Shina Yiheho ya Olímpico Muyihasa Lume Kununga Atu?—Yika Mbimbiliya Yakwamba?

Chinasoloka ngwe ha yiheho ya Olímpico ya 2024 muhapwa atu tununu atano a tununu waze maya ni kutala akwa-kuyiheha aku yifuchi 206. Thomas Bach, mwata wa hashi heswe yoze unasongwela yiheho yacho, yamba ngwenyi: “Yiheho yino mutulinga, muyitukwasa yetu eswe kutwama ni sambukila, kupwa atu amuwika ni kulinunga mukachi ketu.”

Shina yiheho yino muyikwasa lume atu alinunge? Shina tuli ni kutalatala chakupwa ni sambukila yamwenemwene ni kulinunga?

Shina atu mahasa kuneha sambukila ni kulinunga?

Yiheho ya olímpico ya mwaka uno, yalumbunuka yuma yinji hi wika ko yiheho. Yiheho yacho yashindakenya chinji hakutwala ku mwono wa atu ni yuma ya mafwefwe yize yakuhandununa atu. Yuma yacho yinachingi, ulite wa atu, katonde wa yikowa, yuma yipi ya mu mayingeleja ni kalisa mukachi ka atu.

Yiheho yino ya olímpico ya hashi heswe yakuvwisa atu kuwaha. Alioze nawa, shimbu yikwase atu apwe ni sambukila ni kulinunga chamwenemwene, yiheho yino yakwatwala asolole yitanga yize yakuhandununa atu.

Mbimbiliya yaprofetezele yitanga yize yakutwala atu musono mba ahone kulinunga mukachi ko. (2 Timoteu 3:1-5) Nyi unazange kunyingika sango jikwo hakutwala ku uprofeto uno, tanga chikuma chino mu putu: “Será que a Bíblia já falava como as pessoas iriam pensar e agir hoje?”

Kutalatala chamwenemwene cha sambukila ni kulinunga

Mu Mbimbiliya muli kutalatala chingunu chize muchikaneha sambukila ni kulinunga. Yinalakenya ngwo, atu eswe hano hashi makapwa alinunga mu chiyulo cha wanangana wa mu malilu uze akuvuluka ngwo, “Wanangana wa Zambi.”—Luka 4:43; Mateu 6:10.

Yesu Kristu, Mwanangana mu Wanangana wa Zambi, makaneha sambukila hashi heswe. Tala yize Mbimbiliya yakwamba ha chikuma chino:

• “Akwa-ululi kumakawaha ni kupwa ni kulumbama cha sambukila.”—Samu 72:7.

• “Kumakapulula yiswale muze mateta . . . Kumakakuula mwono wo ku yihungumiona ni uswi.”—Samu 72:12, 14.

Chipwe musono, malongeso a Yesu kananungu tununu a tununu twa atu mu yifuchi 239. Amu tuli Akwa-Kristu, yetu Yela ja Yehova hashi heswe hitwalilongesa kupwa akwa-sambukila. Nyi unazange kunyingika sango jikwo nawa, tanga chikuma: “Mumu Liaka Atu Machinunga ni Kulivwila Kole?”