Hashi Heswe Hali Zala Yinji Mumu lia Jita ni Kwalumuka cha Tungonde—Yika Mbimbiliya Yakulongesa?

Jita mu Ucrânia hamwe ni kwalumuka cha tungonde, yinanungu ni kwokesa zala hashi heswe. Yino yinalingiwa chinji mu yifuchi yize yikwete upite unji, muze atu anji a kusa tachi mba awane kulia chakumbana.

“Kulima ni kutwala kulia ku yihela kuze kuli atu, chinakale mumu lia jita, kwalumuka cha tungonde, kwoka cha ndando ya kahia kazembwe ni yuma yikwo nawa.”—António Guterres, Secretário-Geral wa ONU, 17 Julho, 2023.
“Amwe akwa-mana kamwene ngwo, kuchiza ulite wa Rússia wakutwala kulia ku yihela yikwo, muchineha zala yinji mu yifuchi yize kuyishi upite unji, chipi-chipi ku Norte ya África ni ku Médio Oriente.”—Atalayar.com, 23 Julho, 2023.

Tala yize Mbimbiliya yakwamba hakutwala ku kuhona cha kulia ni yize muyikalingiwa kulutwe.

Mbimbiliya yahanjikile kulu hakutwala ku kuhona cha kulia

Yesu kambile ngwenyi: “Vungu limwe mulikakatukila vungu likwo, ni wanangana umwe muukakatukila wanangana ukwo; kumukukapwa zala.”—Mateu 24:7.
Mukanda wa Usolwelo unahanjika hali akwa-kwendesa tuvwalu awana. Umwe wa kuli ayo kanalumbununa jita. Iye kanamukaula kuli mukwo yoze unalumbunuka zala, hanji ngwetu te mukuheta amwe mashimbu waze kulia te muchikeha ni kuchilanjisa ha ndando yinji. Mbimbiliya yinambe ngwo: “Namwene kavwalu mulaa, yoze watwamineho wapwile ni mbalansa ku kwoko. Nevwile yize yapwile ngwe liji . . . liambile ngwo: ‘Njongo ya tiliku ha lumbongo umuwika, ni njongo jitatu ja sevada ha lumbongo umuwika.’”—Usolwelo 6:5, 6.

Uprofeto uno unahanjika hakutwala ku kuhona cha kulia, unamanunuka musono ha mashimbu waze Mbimbiliya yakuvuluka ngwo, “matangwa akusula.” (2 Timoteu 3:1) Mba unyingike sango jikwo hakutwala ku “matangwa akusula” ni kwenda cha tuvwalu awana a mu Usolwelo, tala chinema Chize ha Mwaka 1914 Hashi Halumuka Chinji ni kutanga chikuma “Akwa-Tuvwalu Awana—Yika Analumbunuka?”

Chize Mbimbiliya muyihasa kutukwasa

Mu Mbimbiliya muli yiyulo yipema yize muyihasa kutukwasa muze tuli ha mashimbu akalu, kuchingako kwoka cha ndando ya yuma ya kulia hanji kukeha cha kulia. Tala yilweza yimwe ha chikuma “Kuchi Mutuhasa Kutwama ni Mbongo Jikehe?.”
Mbimbiliya yakutwaha nawa kutalatala ngwo yuma muyikapema. Yinalakenya mashimbu waze ‘mukukapwa kulumbama cha mbuto mu mavu helu lia milundu,’ nawa hita mutu makapwa ni kulia chinji. (Samu 72:16) Mba unyingike sango jikwo hakutwala ku kutalatala chino cha kulutwe lia matangwa ni chize mutuhasa kuchijikijila, tanga chikuma “Fuliela ha Kutalatala Chipema cha Kulutwe lia Matangwa.”