YIZE AKWEZE AKUHULA
Kuchi Mbimbiliya Muyihasa Kungukwasa?—Chihanda 1: Nyingika Kanawa Mbimbiliya ye
“Hinguneseka kutanga Mbimbiliya, alioze muze namwene utohwe wayo, yingulitwamina!”—Briana, 15.
Shina ni yena che wakulivwa? Mutwe uno muukukwasa!
Mumu liaka chili chipema kutanga Mbimbiliya?
Shina wakwivwa uswelele muze wakunyonga ngwe, watamba kutanga Mbimbiliya? Nyi chenacho wakwivwa, kanda unenganyana. Tunanyingika ngwetu, Mbimbiliya yili ni mafwo anji, sona jinji, chikwo nawa, kuyishi ni chizulie nichimwe. Kashika, muchihasa kusoloka ngwe, chili kwayo chashi kutala yinema ha TV ni ha internet!
Achinyonga ha chilweza chino: Nyi wawana umwe mushete ukulu, muze muli upite, shina kuchi kuzanga kuwazulula?
Mbimbiliya yili ngwe, mushete uze uli ni upite unji. Yili ni yuma yinji yize muyihasa kukukwasa
Kukwata yiyulo yipema
Kulivwashana ni yisemi je
Kuwana masepa amwenemwene
Kuhona kusakalala
Kuchi mukanda ukulu chize, muuhasa kutukwasa musono? Chino chakulingiwa mumu, “Yisoneko yeswe yapwa we mwiku wa Zambi.” (2 Timoteu 3:16) Chino chinalumbunuka ngwo, yiyulo yamo yinakatuka kuli Mutu yoze uli ni mana anji.
Mbimbiliya yili umwe mushete wa too ni kakanga mulemu hanji mana anji
Kuchi natamba kutanga Mbimbiliya?
Chitangu: Tanga Mbimbiliya yeswe. Chino muchikukwasa kupwa ni nyonga lialita hakutwala ku mukanda wacho. Kuli milali yinji yakutangilamo Mbimbiliya yeswe. Tala yilweza yimwe:
Muhasa kutanga mikanda yeswe 66 ya mu Mbimbiliya ngwe chize yakusoloka: Uputukilo ndo Usolwelo.
Muhasa kutanga Mbimbiliya kulita ni chize yuma yalingiwile.
Yize muhasa kulinga: Ha Apêndice A7 ya Tradução do Novo Mundo hali mulongo, hanji ngwetu, lista ya ordem cronológica yize yinasolola yuma yeswe yize yalingiwile ku mwono wa Yesu.
Chamuchiali: Kutanga chisoneko chize chinatale ha kapinda yoze uli nenyi. Chakutalilaho:
Shina unazange kupwa ni masepa amwenemwene? Tanga lusango wa Ndawichi ni Jonata. (1 Samuele, kapitulu 18-20) Hanyima, yako ha chikuma chakwamba ngwo “Como encontrar amigos leais,” hanga umone yize muhasa kulilongesa ha lusango wacho.
Shina unazange kupwa ni tachi ja kukumba chimwe cheseko? Tanga lusango wa Yosefwe hanga umone chize iye achilingile. (Uputukilo, kapitulu 39) Hanyima, yako ha chikuma chakwamba ngwo “Como resistir à tentação . . . José—Parte 1” ni ha chikuma chinambe ngwo “Acusado injustamente, José—Parte 2” hanga umone yize muhasa kulilongesa ha lusango wacho.
Shina unazange kunyingika chize kulemba muchihasa kukukwasa? Tanga lusango wa Nehemia. (Nehemia, kapitulu 2) Hanyima, yako ha chikuma chakwamba ngwo “Deus respondeu sua oração” hanga umone yize muhasa kulilongesa ha chilweza cha Nehemia.
Yize muhasa kulinga: Muze muzanga kutanga Mbimbiliya, fupa chihela chize kuheshi zungo hanga uhase kulihumikiza.
Chamuchitatu: Kutanga umwe lusango hanji samu ni kumona chize yuma yacho yinatale hali yena. Chakutalilaho, muhasa kulihula ngwe:
Mumu liaka Yehova asele lusango yono mu Mbimbiliya?
Yika yino yinasolola hakutwala kuli Yehova ni mulali wenyi wa kulingilamo yuma?
Kuchi munguhasa kukaula yuma yino ku mwono wami?
Yize muhasa kulinga: Tesa tangwa lize muputuka kutanga Mbimbiliya.