Unachinyingika Nyi?

Mumu liaka Yesu avulukile akwa-mingoso waze te akulanjisa tushitu mu tembele mu Yerusaleme ngwo “mihuza”?

MU EVANGELU ya Mateu twakutangamo ngwo: ‘Yesu yanjila mu tembele, yatuhwisa waze eswe te analanjisa, ni waze te analande mu tembele, yalimbula mesa ja akwa-kusumbakenya mbongo, ni yitwamo ya akwa-kulanjisa tutele. Ni kwamba ngwenyi, Chinasonewa ngwo, Kumakavuluka zuwo liami ngwo, Zuwo lia kulembela: alioze yenu hinwalipwisa chiswamo cha mihuza.’—Mateu 21:12, 13.

Sango jikulu jinasolola ngwo akwa-kulanjisa mu tembele te kakusolola ulembekese kuli waze te akwaalanda yuma ha kwokesa ndando. Chakutalilaho, tutele kapwile ni ndando yikehe chinji yize chipwe chiswale te mahasa kulanda hanga ahane chitapo. Chipwe chocho, yisoneko yikulu ya A-Yunda yakwamba ngwo, ha mashimbu amwe ku sekulu yitangu, mutu mba alande tutele aali, iye te katamba kufweta Denario ya oru. Mukwa-kukalakala mba azuke mbongo jacho te katamba kukalakala matangwa 25. Tutele yakola ndando, hi yiswale te keshi kuhasa nawa kwaalanda. (Ulevi 1:14; 5:7; 12:6-8) Ngana Simeone Ngamaliele kevwile uli unji hakutwala ha chikuma chacho, chocho yatepululako yimwe milambu yize te A-Yunda atamba kuhana. Hachino, mba ndando ya tutele aali, yiyitepuluka ha centésimo yimuwika yize te yakunjila kaali keswe ha Denario yimuwika ya oru.

Ngwe chize twamona, akwa-kulanjisa mu tembele te kakwete kuzo nawa te kakwiya atu waze te akwaalanda yuma. Kashika Yesu aavulukile ngwo “mihuza.”