Mumu liaka Atu Kechi Kuhasa Kuneha Sambukila?—Yika Mbimbiliya Yakulongesa?

Manguvulu ni maululikiso a hano hashi keshi kuhasa kuneha sambukila. Ha mashimbu wano, kunalingiwa mbwanja yinji kuhiana miaka yikwo kukatuka ha jita yamuchiali ya hashi heswe. Tununu a tununu twa atu kali ku yihela kuze kuli jita.

Mumu liaka atu kechi kuhasa kuneha sambukila? Yika Mbimbiliya Yakulongesa?

Yikuma yitatu yinasolola mumu liaka atu keshi kuhasa kuneha sambukila

1. 1. Atu kakusolola yitanga yize yinaakwika kuneha sambukila. Mbimbiliya yambile ngwo ha mashimbu jetu, “atu te mapwa akwa-kulizanga ene, akwa-kuzanga mbongo, akwa-kulisuta, akwa-kulinangamisa, akwa-kushililika Zambi,  . . . kechi katayiza kulivwashana ni akwo,  . . . keshi kulihumikiza, asasu, kechi kazanga yuma yipema, . . . akwa-pami, akwa-kulizata chinji.”—2 Timoteu 3:2-4.

2. 2. Kukushi mutu niumwe hanji chizavu chize muchihasa kuhwisa kapinda wa atu chakuhona ukwaso wa Sakatanga wo, Yehovaa Zambi. Mbimbiliya yasolwele ngwo, “jila ya mutu kuyapwile ya kuli iye mwene; kuchatwamine muli mukwa kwenda kusongwela mashimbo jenyi.”—Jeremia 10:23.

3. 3. Hashi heswe hali mu chiyulo cha Satana, “yoze unapiangula akwa-hashi heswe.” (Usolwelo 12:9) Amu “hashi heswe kakuyulaho kuli mwe mupi” muhanunga kupwa ni jita ni vunda.—1 Yoano 5:19.

Iya mahasa kuneha sambukila?

Mbimbiliya yinalakenya ngwo tangwa limwe mutukapwa ni sambukila. Alioze sambukila yacho kechi kayineha kuli atu. Zambi mwe maneha sambukila yacho.

• “Ngunanyingika manyonga aze nguli no hali yenu; manyonga akunuwahisa hi kunupinjisa ko. Manyonga akunwaha kutalatala ku yuma ya kulutwe.”—Jeremia 29:11.

Kuchi Zambi makamanununa chilakenyo chino? “Kwasala hakehe hanga Zambi yoze wakuhana sambukila afwenye Satana.” (A-Roma 16:20) Zambi makazachisa unguvulu wenyi wa mu malilu uze akuvuluka mu Mbimbiliya ngwo “Wanangana wa Zambi” hanga akanehe sambukila hashi heswe. (Luka 4:43) Muze Yesu Kristu Mwanangana wa Wanangana wacho makayula hano Hashi, atu makalilongesa chize mahasa kutwama ni sambukila.—Izaia 9:6, 7.

• Nyi muzanga kunyingika sango jikwo tanga chikuma,“Yika Wanangana wa Zambi Muukalinga?”