Kutuhuka

28 “Watamba kutongola hakachi ka A-Izalele yayenu Arone ni ana jenyi a malunga hanga akangulingile mulimo wa usasendote. Tongola Arone ni ana jenyi a malunga: Nandambe, Ambihu, Elieza ni Itama. 2 Ukatongele yayenu Arone mazalo asandu hanga akamwehe uhenya ni upeme. 3 Lweza atu eswe waze akwete utotombo* nahele spiritu yami ya mana, akatonge mazalo ja Arone a kumusela no ku usandu, hanga akangulingile mulimo wa usasendote.

4 “Wano e mazalo waze matonga: Chipwiko, efode, chikuto cha moko ehi, chikuto chisuku cha yipeka-yipeka, chitambala ni muya. Akatongele yayenu Arone ni ana jenyi a malunga mazalo wano asandu hanga akangulingile mulimo wa usasendote. 5 Akwa-utotombo akakalakale ni oru, wanda ulauluka, wa ufungo, wanda uchila ni linyu yipema.

6 “Efode katamba kuyilinga ni oru, wanda ulauluka, wa ufungo, wanda uchila ni linyu yipema chinji, akayikundule ni wanda ku songo. 7 Efode yatamba kupwa ni yihanda yaali ya mahina waze atamba kulinungina ha yipaya, chihanda chimwe kulutwe, chikwo kunyima. 8 Muya wa kukundula ku masongo uze uli wa kutongela ku efode hanga ukakwate efode, katamba kuulinga ni yikwata yimuwika: Oru, wanda ulauluka, wa ufungo, wanda uchila ni linyu yipema chinji.

9 “Watamba kwanda mawe aali a onikise ni kwolaho majina ja ana a Izalele: 10 Majina asambano ha liwe limwe, majina akwo asambano ha liwe likwo, kuputuka kuli mwana mutangu ndo kuli kasula-songo. 11 Mukwa-kwola, makola majina ja ana a Izalele ha mawe jacho aali ngwe chize akusa chijikilo. Watamba kutuma akaase mu yikwachilo ya oru. 12 Ukanangike mawe aali ha yipaya ya efode, mawe jacho makapwa chiwulwiso kuli ana a Izalele. Arone akambate majina jo kumeso ja Yehova ha yipaya yenyi ngwe chiwulwiso. 13 Watamba kulinga yikwachilo ya oru muze mukasa mawe 14 ni malenge aali a oru yipema a kuhosa ngwe mihipu. Malenge jacho watamba kwazezeleka ku yikwachilo.

15 “Watamba kutuma chilangaji hanga alinge chipwiko cha upatwilo. Chipwiko katamba kuchilinga ngwe efode: Ni oru, ni wanda ulauluka, wa ufungo, wanda uchila ni linyu yipema. 16 Muze machikoneka, mambango eswe awana katamba kupwa chimuwika, usuhwe watamba kupwa wa centimetru* 22, ni utohwe wa centimetru 22. 17 Ha chipwiko ukalamikeho milongo yiwana ya mawe. Mulongo utangu wa liwe lia rubi, topaze ni esmeralda. 18 Mulongo wamuchiali wa liwe lia turukeza, safwira ni jasepe. 19 Mulongo wamuchitatu wa liwe lia lesheme,* agata ni ametita. 20 Mulongo wamuchiwana wa liwe lia krisolita, onikise ni jade. Mawe wano eswe katamba kwalamika ha yikwachilo ya oru. 21 E mawe akalite ni majina 12 ja ana a Izalele. Ha liwe ni liwe akoleho jina lia mutu ngwe chize akusa chijikilo, jina ni jina mulisolola vungu limwe lia mavungu 12.

22 “Chipwiko ukachilingile malenge aali a oru yipema, a kuhosa ngwe mihipu. 23 Chipwiko ukachilingile ngo jaali ja oru, ngo jacho ukajise ku masongo a chipwiko. 24 Malenge aali a oru watamba kwanjisa mu ngo jaali jize jili ku masongo a chipwiko. 25 Masongo a malenge aali makapalika mu yituwa ya chikwachilo ni kwakashila ha yipaya ya efode, kulutwe liayo. 26 Ukalinga ngo jaali ja oru ni kujisa ku masongo aali a chipwiko ku chihanda cha muchima chize chinahate ha efode. 27 Watamba kulinga nawa ngo jaali ja oru ni kujisa helu lia efode, mushi lia mikapa yaali yinapalika ha chipaya, hakamwihi ni unungino wa efode helu lia muya wa efode wa kukundula. 28 Watamba kukasa chipwiko ku ngo ja chipwiko ni ngo ja efode ni wanda ulauluka hanga chipwiko chichine kukasuluka. Chino muchikwasa hanga chipwiko chipwe ha chihela chacho, ha efode helu lia muya wa kukundula.

29 “Muze Arone manjila Muma Musandu, akapwe ni majina ja ana a Izalele ha chipwiko cha upatwilo ha pambo lienyi, ngwe chiwulwiso kumeso ja Yehova. 30 Ukase Urimi ni Tumimi* mukachi ka chipwiko cha upatwilo, hanga yikapwe ha pambo lia Arone muze makasoloka kumeso ja Yehova. Chocho, mashimbu eswe Arone masoloka kumeso ja Yehova, makasoloka ni yuma yino ha pambo, yize muyikakwasa ha kusopesa A-Izalele.

31 “Ukanuke chikuto chisuku cha efode cha moko ehi, cheswe chatamba kupwa cha wanda ulauluka. 32 Mukukapwa chituwa cha kutuhwishila mutwe hakachi ni hakachi ka chikuto, chituwa chacho katamba kuchikundula ku masongo ni wanda. Ku kota muchikapwa ngwe chikuto cha maswalale hanga chichine kusuwika. 33 Ku songo lia chikuto, ukatongelako mafufu alifwa ngwe muhuko wa romana, akulinga ni wanda ulauluka, wa ufungo ni wanda uchila, hakachi ka fufu limuwika lia romana ni fufu likwo, ukaseho ngezo ya oru. 34 Watamba kusa ngezo ya oru yinalikaula ni romana, ngezo yimuwika ya oru, romana limuwika. Chikuto cheswe cha moko ehi ukachijingilike chocho. 35 Arone makachizala hanga akalinge mulimo wa usasendote. Zungo lia ngezo, makalivwa muze makanjila mu chihela chisandu kumeso ja Yehova ni muze makatuhukamo hanga iye achine kufwa.

36 “Watamba kulinga chipenya chapeyima cha oru yipema, ni kwolaho ngwe chize akusa chijikilo ngwe: ‘Usandu wapwa wambala wa Yehova.’ 37 Ukachikashila ku chitambala ni muya ulauluka. Chipenya chatamba kupwa kulutwe lia chitambala. 38 Chipenya chikapwe ha huma lia Arone. Arone makapwa ni mulonga nyi ngwe umwe mutu malelesa yuma yisandu. A-Izalele katamba kuhana yuma yino ngwe chawana chisandu kuli Zambi. Chipenya chikapwe ha huma lia Arone mashimbu eswe, hanga ayo akapwe ni utayizo kumeso ja Yehova.

39 “Ukatonge chikuto chisuku cha linyu yipema, cha yipeka-yipeka, ukatonge nawa chitambala ni linyu yipema ni muya.

40 “Ukatongele nawa ana ja Arone mazalo asuku-asuku, miya ni yitambala hanga yikaahe uhenya ni upeme. 41 Watamba kujika yayenu Arone ni ana jenyi a malunga, ukaawayise, ukaase* ha milimo yo ni kwasela ku usandu, ayo makapwa asasendote jami. 42 Ukaanukina nawa tuputula* a linyu hanga akafuke uselesele wo. Tuputula makakatuka mu zalilo ndo mu shina lia molu. 43 Arone ni ana jenyi a malunga, makaazala muze makanjila mu tabernakulu hanji muze makakundama ku chilumbilo hanga akakalakale muma musandu, kuchina mavulumuna, mafwa. Yino yili shimbi ya mutolo kuli iye ni ku minyachi* yenyi.