Masanga a Meya Waze Anapihisa Yuma—Yika Mbimbiliya Yakulongesa?

Hashi heswe, atu anji kanamono lamba mumu lia masanga a meya waze anapihisa yuma. Tutalenu sango jino:

• “Ha kupalika cha amwe matangwa, mu mbonge yinene ya China mwanoka vula munji kuhiana yoze hananoko mu mbonge yacho ha kupalika cha miaka 140. Kukatuka Liaposo ndo Liamatatu, vula yoze wanokeneko kapwile wa milímetros 744.8.”—AP News, 2 Agosto, 2023.

• “Liamaali liapwile tangwa liamuchiali lize kakundukundu avuluka ngwo, Khanun anehene vula munji ni fuji yinji ku sul ya Japão ni kushiha atu aali. Atu waze atala ha yuma ya tungonde kanambe ngwo, chinasoloka ngwe kangonga yoze malingiwako maneha vula wa 0,6 metro mu mbonge ya milundu mu Taiwan.”—Deutsche Welle, 3 Agosto, 2023.

• “Sanga lia meya lize liapalika ku songo lia poso [mu Nova Escócia], liakatukanga ku vula munji ngwe yoze wanokene mu Canadá ku Costa Atlântica ha miaka 50 kunyima.”—BBC News, 24 Julho, 2023.

Yika Mbimbiliya yambile hakutwala ku yuma yino?

Chilayi cha “matangwa a kusula”

Mbimbiliya yinasolola ngwo tuli ha mashimbu waze akuvuluka ngwo, “matangwa a kusula.” (2 Timoteu 3:1) Hakutwala ku matangwa jacho, Yesu kaprofetezele ngwenyi, “munukamona yuma yakukomwesa,” hanji yuma yakwivwisa woma. (Luka 21:11) Kwalumuka cha tungonde chinanehe yuma yinji ya kukolesa woma, yize yinalingiwa ha yisuho yinji nawa yize yineza ni tachi jinji.

Kutalatala chize tuli nacho

Mbimbiliya yinambe ngwo, yuma yinji yipi yize yinalingiwa hano hashi musono, yinatukwase tupwe ni kutalatala. Mumu liaka tunambe chocho? Mumu Yesu kambile ngwenyi: “Nyi munumona yuma yino yinalingiwa, nyingikenu ngwenu Wanangana wa Zambi hiwakundama.”—Luka 21:31; Mateu 24:3.

Yuma yino yinalingiwa yinasolola ngwo, kwasala hakehe Wanangana wa Zambi muululieka yuma ya hashi, kuchingako tachi ja meya jize makasongwela kanawa.—Yombi 36:27, 28; Samu 107:29.

Mba unyingike sango jikwo ja chize Wanangana wa Zambi muukapemesa hashi, tanga chikuma “Quem Vai Salvar a Terra?”