Kanda Wecha Hanga Uhenge Wa Akwenu Ukutalingise

1, 2. Kuchi Mbimbiliya yambile hakutwala ku kwoka cha atu ja Yehova?

HASHI heswe, hali ululikiso umuwika uze wakulongesa atu hanga azange Yehova ni kuzanga kumulingila. Atu jacho kakwavuluka ngwo Yela ja Yehova. Chipwe ngwe o kali akwa-shili nawa ha mashimbu amwe kakuhengesa, nihindu Yehova kakwaasongwela ni spiritu yenyi yisandu. Tutalenu amwe maliji waze iye akwaawahishilamo.

² Ha mwaka 1914, atu akehe wika e te akuwayila Yehova. Alioze Yehova kakuwahisa mulimo wo wakwambujola. Haliapwila, tununu twa atu kanalilongesa umwenemwene wa Mbimbiliya nawa kanapu Yela ja Yehova. Yehova hanasolola kwoka chacho muze ambile ngwenyi: “Mukepe wahiana kumakapwa vungu lia ndundo. Yami nguli Yehova, mungutambwisa chuma chino ha mwaka wacho.” (Izaia 60:22) Musono, mutuhasa kumona ngwetu uprofeto uno unamanunuka. Atu ja Yehova kali ngwe limwe vungu linene chinji. Hano hashi hali yifuchi yinji yize hita chifuchi atu jamo akehe chinji kuhiana atu ja Yehova.

3. Kuchi tuvumbi twa Zambi akusolola zango?

³ Ha matangwa wano akusula, Yehova kakukwasa atu jenyi hanga akolese zango lio muli umwe ni mukwo. Ayo kakwimbulula Zambi, mumu “Zambi iye zango”. (1 Yoano 4:8) Yesu kalwezele tumbaji twenyi hanga ‘alizange umwe ni mukwo.’ Iye yamba nawa ngwenyi: “Ku chino eswe makanyingika yenu nuli tumbaji twami, nyi munupwa ni zango umwe kuli mukwo.” (Yoano 13:34, 35) Ha mashimbu jetu, tuvumbi twa Yehova kakusolola zango lino kuli umwe ni mukwo chipwe muze mu yifuchi mwakupwa jita. Chakutalilaho, ha jita yamuchiali ya hashi heswe, tununu 55 a tununu twa atu kaashihile ku jita yacho. Alioze atu ja Yehova kakashihile mutu niumwe mu jita yacho. (Tanga Mika 4:1, 3.) Chino chakwaakwasa ‘kusamba ku manyinga ja atu eswe.’—Yilinga 20:26.

4. Mumu liaka kwoka cha atu ja Yehova chinakomwesa?

⁴ Atu ja Zambi machinunga ni kwoka chipwe ngwe kali ni mukwa-kole wa ndundo jinji, mwe Satana. Iye kali “zambi ya mwakono.” (2 A-Korindu 4:4) Satana kanasongwela ululikiso wa mafwefwe hano hashi, ni akwa-sango ja yifuchi, iye kakuzachisa yuma yacho hanga akwike mulimo wa kwambujola sango lipema. Alioze iye kechi kuhasa kuukwika. Mumu, Satana kananyingika ngwenyi, shimbu likepe wika alinalio, kashika ananungu ni kutupinjisa hanga tweche ni kuwayila Yehova.—Usolwelo 12:12.

SHINA MUSHISHIKA MUZE AKWENU MAHENGESA?

5. Mumu liaka ha mashimbu amwe akwetu mahasa kutulemeka ku mbunge? (Tala chizulie ha uputukilo.)

⁵ Tuvumbi twa Zambi kananyingika ngwo chili chilemu kuzanga Zambi ni kuzanga atu akwo. Yesu kambile ngwenyi: “Ukazange Mwene Zambi ye ni mbunge ye yeswe, ni mwono we weswe, ni kunyonga che cheswe. Lino lie liji litangu kanda linene lia shimbi. Mba liamuchiali lialifwa nalio ngwo, Ukazange mwenyembo we ngwe wakulizanga yena mwene.” (Mateu 22:35-39) Alioze, Mbimbiliya yinasolola ngwo atu eswe kakusemuka yihenge ha mukunda wa shili ya Alama. (Tanga A-Roma 5:12, 19.) Kashika, ha mashimbu akwo atu amwe mu chikungulwila mahasa kutwamba hanji kutulinga chuma chize muchitulemeka ku mbunge. Nyi chino muchilingiwa, yika twamba kulinga? Shina zango lietu kuli Yehova mulinunga ni kukola nyi? Kutala mutushishika kuli iye ni kuli atu jenyi? Mbimbiliya yinatulweza hakutwala kuli amwe tuvumbi twa Zambi waze ambile hanji alingile yuma yize yalemekene akwo ku mbunge. Tutalenu yize mutulilongesa ha yize yalingiwile kuli ayo.

6. Yika yinasolola ngwo Eli kakafumbile kanawa ana jenyi?

⁶ Chakutalilaho, Eli kapwile sasendote wa lutwe mu Izalele, alioze ana jenyi aali kehukile shimbi ja Yehova. Mbimbiliya yinambe ngwo: “Ana ja Eli o kapwile atu amokomoko, kanyingikine Yehova.” (1 Samuele 2:12) Eli kanyingikine ngwenyi, ana jenyi te kakulinga chinji yuma yipi. Chipwe chocho, iye kakaafumbile kanawa. Hakupalika cha mashimbu, Yehova yecha Eli ni ana jenyi aali hanga afwe. Hi kulutwe lia matangwa, munyachi wa Eli ya uchiza chiteli cha kukalakala ngwe asasendote a lutwe. (1 Samuele 3:10-14) Nyi yena wapwile ha mashimbu jacho nawa munyingika ngwe iye kaneche ana jenyi hanga alinge yuma yipi, shina te muutalinga? Shina chikuma chino kachi chatepulwile ufulielo we, ni kwecha kuwayila Yehova?

7. Shili yika yinene Ndawichi alingile, nawa yika Zambi alingile ha chikuma chacho?

⁷ Ndawichi kapwile ni yitanga yipema, kashika Yehova amuzangile chinji. (1 Samuele 13:13, 14; Yilinga 13:22) Alioze chipwe Ndawichi neye kalingile yuma yipi chinji. Muze Uriya ayile ni kwasa jita, Ndawichi yalisumbakenya ni pwo lia Uriya, Bate-Shipa, aye yapwa ni ufumba. Ndawichi kakazangile hanga atu akwo anyingike yuma yize alingile. Ha chino, aye yasanyika Uriya hanga eze kuli iye ni kweseka kumushinjila hanga aye ni kupomba ku zuwo lienyi. Ndawichi te kanashimbwila hanga Uriya alisumbakenye ni mukwo-pwo Bate-Shipa hanga atu anyonge ngwo Uriya mwe te tato ya mwana yoze masemuka. Uriya kakayile ni kupomba ku zuwo lienyi. Ha chino, Ndawichi yasa tachi hanga Uriya amushihe ku jita. Ha mukunda wa shili yenyi yinene, Ndawichi ni asoko jenyi yamona lamba linji. (2 Samuele 12:9-12) Chipwe chocho, Yehova yamusolwela keke ni kumukonekena. Yehova kanyingikine ngwenyi, Ndawichi te kakuzanga kulinga yuma yize yalita. (1 Mianangana 9:4) Nyi yena te watwama ha mashimbu jacho, kachi kuchi wewile ha yize Ndawichi alingile? Shina kachi wechele kuwayila Yehova?

8. (a) Kuchi postolo Petulu ahonene kumanununa maliji jenyi? (b) Muze Petulu ahengesele, mumu liaka Yehova anungine ni kuzachisa Petulu?

⁸ Chilweza chikwo cha Mbimbiliya chili cha postolo Petulu. Yesu kasakwile Petulu hanga apwe postolo. Chipwe chocho, Petulu ha mashimbu amwe te kakuhanjika ni kulinga yuma yize te kuyishi kulita. Chakutalilaho, Petulu kambile ngwenyi te kechi kwehuka Yesu chipwe ngwe akwo eswe mamwehuka. (Marku 14:27-31, 50) Alioze muze akwachile Yesu, apostolo eswe, hamwe ni Petulu, yamwehuka. Nawa ha yisuho yitatu, Petulu yamba ngwenyi, te kanyingikine Yesu. (Marku 14:53, 54, 66-72) Chipwe chocho, Petulu kevwile yinyengo yinji hakutwala ku yuma yize iye alingile. Ha chino, Yehova yamukonekena ni kununga ni kumuzachisa. Nyi wapwile kambaji ka Yesu ha mashimbu jacho ni kunyingika yuma yize Petulu alingile, kachi wanungine ni kufuliela muli Yehova?

9. Mumu liaka watamba kufuliela ngwe Zambi kakwete ululi mashimbu eswe?

⁹ Ha yilweza yino, twamona ngwetu amwe tuvumbi twa Yehova te kakulinga yuma yipi ni kulemeka akwo ku mbunge. Nyi chino muchilingiwa musono yika watamba kulinga? Shina mwecha kuya kukunguluka hanji kuvulama Yehova hamwe ni atu jenyi? Nyi hanji munyingika ngwe Yehova kali mukwa-keke nawa iye mahasa kushimbwila hanga mutu wacho alikonyeke? Chipwe chocho, mukuhasa kupwa mashimbu waze mutu yoze wavulumuna mahona kwivwa yinyengo ha yize alinganga. Shina ena mufuliela ngwe Yehova kananyingika chikuma chacho, nawa ngwe ha shimbu lialita malulieka yuma yacho? Nyi muchilita iye mahasa kusosolola mutu wacho mu chikungulwila. Kutala mutayiza ngwe Yehova nihindu manunga ni kulinga yuma yize yalita nawa ya ululi?

NUNGA NI KUSHISHIKA

10. Yika Yesu anyingikine hakutwala ku uhenge wa Yundase Ka-Keriote ni Petulu?

¹⁰ Mu Mbimbiliya, twakutanga hakutwala kuli atu anji waze anungine ni kushishika kuli Yehova ni kuli atu jenyi chipwe ngwe atu waze te atunga no te kakulinga yuma yipi. Yesu kali chilweza chipema. Muze te hapalikisa ufuku wamuwundu ni kwita ukwaso kuli Tato, mba yasakula apostolo 12. Alioze umwe wa kuli ayo, yoze te avuluka ngwo, Yundase Ka-Keriote, kulutwe lia matangwa yakunjika Yesu. Nawa postolo Petulu kambile ngwenyi, aye te kanyingikine Yesu. (Luka 6:12-16; 22:2-6, 31, 32) Yesu kakalamikijile Yehova hanji kwehuka tumbaji twenyi mumu ngwo amwe te kakumuvwisa chinyengo. Alioze Yesu kanungine ni kukundama kuli Tato ni kumuwayila ni ushishiko weswe. Ha chino, Yehova yamuwahisa ha kumuhindwisa ku ufwe, hi kulutwe lia matangwa ya mupwisa Mwanangana mu Wanangana wa mu malilu.—Mateu 28:7, 18-20.

11. Yika Mbimbiliya yambile hakutwala kuli tuvumbi twa Yehova ha matangwa wano?

¹¹ Chilweza cha Yesu chinatulongesa chize twatamba kushishika kuli Yehova ni kuli atu jenyi. Nawa tuli ni yitela yipema ya kuchilinga. Mutuhasa kumona ngwetu Yehova kanasongwela atu jenyi ha mashimbu wano akusula. Kanaakwasa hanga ambujole umwenemwene hashi heswe, nawa, ayo wika e akulinga mulimo wacho. Ayo nawa kalinunga hamwe ni chiseke ha mukunda wa yuma yeswe yize Yehova akwaalongesa. Yehova kasolwele nyonga liacho muze ambile ngwenyi: “Tuvumbi twami makemba ni chiseke mu mbunge.”—Izaia 65:14.

12. Kuchi twatamba kumona uhenge wa akwetu?

¹² Tunawahilila chinji mumu Yehova kanatusongwela ni kutukwasa hanga tulinge yuma yipema. Twalisa ni atu a hano hashi ha Satana mumu keshi ni uwahililo nawa keshi ni kutalatala chingunu cha kulutwe lia matangwa. Chili kuhona mana nawa chili chipi chinji kwehuka Yehova ni atu jenyi mumu ngwo umwe ndumbu mu chikungulwila kalinga hanji kamba yuma yize kuyalitele! Chipwe chocho, twatamba kununga ni kushishika kuli Yehova ni kukaula usongwelo wenyi. Twatamba nawa kunyingika yize mutuhasa kulinga hakutwala ku uhenge wa akwetu.

YIKA WATAMBA KULINGA?

13, 14. (a) Mumu liaka twatamba kupwa yimbovu kuli umwe ni mukwo? (b) Chilakenyo chika chize tunazange kwiwuluka?

¹³ Kuchi mulinga nyi umwe ndumbwe mamba hanji malinga chimwe chuma chize muchikulemeka ku mbunge? Mbimbiliya yinahane chiyulo chino: “Kanda ulipupula kutenuka mu mbunge; mumu utenu kuwatwama mu mbunge ja yihepuke.” (Chilumbununyi 7:9) Yetweswe tuli akwa-shili nawa twakuhengesa. Kashika, kutwatambile kushimbwila hanga mandumbu jetu apwe ni kwamba hanji kulinga yuma yize yalita mashimbu eswe. Nawa kuchichi kupema nyi twapwa ni kunyonga mashimbu eswe ha uhenge wo. Nyi twalinga chocho, kutuchikupwa nawa ni chiseke muze mutuwayila Yehova. Nawa ufulielo wetu muli iye muuhasa kukeketela, ha chino mutuhasa kutuhuka mu ululikiso wa Yehova. Nawa, kutuchi kulingila kanawa Yehova chipwe kupwa ni kutalatala cha chifuchi chaha.

¹⁴ Ha chino, yika muyihasa kukukwasa hanga ununge ni kuwayila Yehova muze akwenu makulinga chimwe chuma chipi? Shimbu lieswe pwako ni kwiwuluka chilakenyo chenyi cha utakamiso chakwamba ngwo: “Mungutanga lilu liaha ni hashi haha, ni yuma ya kushi kechi kayiwuluka nawa, chipwe kuyinyonga.” (Izaia 65:17; 2 Petulu 3:13) Yehova makakwaha yiwape yino nyi wanunga ni kushishika kuli iye.

15. Yika Yesu ambile ngwenyi twatamba kulinga nyi akwetu matulemeka ku mbunge?

¹⁵ Chochene, nihindu kutushi mu chifuchi chaha. Kashika niumwe mutu matulemeka ku mbunge, twatamba kupukuna ha yize Yehova anazange hanga tulinge. Chakutalilaho, Yesu kambile ngwenyi: “Nyi kachi yenu munukonekena atu milonga yo, kachi Tatenu wa mwilu nawa kumanukonekena. Alioze nyi kachi yenu kunushi kukonekena atu milonga yo ni Tatenu wa mwilu neye kechi kunukonekena milonga yenu.” Nawa muze Petulu ahulile Yesu ngwenyi ha “yisuho yingahi” natamba kukonekena ndumbwami, Yesu yamwamba ngwenyi: Ngunambe “kuli yena ngwenyi, Chambile ngwami, Ndo yisuho shimbiali, alioze ngwami, Ndo makumi shimbiali a yisuho ha shimbiali.”—Mateu 6:14, 15; 18:21, 22.

16. Chilweza chika chipema chize Yosefwe atuhichikilile?

¹⁶ Chilweza cha Yosefwe chinatulongesa chize mutulinga muze akwetu matulemeka ku mbunge. Yosefwe ni mwanakwo te ayo wika ana ja Rakele waze ashichile ni Yakomba. Yakomba kapwile ni ana akwo kumi, alioze iye te kakuzanga chinji Yosefwe kuhiana ana akwo. Chino yichilingisa ana akwo hanga evwile Yosefwe ukwa. Ha chino, ayo yamuvwila kole yinji chocho yamulanjisa ngwe kapinji, yamutwala mu Engitu. Hakupalika cha miaka yinji, mwanangana wa mu Engitu yapwisa Yosefwe mutu wamuchiali mu chifuchi chacho mumu te kakukomoka chinji milimo yipema ya Yosefwe. Hi kulutwe lia matangwa, mandumbu ja Yosefwe yaya mu Engitu hanga alande kulia, ha mukunda wa zala. Muze o amwene Yosefwe, ayo kakamunyingikine nawa, alioze iye yaanyingika. Chipwe ngwe o kamumwesele lamba, iye kakalingile upi. Alioze yeeseka hanga anyingike nyi o te hanalumuna yitanga yo. Muze Yosefwe anyingikile ngwenyi, o te halumuna yitanga yo, yaalweza ngwenyi, iye te ndumbwo. Mba hi yaatakamisa ni kwaamba ngwenyi: ‘Kanda nwivwa woma. Mungunwaha kulia hamuwika ni ana jenu.’—Uputukilo 50:21.

17. Yika watamba kulinga nyi akwenu mahengesa hanji makulemeka ku mbunge?

¹⁷ Iwuluka ngwe amu yetweswe tuli yihenge, ni yena muhasa kulemeka akwenu ku mbunge. Kashika nyi wanyingika ngwe walemeka umwe mutu ku mbunge, kaula chiyulo cha Mbimbiliya. Mwite ukonekeno, nawa eseka kuneha sambukila hamwe nenyi. (Tanga Mateu 5:23, 24.) Twakuwahilila chinji muze akwetu akutukonekena. Kashika twatamba kulinga chochene kuli ayo. Mukanda wa A-Kolosu 3:13, unatulweze ngwo: “Lihumikizenu umwe ni mukwo, nikulikonekena umwe ni mukwo, nyi kachi umwe munengo ali nawo kuli mukwo. Chizechene ngwe Kristu hananukonekena, chocho ni yenu nawa likonekenenu.” Nyi chamwenemwene twakuzanga mandumbu jetu, kutuchi kununga ni kwevwila uli hakutwala ku yuma yize atulingile ku mashimbu akunyima. (1 A-Korindu 13:5) Nawa nyi twakonekena akwetu, ni yetu, Yehova matukonekena. Kashika muze akwetu mahengesa, mutuhasa kwaasolwela keke ngwe chize akulinga Tata yetu, Yehova, yoze ukwete keke yinji hali yetu.—Tanga Samu 103:12-14.