Kanda Wecha Zango Lie Likekeme

1, 2. (a) Maliji a Yesu waze ali ha Mateu 24:12 aya anatela chitangu? (b) Kuchi mukanda wa Yilinga unasolola ngwo akwa-Kristu anji ku sekulu yitangu kakolesele zango lio? (Tala chizulie ha uputukilo.)

MUZE Yesu apwile hano hashi, kalumbunwine chize te atu mapwa ha “kumanunuka” cha yuma ya mwakono. Ha yuma yikwo, iye yaprofetizala ngwenyi: “Zango lia anji kumuliza kukekema.” (Mateu 24:3, 12) A-Yunda ku sekulu yitangu te kakuliamba ngwo kali atu ja Zambi, alioze zango lio kuli Zambi liakekemene.

² Chipwe chocho, akwa-Kristu anji ha mashimbu jacho kapwile ni nyonga lialisa. Ayo kazangile kwambujola ‘sango lipema lia Kristu’ ni kusolola zango lio kuli Zambi, mandumbu jo amu ufulielo, ni kuli waze te kanda achinyingika umwenemwene. Akwa-Kristu wano kanungine ni kukolesa zango lio kuli Zambi. (Yilinga 2:44-47; 5:42) Alioze, ku sekulu yitangu kwapwile nawa amwe akwa-Kristu waze zango lio te hilinakekema. Kuchi tunachinyingika?

3. Yika yakekemesene zango lia akwa-Kristu amwe?

³ Yesu kalwezele akwa-Kristu atangu waze apwile mu Efwesu ngwenyi: “Hiunehuka zango lie litangu.” (Usolwelo 2:4) Maliji wano kasolwele ngwo akwa-Kristu mu Efwesu te kakukaula yitanga ya atu waze te atunga no, waze te akulizanga-ene. (A-Efwesu 2:2, 3) Efwesu yapwile mbonge ya upite unji, muze atu jamo te akuzanga wika mwono upema ni yuma ya ndando yinji kuhiana chuma cheswacho. Atu anji mu Efwesu te yitanji nawa te keshi kuvumbika shimbi ja Zambi. Ayo te kakuzanga kulivwisa-ene kuwaha kuhiana kusolola zango lingunu hali Zambi ni kuli atu ni akwo.

4. (a) Kuchi zango liakukekema musono? (b) Ha mitapu yika yitatu yize twatamba kununga ni kukoleselamo zango lietu?

⁴ Maliji a Yesu hakutwala ku kukekema cha zango kanatale nawa hali akwa-Kristu musono. Musono atu kakwete zango likehe chinji hali Zambi. Shimbu afupe ukwaso kuli Zambi hanga ahwise yipikalo yo hano hashi, atu anji kakufupa ukwaso ku maululikiso ja atu. Hachino, zango lio linanungu ni kukekema. Chipwe zango lia tuvumbi twa Yehova mulihasa kukekema, ngwe chize chapwile mu chikungulwila cha Efwesu. Kashika, tuhengwolenu mitapu yitatu yize twatamba kununga ni kukoleselamo zango lietu: (1) kuzanga Yehova, (2) kuzanga umwenemwene wa Mbimbiliya, ni (3) kuzanga mandumbu jetu.

KUZANGA YEHOVA

5. Mumu liaka twatamba kuzanga Zambi?

⁵ Iya kevwe twatamba kuzanga chinji kuhiana? Yesu yamba ngwenyi: ‘Ukazange Yehova Zambi ye ni mbunge ye yeswe, ni mwono we weswe, ni kunyonga che cheswe. Lino lie liji litangu kanda linene lia shimbi.’ (Mateu 22:37, 38) Zango lietu hali Zambi liakutukwasa hanga twononokene shimbi jenyi, tunyongonone ni kwehuka kulinga yuma yipi. (Tanga Samu 97:10.) Alioze Satana ni hashi henyi kanafupu kukekemesa ni kupihisa zango lietu kuli Zambi.

6. Yika yakulingiwa kuli atu muze akutokesa zango lio kuli Zambi?

⁶ Atu hano hashi kali ni nyonga lipi hakutwala ku zango. Shimbu azange Zambi, atu anji “kalizanga ene.” (2 Timoteu 3:2) Ayo kakulihulikila wika ha “usolo wa meso, ni kulizata cha mwono.” (1 Yoano 2:16) Postolo Paulu katowezele hakutwala ku yize muyihasa kulingiwa nyi chitangu mutulizanga yetwene. Yamba ngwenyi: “Kunyonga cha musunya, kufwa.” Mumu liaka? Mumu atu waze akuchilinga, kakupwa akwa-kole ja Zambi. (A-Roma 8:6, 7) Atu waze akupalikisa mashimbu ni kulihulikila ha kufupa wika mbongo hanji kukuchisa usolo wo wakulinga utanji, kakumona lamba linji ku mwono wo.—1 A-Korindu 6:18; 1 Timoteu 6:9, 10.

7. Manyonga aka api waze akwa-Kristu mahasa kupwa nawo musono?

⁷ Atu anji waze akwamba ngwo Zambi katwamineko ni waze akwamba ngwo yuma yalitangile yene, kakulingisa akwo hanga achine kuzanga Zambi hanji kutayiza ngwo kwali. O kakwamba ngwo, yihepuke hanji atu waze kalilongesele e akufuliela ngwo Sakatanga kwali. Hachino, atu anji kakulemesa chinji akwa-mana a hono hashi, kuhiana Sakatanga. (A-Roma 1:25) Chipwe akwa-Kristu no mahasa kupwa ni manyonga jacho. Nyi twalinga chocho, usepa wetu ni Yehova muuhasa kutepuluka, nawa zango lietu kuli iye mulihasa kukekema.—A-Hepreu 3:12.

8. (a) Yuma yika muyihasa kuhongesa atu ja Yehova? (b) Kuchi Samu 136 yakututakamisa?

⁸ Hano hashi hapi ha Satana, hanasoloka yuma yinji yize muyihasa kutulingisa hanga tuhone utakamiso ha mashimbu amwe. (1 Yoano 5:19) Alioze nyi mutuhona utakamiso, ufulielo wetu muuhasa kutepuluka ni zango lietu kuli Zambi mulihasa kukekema. Chakutalilaho, mutuhasa kupalika mu yipikalo mumu lia ushinakaji, misongo, hanji kuhona mbongo. Nawa mutuhasa kunenganyana mumu kutushi kuhasa nawa kulinga yimwe yuma ngwe chize twakuzanga kuyilinga. Mutuhasa kunenganyana nyi yuma yimwe ku mwono wetu kuyendele ngwe chize tunayishimbwila. Chipwe mutumona lamba lieswalio, kanda tunyonga ngwetu, Yehova katuhichika ukawetu. Achinyonga ha maliji wano autakamiso mu Samu 136:23, akwamba ngwo: “Yoze watwiwulukile mu ulelu wetu; mumu utu wa zango lienyi wa mutolo.” Mutuhasa kupwa ni shindakenyo ngwetu Yehova makapanjika ‘kulemba’ chetu ni kutukumbulula.—Samu 116:1; 136:24-26.

9. Yika yahanyine Paulu tachi mba anunge ni kukolesa zango lienyi hali Zambi?

⁹ Postolo Paulu kapwile kavumbi wa Zambi yoze wanyongene chinji hakutwala ku chize Yehova te akumufunga, nawa chino te chakumukwasa hanga atakame. Iye yasoneka ngwo: ‘Yehova iye Chikwashi chami; chichi kevwa woma. Atu yika mangulinga?’ (A-Hepreu 13:6) Ufulielo wa Paulu muli Yehova wamukwashile hanga akumbe yipikalo ku mwono wenyi. Muze Paulu apwile ni kumona lamba ha mashimbu amwe, iye kakatokesele ufulielo wenyi muli Yehova. Chipwe muze apwile mu kamenga, nihindu kakwashile mandumbu jenyi akwa-Kristu ha kwaasonekena mikanda ya utakamiso mu yikungulwila. (A-Efwesu 4:1; A-Fwilipu 1:7; Fwilimu 1) Chipwe ngwe Paulu kamwene lamba, nihindu kanungine ni kukolesa zango lienyi kuli Yehova. Iye te kakufuliela muli “Zambi ya kulembejeka cheswe, yoze wakututakamisa mu lamba lietu lieswe.” (2 A-Korindu 1:3, 4) Kuchi mutuhasa kwimbulula Paulu?

10. Kuchi mutuhasa kununga ni kukolesa zango lietu kuli Yehova?

¹⁰ Paulu kalumbunwine yimwe jila yize mutuhasa kununga ni kukoleselamo zango lietu kuli Zambi muze asonekene ngwo: “Lembenu, kanda nulitwamina.” Kulutwe yasoneka nawa ngwo: “Likolezenu mu kulemba chenu.” (1 A-Tesalonika 5:17; A-Roma 12:12) Mumu liaka kulemba chakutukundamisa kuli Zambi? Mumu muze twakulemba, twakuhanjika ni Yehova. Chino chakutukwasa kupwa ni usepa upema ni iye. (Samu 86:3) Muze mutulweza Tata yetu wa mu malilu chize twakwiva ni kunyonga, chino chakutukundamisa kuli iye. (Samu 65:2) Chikwo nawa, zango lietu kuli Yehova liakwoka muze twakumona chize akukumbulula yilemba yetu. Tunafuliela ngwetu, “Yehova hakamwihi ali ni waze eswe akutambika kuli iye.” (Samu 145:18) Ufulielo wetu ha zango ni ukwaso wa Yehova muyitukwasa kukumba lamba lieswalio mutumona haliapwila ni kulutwe lia matangwa.

KUZANGA UMWENEMWNE WA MBIMBILIYA

11, 12. Kuchi mutuhasa kwokesa zango lietu ha umwenemwene wamu Mbimbiliya?

¹¹ Twakuzanga chinji umwenemwene, mumu tuli akwa-Kristu. Umwenemwene wacho twakuuwana mu Liji lia Zambi. Yesu kambile kuli Tato ngwenyi: “Liji lie we umwenemwene.” (Yoano 17:17) Mba tuzange umwenemwene wamu Mbimbiliya, twatamba kunyingika yize yili mu Mbimbiliya. (A-Kolosu 1:10) Alioze kuli yuma yikwo nawa. Tala chize mukwa-kwimba Masamu 119 anatukwase hanga tunyingike yize twatamba kulinga. (Tanga Samu 119:97-100.) Ha tangwa lieswe, twatamba kunyonga chinji hakutwala ku yize twakutanga mu Mbimbiliya. Nyi twapukuna ha yiwape yize yakwiza ha kukaula umwenemwene wamu Mbimbiliya ku mwono wetu, mutuuzanga chinji.

¹² Mukwa-kwimba masamu yamba nawa ngwenyi: “Maliji je cho kuyema ha kuapanjika, mu kanwa liami kayema kuhiana wuchi!” (Samu 119:103) Mikanda yalumbununa Mbimbiliya yize akutuhwisa mu ululikiso wa Zambi, yapwa ngwe kulia chiyema. Nyi tuli ni kulia chize twakuzanga, twakusa mashimbu hanga tuchilie kanawa. Chizechene nawa, twatela kusa mashimbu hanga tulilongese kanawa Mbimbiliya. Nyi twalinga chocho, mba mutuwahilila ni “maliji apema” aumwenemwene nawa chino muchipwa chashi kwiwuluka yize twakutanga ni kuyizachisa hanga tukwase akwetu.—Chilumbununyi 12:10.

13. Yika yakwashile Jeremia mba azange maliji a Zambi? Kuchi yino yakwachile ku mbunge yenyi?

¹³ Profeta Jeremia kazangile maliji a Zambi. Yamba ngwenyi: “Nawana maliji jenu, mba naalia, ni maliji jenu alumukine kuli yami uwahililo ni chiseke cha mbunge yami, mumu hananguluka jina lia yenu, Yehova Zambi-ya-Tujita.” (Jeremia 15:16) Jeremia kanyongene chinji hakutwala ku maliji apema a Zambi, nawa kaazangile. Iye kazangile kumanyinako Yehova ni kwambujola sango jenyi kuli atu. Nyi mutuzanga umwenemwne wamu Mbimbiliya, mutunyingika ngwetu, tuli ni mulimo ulemu ha kupwa Yela ja Yehova ni kwambujola hakutwala ku Wanangana wa Zambi ha matangwa wano akusula.

14. Yika nawa mutuhasa kulinga mba tukolese zango lietu ha umwenemwene wamu Mbimbiliya?

¹⁴ Yika nawa muyitukwasa mba tununge ni kuzanga umwenemwene wamu Mbimbiliya? Twatamba kuya mashimbu eswe ku kukunguluka, kuze akutulongesela kuli Yehova. Longeso lia Mbimbiliya hakuzachisa Kaposhi wa Kutalila hita poso lili yimwe jila yize akutulongeselamo. Nyi mutuzanga kuyuka chinji ha kukunguluka chacho, twatamba kulilulieka chitangu shimbu kanda tuya ni kukunguluka. Chakutalilaho, mutuhasa kutanga hita chisoneko cha mu Mbimbiliya chize chili ha longeso. Musono, atu anji kakutanga hanji kusa Kaposhi wa Kutalila mu telefone, tablet ni computador, mumu kali mu malimi anji mu site jw.org ni mu aplicativo JW Library. Mutapu umwe wa mikanda mu site wakutukwasa kuwana yisoneko ya Mbimbiliya kawashi-washi. Hachino, nyi mutulilongesa hita mutwe wa Kaposhi ni kutanga kanawa yisoneko yize yiliho ni kuyipukuna, zango lietu ha umwenemwene wa Mbimbiliya mulioka chinji.—Tanga Samu 1:2.

KUZANGA MANDUMBU JETU

15, 16. (a) Kulita ni Yoano 13:34, 35, shimbi yika Yesu anatwehe? (b) Kuchi zango lietu kuli Zambi ni Mbimbiliya linalite ni zango lize tukwete kuli mandumbu jetu?

¹⁵ Ha ufuku wenyi wakasula, Yesu yalweza tumbaji twenyi ngwenyi: ‘Shimbi yaha ngunanwehe ngwami, nukalizange umwe ni mukwo; chizechene ngwe yami hingunanuzange, ni yenu nawa nukalizange umwe ni mukwo. Ku chino eswe makanyingika ngwo, nuli tumbaji twami, nyi munupwa ni zango umwe kuli mukwo.’—Yoano 13:34, 35.

¹⁶ Kuzanga mandumbu ni mapangi jetu chinalite ni kuzanga Yehova. Nyi kutushi kuzanga Zambi, kutuchi kuhasa kuzanga mandumbu jetu. Nawa nyi kutushi kuzanga mandumbu jetu, kutuchi kuhasa kuzanga Zambi. Postolo Yoano yasoneka ngwo: “Yoze keshi kuzanga ndumbwenyi yoze anamono, ngwe kuchi mahasa kuzanga Zambi yoze kamumwene.” (1 Yoano 4:20) Zango lietu hali Yehova ni kuli mandumbu jetu linatale nawa ha zango lietu ha Mbimbiliya. Mumu liaka? Mumu nyi mutuzanga yize twakulilongesa mu Mbimbiliya, mutufupa kwononokena shimbi jize twakuwanamo, ja kuzanga Zambi ni mandumbu jetu.—1 Petulu 1:22; 1 Yoano 4:21.

17. Mutapu uka uze mutuhasa kusolwelamo zango?

¹⁷ Tanga 1 A-Tesalonika 4:9, 10. Mutapu uka walita uze mutuhasa kusolwelamo zango kuli mandumbu amu chikungulwila chetu? Umwe ndumbu hanji pangi kashinakaji mahasa kufupa ukwaso wa kuya ni kwiza ku kukunguluka. Umwe tuliwa mahasa kufupa kululieka yimwe mu zuwo lienyi. (Tiangu 1:27) Mandumbu ni mapangi waze ananenganyana, kulema mu mbunge hanji waze anamono lamba kanafupiwa kwaasela mbunge, kwaakolweza ni kwaatakamisa. (Yishima 12:25; A-Kolosu 4:11) Twakusolola ngwetu twakuzanga “akwa zuwo lia ufulielo” ha yize twakuhanjika ni ha yitanga yetu.—A-Ngalashia 6:10.

18. Yika muyitukwasa hanga tuhwise kapinda ni mandumbu jetu?

¹⁸ Mbimbiliya yakwamba ngwo ha “matangwa a kusula” a yuma ya mwakono, atu anji te mapwa ni kuzo hamwe ni chipululu. (2 Timoteu 3:1, 2) Amu tuli akwa-Kristu tunafupiwa kusa tachi hanga tununge ni kwokesa zango lietu kuli Yehova, ha Liji lienyi ni kulizanga umwe ni mukwo. Mumu lia uhenge, ha mashimbu amwe mutuhasa kupwa ni kapinda ni mandumbu jetu. Chipwe chocho, mumu lia kulizanga umwe ni mukwo mutuhwisa kapinda wacho ni zango nawa kawashi-washi. (A-Efwesu 4:32; A-Kolosu 3:14) Kashika, kanda twecha hanga zango lietu likekeme! Tunungenu ni kukolesa zango lietu kuli Yehova, ha Liji lienyi ni kuli mandumbu jetu.