Yika Mbimbiliya Yakwamba Hakutwala ku Kapinda wa Meya Yoze Unasoloka Hashi Heswe?
Yetu eswe tunafupu meya apema mba tupwe ni mwono. Alioze Secretário-geral wa ONU, António Guterres, katowezele ngwenyi: “Kapinda wa meya kananungu ni kwoka hashi eswe. Tunapu ni kapinda munene wa meya.” Tununu a tununu twa atu hashi heswe keshi kuhasa nawa kupwa ni meya apema.
Yizulie ya Strdel /AFP via Getty
Shina tangwa limwe mutukapwa ni meya waze makumba kuli atu eswe? Nyi shina mutununga lume ni kapinda wa meya? Yika Mbimbiliya yakulongesa?
Yize Mbimbiliya yakulakenya ha kwoka cha meya
Mbimbiliya yakwamba ngwo kapinda wa meya tangwa limwe meza kahwa. Kwamba pundu, mukukapwa meya anji apema.
“Meya mapukukila mu puya, ni yitwetwe mu kango. Masekeseke a kahia malumuka chitende, ni mavu a pwila malumuka mafuji a meya.”—Izaia 35:6, 7.
Mumu liaka twatamba kufuliela ha chilakenyo chino? Hengwola yize Mbimbiliya yakwamba hakutwala ku chize Zambi atangile hashi.
Yize Mbimbiliya yakwamba hakutwala ku chize hashi ni meya yakukalakala
‘[Zambi] wakolesele [hashi] kakatangileho hapwe hahululu, watangileho hanga atu akatwameho.’—Izaia 45:18.
Amu Zambi atangile hashi hanga hapwe yitangiwa ya mwono, kashika aseleho uhashi wa kutuhwisa meya anji apema.
“[Zambi] kakukoka masoto a meya, kakwalumuna mbundu yikapwe vula yoze wakupukumukina kwilu, ni kunoka hali atu wa kulumbama.”—Yombi 36:27, 28.
Maliji wano kanasolola chize Zambi alingile uhashi uze meya ene akuliluliekela ni kupukumuka. Meya kakulinga chiku-chiku hashi ni mu kalunga-lwiji, kakupwa malelwa ni kunoka ngwe vula, chino chakukwasa kululieka hashi ni kuneha meya apema waze akunwa atu ni tushitu.—Chilumbununyi 1:7; Amose 5:8.
“Mungunwaha vula ha tukweji twenyi, ni e mavu mahana mbuto, ni mitondo yeswe muyihana mihuko yayo.”—Ulevi 26:4.
Zambi kalakenyene kuwahisa vungu lia Izalele waze te akulima minda, ha kwakwasa apwe ni mbuto yinji ni kwaha meya akumbana. Iye kananyingika ngwenyi, mba tupwe ni yuma yinji ya kulia tunafupiwa vula ha shimbu lialita.
Yize Zambi alingile mu Izalele, kwasala hakehe ayilinge nawa hashi heswe. (Izaia 30:23) Alioze shimbu yino kanda yichilingiwa, mu yifuchi yinji hano hashi kapinda wa meya kananungu ni kwoka, chikwo nawa, kuhona cha vula chinalingi chihanda ku kapinda wacho. Yika nawa Mbimbiliya yakwamba hakutwala ku kuhwisa kapinda wa meya yoze unasoloka musono?
Chize kapinda wa meya makahwa
Mbimbiliya yakwamba ngwo Zambi, kupalikila mu Wanangana wenyi, makahwisa yuma yeswe yize yakupihisa hashi, kuchingako kapinda wa meya. (Mateu 6:9, 10) Wanangana wa Zambi uli umwe unguvulu mu malilu uze muukayula hano hashi. (Daniele 2:44; Usolwelo 11:15) Chikwo nawa, Wanangana wa Zambi muukalinga yuma yize manguvulu ja atu keshi kuhasa kuyilinga. Wanangana wacho, muukahwisa ni kapinda mweswe wa meya.
Kapinda: Kwalumuka cha tungonde necho chinanehe kapinda wa meya. Kapinda wacho kanachingi changa, masanga a meya, kunoka cha vula munji ni kwoka cha meya mu kalunga-lwiji.
Kuhwa cha kapinda: Wanangana wa Zambi muukalulieka yuma yeswe yize yinapihisa hano hashi, mba hashi hakahase kulilulieka hene. Zambi kanalakenya ngwenyi: “Tala! Ngunalingi yuma yeswe yaha.” (Usolwelo 21:5) Ku yihela kuze kuli kapinda wa meya, kumukukapwa meya anji apema ni kukwasa yitangiwa yitwame chipwe lume ku yihela kuze te keshi kutwamako. (Izaia 41:17-20) Wanangana wa Zambi, mu moko ja Yesu, muukahasa nawa kukwika luyinda wa chisemewa hano hashi.
Muze Yesu apwile hano hashi, kaholesele kangonga, ha kulinga chino iye yasolola ndundo jize Zambi amuhele. (Marku 4:39, 41) Ngwe Mwanangana mu Wanangana wa Zambi, Yesu makahwisa luyinda mweswe wa chisemewa. Atu makapwa ni sambukila yamwenemwene hamwe ni ukulungunga, kechi kevwa woma wa luyinda niumwe.
Kapinda: Atu waze keshi kunyonga ha lamba lize liakwiza ku yiyulo yize akukwata mumu lia kuzo, kanapihisa njiji, yitende, mashima a meya ni kuneha kapinda wa meya apema.
Kuhwa cha kapinda: Zambi makapemesa hashi ha kululieka njiji, yitende, tulunga-lwiji ni mashima a meya. Hashi heswe muhakapwa paraisu. Mbimbiliya yinambe ngwo: “Puya ni chifuchi chumu muyikawaha; kango muyikawahilila ni kutemuna yitemo ngwe kawalangaza.”—Izaia 35:1.
Yika muyikalingiwa kuli waze akupihisa hashi ni kupinjisa atu-ni-akwo? Zambi kanalakenya ‘kwonwona waze akwonwona hashi.’—Usolwelo 11:18; Yishima 2:21, 22.
Kapinda: Atu kanazachisa chipi meya waze tuli no, kashika chino chinatepulula meya apema hano hashi.
Kuhwa cha kapinda: Mwanangana wa Zambi, we muukalinga upale wenyi hano “hashi” hi atu ko waze akulizanga ene. (Mateu 6:9, 10) Wanangana wa Zambi muukahana fumbo lipema kuli atu jawo. Mukanda wa Izaia 11:9.a unambe ngwo: “Hashi muhazala ni chinyingi cha Yehova.” Ni ukwaso wa chinyingi chacho, hamwe ni zango lia Zambi hali yitangiwa yenyi yeswe, atu makafunga kanawa hashi ni yuma yeswe yize yiliho.
Mba unyingike nawa yize Wanangana wa Zambi muukalinga, tanga chikuma, “Yika Wanangana wa Zambi Muukalinga?”
Tanga mukanda wa Izaia, kapitulu 35 hanga unyingike chize hashi muhakapwa paraisu.
Tala chinema, Mumu Liaka Zambi Atangile Hashi? hanga unyingike nawa upale wa Zambi hano hashi ni hali atu.
a Yehova lie jina lia Zambi. (Samu 83:18) Tala chikuma, “Yehova Iya?”