso wa Akwa-Kristu muuhasa kupwa washi, upema, nawa uze atu kechi kavulama (Tala paragrafu 10-11)
11. Kuchi asandungi mahasa kusolola ngwo kali akwa-kulikehesa ha chize malilulieka ni yuma yize makazala? (Tala nawa yizulie.)
11 Shina hinunatese yize munukazala ha tangwa lia umbachiso wenu? Kwamba umwenemwene, nunazange kusoloka kanawa. Chipwe ku mashimbu a kunyima sandungi ni nandungi, te kakusakula kanawa yize mazala. (Iza. 61:10) Chikwo nawa, mazalo waze munukazala ha tangwa lia umbachiso wenu, makalisa lume ni waze nwakuzala tangwa ni tangwa. Alioze chipwe chocho, mazalo jacho katamba kupwa ahomboka nawa akusolola vumbi. (1 Timo. 2:9) Kanda nwecha yize munukazala hanji chuma chikwo cheswacho, chikapwe chuma chilemu chinji ha tangwa lia umbachiso wenu.—1 Petu. 3:3, 4.
12. Mumu liaka asandungi atamba kwehuka mianda yeswe yize akulinga kuze atwama ha tangwa lia umbachiso yize kuyalitele ni shimbi ja mu Mbimbiliya?
12 Ehukenu mianda yize kuyalitele ni shimbi ja Mbimbiliya. (Uso. 18:4) Mu chifuchi chino cha Satana, umbachiso unji uze atu analingi unazala too ni mianda ya akwa-mayingeleja a mahuza ni yuma ya mahamba hamwe ni yipupu. Yehova kakutulweza hanga tupwe kusuku ni yuma yino ya luchisa. (2 Kori. 6:14-17) Nyi ngwe nunakakajana ha mianda yimwe yize akulinga ha tangwa lia umbachiso kuze nwatwama, hengwolenu ha chikuma chacho ni kuhengwola nawa shimbi ja mu Mbimbiliya numone yize munukalinga ha tangwa lia umbachiso wenu.
13. Kuchi asandungi mahasa kupwa ni nyonga lia Yehova hakutwala ku yawana?
13 Shina kuze nwatwama chili chako kuhana yawana kuli waze malimbata? Yawana kakuyihana kulita ni mbongo jize mutu akwete. Akwa-Kristu kakwakolweza ahane yawana mumu kakuwahilila ha kuchilinga. (Yishi. 11:25; Yili. 20:35) Alioze, kutwazangile kusolola kuli waze mutusanyika ngwe tunashinjila hanga atwehe yawana, chipwe kwasolwela ngwo kutuchi kuwahilila nyi matwaha yawana ya ndando yikehe. Twakwimbulula Yehova ha kupwa ni nyonga lienyi hakutwala ku yawana. Muze twakuchilinga, twakwecha hanga akwetu atwehe yawana ni mbunge yo yeswe kulita ni uhashi wo.—2 Kori. 9:7.
KWEHUKA NI KUKUMBA YIPIKALO
14. Kapinda muka asandungi amwe akupalika?
14 Hanji munupalika mu umwe kapinda muze nunalulieka umbachiso uze muuhalisa Yehova. Ngwe chilweza, muchihasa kupwa chikalu kululieka umbachiso washi. Charlie, yoze watwama ku Ilhas Salomão yamba ngwenyi: “Chapwile chikalu chinji kusakula atu waze mutusanyika. Yetu tukwete masepa anji chikwo nawa, ku munyachi wetu atu eswe kakushimbwila kwasanyika.” Tabitha, yoze twatongolanga kunyima yamba ngwenyi: “Kuze natwama chili chako kulinga yiwanyino yinene-yinene ya umbachiso. Kwapalikile mashimbu anji mba yisemi jetu atayize nyonga lietu lia kusanyika atu 100 wika.” Sarah yoze watwama ku Índia yamba ngwenyi: “Atu amwe, kakulemesa chinji mbongo ni lufuma wa atu. Asonyi jami hi Yela ja Yehova ko, alioze kalingile umbachiso wa mbongo jinji. Kashika ni yami yingumona ngwami, natamba kulinga umbachiso uze muhiana wa ayo.” Yika muyihasa kukwasa waze anazange kulimbata akumbe kapinda yono?
15. Mumu liaka kulemba chili chilemu kuli waze analulieka umbachiso?
15 Lembenu ha yize nunatese kulinga ha umbachiso wenu. Yenu munuhasa kulemba kuli Yehova ha yuma yeswayo ni kwazulula mbunge jenu, hanga numulweze chize nunalivwu. (Tala nawa “mu yuma yeswe” ha nota mu Mbimbiliya ya etudo ha Fwili. 4:6, 7) Munuhasa kumwita nawa hanga anukwase kukwata yiyulo yipema, nulihumikize muze munusakalala, nupwe nawa ni hamu muze muchifupiwa. (1 Petu. 5:7) Muze munumona ngwenu Yehova kanakumbulula yilemba yenu, ujikijilo wenu muli iye muwoka chinji. Tabitha yoze hitwatongola kulu yamba ngwenyi: “Yetu twapwile ni kwivwa woma wa kulihangujola umwe ni mukwo hanji ni asoko jetu. Kashika, shimbu lieswe muze te twakuhanjika hakutwala ku kululieka umbachiso wetu, chitangu te twakulemba. Twamwene ukwaso wa Yehova nawa twapwile ni sambukila.”
16-17. Kuchi kulihanjikisa kanawa chakukwasa kululieka umbachiso?
16 Hanjikenu ni vumbi ha yuma yeswe yize munutesa. (Yishi. 15:22) Yenu munufupa kukwata yiyulo yinji yinatale ha umbachiso. Ngwe kusakula tangwa, mbongo jingahi munukahwisa, atu waze munukasanyika ni yuma yikwo nawa. Shimbu kanda nuchikwata chimwe chiyulo hakutwala ku yikuma yino, hengwolenu shimbi ja mu Mbimbiliya jize mujinukwasa. Kaulenu nawa yiyulo yize manwaha kuli mandumbu a malunga ni a mapwo waze ajama. Muze munuhanjika hakutwala ku yuma yize nwakuzanga, pwenu yimbovu ni kupwa atu ashi. Ngwe chilweza, nyi ngwe yisemi jenu manwita chimwe chuma mba munumona ngwenu chili mu uhashi wenu kuchilinga, senu tachi hanga nuchilinge. Mumu chiwanyino chacho, chili chilemu chinji nawa kuli ayo. Alioze nyi munumona ngwenu kunuchi kuhasa kulinga yize ayo manwita, alumbunwinenu ni vumbi. (Kolo. 4:6) Lwezenu usoko wenu ngwenu chuma chilemu ha umbashiso wenu chili kulinga chimwe chiwanyino cha uwahililo chize muchihalisa Yehova.
17 Nyi yisemi jenu hi Yela ja Yehova ko, muchihasa kupwa chikalu chinji kwalumbunwina yize nunazange kulinga ha umbachiso wenu. Alioze munuhasa kwalumbunwina manyonga jenu ni vumbi. Ndumbu Santhosh wa mu Índia yamba ngwenyi: “Asoko jetu kazangile hanga tulinge mianda ya ku munyachi wetu ha tangwa lia umbachiso wetu. Twambachile mashimbu anji mba twalweze yize twatesele kulinga ha umbachiso wetu. Twalumwine yimwe yuma yize twamwene ngwetu chipwe mutuyilinga, te kutuchi kuvwisa Yehova chinyengo. Ngwe chilweza, twatepulwile kulia chimwe chize ayo keshi kuzanga ni kusaho chize akuzanga, yitutesa nawa kuhona kwimba chipwe kukina mumu ayo keshi kuzanga kulinga yuma yino.”
18. Yika munuhasa kulinga hanga yuma yeswe yende kanawa ha tangwa lia umbachiso? (1 A-Korindu 14:40) (Tala nawa chizulie.)
18 Tesenu kanawa yuma. Nyi nwalulieka kanawa yuma, chino muchinukwasa hanga nuhone kusakalala chinji ha tangwa lia umbachiso. (Tanga 1 A-Korindu 14:40.) Wayne, wa ku Taiwan yamba ngwenyi: “Muze te hikwasala mashimbu akehe hanga tulinge umbachiso wetu, yitulikungulula ni atu waze alihanyine hanga atukwase. Chocho yituhanjika ha yize twatesele hamuwika ni kulilulieka chikehe hanga tutale nyi yuma yeswe yili kanawa.” Chikwo nawa, mba nukasolole vumbi kuli atu waze munukasanyika, luliekenu kanawa yuma hanga yeswe yikaputuke kulita ni mashimbu waze hinunatese.
Kulianga kululieka yuma shimbu kanda umbachiso uchilingiwa, muchihasa kukwasa hanga yuma yeswe yikende kanawa (Tala paragrafu 18)
19. Yika muyinukwasa hanga yuma yeswe yende kanawa ha tangwa lia umbachiso wenu?
19 Kapinda munji munuhasa kumukumba nyi nwalianga kulilulieka. (Yishi. 22:3) Ngwe chilweza, nyi ngwe ku chihela kuze nwatwama atu kakusoloka ha chiwanyino chipwe ngwe kunwasanyikine, nyongenu ha yize munuhasa kulinga hanga kuhone kusoloka kapinda. Liangenu kwalweza yize munukalinga ha umbachiso wenu, ni kwalweza nyonga lienu hakutwala ku mianda yimwe yize kunuchi kalinga ha umbachiso wenu. Munuhasa kulianyina no chikuma, “O que acontece em um casamento de Testemunhas de Jeová?” chili ha jw.org. Nyi nunazange hanga yuma yeswe yikende kanawa, ha tangwa lia umbachiso wenu, nwatamba kwita kuli umwe ndumbu yoze wajama hanga apwe “kasongo wa umbachiso.” (Yoa. 2:8) Nyi nwamulweza kanawa yize nunazange hanga yikalingiwe ha umbachiso wenu, iye masa tachi hanga yuma yilingiwe kulita ni chize yenu nwatesele, ni kusa shindakenyo ngwo, chiwanyino chacho muchikasolola vumbi.
20. Yika asandungi atamba kwiuluka hakutwala ku umbachiso wo?
20 Munuhasa kusakalala chinji mumu lia kululieka umbachiso. Alioze yiulukenu ngwenu, umbachiso wakulingiwa ha tangwa limuwika wika. Lili tangwa litangu lize mulihasa kupwa lipema chinji, tangwa lize mulihasa kunununga hanga nuputuke kuwayila Yehova hamuwika. Kashika, lingenu yeswe yize munuhasa hanga umbachiso wenu upwe upema nawa washi. Jikijilenu muli Yehova. Ni usongwelo wenyi, yenu munuhasa kululieka kanawa umbachiso wenu. Mba muze munukeuluka mashimbu jacho, munukanyonga wika ha yuma yipema chakuhona kuliseha.—Samu 37:3, 4.
MWASO 107 Zango Lize Akusolola Zambi
a ULUMBUNWISO WA AMWE MALIJI: Ku minyachi yimwe, ha tangwa lia umbachiso waze akulimbata kakulinga yilakenyo yo kumeso ja Zambi. Asandungi amwe, kakulinga chiwanyino haze akusanyika masepa ni asoko jo. Alioze ku yihela yikwo kuze keshi kulingako yiwanyino ya umbachiso, nihindu chili chilemu waze malimbata kukaula shimbi ja mu Mbimbiliya ha tangwa lia umbachiso wo.
b Nyi munuzanga kunyingika sango jikwo, hakutwala ku yize Akwa-Kristu akulinga hanga akaule shimbi ja nguvulu hakutwala ku umbachiso, tala chikuma, “Casamentos honrosos à vista de Deus e do homem” ha Kaposhi wa Kutalila 15 Outubro, 2006.
c Tala chinema ha jw.org Shina Hatamba Kupwa Walwa?