Fuliela Muli Yehova Mba Upwe ni Mwono!

1. Mumu liaka tulieswe tunafupiwa utakamiso?

TULIESWE tunafupiwa utakamiso. Kota mwono wetu unazale too ni yipikalo, kulema ku mbunge ni kuzakalala. Mutuhasa kumona lamba mumu lia yimwe misongo, ushinakaji hanji kufwa cha yoze twazanga chinji. Amwe akuli yetu kanatumwesa lamba kuli akwetu. Chikwo nawa, atu waze twatunga no kanapu chinji yingalwe. Chochene lume, ‘miaka yino yikalu’ yinasolola ngwo tuli ha “matangwa a kusula,” nawa ngwo hita tangwa tunayi ni kukundama ku chifuchi chaha. (2 Timoteu 3:1) Hanji twakushimbwila kumanunuka cha yilakenyo ya Yehova ha miaka yinji, hachino, mutuhasa kupalika mu yipikalo yinji. Mba kulihi mutuhasa kuwana utakamiso?

2, 3. (a) Yika tunanyingika hakutwala kuli Habakuke? (b) Mumu liaka mutuhengwola mukanda wa Habakuke?

² Tuhengwolenu mukanda wa Habakuke hanga tuwane kumbululo lia chihula chacho. Chipwe ngwe Yisoneko kuyishi kutulweza yuma yinji hakutwala ku mwono wa Habakuke, nihindu mukanda wenyi uli ni utakamiso unji. Jina Habakuke kota linalumbunuka “Kukangayika cha zango.” Chino mutuhasa kuchitesa ni kukangayika cha zango cha Yehova chize chakutakamisa tuvumbi twenyi. Hanji mutuhasa nawa kuchitesa mu mutapu uze tuvumbi twenyi akulalaminya kuli iye. Habakuke kahanjikile ni Zambi ni kumuhula yimwe yihula. Yehova yatuma Habakuke hanga asoneke lusango wacho, mumu Iye kanyingikine ngwenyi te makwasa atu anji.—Habakuke 2:2.

³ Lusango wa Yehova ni profeta yono te unalemewa ku mbunge, kanasolola yize Mbimbiliya yakwamba hakutwala hali Habakuke. Alioze mukanda wenyi uli chihanda cha “yuma yeswayo yasonewene kunyima” mu Liji lia Zambi, “hanga ku uhumikizo ni kulembejeka cha Yisoneko Yisandu tukasele mbunge jetu ha chilakenyo cha Zambi.” (A-Roma 15:4) Kuchi mukanda wa Habakuke muhasa kutukwasa? Muhasa kutukwasa hanga tumone yize yinalumbunuka kufuliela muli Yehova. Nawa uprofeto wa Habakuke unatukwasa tupwe ni sambukila ya ku mbunge chipwe ngwe mutupalika mu yipikalo yeswayo ku mwono wetu.

LEMBA KULI YEHOVA

4. Mumu liaka Habakuke evwile yinyengo ku mbunge?

⁴ Tanga Habakuke 1:2, 3. Habakuke katwamine ha mashimbu akalu chinji. Atu waze te atunga no te yingulungulu nawa yingalwe, chino te chakumuvwisa yinyengo yinji ku mbunge. Ku yihela yeswe kuze te akupalikila, te kakumona chize A-Izalele akulimwesa lamba hamwe ni kalimbalimba. Habakuke yahula ngwenyi: ‘Ndo mwiji muka ungulungulu uno muhwa? Mumu liaka Yehova kalingile nichimwe hakutwala ku upi wacho?’ Iye kalivwile ngwe keshi ukwaso. Chocho yeta kuli Yehova hanga alinge yimwe. Habakuke kota kaputukile kunyonga ngwe Yehova keshi kuzanga nawa atu Jenyi, hanji ngwe kechi kulinga nichimwe. Shina hiunalivu ngwe Habakuke?

5. Yika mutuhasa kulilongesa ha mukanda wa Habakuke? (Tala chizulie ha uputukilo.)

⁵ Shina Habakuke kahulile yihula yino mumu kakapwile nawa ni kufuliela muli Yehova ni ku yilakenyo yenyi? Ka, hi chocho ko! Habakuke kechile Yehova hanga amukwase ha kuyambashana ni ha yipikalo yenyi, yize yasolwele ngwo kakahonene kutalatala alioze te kakufuliela kuli Iye. Kwamba pundu, Habakuke te kanazakalala hamwe ni kuyambashana. Iye kakanyingikine mumu liaka Yehova te anashimbula kululieke yuma, ni mumu liaka amwechele hanga amone lamba. Kunyingika ngwetu, Yehova katumine Habakuke hanga asoneke yipikalo yenyi, chinatulongesa fumbo lilemu. Kutwatambile kwivwa woma ha kulweza Yehova yipikalo hanji kuyambashana chetu. Ni zango lieswe, kanatwite hanga tulembe kuli iye ni kumulweza chize tunevu. (Samu 50:15; 62:8) Mukanda wa Yishima 3:5 unatutakamisa ngwo: “Fuliela Yehova ni mbunge ye yeswe; kanda ukajikijila ha malinjekela ja yena mwene.” Habakuke kakawile maliji wano ku mwono wenyi.

6. Mumu liaka chili chilemu kulemba kuli Yehova?

⁶ Habakuke te kakufuliela kuli Yehova, Sepa lienyi kanda Tato, chocho yakundama kuli iye. Habakuke kakalipikalile wika ha lamba lienyi, ni kufupa kululieka yuma mwene. Alioze, yalemba hakutwala ku manyonga ni kulipikala chenyi. Chino chili chilweza chipema chinji kuli yetu. Yehova, Mukwa-Kwiva yilemba, kanatusanyika hanga tusolole ngwetu twamufuliela, ha kulemba ni kumulweza yipikalo yetu yeswe. (Samu 65:2) Nyi twachilinga, mutumona chize Yehova akukumbulula yilemba yetu. Mutulivwa ngwe tuli mukondo lienyi muze anatutakamisa ni kutusongwela. (Samu 73:23, 24) Iye matukwasa kunyingika chize akumona yipikalo yetu, chipwe ngwe mutumona lamba lieswalio. Kulemba kuli Yehova chili yimwe jila yipema yize twakusolwelamo ngwetu twamufuliela.

PANJIKA YEHOVA

7. Yika Yehova alingile muze Habakuke amulwezele yipikalo yenyi?

⁷ Tanga Habakuke 1:5-7. Muze Habakuke alwezele Yehova hakutwala ku yipikalo yenyi, iye kota kalihulumbile ha chize te Yehova mevwa. Ngwe Tata wa zango, Yehova kanyingikine chize Habakuke apwile ni kwivwa. Iye kanyingikine ngwenyi, Habakuke kanamono lamba nawa kanafupu ukwaso. Kashika Yehova kakamukumikine alioze yamulweza yize te kwasala hakehe alinge kuli A-Yunda waze te yihulia. Kota Habakuke kapwile mutu mutangu yoze Yehova alwezele ngwenyi, upatwilo uze maneha kwasala hakehe wize.

8. Mumu liaka Yehova kakakumbulwile Habakuke kulita ni chize te anashimbwila?

⁸ Yehova kalwezele Habakuke ngwenyi hi kwasala hakehe hanga alulieke yuma. Iye te mamwesa lamba A-Yunda waze te yingalwe. Hakwamba ngwo yino muyilingiwa ‘ha matangwa jenu,’ Yehova te kanasolola ngwenyi upatwilo wacho te muwiza muze Habakuke hanji A-Izalele waze te atunga no achili ni mwono. Chize Yehova akumbulwile hi chize ko Habakuke te anashimbwila. A-Kaletea hanji A-Babilonia, te kapwa chinji yingalwe. Ayo kapwile chinji yilianyi kuhiana A-Izalele, waze te anyingika shimbi ja Yehova. Mba mumu liaka Yehova azachishile akwa-mavungu wano yilianyi hanga amwese lamba atu jenyi? Chino te muchineha lamba linji kuli A-Yunda.a (Tala maliji mushi lia lifwo.) Kuchi muwivwa nyi yena mwe te Habakuke?

9. Yihula yikwo yika ahulile Habakuke?

⁹ Tanga Habakuke 1:12-14, 17. Chipwe ngwe Habakuke kanyingikine ngwenyi, Yehova mazachisa A-Babilonia hanga anongese yingalwe waze te atunga no, nihindu iye te machiyambashana. Alioze iye kalikehesele nawa kazangile kununga ni kufuliela muli Yehova. Chocho, iye yamba ngwenyi Yehova nihindu te uchili “Liwe” lienyi. (Shimbi Yamuchiali 32:4; Izaia 26:4) Habakuke kapwile ni shindakenyo ngwenyi, Yehova kali mukwa-zango ni keke, kashika kakevwile woma wa kumuhula yimwe yihula ngwe yino: Mumu liaka Yehova te aneche yuma mu Yunda yipihie ni kwecha atu jenyi amone lamba linji? Mumu liaka te keshi kulinga nichimwe ha mashimbu waze-ene? Mumu liaka Mukwa-Ndundo-Jeswe ‘anahola’ ni kulengulula upi ku yihela yeswe? Chipwe chocho, Yehova kali “Musandu” nawa ‘meso jenyi apema naye kahashile kumona yipi.’

10. Mumu liaka ha mashimbu amwe mutuhasa kulivwa ngwe Habakuke?

¹⁰ Ha mashimbu amwe mutuhasa kulivwa ngwe Habakuke. Twakupanjika Yehova. Twakufuliela muli iye ha kutanga ni kulilongesa Liji lienyi, lize liakukolesa kutalatala chetu. Twakwivwa nawa hakutwala ku yilakenyo yenyi muze mutupanjika yize anatulongesa mu ululikiso wenyi. Chipwe chocho, nihindu mutuhasa kulihula ngwetu, ‘Mba tangwa lika lamba lietu mulikahwa?’ Mutuhasa kuwana kumbululo ha yize yalingiwile kulutwe kuli Habakuke.

SHIMBWILA YEHOVA HANGA ALULIEKE YUMA

11. Chiyulo chika Habakuke akwachile?

¹¹ Tanga Habakuke 2:1. Yize Yehova alwezele Habakuke yamukwashile kupwa ni sambukila ya ku mbunge. Chino chamukwashile kukwata chiyulo cha kushimbwila Yehova hanga alulieke yuma. Habakuke kahilukilile chiyulo chenyi muze ambile ngwenyi: “Mungutwaminyina kuluu tangwa lia lamba muliza.” (Habakuke 3:16) Tuvumbi akwo ashishika a Zambi no kanakashimbwila ni uhumikizo weswe hanga Yehova alulieke yuma. Chilweza cho chakututakamisa, mumu chinasolola ngwo ni yetu mutuhasa kuchilinga.—Mika 7:7; Tiangu 5:7, 8.

12. Yika mutuhasa kulilongesa hali Habakuke?

¹² Yika mutuhasa kulilongesa ha chiyulo cha Habakuke? Chitangu, kutwatambile kwecha kulemba kuli Yehova chipwe ngwe tunamono lamba lieswalio. Chamuchiali, tunafupiwa kupanjika yize Yehova akutulweza kupalikila mu Mbimbiliya ni ululikiso wenyi. Chamuchitatu, twatamba kushimbwila ni uhumikizo weswe kuli Yehova hanga alulieke yuma ni kufuliela ngwetu mahwisa lamba lietu ha mashimbu waze mwene hanatese. Nyi mutwimbulula Habakuke, mutupwa ni sambukila ya ku mbunge nawa mutuhasa kunyongonona. Kutalatala chetu muchitukwasa tulihumikize hamwe ni uwahililo, chipwe ngwe mutumona lamba lieswalio. Tunafuliela ngwetu Tata yetu wa mu malilu makalulieka yuma.—A-Roma 12:12.

13. Kuchi Yehova atakamishine Habakuke?

¹³ Tanga Habakuke 2:3. Mutuhasa kupwa ni shindakenyo ngwetu, Yehova kevwile kuwaha ha chize Habakuke anakashimbwila kuli iye hanga alulieke yuma. Mukwa-Ndundo-Jeswe kanyingikine kanawa lamba lize profeta Habakuke te anamono, kashika amutakamishine ni kumukolweza ni zango lieswe ngwenyi, te makumbulula yihula yenyi. Habakuke te kwasala hakehe hanga kuzakalala chenyi chihwe. Chapwile ngwe Yehova kanalweze Habakuke ngwenyi: “Yena lihumikize wika, nawa fuliela muli yami. Mungukumbulula kulemba che chipwe mukusoloka ngwe miaka yinapalika.” Yehova kewulwile Habakuke ngwenyi, Iye te hanatesa mashimbu waze mamanununa yilakenyo Yenyi. Kashika akolwezele Habakuke hanga anunge wika ni kushimbwila. Hi kusongo, profeta yawana utakamiso.

14. Yika twatamba kulinga muze tunamono lamba?

¹⁴ Ni yetu twatamba kushimbwila kuli Yehova hanga alulieke yuma. Twatamba nawa kupanjika kanawa yize iye akutulweza. Hachino, mutupwa ni ufulielo hamwe ni sambukila ya ku mbunge, chipwe ngwe mutumona lamba lieswalio. Yesu katukolwezele hanga tuhone kulihulikila ha “tungonde ni miaka” yize Zambi kanda achitulweza. (Yilinga 1:7) Twatamba kufuliela ngwetu, Yehova kananyingika mashimbu waze alita akululieka yuma. Kashika kanda tuhonga, alioze twatamba kulikehesa, kulihumikiza ni kufuliela muli Zambi. Nawa muze tunashimbwila, twatamba kuzachisa mashimbu jetu ni mana ni kusa tachi hanga tulingile Yehova ni mbunge yeswe.—Marku 13:35-37; A-Ngalashia 6:9.

YEHOVA KAKUHANA MWONO KULI WAZE AKUMUFULIELA

15, 16. (a) Yilakenyo yika tunawane mu mukanda wa Habakuke? (b) Yilakenyo yacho yika yinatulongesa?

¹⁵ Yehova kanalakenya ngwenyi: “Mukwa ululi kumenda ni kulita ni ufulielo wenyi,” nawa ngwenyi, “hashi muhazala ni chinyingi cha uhenya wa Yehova.” (Habakuke 2:4, 14) Chochene, Yehova kanalakenya mwono wa mutolo kuli waze alihumikiza ni kufuliela muli iye.

¹⁶ Chilakenyo chino tunawane ha Habakuke 2:4, chili chilemu, kashika postolo Paulu achitongwele katatu keswe ha mikanda yenyi! (A-Roma 1:17; A-Ngalashia 3:11; A-Hepreu 10:38) Mutuhasa kupwa ni shindakenyo ngwetu, chipwe ngwe mutupalika mu lamba lieswalio, nyi mutununga ni kushishika kuli Yehova mutukamona kumanunuka cha yilakenyo yenyi yeswe. Yehova kanazange hanga tulihulikile ha kutalatala chetu cha kulutwe lia matangwa.

17. Yika Yehova anatulakenya nyi mutununga ni kufuliela muli iye?

¹⁷ Mukanda wa Habakuke uli ni longeso lilemu kuli yetweswe tuli ha matangwa wano akusula. Yehova kanalakenya mwono wa mutolo kuli hita mukwa-ululi yoze wakufuliela muli iye ni mbunge yeswe. Kashika tunungenu ni kukolesa ufulielo wetu kuli Zambi, chipwe ngwe tunamono lamba ni yipikalo yeswayo. Yize Yehova alwezele Habakuke yinatwehe shindakenyo ngwo, iye matufunga ni kutulamwina. Ni zango lieswe, iye kakutwita hanga tumufuliele ni kushimbwila ni uhumikizo weswe ngwo, Wanangana wenyi mukayula hashi ha mashimbu waze iye hanatese. Ha mashimbu jacho, hashi muhakazala too ni atu a sambukila ni uwahililo waze akuwayila Yehova.—Mateu 5:5; A-Hepreu 10:36-39.

FULIELA KULI YEHOVA HANGA UWAHILILE

18. Kuchi maliji ja Yehova akwachile hali Habakuke?

¹⁸ Tanga Habakuke 3:16-19. Yize Yehova alwezele Habakuke yamukwachile chinji ku mbunge. Habakuke kanyongene ha yuma ya ukomokeso yize Yehova alingilile atu jenyi kunyima. Chocho, ufulielo wenyi muli Yehova yiukola chinji kuhiana. Kanyingikine pundu ngwenyi, kwasala hakehe Yehova malulieka yuma! Chino chatakamishine profeta, chipwe ngwe kanyingikine ngwenyi mamona lamba ha amwe mashimbu. Habakuke kakapwile nawa ni kuyambashana. Alioze, ni mbunge yeswe yafuliela muli Yehova yoze te mamulamwina. Kwamba pundu, maliji ambile ha versu 18 mahasa kupwa amwe maliji alemu waze twakutanga mu Mbimbiliya. Amwe akwa-mana kakwamba ngwo, maliji jacho kanalumbunuka, ngwo: “Munguzombokela kuli Mwene wami; mungutwama hamwe ni Zambi yami.” Lino lili longeso lilemu kuli yetu! Yehova katuhele wika yilakenyo yipema ya kulutwe lia matangwa, alioze kanatulweza nawa ngwenyi, kwasala hakehe hanga amanunune yilakenyo yacho.

19. Kuchi Yehova mahasa kututakamisa ngwe chize alingile hali Habakuke?

¹⁹ Longeso lilemu twawana mu mukanda wa Habakuke lili liakufuliela muli Yehova ni mbunge yeswe. (Habakuke 2:4) Mba tununge ni kufuliela muli Yehova, twatamba kukolesa usepa wetu ni iye. Kashika twatamba kulinga yuma yitatu: (1) Kulemba kuli Yehova ni kumulweza lamba ni yipikalo yize tunamono. (2) Kupanjika kanawa yize Yehova akutulweza mu Liji lienyi, ni kukaula usongwelo uze akutwaha kupalikila mu ululikiso wenyi. (3) Kushishika hamwe ni uhumikizo muze tunashimbwila Yehova hanga amanunune yilakenyo yenyi. Yino ye alingile Habakuke. Chipwe ngwe kalihulumbile muze aputukile kuhanjika ni Yehova, nihindu kusongo kawanyine utakamiso hamwe ni uwahililo! Nyi mutwimbulula Habakuke, ni yetu makatukangayika kuli Tata yetu wa mu malilu, Yehova. Uno uli utakamiso unene uze mutuhasa kupwa nawo hashi hano hapi.