Yika Mbimbiliya Yakwamba Hakutwala ku Kupwa Yihanyi?
Kumbululo lia mu Mbimbiliya
Mbimbiliya yakutukolweza kuhana yawana kuli akwetu ni nyonga lialita nawa ni mbunge yetu. Yakwamba nawa ngwo, kuhana chawana chakuvwisa kuwaha mutu yoze unatambula ni yoze unahana. (Yishima 11:25; Luka 6:38) Yesu kambile ngwenyi: “Chinawaha kutambula alioze shinaho kuhana.”—Yilinga 20:35.
Kuhana chika chize chakuvwisa Zambi kuwaha?
Zambi kakwivwa kuwaha muze twakuhana chakuhona kutushinjila. Mbimbiliya yakwamba ngwo: “Mutu mweswe akahane nikulita ni chize hanapale mu mbunge yenyi: hi ni wuli ko, hanji ngwe hamukapwola: mumu Zambi kakuzanga chihanyi wa kusehejela.”—2 A-Korindu 9:7.
Kuhana ni mbunge yeswe chili chilayi cha “uwayilo wamwenemwene” uze Zambi akutayiza. (Tiangu 1:27) Mutu yoze wakukwasa akwo muze anahono, kakukalakala hamwe ni Zambi. Zambi kakumona chuma chacho ngwe kanamwehecho iye. (Yishima 19:17) Mbimbiliya yakulongesa ngwo, Zambi makayukisa atu waze apwa yihanyi.—Luka 14:12-14.
Kuhana chika chize kuchishi kuvwisa Zambi kuwaha?
Muze mutuhana ni kunyonga hali yetwene. Chakutalilaho:
Muze twakuhana hanga tukomwese akwetu.—Mateu 6:2.
Hanga tuzuke yimwe.—Luka 14:12-14.
Hanga akatulamwine.—Samu 49:6, 7.
Muze chawana chacho akuchizachisa hanga alinge hanji akwase yuma yize Zambi keshi kuzanga. Chakutalilaho, chili chipi kuhana mbongo kuli mutu yoze maya ni kuta najo batota, kunwa droga ni walwa unji. (1 A-Korindu 6:9, 10; 2 A-Korindu 7:1) Hi chipema ko nawa kuhana yuma kuli mutu uli ni tachi ja kukalakala alioze keshi kutayiza kuchilinga.—2 A-Tesalonika 3:10.
Muze muchipinjisa kulinga kanawa chiteli chize hanakwehe kuli Zambi. Mbimbiliya yakulongesa ngwo, miata a mu usoko katamba kulisa akwa zuwo lio. (1 Timoteu 5:8) Chili chipi mwata wa mu usoko kuhana yawana kuli atu a haze ni kumwesa lamba akwa-zuwo lienyi. Chikwo nawa, Yesu kahishile atu waze te keshi kukwasa yisemi jo tushinakaji mumu ngwo yikumba yo kayihana “chawana kuli Zambi.”—Marku 7:9-13.