Imbulula Ululi ni Keke ya Yehova
“Patulenu ni ululi; lingenu ni utu ni keke mutu mweswe kuli mukwo.”—ZEKARIA 7:9.
1, 2. (a) Kuchi Yesu te akwivwa ha Shimbi ja Zambi? (b) Kuchi alongeshi a shimbi ni A-Fwariseu te akuzachisa Shimbi mu jila yipi?
YESU te kakuzanga Shimbi ya Mose. Chino kuchishi kutukomwesa, mumu Shimbi yacho yakatukile kuli Tato, Yehova, Mutu mulemu ku mwono wa Yesu. Ha Samu 40:8, Mbimbiliya yaprofetizalile zango linene lia Yesu ha Shimbi ja Zambi, ngwo: “Ngunawahilila kulinga upale we, Zambi yami. Ewa, shimbi je jinasonewa muchima lia mbunge yami.” Yesu kasolwele ha yize te akwamba ni yize akulinga ngwo, Shimbi ja Zambi jingunu, jakufumbuka, nawa ngwo katamba kujikaula.—Mateu 5:17-19.
2 Yesu kota kevwile chinyengo muze amwene alongeshi a shimbi ni A-Fwariseu kanazachisa Shimbi ja Tato mu jila yipi, hakujisolola ngwe japwa jikalu. Yesu yaamba ngwenyi: “Nwakufweta chihanda cha kumi cha ku chimbumba ni endru ni kominyu,” maliji wano kanalumbunuka ngwo ayo kapwile ni kulihulumba chinji ha kwononokena yuma yikehe-yikehe ya Shimbi. Mba mulonga te hali uli? Yesu yamba ngwenyi: “Alioze hinunalelesa yuma yilemu yahiana ya Shimbi, upatwilo wa ululi, ni keke, ni ufulielo.” (Mateu 23:23) A-Fwariseu te kakanyingikine ulumbunwiso wa Shimbi, nawa te kakunyonga ngwo kapwa alemu chinji kuhiana akwo. Alioze Yesu kanyingikine kanawa ulumbunwiso wa Shimbi ni yize hita shimbi te yakusolola hali Yehova.
3. Yika mutulilongesa ha mutwe uno?
3 Amu tuli akwa-Kristu kutwafupiwile kwononokena Shimbi ya Mose. (A-Roma 7:6) Mba mumu liaka Yehova asele Shimbi yino mu Liji lienyi, Mbimbiliya? Iye kazangile hanga tunyingike ni kukaula “yuma yilemu,” hanji kukaula malongeso waze anakatuka ha Shimbi. Chakutalilaho, mba malongeso aka mutuwana ha ululikiso wa yihunda ya uchinyino? Ha mutwe uze wapalika, twawanaho malongeso ha kuhengwola yize te akulinga mutu yoze washiha mukwo kachihalile. Mu mutwe uno, mutumonamo yize yihunda ya uchinyino muyitulongesa hali Yehova ni chize mutuhasa kwimbulula yitanga yenyi. Mutukumbulula yihula yino yitatu: Kuchi yihunda ya uchinyino yinasolola keke ya Yehova? Yika muyitulongesa hakutwala ha chize Zambi akumona mwono? Nawa kuchi yinasolola ululi wenyi ungunu? Ha hita chihula, fupa kumona chize muhasa kwimbulula Yehova.—Tanga A-Efwesu 5:1.
KUZE KWAPWILE YIHUNDA YA UCHINYINO TE KWAKUSOLOLA KEKE YA YEHOVA
4, 5. (a) Yika alingileko mba chipwe chashi kuli mutu yoze washiha mukwo kachihalile kuwana kawashi chihunda cha uchinyino, nawa mumu liaka? (b) Yika chino chinatulongesa hali Yehova?
4 Yehova kasele yihunda yisambano ya uchinyino mu yihela yashi kuyimona. Kalwezele A-Izalele hanga asakule yihunda yitatu ku hita sali lia Yordau. Mumu liaka? Hanga mutu yoze unachinyinamo ahase kuheta kawashi ku chimwe cha ku yihunda yacho. (Kwalula 35:11-14) Matapalo akuyako te apema nawa te kakukwasa atu kuhetako kawashi. (Shimbi Yamuchiali 19:3) Kulita ni chako cha A-Yunda, mu matapalo jacho mwapwile yilayi yize te yakukwasa mutu yoze unachinyinako hanga awane yihunda yacho. Amu kwapwile yihunda yino ya uchinyino, ka-Izalele yoze te mashiha mutu kachihalile te kechi kuchinyina ku yifuchi ya yilambala, mumu nyi mayako mahasa kuwayila tuzambi amahuza.
5 Achinyonga hachino: Yehova kambile ngwenyi, yingalwe te katamba kwaashiha. Alioze yamba nawa ngwenyi, mutu ni mashiha mukwo kachihalile te mamusolwela keke, utu, ni kumufunga. Kulita ni umwe mukwa-kuhanjeka hakutwala ku Mbimbiliya yamba ngwenyi: “Ululikiso weswe uze aseleko hakutwala ku chikuma chino wapwile washi nawa mutu mweswe te mahasa kuunyingika kanawa.” Yehova keshi ngwe ngaji yoze ukwete mbunge yikalu yoze wakufupa kumwesa tuvumbi twenyi lamba. Alioze, iye kali “mukwa keke ya kulumbama.”—A-Efwesu 2:4.
6. Shina A-Fwariseu kembulwile keke ya Yehova? Lumbununa.
6 Alioze A-Fwariseu, te keshi kuzanga kusolwela akwo keke. Chakutalilaho, ndako ja A-Yunda te jakwamba ngwo A-Fwariseu te keshi kuzanga kukonekenena mutu yoze walinga uhenge wowene ha yisuho yitatu. Mba asolole ndako jo jipi, Yesu yazachisa chilweza cha umwe Ka-Fwariseu yoze wapwile ni kulemba sali lia mukwa-kufwetesa lijimu. Ka-Fwariseu yamba ngwenyi: “Zambi, ngunakusakwila yami chapwile ngwe atu akwo, akwa mbenga, yihenge, yitanji, hanji chipwe ngwe yono mukwa kufwetesa lijimu.” Nyonga lia Yesu te lika? A-Fwariseu te kakumona akwo ngwe atu amokomoko,’ alioze ayo te kanyingikine ngwo katamba kusolola keke.—Luka 18:9-14.
Shina akwenu kakuhasa kukwita ukonekeno? Pwako mukwa-kulikehesa nawa mwashi kuhanjike ne (Tala paragrafu 4-8)
7, 8. (a) Kuchi muhasa kwimbulula keke ya Yehova? (b) Mumu liaka twatamba kupwa akwa-kulikehesa mba tukonekene akwetu?
7 Imbulula Yehova, hi A-Fwariseu ko. Solola keke ni utu. (Tanga A-Kolosu 3:13.) Pwako mutu mwashi yoze akwenu mahasa kwita ukonekeno. (Luka 17:3, 4) Achilihule ngwe: ‘Shina nakukonekena akwetu ni kawashi, chipwe muze mangutuka ha yisuho yinji? Kutala nakuzanga kupwa ni sambukila ni mutu yoze wangutuka hanji wangulemeka ku mbunge?’
8 Mba tukonekena akwetu, twatamba kupwa akwa-kulikehesa. A-Fwariseu te kakunyonga ngwo alemu kuhiana akwo, kashika te keshi kukonekena atu ni mbunge yeswe. Alioze amu tuli akwa-Kristu, twakulikehesa ha ‘kunyonga ngwetu, akwetu katuhiana’ ni kwaakonekena ni mbunge yeswe. (A-Fwilipu 2:3) Mutuhasa kulihula ngwetu: ‘Nakwimbulula Yehova ni kusolola kulikehesa?’ Nyi twalikehesa, muchipwa chashi akwetu kutwita ukonekeno nawa muchipwa chashi kwaakonekena. Lipupwise ha kusolola keke ni kupwa makoke kutenuka.—Chilumbununyi 7:8, 9.
LEMESA MWONO HANGA ‘UCHINE KUPWA NI MULONGA WA MANYINGA’
9. Kuchi Yehova akwashile A-Izalele hanga anyingike ngwo mwono wapwa usandu?
9 Yihunda ya uchinyino kayisele hanga yifunge A-Izalele achine kupwa ni mulonga wa kumwanga manyinga ja mutu yoze keshi chitela. Chino che chikuma chilemu atungilile yihunda yacho. (Shimbi Yamuchiali 19:10) Yehova kakuzanga mwono, nawa kakuvwila yingalwe lwaji. (Yishima 6:16, 17) Zambi te kechi kulengulula chipwe kufwa cha ponde, mumu iye kakwete ululi nawa musandu. Chochene ngwetu, mutu yoze washiha mukwo kachihalile te mahasa kumwivwila keke. Alioze chitangu iye te katamba kulumbununa mulonga wenyi kuli makulwana. Nyi makulwana makwata chiyulo ngwo kufwa chacho te cha ponde, hachino yoze washihanga mukwo te katamba kutwama mu chihunda cha uchinyino ndo ha kufwa cha sasendote wa lutwe. Chino chinalumbunuka ngwo mutu wacho te mahasa kutwama mu chihunda cha uchinyino ku mwono wenyi weswe. Ululikiso uno wakwashile A-Izalele eswe hanga anyingike ngwo mwono te wapwa usandu. Mba afumanyise Chihanyi wa mwono, ayo te katamba kusa tachi hanga achine kusa mwono wa akwo mu ponde.
10. Kulita ni Yesu, kuchi alongeshi a shimbi ni A-Fwariseu asolwele ngwo keshi kulemesa mwono wa akwo?
10 Kulisa ni Yehova, alongeshi a shimbi ni A-Fwariseu kasolwele ngwo te keshi kulemesa mwono wa akwo. Yesu yaamba ngwenyi: “Hinwachiza sapi ya chinyingi; kunwanjilile yenwene, mba waze apwile nikunjila nwaakwikile!” (Luka 11:52) Yika Yesu ambile kwamba? Alongeshi a shimbi ni A-Fwariseu kapwileko hanga alumbunwine atu Liji lia Zambi ni kwaakwasa azuke mwono wa mutolo. Alioze, ayo te kakukinda atu hanga achine kukaula Yesu, “mwe Kaputu ka Mwono.” (Yilinga 3:15) Hachino, ayo te kakusongwela atu ku kufwa. Alongeshi a shimbi ni A-Fwariseu te kakulizata hamwe ni kuzo, nawa te keshi kulihulumba ha mwono wa atu. Uno uli ungalwe unene ni kuhona zango!
11. (a) Kuchi postolo Paulu asolwele ngwo kakulemesa mwono ngwe Yehova? (b) Yika muyitukwasa mba twimbulule zango lia Paulu hakwambujola?
11 Kuchi mutuhasa kwimbulula Yehova ni kwehuka kupwa ngwe alongeshi a shimbi ni A-Fwariseu? Twakuchilinga muze twakuvumbika ni kulemesa mwono. Postolo Paulu kachilingile ha kusa tachi hanga ambujole sango lipema lia Wanangana kuli atu anji. Kashika ahashile kwamba ngwenyi: “Ngunasambe ku manyinga ja atu eswe.” (Tanga Yilinga 20:26, 27.) Shina Paulu kambujolwele wika mumu ngwo te keshi kuzanga kupwa ni mulonga wa manyinga nawa mumu Yehova kamwambile hanga achilinge? Ka. Paulu te kakuzanga chinji atu. Iye te kakulemesa mwono wo, nawa te kakuzanga hanga azuke mwono wa mutolo. (1 A-Korindu 9:19-23) Ni yetu twatamba kulemesa mwono ngwe Yehova. Iye kakuzanga hita mutu alikonyeke hanga azuke mwono. (2 Petulu 3:9) Mba twimbulule Yehova, twatamba kuzanga akwetu. Kupwa ni keke muchitukwasa hanga twambujole ni zango nawa nyi twachilinga mutupwa ni chiseke.
12. Mumu liaka kulifunga chikwete ulemu kuli atu ja Zambi?
12 Mba tulemese mwono ngwe Yehova, twatamba nawa kupwa ni nyonga lialita hakutwala kukulifunga. Muze tunendesa mashinyi, moto, ni kinga twatamba kwendesa kanawa hanga tulifunge. Chipwe muze tunayi ku kukunguluka, tunatunga mazuwo hanji tunalulieka yimwe nihindu twatamba kulifunga. Atu, kulifunga ni mujimba upema, yikwete ulemu kuhiana kufunga mashimbu ni mbongo. Zambi yetu kakulinga yuma yalita mashimbu eswe, ni yetu tunazange kupwa ngwe iye. Chipi-chipi makulwana amu chikungulwila kanafupiwa kufunga kanawa mwono wo ni wa akwo. (Yishima 22:3) Nyi mukulwana wamu chikungulwila makwiwulula ngwo watamba kukaula shimbi ja kulifunga mupanjike. (A-Ngalashia 6:1) Nyi mutulemesa mwono ngwe Yehova, ‘kutuchi kupwa ni mulonga wa manyinga.’
SOPESENU “NIKULITA NI UPATWILO UNO”
13, 14. Kuchi makulwana A-Izalele te akuhasa kwimbulula ululi wa Yehova?
13 Yehova kalwezele makulwana A-Izalele hanga embulule ululi wenyi. Nyi umwe mashiha mukwo, chitangu, makulwana te katamba kunyingika mumu liaka iye amushiha. Mba hi mahengwola kanawa chitela amushihilanga, ndako jenyi ni chize ayo apwile ni kutwama shimbu mukwo te kanda achifwa. Makulwana te katamba kunyingika nyi mutu wacho te kakwivwila mukwo kole kashika afupa chitela cha kumushiha. (Tanga Kwalula 35:20-24.) Nyi hapwanga atu, te kwakufupiwa wika yela aali shimbu chingalwe wacho kanda amupatwila kufwa.—Kwalula 35:30.
14 Muze manyingika kanawa yize yalingiwangako, makulwana te katamba kunyonga hali mutu wacho, hi wika ko ha yize alinganga. Makulwana te kakufupiwa malinjekela mba amone kanawa ni kunyingika yitela ya mumu liaka ashihanga mukwo. Kuhiana yeswe, te kakufupiwa spiritu yisandu ya Yehova hanga yaakwase kwimbulula malinjekela, keke ni ululi wenyi.—Kutuhuka 34:6, 7.
15. Kuchi nyonga lia Yesu hali yivulumunyi lialisele ni lia A-Fwariseu?
15 A-Fwariseu, te keshi kupatwila akwo ni keke. Ayo te kakulihulikila chinji ha yize mutu alinga chakuhona kunyonga ha yitanga yenyi yipema. Muze amwe A-Fwariseu amwene Yesu kanali mu zuwo lia Mateu, ayo yahula tumbaji twenyi ngwo: “Kuchi te Longeshi yenu unali hamwe ni akwa kufwetesa lijimu ni yivulumunyi?” Yesu yakumbulula ngwenyi: “Angunu keshi kufupa mbuki, alioze waze ayiza. Alioze yeenu, nukalilongese chize chinalumbunuka ngwo, Ngunazange keke, hi chitapo ko; mumu nguneza mukutambika yivulumunyi alikonyeke; hi akwa ululi ko.” (Mateu 9:9-13) Shina Yesu te kakukalila yivulumunyi? Ka, hi chocho ko. Iye kafupile wika hanga o alikonyeke. Chino che te akushindakenya mu mulimo wenyi wakwambujola. (Mateu 4:17) Yesu kanyingikine ngwenyi, amwe “akwa kufwetesa lijimu ni yivulumunyi” te kanazange kwalumuna yitanga yo. Kakayile wika ku zuwo lia Mateu ni kulia. Ayo kayileko mumu te tumbaji jenyi. (Marku 2:15) Chaluyinda, A-Fwariseu anji te keshi kulemesa atu ngwe chize te akwaalemesa kuli Yesu. Ayo kakapwile ni kutayiza ngwo atu mahasa kwalumuna yitanga yo. Nawa te kakwaamona ngwe kali wika yivulumunyi waze keshi ni kutalatala. Chino chili kulisa chinene cha chize Yehova akusolola keke kuli atu!
16. Yika mandumbu amu chizavu cha akwa-kusopesa atamba kulinga?
16 Musono, makulwana amu chikungulwila katamba kwimbulula Yehova, yoze ‘wakuzanga ululi.’ (Samu 37:28) Nyi umwe ndumbu malinga shili, chitangu, ayo katamba ‘kuhengwola’ hanga apwe ni shindakenyo ya shili yacho. Nyi mapwa ni shindakenyo, ayo makaula usongwelo wa Mbimbiliya mba akwate chiyulo. (Shimbi Yamuchiali 13:12-14) Nyi ayo mapwa mu chizavu cha akwa-kusopesa, katamba kukeya mba anyingike nyi ndumbu yoze walinga shili yinene kalikonyeka ni ka. Chino hi chashi ko. Mumu kulikonyeka chinatale ha chize chivulumunyi anevu ha yize alinganga ni yize yili mu mbunge yenyi. (Usolwelo 3:3) Chivulumunyi katamba kulikonyeka mba azuke keke.a—Tala maliji mushi lia lifwo.
17, 18. Kuchi makulwana mahasa kunyingika nyi umwe ndumbu kalikonyeka lume? (Tala chizulie ha uputukilo.)
17 Yehova ni Yesu kananyingika kanawa yize mutu akunyonga ni kwivwa, mumu ayo mahasa kunyingika yize yili mu mbunge ya mutu. Alioze makulwana keshi kuhasa kunyingika yize yili mu mbunge ya mutu. Kashika nyi uli mukulwana mu chikungulwila, kuchi muhasa kunyingika nyi ndumbu umwe kalikonyeka lume? Chitangu, lemba hanga wite mana ni malinjekela. (1 Mianangana 3:9) Chamuchiali, zachisa Liji lia Zambi ni mikanda ya ndungo wamwenemwene hanga umone kulisa chapwa ha “chinyengo cha hano hashi” ni “chinyengo kulita ni upale wa Zambi,” chekwamba, kulikonyeka chamwenemwene. (2 A-Korindu 7:10, 11) Tala chize Mbimbiliya yakusolola waze alikonyekene ni waze kakalikonyekene, nawa nyonga ha chize evwile, anyongene, ni yize alingile.
18 Chamuchitatu, nyonga hali ndumbu wacho, hi ha yize alinganga ko. Lihule ngwenyi: Mumu liaka iye ali chichize? Mumu liaka akwatanga yiyulo yamutapu au? Yipikalo ni ulelu uka iye akwete? Mbimbiliya yambile ngwenyi Yesu, mutwe wa chikungulwila cha akwa-Kristu, “Kechi kayula nikulita ni chize meso jenyi mamona; kechi kapatwila nikulita ni chize matwi jenyi mevwa; alioze makayula yiswale ni ululi, kechi kapatwila yimbovu a hashi, ni katonde.” (Izaia 11:3, 4) Makulwana, Yesu hananutongwola hanga nufunge chikungulwila chenyi, kashika iye manukwasa hanga nusopese ni ululi hamwe ni keke. (Mateu 18:18-20) Twakusakwilila chinji hakupwa ni makulwana waze akutufunga! Ayo nawa kakutukwasa hanga tusolole ululi ni keke kuli umwe ni mukwo.
19. Malongeso aka hakutwala ku yihunda ya uchinyino unazange kukaula ku mwono we?
19 Shimbi ya Mose yapwile ‘ni cheseko cha chinyingi ni umwenemwene.’ Yino yinatulongesa hakutwala hali Yehova ni shimbi jenyi. (A-Roma 2:20) Yihunda ya uchinyino analumbununa mu Shimbi, yakulongesa makulwana chize atamba ‘kupatwila ni ululi,’ nawa yinatulongesa chize mutusolola “keke mutu mweswe kuli mukwo.” (Zekaria 7:9) Chipwe ngwe kutwafupiwile kukaula Shimbi ya Mose, alioze Yehova keshi kwalumuka. Ululi ni keke nihindu yikwete ulemu unji kuli iye. Chili chiwape chinene kuwayila Zambi mukwa-keke. Kashika twimbululenu yitanga yino yipema ni kuwana uchinyino hamwe ni ufunge muli Zambi!
a Tala “Yihula ya Waze Akutanga Mikanda Yetu” mu Kaposhi wa Kutalila, 15 wa Setembro 2006, lifwo 30, mu malimi akwo.