Imbulula Yehova ha Kupwa Chimbovu ni Kulihulumba Hali Akwenu
“Kawaha yoze wakunyonga yiswale.”—SAMU 41:1.
1. Kuchi tuvumbi twa Yehova akulizanga umwe ni mukwo?
TUVUMBI eswe a Yehova hano hashi kali mu usoko umuwika. Ayo kali mandumbu ni mapangi waze akulizanga umwe ni mukwo. (1 Yoano 4:16, 21) Ha mashimbu amwe, ayo kakulihana ene hanga akwase mandumbu jo, alioze ha mashimbu akwo kakusolola zango lio ha kwaalingila yuma yinji yikehe-yikehe. Chakutalilaho, ayo mahasa kulweza mandumbu jo chuma chipema hanji kwaasolwela umbovu. Kashika muze mutulihulumba hali akwetu, acho tunembulula Tata yetu wa mu malilu.—A-Efwesu 5:1.
2. Kuchi Yesu embulwile zango lia Tato?
2 Yesu kembulwile Tato ni ungunu weswe. Iye te kakusolwela akwo umbovu. Yamba ngwenyi: “Tweyenu kuli yami, yenu eswe nwakukilikita nikulemewa, ni yami kumungunuhwimisa.” (Mateu 11:28, 29) Nyi twembulula Yesu ha kulihulumba hanji ‘kunyonga yiswale,’ mutuvwisa Yehova kuwaha, ni yetu nawa mutuwahilila chinji. (Samu 41:1) Ha mutwe uno, mutumonaho chize mutuhasa kulihulumba hali asoko jetu, mandumbu jetu mu chikungulwila, ni hali atu waze twakuwana mu mulimo wa kwambujola.
LIHULUMBE HALI ASOKO JE
3. Kuchi umwe lunga akulihulumba hali mukwo-pwo? (Tala chizulie ha uputukilo.)
3 Malunga katamba kusolola chilweza chipema ha chize akufunga asoko jo. (A-Efwesu 5:25; 6:4) Mbimbiliya yinambe ngwo, malunga katamba kulihulumba hali mapwo jo ni kwanyingika kanawa. (1 Petulu 3:7) Lunga yoze wakutwama kanawa ni mukwo-pwo, kananyingika ngwenyi chipwe ngwe iye kalisa nenyi mu yuma yinji, nihindu iye keshi mulemu kuhiana pwo. (Uputukilo 2:18) Iye kakulihulumba ha chize mukwo-pwo akwivwa nawa kakumulemesa ni kumuvumbika. Umwe pwo mu Canadá yahanjika hali mukwo-lunga ngwenyi: “Iye kanda achilengulula kama chize nakwivwa hanji kungwamba ngwenyi, ‘Ena kuwatambile kwivwa chocho.’ Iye nawa kakungupanjika kanawa. Muze akungukwasa hanga ngwalumune manyonga jami ha chimwe chikuma kakuchilinga ni umbovu weswe.”
Lunga kakushishika kuli mukwo-pwo mumu kakumuzanga nawa kakuzanga Yehova ni kuvwila lwaji yuma yipi
4. Kuchi lunga mahasa kusolola ngwenyi kakulihulumba hali mukwo-pwo ha chize akutwama ni mapwo akwo?
4 Lunga yoze wakulihulumba hali mukwo-pwo keshi kutala mapwo akwo ni kwavwila usolo hanji kwasolwela zango lia ulo, chipwe mu rede social hanji ha Internet. (Yombi 31:1) Keshi kuzachisa rede social hanga apwe ni kuhehesa mapwo eka hanji kutala yizulie yipi. Kakushishika kuli mukwo-pwo mumu kakumuzanga nawa kakuzanga Yehova ni kuvwila lwaji yuma yipi.—Tanga Samu 19:14; 97:10.
5. Kuchi pwo mahasa kulihulumba hali mukwo-lunga?
5 Nyi lunga membulula chilweza cha zango cha mwata wenyi, Yesu Kristu, muchipwa chashi mukwo-pwo ‘kumuvumbika.’ (A-Efwesu 5:22-25, 33) Hamukunda wa vumbi liacho, pwo masa tachi hanga anyingike chize lunga akwivwa ni kumusolwela umbovu muze analingi milimo ya mu chikungulwila hanji muze ali ni kapinda. Umwe lunga mu Grã-Bretanha yamba ngwenyi: “Nyi mukwetu-pwo mamona yimwe yitanga yinalumuka ku mwono wami, iye kakunyingika ngwo yimwe kuyishi kwenda kanawa. Mba hi makaula chiyulo chili ha Yishima 20:5, chipwe ngwe chino muchilumbunuka kushimbwila ndo ha mashimbu alita mba ngumulweze chize ngunevu.”
6. Kuchi yetweswe mutuhasa kukolweza twanuke hanga apwe yimbovu ni kulihulumba hali akwo, nawa kuchi ayo mevwa?
6 Nyi yisemi malihulumba hali umwe ni mukwo, malweza ana jo chilweza chipema. Ayo nawa kanafupiwa kulongesa ana jo hanga apwe yimbovu ni kulihulumba hali akwo. Chakutalilaho, yisemi mahasa kulongesa ana jo hanga alitwamine kuzomboka-zomboka mu Zuwo lia Wanangana. Hanji muze ali ha chimwe chiwanyino, yisemi mahasa kulweza ana jo hanga ashimbwile makulwana aliange kwanda kulia, mba hi ayo manda. Chipwe chocho, hita ndumbu mu chikungulwila mahasa kukwasa yisemi. Hachino, twatamba kuchichimieka twanuke muze malinga chimwe chuma chipema, chakutalilaho, ngwe muze matwazulwila pito. Chino muchivwisa twanuke kuwaha nawa mutwakwasa hanga anyingike ngwo “chinawaha kutambula alioze shinaho kuhana.”—Yilinga 20:35.
LIHULUMBE HALI MANDUMBU JE MU CHIKUNGULWILA
7. Kuchi Yesu alihulumbile hali umwe lunga kafwa-matwi, nawa yika mutuhasa kulilongesa ha chilweza cha Yesu?
7 Limwe tangwa, muze Yesu apwile mu Ndekapole atu yamunehena “umwe kafwa-matwi, kanda mukwa chilimi cha kuhanjika.” (Marku 7:31-35) Yesu yamuwuka, alioze hi meso ja mbunga ko. Mumu liaka? Mumu, amu lunga wacho te keshi kuhanjika, kota te kechi kulivwa kanawa nyi mamuwukila mukachi ka mbunga. Yesu kanyingikine chize lunga wacho te anevu, chocho “yamutwala ku tenga” hanga amuwukileko. Chipwe ngwe yetu kutuchi kulinga yikomokeso, alioze twatamba kulihulumba hali mandumbu jetu ni kwasolwela umbovu. Postolo Paulu yasoneka ngwenyi: “Tulitalenu umwe ni mukwo ni kulikasumuna ku zango ni yitanga yipema.” (A-Hepreu 10:24) Yesu kanyingikine chize lunga wacho evwile, chocho yamuvwila keke. Chino chili chilweza chipema chize twatamba kukaula!
Zango liakutulingisa hanga tukwase mandumbu jetu waze hashinakajiwa hanji yitonji
8, 9. Kuchi mutuhasa kusolola ngwetu twakulihulumba hali tushinakaji ni yitonji? (Hana yilweza.)
8 Kulihulumba hali tushinakaji ni yitonji. Chitanga chilemu cha mu chikungulwila cha akwa-Kristu chili zango hi kukalakala chinji ko. (Yoano 13:34, 35) Zango liakutulingisa hanga tukwase mandumbu jetu waze hashinakajiwa hanji yitonji ha kuya no kukunguluka ni kwambujola. Twakwakwasa chipwe ngwe chinakaliwa hanji kutushi ni uhashi unji wa kuchilinga. (Mateu 13:23) Michael, yoze uli chitonji, kakusakwilila chinji ha ukwaso uze akumwaha kuli asoko jenyi ni kuli mandumbu amu chikungulwila. Yamba ngwenyi: “Mumu lia ukwaso uze ayo akungwaha, nakuhasa kuya kukunguluka ni kwambujola sango lipema. Chipi-chipi kwambujola ha mbunga.”
9 Ku Mbetele jinji, kuli mandumbu ashishika waze hapwa tushinakaji hanji yitonji. Mandumbu waze akwafunga kakwasolwela zango ha kwakwasa hanga ambujole kupalikila mu kusoneka mikanda ni kuzachisa telefone. Bill, yoze uli ni miaka 86 nawa wakutuma mikanda kuli atu waze atwama kusuku yamba ngwenyi: “Twakusakwilila hakupwa ni uhashi wakusoneka mikanda.” Nancy, yoze uli ni miaka 90, yamba ngwenyi: “Ami chishi kumona mulimo wacho ngwe wa kusa wika mikanda mu invelope. Alioze uli mulimo wa kwambujola. Mumu atu kanafupiwa kupanjika sango lipema!” Ethel, yoze wasemukine ha mwaka 1921, ngwenyi: “Nakupinda ni yikola ku mwono wami. Ha matangwa amwe chakungukalila kuzala mazalo.” Chipwe chocho, iye kakwambujola ku telefone mba kali ni atu anji waze akumeneka. Barbara, yoze uli ni miaka 85, yamba ngwenyi: “Mumu lia musongo wami, chakungukalila kuya mu munda. Alioze, nakwambujola kuli atu ha kuzachisa telefone. Nakusakwilila chinji Yehova!” Ha tukweji akehe wika, chizavu cha mandumbu waze hakola kalingile maola 1,228 mu munda, yasoneka mikanda 6,265, yasanyika atu ku telefone ha yisuho 2,000, nawa yahana mikanda 6,315! Mutuhasa kupwa ni shindakenyo ngwetu Yehova kakwivwa kuwaha ha tachi jize akusa mandumbu jacho!—Yishima 27:11.
10. Kuchi mutuhasa kukwasa mandumbu jetu mba ayuke muze ali ha kukunguluka?
10 Kulihulumba hali akwetu muze tuli ha kukunguluka. Nyi twalihulumba hali mandumbu jetu, mutwakwasa hanga ayuke chinji muze ali ha kukunguluka. Mu mulali uka? Mulali umwe uli wa kulianga kuheta hanga tuhone kupinjisa akwetu. Ewa, ha mashimbu amwe, yuma yize yakulingiwa susumuku muyihasa kutulalwisa. Alioze nyi tukwete chako cha kulaluka, twatamba kunyonga ha chize chako chacho muchihasa kukwata hali mandumbu jetu ni yize mutuhasa kulinga hanga tusolole ngwetu twakulihulumba hali ayo. Nyingika ngwe Yehova ni Mwanenyi e akutusanyika ha kukunguluka. (Mateu 18:20) Kashika twatamba kwavumbika hakuheta ha mashimbu waze alita!
11. Mumu liaka mandumbu waze ali ni yihanda ha kukunguluka atamba kukaula usongwelo uli ha 1 A-Korindu 14:40?
11 Nyi twalihulumba hali mandumbu jetu, mutukaula usongwelo wa Mbimbiliya uze wakwamba ngwo: “Akalinge yuma yeswe nikulita ni kululika.” (1 A-Korindu 14:40) Mandumbu waze akupwa ni yihanda ha kukunguluka katamba kukaula usongwelo uno hanga kukunguluka chihwe ha mashimbu alita. Hakulinga chocho, masolola ngwo keshi ni kulihulumba wika hali mandumbu waze masulaho ni pande, alioze ni hali mandumbu eswe mu chikungulwila. Mumu kukunguluka nyi kuchahwile ha mashimbu alita, chino muchihasa kupinjisa chinji mandumbu. Mandumbu amwe katwama kusuku, kashika kakufupiwa shimbu hanga afune ku mazuwo jo. Akwo kakufupiwa kukwata kalela hanji masuwa. Eka, kalimbata ni waze hi Yela ja Yehova ko, kashika kakwashimbwila hanga ahete ku zuwo ha ola yalita.
12. Mumu liaka twatamba kuvumbika ni kuzanga makulwana amu chikungulwila? (Tala mushete “Lihulumbe Hali Waze Apwa Tusongo.”)
12 Makulwana kakukalakala chinji mu chikungulwila ni mu munda, kashika twatamba kwavumbika ni kwazanga. (Tanga 1 A-Tesalonika 5:12, 13.) Tunafuliela pundu ngwetu, nwakusakwilila ha yeswe yize akulinga. Munuhasa kusolola usakwililo wacho ha kwononokena ni mbunge yeswe ni kwakwasa, mumu “kakulawoka ha mbunge jenu, chizechene ngwe waze makalumbununa kuli Zambi.”—A-Hepreu 13:7, 17.
LIHULUMBE HALI WAZE WAKUWANA MU MULIMO WAKWAMBUJOLA
13. Yika mutuhasa kulilongesa ha mutapu uze Yesu te akulihulumba hali atu?
13 Mu umwe uprofeto hakutwala kuli Yesu, Izaia yamba ngwenyi: “Lumbungu wa kuwondewa kechi kamumakuna, wanda unatuhwisa mwishi kechi kaujima.” (Izaia 42:3) Zango lize Yesu apwile nalio hali atu liamukwashile kusolola keke. Iye te kakulihulumba hali waze keshi utakamiso ni waze analela ngwe “lumbungu wa kuwondewa” hanji “wanda unatuhwisa mwishi,” hachino, yaasolwela umbovu ni uhumikizo. Chipwe twanuke te kakuzanga kuya kuli Yesu. (Marku 10:14) Ewa, kutuchi kuhasa kunyingika atu hanji kwalongesa ngwe chize Yesu alingile! Alioze mutuhasa kulihulumba hali atu waze twakuwana mu munda, ha kunyonga ha chize mutuhanjika no, ha shimbu lize mutwahanjisa, ni kusuha cha shimbu lize mutupwa no.
Maliji jetu ni mutapu uze mutuhanjika yatamba kusolola kuli atu ngwo twakwazanga nawa twakulihulumba hali ayo
14. Mumu liaka twatamba kunyonga ha chize twakuhanjika ni atu?
14 Kuchi twatamba kuhanjika ni atu? Atu anji musono “kanalikatalisa nikulimbilambila” hamukunda wa kalimbalimba wa manguvulu, mangana a yingeleja ni mingoso yize kuyalitele. (Mateu 9:36) Kashika, atu anji keshi kufuliela ni kujikijila hali mutu niumwe. Hachino, maliji jetu ni mutapu uze mutuhanjika yatamba kusolola kuli atu ngwo twakwazanga nawa twakulihulumba hali ayo! Atu anji kakuzanga kupanjika sango jetu hi ko ngwo, mumu twakuzachisa kanawa Mbimbiliya alioze mumu twakwasolwela zango ni vumbi.
15. Mu majila aka waze mutuhasa kulihulumba hali atu amu njiza yetu?
15 Kuli mitapu yinji yize mutuhasa kulihulumba hali atu amu njiza yetu. Muze mutwahula, twatamba kuchilinga ni umbovu hamwe ni vumbi. Umwe pionelu kakalakalile mu njiza muze atu anji te akwivwa sonyi, chocho yecha kupwa ni kwahula yihula yize muyevwisa sonyi nyi kahashile kukumbulula. Iye te keshi kwahula ngwo, “Shina unanyigika jina lia Zambi?” hanji “Kutala unanyingika Wanangana wa Zambi?” Alioze, te kakwamba chino, “Natanganga mu Mbimbiliya ngwo Zambi kakwete jina. Shina muchilita ngukulweze jina liacho mu Mbimbiliya?” Ku yihela yikwo atu keshi kuhasa kulinga chocho, mumu atu kakwete mianda yalisa. Alioze nihindu twatamba kusolola umbovu ni vumbi hali atu amu njiza yetu. Mba tuchilinge, tunafupiwa kwanyingika kanawa.
16, 17. Kuchi mutuhasa kusolola umbovu hakutwala ku (a) shimbu lize mutuya ni kuhanjika ni atu ku mazuwo jo? (b) mashimbu waze mutuhanjika no?
16 Shimbu lika twatamba kuhanjika ni atu? Muze tunayi ni kwambujola ku zuwo ni zuwo, atu keshi kunyingika ngwo mutuya ku mazuwo jo, mumu hi ayo ko akutusanyika. Kashika, chili chilemu kuya ku mazuwo jo ha maola waze ayo mahasa kupwa ni mashimbu akuhanjika. (Mateu 7:12) Chakutalilaho, shina atu amu njiza yenu kakuzanga chinji kupomba kusongo lia poso, ngwe lia Sambata ni Liayenga? Hachino, munuhasa kuputuka kwambujola mu tapalo, ha mbunga, hanji kuya ni kumeneka atu waze nwalitesanga no.
17 Mashimbu angahi twatamba kulinga? Atu kakwete milimo yinji, kashika, muchilita kuhanjika no ha mashimbu akehe, chipi-chipi nyi ha tangwa litangu. Muchipwa chipema kuhwisa lusango wetu ni kawashi chakuhona kushimbula chinji. (1 A-Korindu 9:20-23) Muze atu mamona ngwo, tunalemesa milimo yo, ayo mazanga kuhanjika ni yetu ha mashimbu akwo. Nyi mutusolola yitanga yize yinakatuka ha spiritu ya Zambi, mutupwa pundu “akwa-milimo-ni-akwo a Zambi.” Acho, Yehova matuzachisa hanga tukwase atu kunyingika umwenemwene!—1 A-Korindu 3:6, 7, 9.
18. Nyi twalihulumba hali akwetu, yiwape yika mutukazuka?
18 Kashika, yetweswe twatamba kulihulumba hali asoko jetu, mandumbu jetu mu chikungulwila ni kuli waze twakuwana mu munda. Nyi twachilinga, mutuzuka yiwape yinji haliapwila ni kulutwe lia matangwa. Ngwe chize Samu 41:1, 2 yinambe: “Kawaha yoze wakunyonga yiswale. Yehova kumakamupulula ha tangwa lipi. Yehova mamufunga, mamwaha mwono, kumakawaha mu chifuchi.”