Tusololenu Keke kuli “Atu Eswe”

MUZE Yesu alongesele tumbaji twenyi chize mambujola sango lipema, iye yaalweza ngwenyi atu eswe te kechi kwaapanjika. (Luka 10:3, 5, 6) Chino nawa chakulingiwa mu mulimo wetu wa kwambujola. Atu amwe waze twakuya ni kwambulwila sango lipema mahasa kupwa akalu hanji kutulinga yuma yipi. Nawa nyi matulinga yuma yipi, chakupwa chikalu kwaasolwela keke ni kuzanga kwaambulwila sango lipema.

Mutu mukwa-keke kakutala ha milonga ni yize akwo anafupiwa, nawa kakwevwila keke ni kuzanga kwaakwasa. Alioze yika muyilingiwako nyi twahona kusolola keke hali atu waze twakuwana mu munda? Zango lietu mulihwa, chekwamba, kutuchi kulipikala ha kwaambulwila sango lipema, nawa kutuchi kuzanga kwaakwasa. Mutuhasa kutesa zango lize tukwete ha mulimo wetu wa kwambujola ni kahia. Mba kahia kanunge ni kukwata chatela kusaho kunyi jinji. Chizechene nawa, mba zango lietu likole mu mulimo wa kwambujola twatamba kupwa ni keke!—1 A-Tesalonika 5:19.

Kuchi mutuhasa kusolola keke, chipwe muze muchipwa chikalu? Tushimutwinenu yilweza ya atu atatu waze mutuhasa kwimbulula: Yehova, Yesu, ni postolo Paulu.

TWIMBULULENU KEKE YA YEHOVA

Hi kwapalika tununu twa miaka, atu nihindu kakuhanjika mahuza hakutwala kuli Yehova. Alioze iye machinunga ni kusolola “utu kuli akwa kaleleso ni yingulungulu.” (Luka 6:35) Mba kuchi iye akusolola utu wacho? Ha kupwa chihumikiji kuli atu eswe. Yehova kanazange hanga “atu eswe” akalilamwine. (1 Timoteu 2:3, 4) Chipwe ngwe Zambi kakuvwila lwaji ungulungulu, atu kapwa alemu chinji kuli iye nawa kazangile niumwe hanga afwe.—2 Petulu 3:9.

Yehova kananyingika ngwenyi Satana kali ni mana anji akwonga no atu hanga afuliele mahuza. (2 A-Korindu 4:3, 4) Atu anji kakwaalongesa yuma ya mahuza hakutwala kuli Zambi kukatuka ku wanuke. Kashika mutapu uze ayo akunyonga ni kwivwa muuhasa kwaakwika kutayiza umwenemwene. Alioze Yehova kanazange chinji kwaakwasa. Mba kuchi tunachinyingika?

Chakutalilaho, kuchi Yehova evwile hakutwala kuli atu mu mbonge ya Ninive? Chipwe ngwe ayo te yingalwe, nihindu Yehova yalweza Yona ngwenyi: ‘Kuchangutambile yami kuvwila keke Ninive, lie limbo linene, muze mwatwama atu kuhiana kulakaji ni makumi aali a tununu (120, 000) waze kanyingikine kutongola hakachi ka upeme ni upi?’ (Yona 4:11) Yehova kevwilile atu jacho keke, waze te kanyingikine umwenemwene hali iye. Kashika atumine Yona hanga aatoweze.

Ni yetu twakwivwa ngwe chize Yehova akwivwa hali atu. Ayo kakwete ulemu unji. Ngwe Yehova, tunazange kwaakwasa hanga amunyingike, chipwe ngwe ayo masolola ngwo kasolo kutayiza umwenemwene.

TWIMBULULENU KEKE YA YESU

Ngwe Tato, Yesu kevwilile atu keke “mumu analikatalisa nikulimbilambila, ngwe mapanga waze keshi kafunga.” (Mateu 9:36) Yesu kanyingikine mumu liaka atu apwile chocho. Chapwile mumu tusongo a mangeleja te keshi kutwama no kanawa nawa te kakwaalongesa yuma ya mahuza. Chipwe ngwe Yesu kanyingikine ngwenyi atu anji te kakwiza ni kupanjika malongeso jenyi ha yitela yalisa hi hakupwa tumbaji twenyi ko, nihindu iye yanunga ni kwaalongesa yuma yinji.—Marku 4:1-9.

Nyi atu katayijile sango jetu, twatamba kunyingika mumu liaka kasolo kujitayiza. Kota kali ni nyonga lipi ha Mbimbiliya hanji hali akwa-Kristu, mumu kakumona ngwo amwe waze akuliamba ngwo akwa-Kristu kakulinga yuma yipi. Akwo hanji kakwivwa yuma ya mahuza hakutwala ku ufulielo wetu. Eka hanji kakwivwa woma wa asoko hanji enyembo jo ngwo maakekuna nyi mahanjika ni yetu.

Atu amwe waze twakuwana mu mulimo wetu wa kwambujola hanapalika mu yuma yipi ku mwono wo. Mishionaliu yoze avuluka ngwo Kim yamba ngwenyi atu anji mu njiza yenyi kalilamwinyine ku jita ni kutokesa yuma yeswe yize apwile nayo. Ayo keshi ni kutalatala nichimwe cha kulutwe lia matangwa. Kakwivwa uli unji nawa keshi kujikijila muli mutu niumwe. Atu amu njiza yacho, kanji-kanji kakumanyisa Yela ja Yehova hanga aambulwile sango lipema. Limwe tangwa Kim muze te anambujola neye yamumanyisa.

Kuchi Kim akununga ni kusolola keke, chipwe muze atu akumulinga yuma yipi? Iye nihindu kakwiwuluka maliji ali ha Yishima 19:11, akwamba ngwo: “Malinjekela kakupwisa mutu makoke kutenuka.” Muze akunyonga yize atu apalikile mu njiza yenyi, chakumukwasa kwaasolwela keke. Nawa hi ko ngwo atu eswe waze akuwana mu munda keshi kumutayiza. Mu njiza yoyene, iye kakuwanamo atu waze akufuna ni kumeneka.

Mutuhasa kulihula ngwetu: ‘Nyi ami te kuchanyingikine umwenemwene, kuchi te ngulinga nyi Yela ja Yehova meza ni kungwambulwila sango lipema?’ Chakutalilaho, mahuza aka twevwile hakutwala kuli Yela ja Yehova? Kota ni yetu kachi twakumbulwile chipi nawa te muchifupiwa kutusolwela keke. Yesu kambile ngwenyi, twatamba kutwama kanawa ni akwetu ngwe chize yetu twakuzanga hanga akwetu atwame ni yetu. Kashika twatamba kunyingika chize akwetu akwivwa ni kupwa yihumikiji kuli ayo, chipwe ngwe muchikaliwa.—Mateu 7:12.

TWIMBULULENU KEKE YA PAULU

Postolo Paulu kasolwele keke chipwe kuli atu waze te keshi kutayiza sango lipema. Mumu liaka? Mumu iye kewulukile chize apwile. Yamba ngwenyi: “Napwile kunyima mukwa kushililika Zambi, mukwa kuhungumiona, mukwa kupopolola, hindu nawanyine keke, mumu nachilingile ni kwalajala, nikuhona ufulielo.” (1 Timoteu 1:13) Paulu kanyingikine ngwenyi, Yehova ni Yesu kamusolwelele keke yinji. Kashika iye ahashile kunyingika atu waze azangile kukanjisa mulimo wa kwambujola, mumu neye che alingile.

Ha mashimbu amwe, Paulu, te kakuliwana ni atu waze afuliela chinji ha malongeso a mahuza. Mba kuchi te akwivwa hachino? Ha Yilinga 17:16, twakutangaho ngwetu, muze apwile mu Atene, ‘yalipikala kuhiana ha kumona limbo lia too ni mahamba.’ Hachino, Paulu yazachisa yuma yize alipikalile nayo ngwe jila hanga alongeselemo atu. (Yilinga 17:22, 23) Iye te kakwalumuna mutapu wa kwambujola ni kuhanjika yuma kulita ni atu waze awana hanga ‘eswe akalamwine.’—1 A-Korindu 9:20-23.

Muze mutwambujola kuli atu waze keshi kutuzanga hanji waze akwete nyonga lipi hali yetu, mutuhasa kupwa ngwe Paulu. Mutuhasa kuzachisa yuma yize twanyingika hali ayo hanga twaakwase anyingike “sango lia kuwaha lia yuma yipema.” (Izaia 52:7) Pangi Dorothy yamba ngwenyi: “Mu njiza yetu atu hanaalongesa ngwo Zambi kapwa mukalu nawa kakupatwila atu ni kawashi ha yize malinga. Nakuchichimieka atu jacho hakutwala ku ufulielo wo ukolo hali Zambi, mba hi ngwaasolwela yize Mbimbiliya yakwamba hakutwala ku utu wa zango wa Yehova ni yilakenyo yenyi ya kulutwe lia matangwa.”

“KUMBENU YIPI HA KULINGA YIPEMA”

Amu tunakundama ku songo lia hano hashi, mutuhasa kushimbwila ngwetu atu “kumakapiha kuhiana.” (2 Timoteu 3:1, 13) Alioze kutwatambile kutokesa keke hanji uwahililo wetu mumu lia yize atu akulinga. Yehova mahasa kutwaha tachi hanga ‘tukumbe yipi ha kulinga yipema.’ (A-Roma 12:21) Jessica umwe pionelu yamba ngwenyi kanji-kanji iye kakuliwana ni atu waze alizata nawa akutukekuna hamwe ni sango jetu. Iye yawezela ngwenyi: “Chino muchihasa kuneha uli. Alioze muze ngunambe kuputuka umwe lusango, chitangu nakulemba kuli Yehova mu mbunge hanga angukwase ngumone atu ngwe chize iye akwaamona.” Chino chakukwasa Jessica ahone kulihulikila ha chize anevu ku mbunge, alioze anyonge ha chize makwasa atu.

Twatamba kukolweza mandumbu jetu muze tunambujola no hamuwika. Jessica yamba ngwenyi muze iye akutuhuka ni akwo mu munda nyi ayo mamulweza lusango mupi, iye keshi kulihulikila ha lusango wacho. Alioze, kakuhanjika yuma yipema, ngwe yize twakupwa nayo mu mulimo wetu wa kwambujola chipwe ngwe atu keshi kuuzanga.

Yehova kananyingika kanawa ngwenyi ha mashimbu amwe chakupwa chikalu kwambujola. Alioze iye kakuwahilila chinji muze twakwimbulula keke yenyi! (Luka 6:36) Chipwe chocho, tunanyingika ngwetu, Yehova kechi kununga ni kuvwila atu jacho keke ni uhumikizo ku miaka yeswe. Mutuhasa kupwa ni shindakenyo ngwetu iye kananyingika kanawa shimbu lize makaneha songo hano hashi. Amu shimbu liacho kanda lichiheta, mulimo wa kwambujola twatamba kuulinga ni kawashi. (2 Timoteu 4:2) Hachino, tunungenu ni kwambujola ni mbunge yeswe ni kusolola keke kuli “atu eswe.”