Usolwelo wa Yesu Kristu Alwezele Kuli Yoano

10 Namwene mungelo mukwo wa ngolo kanahulumuka mwilu, kanazala lelwa, kali ni kongolo ha mutwe wenyi, chifwa chenyi chapwile ngwe tangwa, molu* jenyi apwile ngwe manguji a kahia, 2 mu kwoko lienyi mwapwile chivungo chikehe chize avungulwile. Mba yasa kulu lia chindume mu kalunga-lwiji, alioze lia chimeso hashi, 3 ni kukololoka ni liji linene ngwe kuhuza cha ndumba. Muze akololokele, maliji shimbiali a kukulunguza ahanjikile.

4 Muze kukulunguza shimbiali chahanjikile, yami te kwasala hakehe hanga ngusoneke, alioze nevwile liji kukatuka mwilu ngwo: “Sweka* yuma yize kukulunguza shimbiali yambile, kanda uyisoneka.” 5 Mungelo yoze namwene unamana mu kalunga-lwiji ni hashi, wazundwile kwoko lienyi lia chindume kwilu. 6 Walishingile kuli Yoze watwama ku miaka ya mutolo, yoze watangile lilu ni yuma yize yilimo, ni hashi ni yuma yize yiliho, ni kalunga-lwiji ni yuma yize yilimo ngwenyi: “Kukuchi kapwa nawa kushimbula. 7 Alioze ha matangwa waze muze te hikwasala hakehe hanga mungelo wamuchishimbiali embe chitavwi chenyi, hohene Zambi makamanununa chijimbikilo chenyi chisandu chize anyingikishine ngwe sango jipema kuli ndungo jenyi aprofeta.”

8 Liji lize nevwile kukatuka mwilu, liahanjikile cheka nawa ni yami ngwo: “Yako utambule chivungo cha kuvungulula chili ku kwoko lia mungelo yoze unamana mu kalunga-lwiji ni hashi.” 9 Chocho yinguya kuli mungelo ni kumulweza hanga angwehe chivungo chikehe. Iye yangwamba ngwenyi: “Chitambule, uchilie. Mu jimo lie muchisasa, alioze mu kanwa lie muchiyema ngwe wuchi.” 10 Natambwile chivungo chikehe ku kwoko lia mungelo ni kuchilia. Mba mu kanwa liami chayemene ngwe wuchi, alioze muze nahwishile kuchilia, mu jimo mwasashile. 11 Yamba kuli yami ngwo: “Watamba kuprofeteza cheka nawa hakutwala ku yifuchi, mavungu, malimi ni mianangana anji.”