SHINA UNEWULUKA?

Shina watanga mitwe ya Tuposhi eswe a mwaka uno? Tala nyi muhasa kukumbulula yihula yino:

Mumu liaka twakuhalisa Yehova?

Twakuhalisa Yehova, mumu twakumuvumbika chinji ni kumuzanga. Twakuhalisa nawa Yehova mumu twakuzanga hanga akwetu amunyingike.—w25.01, lifwo. 3.

Muze umwe makulemeka ku mbunge yika muyikukwasa kumukonekena?

Kanda tulengulula chize tunalivwu ku mbunge; Kwecha kutulika toto, chili chawana chize twakuliaha yetu ene, chakutukwasa kwehuka ufwatulo ni kununga ni kuwahilila ku mwono.—w25.02, lifwo. 15-16.

Mumu liaka kambaji Marku ali chilweza chipema kuli mandumbu jetu akweze?

Marku katayijile kuya ni kukalakala ku chihela cheka. Chipwe ngwe iye kota kanenganyanyine chinji ni kupihilila muze kwalingiwile yimwe, nihindu iye kakalitwaminyine. Iye kapwile ni usepa upema ni Paulu hamwe ni Akwa-Kristu akwo waze te akwete ufulielo ukolo.—w25.04, lifwo. 27.

Yika Yesu azangile kwamba muze alembele ngwenyi: “Yami naanyingikisa jina lienu, mungukaanyingikisalio cheka.”? (Yoano 17:26)

Yesu kakalwezele wika tumbaji twenyi ngwo jina lia Zambi, Yehova. Alioze kaalongesele ulumbunwiso wa jina liacho, kuchingako, upale wenyi hano hashi, yize makalinga kulutwe ni yitanga yenyi.—w25.05, lifwo. 20-21.

Nyi twapwa akwa-kulikehesa, yika mututayiza?

Mututayiza ngwetu yetu kutwanyingikine yuma yimwe. Ngwe chilweza, kutwanyingikine tangwa lize songo muliza hanji yize Yehova mahasa kulinga. Ewa, kutwanyingikine yize muyikalingiwa hamene nawa kutwanyingikine ndo haze Yehova atunyingikina.—w25.06, lifwo. 15-18.

Yika muyihasa kutukwasa hanga tuyuke ha pande?

Mutuhasa kulihula ngwetu: Yuma yika ashindakenya yize muyikwasa atu waze ali ha mbunga?’ ‘Shina katongolaho chilweza chize ni yami munguhasa kutongola muze ngunalongesa?’ ‘Iya mazanga yikuma yacho?’—w25.07, lifwo. 19.

Yika twalilongesa ha ukonekeno wa Yehova hakutwala ku chize atalile ha mulonga wa Ndawichi?

Chipwe ngwe Ndawichi kalingile shili yinene ku mwono wenyi, alioze muze alikonyekene ni mbunge yeswe, Yehova yamukonekena. (1 Mia. 9:4, 5) Muze Yehova akukonekena shili yetu, iye keshi kuyiwuluka nawa chipwe kutumwesa lamba mumu lia shili yacho.—w25.08, lifwo. 17.

Nyi ngwe longi wa Mbimbiliya kakwachile kanawa chikuma yika mutuhasa kulinga?

Nyi ngwe longi wa Mbimbiliya kakwachile kanawa chikuma chipwe ngwe wasa tachi jinji hanga umukwase, nungenu ni longeso mba hanyima nufunyine ha chikuma chacho.—w25.09, lifwo. 24.

Mbimbiliya yakwamba ngwo shili yikwete “ndundo ja kwonga.” (Hepre. 3:13) Mu mutapu uka?

Shili muyihasa kututwala tulinge yuma yipi. Muyihasa nawa kututwala tuyambashane nyi chamwenemwene Zambi kakutuzanga lume.—w25.10, lifwo. 16.

Yuma yika yitatu yize muyihasa kupemesa yilemba yetu?

(1) Mutuhasa kunyonga ha yitanga ya Yehova. (2) Mutuhasa kunyonga ha yize tunapalika ni kuyita mu yilemba ngwe kwita ukwaso hanga tukonekene umwe mutu. (3) Mutuhasa kushimbula muze tunalembe mumu chino muchitukwasa kwazulula mbunge yetu ni kuhanjika yize tunanyongo.—w25.10, lifwo. 19-20.

Kuchi mutuhasa kukwasa tushinakaji?

Muhasa kuya ni kumeneka tushinakaji hanji kwasanyika ku telefone. Mutuhasa nawa kwakaula ku shipitali. Chikwo nawa, mutuhasa kukalakala ni tushinakaji mu majila eka ni eka mu mulimo wa kwambujola.—w25.11, lifwo. 6-7.

Yika muyihasa kukwasa Akwa-Kristu kulinga umbachiso uze muuhalisa Yehova?

Kwononokena shimbi ja nguvulu ha chikuma chinatale ha umbachiso. Kusa shindakenyo ngwo umbachiso wacho muusolola muhuko wa spiritu ya Zambi. Kuzala mazalo ahomboka ni kwehuka mianda yize kuyalitele ni shimbi ja mu Mbimbiliya. Kulihanjikisa kanawa muze munululieka umbachiso wenu.—w25.12, lifwo. 21-24.