Kwalula
11 Chocho, atu yaputuka kulinyenyeta chinji kumeso ja Yehova. Muze Yehova achivwile, yevwa uli unji. Yehova yahulumwisa kahia mwilu, yikaputuka kulekwoka mukachi ko ni kwocha amwe a kuli ayo ku songo lia chilombo. 2 Muze atu atetele kuli Mose, iye yaliumba kuli Yehova mba kahia yikajima. 3 Kashika, chihela chacho yachiluka jina ngwo, Tabera* mumu kwenako Yehova ahulumwishine kahia.
4 Chocho, yilambala waze apwile mukachi ko yevwa katu ya kulia yifwo, mba A-Izalele yaputuka kulila nawa ni kwamba ngwo: “Iya matwaha kama yifwo hanga tulie? 5 Tunevu usona unji wa yishi waze te twakulia mu Engitu chawana, tusakwa, ulenga, kalumingu ni sopwola jeka ni jeka! 6 Haliapwila hijatuhwa. Kutushi ni chuma chikwo cha kulia, shina wika manaa.”
7 Manaa yapwile yitoma ngwe jimwe mbuto jikehe-jikehe.* 8 Atu te kakulimwanga hanga ayitongone, te kakuyikunga hanga ayifwenye hanji kuyitwa mu chinu, mba mayiteleka hanji kuyilinga mbolo. Manaa te yakuyema ngwe mbolo ja kulinga ni maji a olevwe. 9 Muze mu chilombo te mwakupwa mume ha ufuku, manaa neyo te yakuholoka.
10 Mose yevwa asoko anji kanalila mutu ni mutu ku chikolo cha mbalaka yenyi. Mba Yehova yevwa uli unji ni Mose neye yapihilila. 11 Chocho Mose yamba kuli Yehova ngwenyi: “Mumu liaka wangunehena kapinda mupwahaha? Mumu liaka chapwile ni utayizo wenu, alioze wangutwika yiteli ya atu wano? 12 Shina yami mwe namichine atu wano? Yami mwe naasemene mba wambe ngwe, ambate mukondo ngwe chize ndeji akumbata mwana kemba hanga ngwatwale mu chifuchi chize walishingile kuhana kuli tulamba two? 13 Kulihi munguwana yifwo hanga nguhane kuli atu wano? Mumu kananungu ni kulila kuli yami ni kwamba ngwo: ‘Twehe yifwo hanga tulie!’ 14 Chichi kuhasa kumbata yiteli ya atu wano ukawami, yoka naye kuli yami. 15 Nyi mununga ni kungulinga yuma yino, lisesa ngushihe haliapwila. Nyi nguli ni utayizo kumeso jenu, kanda nungumwesa nawa lamba nilimwe.”
16 Yehova yalweza Mose ngwenyi: “Ngukungile makulwana A-Izalele 70, malunga waze yena unanyingika ngwe, kali makulwana ni alemu ja atu. Atwale mu mbalaka ya kulikungulwila utwame no hamuwika. 17 Mungusunuka, munguhanjika ni yena, mungwanda ndambu ya spiritu yize yili hali yena munguyisa hali ayo, ayo makukwasa kumbata yiteli ya atu wano hanga uhone kuyimbata ukawe. 18 Watamba kulweza atu ngwe: ‘Lipemesenu hanga hamene nukalie yifwo, mumu nwalila kuli Yehova ni kwamba ngwenu: “Iya matwaha yifwo hanga tulie? Mu Engitu tunakapwa kwetu kanawa!” Yehova manwaha yifwo yize munulia. 19 Yifwo yacho kunuchi kayilia ha tangwa limuwika, ha matangwa 2, ha matangwa 5, ha matangwa 10 chipwe ha matangwa 20, 20 alioze munukayilia ha kakweji wamuundu ndo muze muyinutuhukila mu mazulu. Munuyivwila lwaji, mumu nwehuka Yehova yoze uli mukachi kenu. Nwalila kumeso jenyi ni kwamba ngwenu: “Mumu liaka watuchiza ku Engitu?”’”
21 Chocho, Mose yamba ngwenyi: “Atu wano ngunasongwela kali anji, kali 600,000 a malunga anende hashi, chipwe chocho unambe ngwe: ‘Mungwaha yifwo yakumbana yize malia ha kakweji wamuundu!’ 22 Chipwe mashiha mapanga ni ngombe anji, shina makumbana kuli ayo? Chipwe makwata yishi eswe a mu kalunga-lwiji, shina makumbana kuli ayo?”
23 Yehova yamba kuli Mose ngwenyi: “Shina kwoko lia Yehova lili lihi chinji? Haliapwila mumona nyi yuma yize ngunambe muyilingiwa nyi ka.”
24 Chocho, Mose yakatuka yalweza atu maliji a Yehova. Yakunga malunga 70 makulwana ja atu, yaalweza hanga ajingilike mbalaka. 25 Yehova yasunuka kupalikila mu lelwa, yahanjika nenyi, yanda ndambu ya spiritu yize yapwile muli iye yayisa hali makulwana 70. Muze spiritu ayisele hali ayo, yaputuka kusolola yitanga ngwe ya aprofeta, alioze kachilingile wika ha tangwa lize.
26 Hakachi ka malunga waze asakwile, hapwile aali waze te achili mu chilombo, kakayile mu mbalaka. Majina jo kapwile Eldade ni Medade. Spiritu yiyiza hali ayo, yaputuka kusolola yitanga ngwe ya aprofeta mu chilombo. 27 Umwe mukweze yazomboka kuli Mose, yamulweza ngwenyi: “Eldade ni Medade kanasolola yitanga ngwe ya aprofeta mu chilombo!” 28 Chocho, Yoshua mwana wa Nune, yoze wapwile chikwashi wa Mose chize mu ukweze, yamba kuli Mose ngwenyi: “Mwene wami, alweze hanga alitwamine!” 29 Mba Mose yamukumbulula ngwenyi: “Yami chevwile ukwa, mba mumu liaka yena unevu ukwa? Te muchipema chinji nyi atu eswe ja Yehova mapwa aprofeta, nyi Yehova masa spiritu yenyi hali ayo!” 30 Kulutwe lia yino, Mose yahiluka ni makulwana a Izalele mu chilombo.
31 Chocho, fuji ya Yehova yiyichiza ngwali sali lia kalunga-lwiji ni kwaholwela hakamwihi ni chilombo, yalumbama sali lieswe. Mutu te katamba kwenda tangwa lia muundu mba ahiane haze ngwali te analumbama. 32 Mba atu yaputuka kutongona ngwali ha tangwa lieswe ni ha ufuku weswe ni ha tangwa lize liasulileko. Niumwe wa kuli ayo wakungile mushi lia homere* kumi, wakuhi. Ayo yanyika ngwali hakamwihi ni chilombo. 33 Muze yifwo te yichili mu kanwa, ufwatulo wa Yehova hali atu yiwiza, Yehova yashiha anji a kuli ayo.
34 Chocho, chihela chacho yachivuluka ngwo, Kibrote-Hatava, mumu he afunjile atu waze apwile ni usolo upi. 35 Atu yakatuka ku Kibrote-Hatava yaya ku Hazerote, yatwama ku Hazerote.