Ngunazange Kufwa—Shina Mbimbiliya Muyihasa Kungukwasa Nyi Nguli ni Manyonga a Kulishiha?
Kumbululo lia mu Mbimbiliya
Ewa! Mbimbiliya yinakatuka kuli “Zambi yoze wakutakamisa akwa kuhonga.” (2 A-Korindu 7:6) Chipwe ngwe Mbimbiliya hi mukanda ko uze wakuhanjika ha kuwuka misongo ya mutu, nihindu hiyakwasa atu anji kukumba manyonga a kulishiha. Yiyulo yipema yize yatwamamo, muyihasa kukukwasa.
Yiyulo yika yipema yize Mbimbiliya yakuhana?
● Hanjika hakutwala ku chize unevu.
Yize Mbimbiliya yakwamba: “Sepa lia mutu kakuzanga matangwa eswe; alioze ha tangwa lia lamba he hakusemukina uyaya.”—Yishima 17:17.
Ulumbunwiso: Twakufupiwa ukwaso wa akwetu muze tunapinji ni manyonga api.
Nyi ngwe kuwahanjikile ni akwenu hakutwala ku chize unevu, manyonga je api mahasa kupwa chiteli chilemu kuli yena. Alioze, nyi muhanjika ni masepa je, manyonga je mahasa kutepuluka hanji muhasa lume kupwa ni nyonga lialita ha chize unevu.
Eseka kulinga chino: Musono, hanjika ni umwe usoko hanji sepa yoze wakufuliela.a Muhasa kusoneka chize unevu ha umwe mukanda.
● Fupa ukwaso wa mandotolo.
Yize Mbimbiliya yakwamba: “Angunu keshi kufupa mbuki, alioze waze ayiza.”—Mateu 9:12.
Ulumbunwiso: Twatamba kufupa ukwaso wa mandotolo muze tunayiji.
Manyonga a kulishiha mahasa kupwa uputukilo wa yikola ya mahesu-hesu hanji kuhonga ku mbunge. Chizechene ngwe twakupwa ni misongo yikwo, kutwatambile kwivwa sonyi mumu lia manyonga wano a musongo wa mahesu-hesu hanji kuhonga ku mbunge. Mumu mandotolo mahasa kuyiwuka.
Eseka kulinga chino: Fupa ukwaso wa ndotolo muze muopwa ni uhashi.
● Nyingika ngwe, Zambi kakulihulumba hali yena.
Yize Mbimbiliya yakwamba: “Atu te keshi kulanjisa tulujila tutano ha tulumbongo twaali, nyi? Hindu Zambi keshi kuvulama chipwe umuwika hakachi ko. . . . Kanda nwivwa woma; yenu kunwahiana tujila tunji.”—Luka 12:6, 7.
Ulumbunwiso: Uli mulemu chinji kumeso ja Zambi.
Muhasa kunyonga ngwe niumwe wakulihulumba ha chize wakwivwa wakuhi, alioze Zambi kakumona yize wakupalika. Iye kakulihulumba hali yena chipwe ngwe unalivu ngwe kuwazangile nawa kutwama ni mwono. Ha Samu 51:17, hanambe ngwo: “Spiritu yize yinamakuka. Yena Zambi kushi kulelesa mbunge yize ya kulimakuna ni kulikehesa.” Zambi kanazange hanga ununge ni mwono mumu kakukuzanga.
Eseka kulinga chino: Hengwola mu Mbimbiliya yuma yize yakusolola ngwo Zambi kakukuzanga. Chakutalilaho, tanga kapitulu 24 wa mukanda Achegue-se a Jeová.
● Lemba kuli Zambi.
Yize Mbimbiliya yakwamba: “Kunjikenu yipikalo yenu yeswe kuli [Zambi], mumu iye kakunufunga.”—1 Petulu 5:7.
Ulumbunwiso: Zambi kanazange hanga umulweze chize unevu ni yize yinakupinjisa.
Zambi mahasa kukwaha sambukila ya ku mbunge ni tachi hanga uhase kukumba kapinda yoze uli nenyi. (A-Fwilipu 4:6, 7, 13) Ayi ye jila yize iye akuzachisa hanga akwase waze akulemba kuli iye ni mbunge yeswe.—Samu 55:22.
Eseka kulinga chino: Musono, lemba kuli Zambi. Zachisa jina lienyi, Yehova ni kumulweza chize unevu. (Samu 83:18) Mwite hanga akukwase kununga ni kusa tachi hanga ukumbe kapinda yoze unapalika.
● Nyonga ha kutalatala cha kulutwe lia matangwa chize analakenya mu Mbimbiliya.
Yize Mbimbiliya yakwamba: Kutalatala “chino tuli nacho ngwe ankora ya mbunge, kuyajikiza, kuyakola nawa, se yanjila muze muchima lia chikalakala cha hina.”—A-Hepreu 6:19.
Ulumbunwiso: Ha mashimbu amwe muhasa kupinda ni manyonga ngwe chize ulungu wakupinda mu kalunga-lwiji mumu lia kangonga. Alioze, kutalatala chize twakuwana mu Mbimbiliya muchihasa kukwasa kujikiza muze unapinji.
Kutalatala chino, hi yilota ko. Alioze, chakukatuka ku yilakenyo ya Zambi ya kuhwisa yuma yeswe yize yakutukokela lamba.—Usolwelo 21:4.
Eseka kulinga chino: Lilongese nawa hakutwala ku kutalatala chize Mbimbiliya yakuhana. Tanga longeso 5 lia mukanda Sango Jipema ja Kuli Zambi!
● Linga chimwe chuma chize wakuzanga.
Yize Mbimbiliya yakwamba: “Mbunge ya chiseke yapwa yitumbo yipema.”—Yishima 17:22.
Ulumbunwiso: Kulinga yuma yize yakutuvwisa kuwaha, muchihasa kutukwasa chinji mu manyonga.
Eseka kulinga chino: Linga chuma chize wakuzanga chinji. Chakutalilaho, panjika miaso yize yakukwasa kulivwa kanawa, tanga umwe mukanda uze muukutakamisa hanji kulinga yiheho yize wakuzanga. Muhasa kuwahilila nyi walingila akwenu yimwe, chipwe muyisoloka ngwe yili yikehe.—Yilinga 20:35.
● Funga mujimba we.
Yize Mbimbiliya yakwamba: “Kulifumba cha mujimba chinawaha hakepe.”—1 Timoteu 4:8.
Ulumbunwiso: Kunana-nana mujimba, kupomba mashimbu alita ni kulia, kulia chipema yakutukwasa chinji.
Eseka kulinga chino: Muhasa kuzombako chikehe, chipwa ha minutu 15 wika.
● Iwuluka ngwe manyonga ni yuma ku mwono we yakwalumuka.
Yize Mbimbiliya yakwamba: “[Yenu] kunwanyingikine chize muchipwa ha tangwa lia hamene.”—Tiangu 4:14.
Ulumbunwiso: Kapinda munene, chipwe yoze hanji munyonga ngwe kechi kahwa nilimwe tangwa mahasa kuhwa.
Chipwe ngwe kapinda we masoloka ngwe kechi keza kahwa, mahasa kuhwa hamene. Kashika, fupa jila yakukumbilamo kapinda wacho. (2 A-Korindu 4:8) Ha kupalika cha mashimbu, kapinda we mahasa kwalumuka, alioze nyi ngwe walishiha, kuuchi kuhasa kwalumuna yuma.
Eseka kulinga chino: Tanga mu Mbimbiliya sango ja atu waze ahongele chinji ni kufupa kufwa. Tala nawa chize mwono wo walumukine ha kupalika cha mashimbu. Anji a kuli ayo, mwono wo walumukine mu jila yize te keshi ni kushimbwila. Tala yimwe yilweza.
Shina Mbimbiliya yakuhanjika hali atu waze azangile kufwa?
Ewa. Mbimbiliya yakuhanjika hali atu waze ambile maliji ngwe wano: “Ngunazange kufwa.” Zambi kakakumikine atu jacho, alioze yaakwasa. Kashika, Zambi mahasa kuchilinga hali yena.
Eliya
● Eliya te iya? Iye kapwile umwe profeta wa hamu. Alioze, ha mashimbu amwe neye kapwile ni kuhonga. Mukanda wa Tiangu 5:17, unambe ngwo, “Eliya te mutu wa kulifwa ni yetu mu mbunge yenyi.”
● Mumu liaka azangile kufwa? Ha shimbu limwe, iye kalivwile ukawenyi, kevwile woma. Yaliumba ngwenyi: “Yehova, tambula kama mwono wami.”—1 Mianangana 19:4.
● Yuma yika yamukwashile? Eliya kalwezele Yehova chize te anevu. Mba kuchi Zambi amukwashile? Zambi kasolwele ngwenyi te kakulihulumba hali Eliya ni kumusolwela ndundo jenyi ha yisuho yinji. Zambi kalwezele nawa Eliya ngwenyi, kapwile mulemu chinji. Chikwo nawa, Zambi yamwaha umwe chikwashi mupema.
▸ Tanga hakutwala kuli Eliya: ha 1 Mianangana 19:2-18.
Yombi
● Yombi te iya? Iye kapwile mwata wa mu usoko, pichi yoze te wakuwayila Zambi.
● Mumu liaka azangile kufwa? Mwono wa Yombi walumukine susumuku, chocho yuma yinji yipi yiyilingiwa ku mwono wenyi. Iye yatokesa upite wenyi weswe. Anenyi eswe yafwa ku yimwe ponde. Yapwa ni musongo upi. Kusulaho, yamulamikiza yuma yinji yipi. Yombi yamba ngwenyi: “Mwono wami hiwangupihila; chazangile kutwama ni mwono.”—Yombi 7:16.
● Yuma yika yamukwashile? Yombi kalembele kuli Zambi ni kuhanjika ni akwo. (Yombi 10:1-3) Umwe sepa lienyi avuluka ngwo, Elihu yamutakamisa ni kumukwasa kumona kapinda wenyi mu mulali walita. Chahiana ulemu, Yombi katayijile ukwaso ni yiyulo ya Zambi.
▸ Tanga hakutwala kuli Yombi: ha Yombi 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Mose
● Mose te iya? Iye kapwile kasongo nawa profeta washishika wa vungu lia Izalele.
● Mumu liaka azangile kufwa? Mose kapwile ni milimo yinji yize te atamba kulinga, atu kapwile ni kumukumika, hachino iye yahonga chinji. Mba yamba kuli Zambi ngwenyi: “Ungushihe haliapwila.”—Kwalula 11:11, 15.
● Yuma yika yamukwashile? Mose yalweza Zambi chize te anevu. Chocho Zambi yamukwasa kutepulula yiteli ni kusakalala chenyi.
▸ ▸Tanga hakutwala kuli Mose: ha Kwalula 11:4-6, 10-17.
a Nyi unanyonga chinji kulishiha, alioze atu waze wakujikijila keshi hakamwihi, eta ukwaso kuli mandotolo.