Kutuhuka
1 Wano e majina ja ana ja Izalele waze ayile ni Yakomba mu Engitu, mutu ni mutu ni akwa-zuwo lienyi: 2 Rupene, Simeone, Levi ni Yunda. 3 Yisaka, Zapulone ni Mbenjamine. 4 Ndane ni Napatali, Ngate ni Ashe. 5 Atu eswe a mu usoko wa Yakomba kapwile 70, alioze, Yosefwe te katwama kulu mu Engitu. 6 Mba Yosefwe ni mandumbu jenyi eswe yafwa ni atu eswe a mu chisemuko chenyi no yafwa. 7 A-Izalele yasema ana anji, yoka chinji, yanunga ni kuliokesa, yapwa ni tachi jinji, yoka mu chifuchi.
8 Ha kupalika cha mashimbu, mu Engitu yimupwa mwanangana mwaha yoze te kanyingikine Yosefwe. 9 Mba iye yamba kuli atu jenyi ngwenyi: “Talenu, A-Izalele hoka chinji, chikwo nawa, kali ni tachi jinji kuhiana yetu. 10 Tukanyamenu no, nyi ka, ayo manunga ni kuliokesa, mba muze mukupwa jita mu chifuchi malichinga ni akwa-kole jetu, malimika ni yetu, chocho makatuka mu chifuchi.”
11 Kashika, A-Engitu yasela A-Izalele miata hanga aamwese lamba ha kwaha milimo yikalu chinji, chocho ayo yatungila Falau mazuwo a kutulikila kulia, che kwamba, Pitome ni Ramese. 12 Alioze, muze apwile ni kwamwesa lamba linji, no kapwile ni kwoka chinji ni kulimwanga mu chifuchi, chocho A-Engitu yaputuka kuvwila A-Izalele woma unji. 13 Mba A-Engitu yaputuka kumwesa A-Izalele lamba linji ni kwapwisa tupinji. 14 Yakalisa chinji mwono wo ha kwaha milimo yikalu yakulinga ndambo ni tijolu, ni milimo yikalu ya kulima minda. Yaashinjila hanga alinge milimo yikalu chinji, milimo yeka ni yeka ya upinji.
15 Kulutwe, mwanangana wa Engitu yahanjika ni Shipara ni Puvwa, yifunguji A-Hepreu. 16 Mwanangana yamba kuli ayo ngwenyi: “Muze munupwa ha kufungula mapwo A-Hepreu, nyi mwana mapwa wa lunga numushihe, alioze nyi wa pwo kanda numushiha.” 17 Alioze yifunguji te kakuvwila Zambi woma, kashika kalingile yize mwanangana wa Engitu aalwezele, chocho yecha ana a malunga ni mwono. 18 Ha kupalika cha mashimbu, mwanangana wa Engitu yasanyika yifunguji, yaahula ngwenyi: “Mumu liaka kunwashihile ana a malunga?” 19 Yifunguji yakumbulula Falau ngwo: “Mapwo A-Hepreu keshi ngwe mapwo A-Engitu. Ayo kakwete tachi jinji, kakusema shimbu yifunguji kanda achiheta.”
20 Kashika, Zambi yakwasa yifunguji jacho, A-Izalele yanunga ni kwoka ni kupwa ni ndundo jinji. 21 Kashika, amu yifunguji jacho evwilile Zambi wamwenemwene woma, Zambi yaaha ana. 22 Mba Falau yalweza atu jenyi eswe ngwenyi: “Ana-kemba eswe a malunga A-Hepreu waze masemuka, nwatamba kwambila mu Lwiji Nilu, alioze ana a mapwo kanda nwashiha.”