Kunyingika Chiteli cha Kristu mu Ululikiso wa Zambi

“HA UPUTUKILO Zambi watangile malilu ni hashi,” mba yuma yeswe yize alingile ‘yapemene chikolo.’ (Uputu. 1:1, 31) Yehova katangile atu hanga akatwame kanawa ku miaka yeswe. Alioze, chino kuchalingiwile hamukunda wa upi uze walingiwile mu Endene. Nihindu, upale wa Yehova hano hashi ni kuli atu kuwalumukine. Zambi yasolola ngwenyi makapulula ana ja Alama waze makononoka. O makafuna nawa ku uwayilo wamwenemwene, mba Zambi makonwona mwe chingulungulu ni milimo yenyi yipi. (Uputu. 3:15) Yuma muyikapwa nawa ‘yipema chikolo.’ Yehova makalinga yuma yeswayi kupalikila muli Mwanenyi, Yesu Kristu. (1 Yoa. 3:8) Kashika, twatamba kunyingika pundu chiteli cha Kristu mu ululikiso wa Zambi.—Yili. 4:12; Fwili. 2:9, 11.

CHITELI CHIZE KRISTU AKWETE

² Muze mutunyonga ha chiteli cha Kristu mu ululikiso wa Zambi, twatamba kunyingika ngwetu chiteli chacho chinatale ha yuma yinji. Yesu kali Chilamwina chetu, Sasendote wa Lutwe, Mutwe wa chikungulwila cha akwa-Kristu, chikwo nawa kali Mwanangana wa Wanangana wa Zambi. Nyi twanyonga ha milimo yeswayi, mutusakwila chinji Zambi ha ululikiso wacho ni kuzanga chinji Kristu Yesu. Mbimbiliya yinalumbununa milimo yenyi yimwe.

³ Muze Kristu apwile hano hashi, chasolokele pundu ngwo kupalikila muli iye atu waze akwononoka mahasa kupwa masepa ja Zambi. (Yoa. 14:6) Yesu yahana mwono wenyi ngwe ndando ya ukuule hanga alamwine atu. (Mateu 20:28) Kashika, kutwatambile kumona Yesu ngwe kali wika chilweza chipema cha mutu yoze wasolwele yitanga yize yakuvwisa Zambi kuwaha. Alioze kali mutu mulemu mu umanunuko wa upale wa Zambi hali atu. Iye wika jila yakutambwilamo vumbi lia Zambi. (Yili. 5:31; 2 Kori. 5:18, 19) Kufwa cha Yesu ni uhindukilo wenyi yazulwile jila yize atu waze akwononoka makatambwilamo yiwape ya mutolo mu Wanangana wa Zambi uze uli mu malilu.

⁴ Sasendote wa Lutwe, Yesu, kakutuvwila “keke ha kukokoloka chetu,” ni kufuka milonga ya tumbaji twenyi hano hashi waze hanalihana kuli Zambi. Postolo Paulu yalumbununa ngwenyi: ‘Kuchapwile ngwe sasendote mukwa lutwe tuli nenyi yoze kechi kuhasa kwivwa keke ha kukokoloka chetu; alioze iye mwene hanamweseka ha yuma yeswe chizechene ngwe yetu, hindu kalingile shili.’ Mba Paulu yakolweza waze akufuliela muli Yesu Kristu hanga ase tachi, ayuke ku ululikiso wacho wa kupwa masepa ja Zambi, hakwamba ngwenyi: “Tukundamenu ni hamu ku ngunja ya vumbi, hanga tukawane keke, ni vumbi liakutukwasa ha mwaka wa chikala.”—Hepre. 4:14-16; 1 Yoa. 2:2.

⁵ Yesu kali nawa Mutwe wa chikungulwila cha akwa-Kristu. Etu kutushi ni tetekeli hano hashi, ngwe chize chapwile kuli tuvumbi twa Yesu a ku sekulu yitangu. Yesu mwe wakutusongwela kupalikila mu spiritu yisandu ni makulwana ajama waze makalumbununa kuli iye ni kuli Tato chize anafungu mapanga ja Zambi. (Hepre. 13:17; 1 Petu. 5:2, 3) Mu uprofeto, Yehova yamba hali Yesu ngwenyi: “Namupwishile chela ku mavungu; kasongo ni kapitau ka minyachi.” (Izaia 55:4) Yesu yashindakenya kumanunuka cha uprofeto uno hakulweza tumbaji twenyi ngwenyi: “Kanda akanuvuluka ngwo, miata: mumu Mwata wenu umuwika, mwe Kristu.”—Mateu 23:10.

⁶ Yesu kasolwelele mbunge yize akwete yakufupa kutukwasa, hakwamba ngwenyi: “Tweyenu kuli yami, yenu eswe nwakukilikita nikulemewa, ni yami kumungunuhwimisa. Lilemenu ku kanga yami, lilongesenu kuli yami; mumu nguli mukwa kushimbika, mukwa kulikehesa mu mbunge; mba kumunuwana uhwimino ku mbunge jenu. Mumu kanga yami yashi, ni chiteli chami chilelu.” (Mateu 11:28-30) Yesu Kristu kali “kafunga mupema” ngwe chize apwa Tato, Yehova Zambi, ha kufunga chikungulwila cha akwa-Kristu ni umbovu hanga tuwanemo uhwimino.—Yoa. 10:11; Iza. 40:11.

⁷ Paulu kalumbunwine mulimo ukwo wa Yesu Kristu ha mukanda wenyi utangu kuli A-Korindu ngwenyi: ‘Chamutamba kuyula ndo masa akwa kole jenyi eswe kushi lia yiliato yenyi. Alioze muze yuma yeswe mayizeyesa kuli iye, mba Mwana mwene makalizeyesa kuli yoze wazeyesele yuma yeswe kuli iye, hanga Zambi akapwe yuma yeswe muli eswe.’ (1 Kori. 15:25, 28) Yesu kapwile “chilangaji” wa Zambi muze te kanda achiza hano hashi, mumu iye mwe Zambi aliangile kutanga. (Yishi. 8:22-31) Muze Zambi atumine Yesu hano hashi, iye yalinga upale wa Zambi matangwa eswe. Yanyongonona mu yeseko ni kushishika kuli Tato ndo ku kufwa chenyi. (Yoa. 4:34; 15:10) Mba Zambi yamuhindwisa aye mwilu ni kumwaha chiyulo ngwe Mwanangana wa Wanangana wa mu malilu mumu lia ushishiko wenyi. (Yili. 2:32-36) Kashika, Yesu Kristu hanamwehe mulimo upema kuli Zambi wa kusongwela tununu a tununu ja angelo waze makanongesa yiyulo ya atu hano hashi ni kuchizaho ungulungulu weswe. (Yishi. 2:21, 22; 2 Tesa. 1:6-9; Uso. 19:11-21; 20:1-3) Mba Wanangana wa Zambi wa mu malilu uze makayula kuli Kristu we muukayula hashi heswe.—Uso. 11:15.

KUNYINGIKA CHITELI CHA KRISTU YIKA CHINALUMBUNUKA?

⁸ Chilweza chetu Yesu Kristu, kali mungunu. Hanamwehe mulimo wa kutufunga. Nyi tunazange atufunge kanawa ni zango, twatamba kununga ni kushishika kuli Yehova ni kununga ni kwenda hamuwika ni ululikiso wa Yehova uze unayi lume kulutwe.

⁹ Tumbaji twa Yesu a ku sekulu yitangu, kanyingikine chiteli atwama nacho Kristu mu ululikiso wa Zambi. Ayo yachisolola ha kukalakalila hamuwika mushi lia wata wa Kristu, ni kuzeyela ku usongwelo wenyi kulita ni spiritu yisandu. (Yili. 15:12-21) Postolo Paulu yasoneka ha kulinunga chapwile mu chikungulwila cha akwa-Kristu akuwayisa ngwenyi: “Tukakaminye ku umwenemwene mu zango, tukatatuke ni yuma yeswe kuli mwe mutwe wa chikungulwila, iye Kristu. Kuli iye we mujimba weswe wakusepekenya nikununga ni chize yihanda yeswe yakuhana, nikulita ni cheseko cha milimo ya chihanda cheswe, chakuweza ku kulitatwisa cha mujimba weswe mu zango.”—Efwe. 4:15, 16.

¹⁰ Nyi hita mutu mu chikungulwila makalakala hamuwika ni akwo mushi lia chiyulo cha Kristu, muchisolola ngwo zango hakachi ko linatatuka chinji, mumu lie liapwa “muya wa ungunu.”—Yoa. 10:16; Kolo. 3:14; 1 Kori. 12:14-26.

¹¹ Yuma yinalingiwa hashi heswe kulita ni uprofeto wa Mbimbiliya yinasolola ngwo, Yesu Kristu kamuhele chiyulo cha Wanangana mu mwaka 1914. Haliapwila kanayulu hakachi ka akwa-kole jenyi. (Samu 2:1-12; 110:1, 2) Chino yika chinalumbunuka kuli waze ali hano hashi musono? Chinalumbununa ngwo, kwasala hakehe Yesu asolole ngwenyi kali Mwanangana wa mianangana, Mwata wa miata, muze maneha upatwilo wa Zambi hali akwa-kole jenyi. (Uso. 11:15; 12:10; 19:16) Muze yino muyikalingiwa, chilakenyo cha Yehova cha kulamwina atu, chize ambile muze mutu mutangu avulumwine, muchikamanunuka ha kuyukisa waze ali ku kwoko lia chindume lia Kristu akwete utayizo wenyi. (Mateu 25:34) Cho kuwaha twakwivwa hakunyingika mulimo uze Kristu atwama nawo mu ululikiso wa Zambi! Ha matangwa wano a kusula, tunungenu ni kukalakala hamuwika ni mandumbu jetu a hashi heswe mushi lia usongwelo wa Kristu.