Shina Chili Chilemu Kupwa mu Yimwe Yingeleja?

Kumbululo lia Mbimbiliya

Ewa, mumu Zambi kanazange hanga atu alikungulwile hamuwika ni kumuwayila. Mbimbiliya yinambe ngwo: ‘Tulitalenu umwe ni mukwo ni kulikasumuna ku zango ni yitanga yipema. Kanda twehuka kulikungulula hamuwika.’—A-Hepreu 10:24, 25.

Yesu kasolwele ngwenyi tumbaji twenyi te mapwa mu chimwe chizavu chakululieka hakwamba ngwenyi: “Ku chino eswe makanyingika yenu nuli tumbaji twami, nyi munupwa ni zango umwe kuli mukwo ni mukwo.” (Yoano 13:35) Tumbaji twa Yesu te katamba kulikungulula hamuwika hanga ahase kusolola zango liacho kuli mandumbu jo a ku ufulielo. Tumbaji twacho te mapwa akululieka mu yikungulwila yize yakulikungulula hanga awayile Zambi. (1 A-Korindu 16:19) Kashika, o eswe te mapwa umwe usoko walinunga wa hashi heswe.—1 Petulu 2:17.

Kutwatambile wika kupwa mu yimwe yingeleja

Mbimbiliya yakulongesa ngwo atu katamba kulikungulula hanga awayile Zambi. Alioze, Mbimbiliya kuyishi kulongesa ngwo, mutu mavwisa Zambi kuwaha mumu ngwo katwama mu yimwe yingeleja. Malongeso a mu Mbimbiliya waze akulongesa mu yingeleja katamba kukwata ha mwono wa mutu mba apwe ni utayizo wa Yehova. Chakutalilaho, Mbimbiliya yakwamba ngwo: “Uwayilo ubema ni wamwenemwene ku meso ja Tata Zambi wenau au: kukwasa ana a shiwa ni mapwo waze haanafwisa malunga mu lamba lio, ni kulifunga ku yibi ya hano hashi.”—Tiangu 1:2, MW 1991.