Tuli Ambala a Yehova
“Vungu lize lili ni Yehova Zambi yo kuliawaha. Kawaha atu waze iye hatongola akapwe chihinga chenyi.”—SAMU 33:12.
1. Mumu liaka mutuhasa kwamba ngwetu yuma yeswe yambala ya Yehova? (Tala chizulie ha uputukilo.)
YUMA yeswe yambala ya Yehova! Mbimbiliya yinambe ngwo: “Lilu lia malilu, hashi ni yeswe yiliho” yambala ya Yehova. (Shimbi Yamuchiali 10:14; Usolwelo 4:11) Atu eswe tuli upite wa Yehova, mumu iye mwe watutangile. (Samu 100:3) Alioze hakutwala kuli atu, Yehova kakusakula amwe hakachi ko hanga apwe atu jenyi mu mutapu walipwila.
2. Kulita ni Mbimbiliya, atu aka waze ali ambala a Yehova mu mutapu walipwila?
2 Chakutalilaho, Samu 135 yavulukile tuvumbi ashishika a Yehova mu Izalele ya ku shakulu ngwe “upite wa iye mwene wika.” (Samu 135:4) Hozeia, nawa yaprofetizala hakutwala kuli amwe atu waze hi A-Izalele ko, alioze te mapwa atu ja Yehova. (Hozeia 2:23) Uprofeto uno wamanunukine muze Yehova aputukile kusakula atu waze te hi A-Izalele ko hanga akayule ni Kristu mu malilu. (Yilinga 10:45; A-Roma9:23-26) Atu jacho akuwayisa ni spiritu yisandu kakwaavuluka ngwo “chifuchi chisandu.” Ayo kali ‘upite’ wa mwene Yehova. (1 Petulu 2:9, 10) Alioze yika mutwamba hakutwala kuli akwa-Kristu eswe ashishika waze ali ni kutalatala cha mwono wa mutolo hano hashi? Yehova kakwaavuluka nawa ngwo “atu jami” hanji “waze natongwele.”—Izaia 65:22.
3. (a) Aya waze ali ni usepa ulemu ni Yehova musono? (b) Yika mutushimutwina ha mutwe uno?
3 Musono, “mbunga yikepe ya mapanga,” waze ali ni kutalatala cha kutwama mu malilu ku miaka yeswe, ni “mapanga akwo” waze ali ni kutalatala cha kutwama hano hashi ku miaka yeswe, kakuwayila Yehova hamuwika mu “chendo chimuwika.” (Luka 12:32; Yoano 10:16) Twakuzanga kusolola kuli Yehova ngwetu tunawahilila hakupwa ni usepa ulemu ni iye. Ha mutwe uno, mutushimutwinaho chize mutuhasa kusakwilila Yehova ha usepa uno ulemu uze tukwete.
TWAKUHANA MWONO WETU KULI YEHOVA
4. Kuchi mutuhasa kusakwilila Yehova ha kutwecha tupwe ni usepa upema ni iye, nawa kuchi Yesu achilingile?
4 Twakusakwilila Yehova muze twakuhana mwono wetu kuli iye ni kutupapachisa. Hachino yetweswe tuli ambala a Yehova, nawa tunazange kumwononokena ni mbunge yeswe. (A-Hepreu 12:9) Yesu neye che alingile muze amupapachishile. Chipwe ngwe iye kasemukine mu vungu lia Yehova, nihindu mwene kalihanyine kuli Yehova. Chapwile ngwe kanambe ngwenyi: “Ngunawahilila kulinga upale we, Zambi yami.”—Samu 40:7, 8.
5, 6. (a) Yika Yehova ambile muze apapachishile Yesu? (b) Chilweza chika muchitukwasa kunyingika chize Yehova akwivwa hakutwala ku kulihana chetu?
5 Kuchi Yehova evwile muze apapachishile Yesu? Mbimbiliya yinambe ngwo: “Muze te hamupapachisa, Yesu machitutuka mu meya, kumanyi malilu yazuluka kuli iye, yamona spiritu wa Zambi kanahulumuka ngwe katele, nikwiza hali iye. Liji yilituhuka mu malilu ngwo, Yono mwe Mwanami, ngunamuzange chikolo, muli iye ngunawahilila.” (Mateu 3:16, 17) Chize ku uputukilo, Yesu te kapwa wambala wa Zambi. Alioze Yehova kevwile kuwaha muze amwene Yesu ni mbunge yeswe kanazachisa mwono wenyi hanga amulingile. Yehova nawa kakuwahilila muze twakuhana mwono wetu kuli iye, nawa iye kakutuwahisa.—Samu 149:4.
6 Alioze yuma yeswe nihindu yambala ya Yehova! Mba yika yetu mutuhasa kumwaha? Achinyonga umwe lunga kali ni yitemo yipema mu munda wenyi. Limwe tangwa mwanenyi wa pwo wa kanuke mahela chitemo chimwe ni kumwaha cho. Chipwe ngwe chitemo chacho ni chenyi, nihindu tata yoze ukwete zango mawahilila ni chawana chize amwaha kuli mwanenyi. Chino chasolola ngwo mwanenyi kakumuzanga. Chitemo chino amwaha kuli mwanenyi chili ni ulemu unji kuli iye kuhiana yitemo yikwo yize yili mu munda. Chizechene nawa, Yehova kakuwahilila chinji muze twakuhana mwono wetu kuli iye ni mbunge yeswe.—Kutuhuka 34:14.
7. Kuchi Malakia atukwasa kunyingika chize Yehova akwivwa hali waze akumulingila ni mbunge yeswe?
7 Tanga Malakia 3:16. Mumu liaka chili chilemu kuhana mwono we kuli Yehova ni kukupapachisa? Kwamba umwenemwene, kukatuka haze mwono we waputukile uli wambala wa Tangi yetu, Yehova. Chipwe chocho, Yehova mevwa kuwaha chinji nyi wamutayiza ngwe Mwata ni kuhana mwono we kuli iye! (Yishima 23:15) Yehova kananyingika waze akumulingila ni mbunge yeswe, nawa kakusoneka majina jo ku mukanda wenyi “wa kwiwuluka.”
8, 9. Yika Yehova akwita kuli atu waze majina jo anasonewa ku mukanda wenyi “wa kwiwuluka”?
8 Nyi tunazange hanga jina lietu linunge mu mukanda “wa kwiwuluka” wa Yehova, kuli yimwe yize twatamba kulinga. Malakia kambile ngwenyi twatamba kuvwila Yehova woma ni kupukuna ha jina lienyi. Nyi mutuwayila mutu hanji chuma cheswacho, jina lietu malichiza mu mukanda wa Yehova!—Kutuhuka 32:33; Samu 69:28.
Hita tangwa, twatamba kusolola ku yitanga yetu ngwetu twakwononokena Yehova
9 Kashika, kuchakumbanyine wika kulihana kuli Yehova ni kutupapachisa. Mumu yino yili yuma yize twakulinga wika ha limwe shimbu, alioze kuwayila Yehova chapwa chuma chize mutulinga ku mwono wetu weswe. Kashika hita tangwa, twatamba kusolola ku yitanga yetu ngwetu twakwononokena Yehova.—1 Petulu 4:1, 2.
TWEHUKENU USOLO WA HANO HASHI
10. Kalisa muka watamba kupwa hakachi ka waze akulingila Yehova ni waze keshi kumulingila?
10 Ha mutwe uze wapalika twalilongesanga ngwetu, Kene, Solomone, ni A-Izalele te kakuliamba ngwo kakuwayila Yehova, alioze kakashishikile kuli iye. Yilweza yino yatulongesa ngwo kutwatambile wika kwamba mu kanwa ngwo twakuwayila Yehova. Alioze twatamba kuvwila lwaji yuma yipi ni kuzanga yuma yipema. (A-Roma 12:9) Yehova kambile ngwenyi te mukupwa kalisa “hakachi ka akwa-ululi ni yingulungulu; hakachi ka mukwa-kulingila Zambi ni yoze kamulingilile.”—Malakia 3:18.
11. Mumu liaka atu eswe atamba kutunyingika ngwo twakuwayila wika Yehova?
11 Twakusakwilila chinji Yehova hakutusakula hanga tupwe atu jenyi! Twatamba kupwa ni hamu lia kusolola kuli akwetu ngwetu tuli ambala a Yehova. (Mateu 5:16; 1 Timoteu 4:15) Achilihule ngwe: ‘Shina akwetu kangunyingika ngwo nashishika kuli Yehova? Kutala nakuzanga kulweza akwetu ngwami nguli Chela cha Yehova?’ Yehova mevwa yinyengo yinji nyi mutwivwa sonyi ja kulweza akwetu ngwetu tuli atu jenyi.—Samu 119:46; tanga Marku 8:38.
Shina yitanga ye yakusolola kuli akwenu ngwo uli Chela cha Yehova? (Tala maparagrafu 12, 13)
12, 13. Kuchi chapwa chikalu kunyingika Yela ja Yehova amwe?
12 Chaluyinda, chipwe Yela ja Yehova amwe no kakwimbulula “spiritu ya hano hashi.” Hachino, ayo keshi kulisa chinji ni atu waze keshi kuwayila Yehova. (1 A-Korindu 2:12) “Spiritu ya hano hashi” yakulingisa atu hanga alihulikile ha usolo wo wa kuzo. (A-Efwesu 2:3) Chakutalilaho, chipwe ngwe twakutambula malongeso amuwika, nihindu mandumbu amwe kakuzala kulita ni yitanga ya hano hashi. Ayo kakuzala mazalo waze akulikwata chinji ku mujimba ni kusolola yihanda ya mujimba, chipwe muze ali hamwe ni akwa-Kristu-ni-akwo. Nawa kakululieka kambu jo kulita ni yitanga ya hano hashi. (1 Timoteu 2:9, 10) Chino chakupwa chikalu akwo kwaanyingika nyi kali lume Yela ja Yehova nyi ka.—Tiangu 4:4.
13 Kuli nawa yuma yikwo yize yakulingisa amwe Yela ja Yehova hanga achine kulisa ni akwa-mavungu. Chakutalilaho, ha yiwanyino, mandumbu amwe kakuhangana ni kusolola yitanga yize akwa-Kristu katambile kupwa nayo. Akwo kakusa yizulie ni sango jo ha internet hanga asolole manyonga jo amusunya. Ayo kota kanda achitambula kama fumbo ya shili yinene mu chikungulwila, alioze mahasa kupwa masepa api kuli mandumbu ni mapangi akwo mu chikungulwila waze akusa tachi hanga alise ni atu a hano hashi.—Tanga 1 Petulu 2:11, 12.
Kanda ukaula yitanga ya mandumbu waze apwa ngwe nongwena
14. Yika twatamba kulinga mba tufunge usepa wetu ni Yehova?
14 Yuma yeswe hano hashi, kakuyilinga hanga yitutwale ku “usolo wa musunya, ni usolo wa meso, ni kulizata cha mwono.” (1 Yoano 2:16) Yetu twalisa ni atu akwo, mumu tuli ambala a Yehova. Twakulituna “utanganyanyi ni usolo wa hano hashi,” nawa twakusa tachi ha “kwenda ni mana ni ululi ni uwayilo.” (Titu 2:12) Ku mwono wetu weswe, kuchingako chize twakuhanjika, kulia, kunwa, kuzala ni kukalakala, yino yeswe yatamba kusolola kuli atu eswe ngwo tuli ambala a Yehova.—Tanga 1 A-Korindu 10:31, 32.
‘TULIZANGENU UMWE NI MUKWO NI MBUNGE YESWE’
15. Mumu liaka twatamba kusolola zango ni umbovu kuli mandumbu jetu akwa-Kristu?
15 Twakusolola ngwetu tunalemesa usepa wetu ni Yehova ha chize twakutwama ni mandumbu jetu akwa-Kristu. Ayo kali atu ambala a Yehova, chizechene ngwe yetu. Nyi twewuluka chikuma chino, mashimbu eswe mututwama kanawa ni mandumbu jetu ha kwaasolwela zango ni umbovu. (1 A-Tesalonika 5:15) Ulemu uka chino chikwete? Yesu kalwezele tumbaji twenyi ngwenyi: “Ku chino eswe makanyingika ngwo yenu nuli tumbaji twami, nyi munupwa ni zango kuli umwe ni mukwo.”—Yoano 13:35.
16. Yika twalilongesa ha Shimbi ya Mose yize yinasolola zango lia Yehova hali tuvumbi twenyi?
16 Chilweza chimwe ha Shimbi ya Mose muchihasa kutukwasa kutwama kanawa ni akwetu mu chikungulwila. Mu tembele ya Yehova mwapwile yikumba yize te akuzachisa wika mu uwayilo. Shimbi yacho yalumbunwine kanawa chize A-Levi atamba kuzachisa yikumba yacho, nawa yoze te mahona kukaula usongwelo wacho te mamushiha. (Kwalula 1:50, 51) Yehova kapwile ni kulipikala chinji ha chize atu mafunga yikumba yize te akuzachisa mu uwayilo wenyi. Yino yinasolola chize iye akulihulumba ha chize atu akutwama ni tuvumbi twenyi ashishika. Kakutukwasa tunyingike ulemu uze tukwete kuli iye, hakwamba ngwenyi: “Yoze manusunga chapwa ngwe kunguchoka mu katumba ka liso.”—Zekaria 2:8.
Yehova kakutumona muze mutuzumbula ngeji, mutuhana yuma kuli akwetu, mutukonekena akwetu ni kwaasolwela umbovu
17. Yika Yehova ‘apanjikile, nawa evwile’?
17 Malakia kambile ngwenyi, Yehova ‘wapanjikile, nawa wevwile’ chize atu jenyi te akutwama umwe ni mukwo. (Malakia 3:16) Yehova ‘kananyingika atu jenyi.’ (2 Timoteu 2:19) Iye kananyingika yeswe yize twakulinga hanji twakuhanjika. (A-Hepreu 4:13) Nyi mutulinga yuma yipi kuli mandumbu jetu, Yehova mayimona. Alioze twatamba kunyingika nawa ngwetu Yehova kakutumona muze mutuzumbula ngeji, mutuhana yuma kuli akwetu, mutukonekena akwetu ni kwaasolwela umbovu.—A-Hepreu 13:16; 1 Petulu 4:8, 9.
“YEHOVA KECHI KUMBILA ATU JENYI”
18. Kuchi mutuhasa kusakwilila Yehova mumu lia kupwa atu jenyi?
18 Twakusakwilila chinji Yehova hakupwa atu jenyi. Tunanyingika ngwetu nyi twahana mwono wetu kuli iye, twasakula kulinga chuma cha mana. Chipwe ngwe twatwama “mukachi ka chisemuko cha uhenge,” nihindu mutuhasa ‘kupanguka hano hashi ngwe temo.’ (A-Fwilipu 2:15) Kashika twatamba kwecha kulinga yuma yeswe yize Yehova keshi kuzanga. (Tiangu 4:7) Nawa twatamba kuzanga ni kuvumbika mandumbu jetu mumu no kali atu ambala a Yehova.—A-Roma 12:10.
19. Kuchi Yehova akuwahisa atu waze akupwa ku sali lienyi?
19 Mbimbiliya yinalakenya ngwo: “Yehova kechi kumbila atu jenyi.” (Samu 94:14) Chino chili chilakenyo chilemu chinji. Mumu chipwe ngwe mukulingiwa yuma yeswayo, nihindu Yehova makapwa hamwe ni yetu. Chipwe ngwe mutufwa, iye kechi katuvulama. (A-Roma 8:38, 39) Mbimbiliya yinambe ngwo: “Chipwe kachi mutupwa ni mwono, kuli Mwene mutupwa ni mwono. Chipwe kachi mutufwa, kuli Mwene mutufwa. Kashika chipwe mutupwa ni mwono, chipwe mutufwa, tuli ambala a Mwene.” (A-Roma 14:8) Hachino, tunashimbwila matangwa waze Yehova makahindwisa masepa jenyi eswe ashishika waze hanafu. (Mateu 22:32) Alioze, chipwe haliapwila tuli ni yiwape yinji yipema ya kuli Yehova. Mbimbiliya yinambe ngwo: “Vungu lize lili ni Yehova Zambi yo kuliawaha. Kawaha atu waze iye hatongola akapwe chihinga chenyi.”—Samu 33:12.