Usolwelo wa Yesu Kristu Alwezele Kuli Yoano
3 “Kuli mungelo wa chikungulwila mu Sarte soneka ngwe: Yino yuma anambe yoze uli ni spiritu shimbiali ya Zambi, ni tutongonoshi shimbiali ngwenyi: ‘Ngunanyingika yitanga ye, ngunanyingika nawa jina* uli nalio ngwo, mwono uli nawo, alioze hiunafu. 2 Laula ukolese yuma yize yinasala, yize kwasala hakehe hanga yifwe, mumu hinamona ngwami yitanga ye kuyamanunukine kumeso ja Zambi yami. 3 Kashika, nunga ni kwiwuluka yuma yize watambwile ni yize wevwile, nunga ni kuyifunga kanawa, likonyeke. Mumu nyi kuwalawile, mungukutungumuna ngwe mwiji, kuchi kunyingika ola yize mungukeza.
4 ‘“Alioze uli ni amwe* ku Sarte waze kachishile mazalo jo. O kumakenda hamwe ni yami ni mazalo atoma, mumu kanaatela. 5 Yoze makumba, chocho mamujika mazalo atoma. Chichi kajimuna* lume jina lienyi mu mukanda wa mwono, alioze mungukanyingikisa jina lienyi kumeso ja Tata ni kumeso ja angelo jenyi. 6 Yoze uli ni matwi, apanjike yize spiritu yinambe ku yikungulwila.’
7 “Kuli mungelo wa chikungulwila mu Filadelfia, soneka ngwe: Yino yuma anambe mwe musandu, mukwa-umwenemwene, yoze uli ni sapi ya Ndawichi, yoze wakwazulula mba niumwe kechi kuhasa kwajila, wakwajila mba niumwe kechi kuhasa kwazulula, ngwenyi: 8 ‘Ngunanyingika yitanga ye—tala! Hingunase kumeso je pito lia washi, lize niumwe kechi kuhasa kwajila. Ngunanyingika ngwami, ndundo jikepe uli najo, hiunafungu liji liami, chikwo nawa, kuwalikalile jina liami. 9 Tala! Waze ali a ku sunangonga ya Satana waze akuliamba ngwo, kali A-Yunda alioze hi A-Yunda ko, mumu kakuhanjika mahuza—mungulinga hanga akeze, akafulamane ku molu jenu, mba makanyingika ngwo nakunuzanga. 10 Amu hiunafungu liji hakutwala ku kunyongonona chami,* ni yami nawa mungukakufunga ha ola ya cheseko, chize muchiza hali akwa-hashi eswe hanga cheseke waze atwama hano hashi. 11 Nguneza ni kawashi. Nunga ni kulalaminya ku chize uli nacho, hanga niumwe kechi katambula chipangula che.
12 ‘“Yoze makumba—mungumupwisa nguji mu tembele ya Zambi yami, iye kechi katuhukamo nawa. Mungukasoneka hali iye jina lia Zambi yami, ni jina lia mbonge ya Zambi yami, ye Yerusaleme Yaha, yize muyihulumuka mwilu kuli Zambi yami, ni jina liami liaha. 13 Yoze uli ni matwi, apanjike yize spiritu yinambe ku yikungulwila.’
14 “Kuli mungelo wa chikungulwila mu Laotisea soneka ngwe: Yino yuma anambe mwe Amene, chela washishika, wamwenemwene, mwe uputukilo wa yitangiwa ya Zambi ngwenyi: 15 ‘Ngunanyingika yitanga ye, ngunanyingika nawa ngwami uli ngwe meya akavume waze hi akekema ko chipwe a kahia. Alioze ngunazange hanga upwe ngwe meya akekema hanji a kahia. 16 Kashika, amu wapwa ngwe meya akavume waze hi akekema ko chipwe a kahia, mungukusaza mu kanwa liami. 17 Amu wakwamba ngwe: “Nguli pichi, hinapwa ni upite kashika chahonene nichimwe,” alioze kuwanyingikine ngwe uli mukwa-kulungajala, mukwa-hunya, chiswale, kapuputa, uselesele uli nawo. 18 Kashika ngunakukanyamisa, ulande kuli yami oru ya kusaya mu kahia, hanga ukapwe pichi, ni mahina atoma hanga uzale, hanga kanda ukevwa sonyi ja uselesele we ni yitumbo ya kusa mu meso hanga ukamone.
19 “‘Waze eswe nakuzanga, nakwakanjisa ni kwafumba. Kashika likonyeke ku shili ye ni kulingila Zambi ni mbunge ye yeswe. 20 Tala! Ngunamana ku pito, ngunangongwela. Nyi kachi umwe mevwa liji liami, mazulula pito, mungunjila mu zuwo lienyi, mungulia hamwe nenyi, neye hamwe ni yami. 21 Yoze makumba mungumwaha kutwama hamwe ni yami ha ngunja yami, chizechene ngwe ni yami hingunakumbu ni kutwama hamwe ni Tata ha ngunja yenyi. 22 Yoze uli ni matwi, apanjike yize spiritu yinambe ku yikungulwila.’”