Akweze, Shina Nunalihulikila ku Milimo ya ku Spiritu?

1-3. (a) Kapinda muka ali nenyi akweze eswe, nawa ni yika mutuhasa kumutesa? (Tala chizulie ha uputukilo.) (b) Yika muyikwasa akweze akwa-Kristu kukumba kapinda wacho?

ACHINYONGA ngwe unalulieka wenyi wakuya ku chiwanyino chilemu mu yimwe mbonge ya kusuku. Mba uyeko, unafupiwa kukwata kalela. Muze muheta ha utulilo wa kalela, muyambashana mumu hali atu ni tulela anji. Alioze muwahilila mumu unanyingika kanawa kuze unayi ni kalela yoze mukwata. Kuuchi kukwata kalela mweswawo, mumu unanyingika ngwe makutwala kweka.

² Mwono wapwa ngwe wenyi, nawa akweze kali ngwe atu waze ali ha utulilo wa kalela. Ha mashimbu amwe kwakusoloka yuma ni manyonga anji ku mwono, yino muyihasa kukuyambanganyisa. Alioze nyi unanyingika pundu kuze mwoya, muchipwa chashi kukwata chiyulo cha mana. Mba sali lika watamba kuya?

³ Mutwe uno mukumbulula chihula chino nawa muukukolweza hanga ununge ni kulingila Yehova ku mwono we weswe. Chino chinalumbunuka kukaula usongwelo wa Yehova ku mwono we muze unakwate yiyulo hakutwala ku shikola, mulimo, kumbata ni kupwa ni ana. Nawa chinalumbunuka kutesa yimwe ku spiritu, chekwamba, kulinga yize muyikukundamisa kuli Yehova. Nyi mununga ni kulingila Yehova ku mwono we weswe, muhasa kupwa ni shindakenyo ngwe makakuwahisa ni kukukwasa hanga ufumbuke.—Tanga Yishima 16:3.

MUMU LIAKA TWATAMBA KUTESAYUMA YA KU SPIRITU?

4. Yika mutuhengwola ha mutwe uno?

⁴ Chili chipema kutesa yuma ya ku spiritu ku mwono wetu. Mumu liaka? Mutuhengwola yikuma yitatu. Chitangu ni chamuchiali muchikukwasa umone ngwe kutesa yuma ya spiritu muchikolesa usepa we ni Yehova. Chamuchitatu muchisolola mumu liaka chili chipema kutesa yuma ya spiritu muze uchili mukweze.

5. Chikuma chika chilemu chize chakutulingisa mba tutese yuma ya ku spiritu ku mwono wetu?

⁵ Chikuma chilemu chize chakutulingisa mba tutese yuma ya ku spiritu ku mwono wetu, chili kusakwilila Yehova ha zango lienyi ni ha yize akutulingila. Umwe mukwa-kusoneka Masamu yamba ngwenyi: “Chinapeme kusakwilila Yehova . . . Mumu yena Yehova hiwangwaha chiseke mumu ha yitanga ye. Mungukumba ni yitanga ya moko je.” (Samu 92:1, 4) Achinyonga ha yuma yeswe yize Yehova hanakwehe: ngwe mwono, ufulielo, Mbimbiliya, chikungulwila, ni kutalatala cha mwono wa mutolo mu Paraisu. Nyi watesa yuma ya ku spiritu ku mwono we, musolola kuli Yehova ngwe unasakwila ha yize hanakwehe ni kukundama kuli iye.

6. (a) Kuchi yuma ya ku spiritu yize mutesa yinatale ha usepa we ni Yehova? (b) Yuma yika yize muhasa kutesa ku mwono we muze uchili kanuke?

⁶ Chikuma chamuchiali chize chakutulingisa mba tutese yuma ya ku spiritu ku mwono wetu, chili ngwo nyi musa tachi hanga uyilinge, acho unalingi kanawa mulimo wa Yehova. Chino muchikukundamisa kuli iye. Postolo Paulu yamba ngwenyi: “Zambi hi chihenge ko, akavulame milimo yenu ni zango lize nwalwezele ku jina lienyi.” (A-Hepreu 6:10) Twanuke no mahasa kutesa yuma ya ku spiritu ku mwono wo. Chakutalilaho, muze Christine akwachile chiyulo cha kutanga sango ja ku mwono wa Yela ja Yehova waze ashishika te kali ni miaka 10. Toby kapwile ni miaka 12 muze atesele kutanga Mbimbiliya yeswe shimbu te kanda amupapachisa. Maxim kapwile ni miaka 11 nawa ndumbwenyi kapwile ni miaka 10 muze aapapachishile. Eswe ni aali yapwa ni nyonga lia kuya ku Mbetele. Mba alihulikile ha yize atesele, ayo yasa lifwo lia kusanyikina ku Mbetele ku chikalakala cha zuwo lio. Mba yena? Shina muhasa kunyonga ha yize mutesa ku mwono we hanga uputuke kuyilinga?—Tanga A-Fwilipu 1:10, 11.

7, 8. (a) Kuchi kutesa yuma ya ku spiritu muchikukwasa kukwata yiyulo ya mana? (b) Mumu liaka mukweze umwe echele kuya ku shikola yinene?

⁷ Chikuma chika chamuchitatu chize chinasolola ulemu wa kutesa yize mulinga muze uchili mukweze? Amu uli mukweze, uli ni yiyulo yinji ya kukwata. Watamba kusakula mulimo hanji shikola yize mulilongesa, ni yuma yikwo nawa. Yiyulo yize mukwata ku mwono we yili ngwe uli ha makano muze uli mu wenyi. Nyi wanyingika kuze unayi, muchipwa chashi kunyingika jila yize mwoya. Chizechene nawa, nyi wanyingika yuma yize mutesa ku mwono we, muchipwa chashi kukwata yiyulo ya mana. Mukanda wa Yishima 21:5 unambe ngwo: “Manyonga a yipalakata katwala kukulumbama wika.” Nyi walianga kutesa yuma yize mulinga ku wanuke we, mukafumbuka ku mwono. Yino ye alingile Damaris muze afupile kukwata chiyulo chilemu ku ukweze wenyi.

⁸ Damaris kapwile ni nota jipema muze ahwishile shikola yikehe, kashika te mahasa kuya ku shikola yinene hanga alilongese shimbi ja mu chifuchi chakuhona kufweta. Alioze, yasakula kukalakala ku banku. Mumu liaka? Mumu muze te uchili mukweze, kasakwile kupwa pionelu. Yamba ngwenyi: “Chino te chinalumbunuka kukalakala ha mashimbu akehe. Nyi nalilongesele shimbi ja mu chifuchi ku shikola yinene, kachi te nakutambula mbongo jinji, alioze te muchikaliwa kuwana mulimo wa mashimbu akehe.” Damaris halinga miaka 20 mu upionelu. Shina kakwivwa ngwe katesele kulinga chuma chipema nawa kakwachile chiyulo chipema ku ukweze wenyi? Ewa. Ku banku te akalakala, kalinyingikine ni ngaji anji waze apwile ni kulinga milimo yize iye te malinga nyi kayile ku shikola yinene. Yamba ngwenyi, anji akuli ayo keshi kuwahilila ha milimo yize akulinga. Damaris kakwivwa chiseke chinji ha miaka yeswayi analingi upionelu nawa wakumukwasa ahone kwivwa yinyengo ngwe atu jacho.

9. Mumu liaka twatamba kuchichimieka akweze?

⁹ Tununu twa akweze hashi heswe kanalingi kanawa mulimo wa Yehova kashika twatamba kwaachichimieka. Usepa wo ni Yehova ni yuma ya ku spiritu yize hanatese, yikwete ulemu ku mwono wo. Akweze jacho kakuwahilila ku mwono nawa kakulilongesa chize makaula usongwelo wa Yehova mu yuma yeswe, ngwe shikola, mulimo, ni usoko. Solomone ngwenyi: “Fuliela Yehova ni mbunge ye yeswe.” Yawezela nawa ngwenyi: “Ukamutayize mu yilinga ye yeswe mba iye makalulamisa majila je.” (Yishima 3:5, 6) Akweze, Yehova kakunuzanga chinji! Kuli iye yenu nuli alemu, manufunga, manusongwela ni kunuwahisa.

LILULIEKE ULWEZE AKWENU HAKUTWALA KULI YEHOVA

10. (a) Mumu liaka kwambujola chatamba kupwa chuma chilemu ku mwono wetu? (b) Kuchi muhasa kulumbununa kanawa yize wafuliela?

¹⁰ Nyi wanunga ni kulingila Yehova ku mwono we weswe, acho muzanga kulweza akwenu hakutwala kuli iye. Yesu Kristu yamba ngwenyi: “Sango lipema ndo malianga kuliambujola” chitangu. (Marku 13:10) Amu mulimo wa kwambujola twatamba kuulinga ni kawashi, kashika ndo upwe chuma chilemu ku mwono wetu. Shina mululieka yimwe ku mwono we hanga wambujole chinji? Kutala muhasa kama kupwa pionelu? Alioze yika mulinga nyi kuushi kuzanga kwambujola chinji? Nawa kuchi muhasa kulumbununa kanawa yize wafuliela? Yuma yaali muyikukwasa: Kulilulieka kanawa, ni kulweza akwenu yize unanyingika hakutwala kuli Yehova. Nyi walinga chocho muzanga chinji mulimo wa kwambujola.

11, 12. (a) Yika muhasa kulinga mba ulilulieke ni kulweza akwenu hakutwala kuli Yehova? (b) Kuchi mukweze umwe ahashile kulweza akwo ku shikola hakutwala kuli Yehova?

¹¹ Putuka kululieka kumbululo lia yimwe yihula yize akukuhula kuli waze walilongesa no ku shikola, ngwe chakutalilaho, “Mumu liaka wakufuliela muli Zambi?” Mu site yetu jw.org muli yikuma yize muyikukwasa kukumbulula chihula chino. Yako ha chikuma MALONGESO A MBIMBILIYA >AKWEZE, muwanaho chikuma “Mumu Liaka Nakufuliela kuli Zambi?” Zachisa kanawa chikuma chacho hanga ululieke kumbululo lie. Muwanaho nawa versu jitatu ja Mbimbiliya jize muhasa kuzachisa: A-Hepreu 3:4, A-Roma 1:20 ni Samu 139:14. Muli nawa yikuma yikwo yize muhasa kuzachisa hanga ululieke makulumbululo a yihula yinji.—Tanga 1 Petulu 3:15.

¹² Lweza waze walilongesa no ku shikola ngwe, mahasa kulifupila ene malongeso ha jw.org. Yino ye alingile Luca. Mu kalasa kenyi te kanahanjikamo hakutwala ku uwayilo walisa. Luca yamona ngwenyi te kanahanjika yuma yipi hali Yela ja Yehova. Chipwe ngwe te kanevu woma wa kuhanjika, nihindu Luca yeta kuli longeshi hanga alumbunune kuli alongi eswe mumu liaka nyonga liacho te lia mahuza. Longeshi yamwecha hanga alumbunune yize afuliela, chocho yapwa ni uhashi wa kusolola site kuli alongi eswe. Hachino, longeshi yeta kuli alongi eswe hanga akatale chinema chakwamba ngwo, Kukumba Akwa-Kusosomba Chakuhona Kuzwela. Luca kanakawahilila chinji ha kukalila Yehova ku shikola.

13. Mumu liaka kutwatambile kwecha kwambujola muze tuli mu yeseko?

¹³ Muze mupalika mu yeseko, kanda uhonga, alioze nunga ni kusa tachi hanga ulinge yize hi unatesa ku mwono we. (2 Timoteu 4:2) Yino ye alingile Katharina. Muze te ali ni miaka 17, yaputuka kwambujola kuli waze te akalakala no. Umwe wa kuli ayo te kakumusosomba chinji. Alioze iye kakavulamine yize atesele kulinga. Yitanga yenyi yipema yakomwesene Hans yoze te akalakala nenyi. Iye yaputuka kutanga mikanda yetu, kulilongesa Mbimbiliya, chocho yamupapachisa. Katharina kakanyingikine yuma yeswayi, mumu kayile ni kutwama kweka. Hachino muze hikwapalika miaka 13, iye yakomoka ha kumona Hans kanahanjika pande ja mbunga ha kukunguluka haze apwile ni usoko wenyi! Katharina yawahilila chinji mumu kakechele kwambujola kuli waze te akalakala no.

KANDA UVULAMA YUMA YIZE HIUNATESE KU MWONO WE

14, 15. (a) Yika watamba kwiwuluka muze akwenu makushinjila kulinga yize ayo akuzanga? (b) Yika muhasa kulinga mba ukole muze akwenu makushinjila kulinga yuma yize ayo akuzanga?

¹⁴ Kwamba pundu, mutwe uno wakukwasa hanga ununge ni kuwayila Yehova ni kutesa yuma ya ku spiritu ku mwono we. Alioze akweze anji waze ali ni miaka ngwe yena kanazange kulivwisa ene kuwaha. Nawa hanji mazanga hanga ni yena ulinge yuma yacho. Alioze, mwono we mukasolola kuli akwenu ngwo walingile kanawa ha kutesa yuma ya ku spiritu ku mwono we. Kashika kanda wecha akwenu hanga akuvulamise yize hi unatesa kulinga. Nyi wapwile ha utulilo wa kalela uze twatongola ku uputukilo, shina te mukwata kalela mweswawo, mumu ngwo atu waze alimo kanalivwisa kuwaha? Ka, kuuchi kuchilinga!

¹⁵ Hachino, yika mulinga mba ununge ni kukola muze akwenu makushinjila kulinga yuma yize ayo akuzanga? Ehuka yuma yize muyikukinda kukumba yihungumiona ya akwenu. (Yishima 22:3) Nyonga ha lamba lize liakwiza ha kulinga yuma yize kuyalitele. (A-Ngalashia 6:7) Ni kulikehesa cheswe tayiza ngwo unafupiwa chiyulo chipema. Panjika yize makulweza kuli yisemi je ni mandumbu mu chikungulwila waze hajama.—Tanga 1 Petulu 5:5, 6.

16. Kuchi chilweza cha Christoph chinasolola ulemu wakulikehesa?

¹⁶ Kulikehesa chakwashile Christoph hanga atayize chiyulo chipema. Ha mashimbu akehe muze te hamupapachisa, yaputuka kuya ku shikola ya kufumba mujimba. Koko, akweze akwo yamusanyika hanga apwe mu chizavu cho cha yiheho. Yalweza mukulwana wa mu chikungulwila chikuma chacho, mukulwana yamulweza hanga anyonge ha jimwe ponde, ngwe kulitachika hanji kufwila yuma ni akwo. Chipwe chocho, Christoph yakwata chiyulo cha kunjila mu chizavu chacho. Alioze hakupalika cha amwe mashimbu, yamona ngwenyi yiheho yacho yakuneha mbwaja ni ponde jinji. Hachino yahanjika nawa ni makulwana, ayo yamwaha chiyulo cha Mbimbiliya. Christoph yamba ngwenyi, “Yehova kangutuminyine akwa-kuhana yiyulo apema, nawa yingumupanjika chipwe ngwe kwapalikile amwe mashimbu.” Shina wakulikehesa ni kutayiza yiyulo yipema?

17, 18. (a) Yika Yehova anazange hanga akweze alinge musono? (b) Kuchi yiyulo yize mukwata muyihasa kukukwasa uhone kuliseha ku ukulwana? Hana chilweza.

¹⁷ Mbimbiliya yinambe ngwo: “Mukweze, wahilila mu ukweze we, mbunge ye yikuwahise ha matangwa a ukweze we.” (Chilumbununyi 11:9) Yehova kanazange hanga ni yena uwahilile ku ukweze we. Mu mutwe uno, walilongesa chize muhasa kuwahilila ha kulihulikila ku yuma ya ku spiritu yize hiunatese ni kukaula usongwelo wa Yehova ha kukwata yiyulo. Nyi mukaula yuma yino kukatuka ku ukweze we, mukamona chize Yehova makusongwela, makufunga ni kukuwahisa. Nyonga ha yiyulo yipema ya Mbimbiliya yize Yehova akukwaha ni kukaula chiyulo chino ngwo: “Iwuluka Tangi ye ha matangwa ja ukweze we.”—Chilumbununyi 12:1.

¹⁸ Twanuke kakukola kawashi ni kupwa makulwana. Alioze, anji akuli ayo kakuliseha mumu lia yuma yipi yize atesele hanji kuhona kutesa niyimwe ku ukweze wo. Alioze, nyi walihulikila ku yuma ya ku spiritu yize hiunatese, muze mukola mukawahilila ha yiyulo yize wakwachile. Chino che evwile Mirjana. Ku ukweze wenyi te kakuheha yiheho ya ha chiwe. Chocho yamusanyika hanga aye ni kuheha mu chizavu chinene. Alioze iye yasakula kulingila Yehova mashimbu eswe. Hikwapalika miaka kuhiana 30, nihindu uchili mu mulimo wa shimbu lieswe hamwe ni mukwo-lunga. Yamba ngwenyi, atu waze akuzanga lufuma, uhenya, ndundo, ni upite keshi kupwa ni uwahililo wamwenemwene. Yawezela nawa ngwenyi, yuma yipema kulinga ku mwono yili kuwayila Zambi ni kukwasa atu hanga amunyingike.

19. Mumu liaka chili chipema kulihulikila ku yuma ya ku spiritu muze uchili mukweze?

¹⁹ Akweze nunatela uchichimieko mumu chipwe ngwe nwakupalika mu yipikalo yinji, nihindu nwakununga ni kulingila Yehova. Nyi nwatesa yuma ya ku spiritu, munulemesa chinji mulimo wa kwambujola ku mwono wenu. Chikwo nawa, kunushi kwecha yitanga ya hano hashi, hanga yinuvulamise yuma ya ku spiritu yize hi nunatese. Munuhasa kupwa ni shindakenyo ngwo tachi jize nunase hi jangwaza ko. Nuli ni mandumbu anji waze akunuzanga ni kunukwasa. Kashika, ‘kunjikenu yilinga yenu kuli Yehova mba kuhala chenu muchikakola.’