Kutuhuka
9 Yehova yamba kuli Mose ngwenyi: “Yako kuli Falau wambe ngwe, ‘Yehova, Zambi ya A-Hepreu kanambe ngwenyi: “Echa atu jami aye hanga angulingile. 2 Nyi mulituna kwecha hanga aye ni kununga ni kwakwika, 3 nyingika ngwe, kwoko lia Yehova mulishiha yimuna ye yeswe yize yili mu yambu. Mukupwa chipuho chize muchikashiha tuvwalu, yimbulu, tumelu, ngombe ni mapanga. 4 Alioze, Yehova makasa kalisa hakachi ka ngombe ja A-Izalele ni ngombe ja A-Engitu. Niumwe chimuna wa A-Izalele kechi kafwa.”’” 5 Chikwo nawa, Yehova yatesa shimbu lize chino te muchilingiwa, yamba ngwenyi: “Hamene, Yehova makalinga chuma chino mu chifuchi.”
6 Mukwachako, Yehova yalinga chize ambile, yimuna eswe a mu Engitu yaputuka kufwa, alioze niumwe chimuna wa A-Izalele kafwile. 7 Muze Falau atumine atu jenyi kutala, yanyingika ngwenyi niumwe chimuna wa A-Izalele kafwile. Chipwe chocho, Falau yanunga ni kukalisa mbunge, kechele A-Izalele hanga aye.
8 Mba Yehova yamba kuli Mose ni Arone ngwenyi: “Zomonenu moko aali a too ni uto wa ha jiko, Mose katamba kuukuwa mwilu, kumeso ja Falau. 9 Uto wacho muukapwa fufuta mu chifuchi cheswe cha Engitu, mba fufuta yacho muyikaneha yivunda ya mashina kuli atu ni kuli tushitu mu chifuchi cheswe cha Engitu.”
10 Chocho, ayo yazomona uto ha jiko, yaya yamana kumeso ja Falau. Mose yakuwa uto wacho mwilu, mba uto yiuneha yivunda ya mashina hali atu ni tushitu. 11 Akwa-kutaha kahashile kumana kumeso ja Mose, mumu no yivunda yaakwachile hamwe ni A-Engitu eswe. 12 Alioze, Yehova yecha hanga Falau akalise mbunge yenyi, mba iye kapanjikile Mose ni Arone ngwe chize Yehova ambile kuli Mose.
13 Yehova yamba kuli Mose ngwenyi: “Ukakatuka chimenemene, ukaye kuli Falau wambe kuli iye ngwe: ‘Yehova, Zambi ya A-Hepreu kanambe ngwenyi: “Echa atu jami aye hanga angulingile. 14 Haliapwila, yilungo yami yeswe munguyitalikisa hali yena, hali tuvumbi twe ni hali atu je, hanga unyingike ngwe kukushi mutu niumwe walifwa ni yami hashi heswe. 15 Mumu yena ni atu je kachi nanushihile kulu ni chilungo chipi ni kununongesa* hashi. 16 Alioze, chikuma chize nakwechela ni mwono chili chino: Hanga ngusolole ndundo jami, ni jina liami alinyingike hashi heswe. 17 Yena kusolo kwecha atu jami hanga aye, muchinunga ni kulinangamisa. 18 Hamene, ha ola ngwe yino, mungukanokesa chiwe cha makelekeshi chize kanda chichinoka kama mu Engitu, chize haze atungilile chifuchi chino ndo musono. 19 Kashika, tuma kuchiza yimuna ye eswe ni yikwata ye yeswe yize yili mu yambu. Atu eswe ni yimuna waze kakatukile mu yambu, makafwa muze chiwe muchikanoka hali ayo.”’”
20 Tuvumbi eswe a Falau waze te akuvwila liji lia Yehova woma, yanjisa ni kawashi ngamba jo ni yimuna yo mu mazuwo. 21 Alioze, waze eswe alelesele liji lia Yehova, yecha ngamba jo ni yimuna yo mu yambu.
22 Mba Yehova yamba kuli Mose ngwenyi: “Olola kwoko lie mwilu hanga chiwe chinoke mu chifuchi cheswe cha Engitu, chinoke hali atu, ni hali tushitu ni ha kulia cheswe chize chakusoka mu minda mu chifuchi cha Engitu.” 23 Chocho, Mose yolola mulumbu wenyi mwilu, mba Yehova yatuma mihenyo ni chiwe, kahia* yikahulumukina hashi, mba Yehova yanokesa chiwe mu chifuchi cheswe cha Engitu. 24 Kwapwile chiwe, mba mukachi ka chiwe mwapwile kahia. Vula wacho wa chiwe kapwile munji, te kanda anoka kama mu chifuchi, chize haze chifuchi cha Engitu chaputukile kupwa vungu. 25 Chiwe yichinongesa yuma yeswe yapwile mu yambu mu chifuchi cheswe cha Engitu. Chize kuli atu ndo kuli yimuna, yichinongesa kulia cheswe ni mitondo yeswe mu yambu. 26 Mu chifuchi cha Ngoshone wika muze apwile A-Izalele, mwe kumwakanokene chiwe.
27 Chocho, Falau yatuma kusanyika Mose ni Arone, yamba kuli ayo ngwenyi: “Ha chisuho chino navulumuna. Yehova kali mukwa-ululi, alioze yami ni atu jami twahengesa. 28 Liumbenu kuli Yehova hanga ahwise mihenyo ni chiwe cha kuli Zambi. Mba mungunwecha hanga nuye, kunuchi kutwama nawa muno.” 29 Kashika, Mose yamba kuli iye ngwenyi: “Muze mungutuhuka mu mbonge, mungwolola moko kumeso ja Yehova. Mihenyo muyihwa ni chiwe necho muchihwa, hanga unyingike ngwe hashi hambala ha Yehova. 30 Alioze, ngunanyingika ngwami yena ni tuvumbi twe nihindu kunuchi kuvwila Yehova Zambi woma.”
31 Mitondo ya linyu ni sevada yayinongesa, mumu sevada te hiyapwa ni mitwe, mitondo ya linyu te hiyapwa ni yitemo. 32 Alioze, tiliku ni shipeleta* kakayinongesene. Mumu te kanda yichikola. 33 Mose yakatuka kumeso ja Falau, yatuhuka mu limbo, yazundula moko jenyi kuli Yehova, mba mihenyo ni chiwe yiyihwa, ni vula yapatuka. 34 Muze Falau amwene ngwenyi, vula, chiwe ni mihenyo hiyahwa, iye ni ngamba jenyi yavulumuna cheka, chikwo nawa, yakalisa mbunge. 35 Falau yanunga ni kukalisa mbunge, katayijile kwecha A-Izalele hanga aye, ngwe chize Yehova ambile kupalikila muli Mose.