Kapinda Yoze Mahasa Kuneha Kutalatala

“Ha matangwa a kusula kumukukapwa miaka yikalu.”—2 TIMOTEU 3:1.

HIUNEVU hanji kumona kama yuma yino?

● Misongo yakushiha tununu a tununu twa atu.

● Zala yakushiha atu anji.

● Minyiko yakushiha tununu a tununu twa atu ni kupuzula mazuwo ja atu anji.

Ha mafwo mahataho, mumona yuma ngwe yino yize yinalingiwa. Twatamba kunyonga chinji ha yuma yacho. Chikwo nawa, mumona ngwe Mbimbiliya yaliangile kwamba ngwo, yuma yacho te muyilingiwa ha amwe mashimbu waze avuluka ngwo, “matangwa a kusula.”a

Chikuma chilemu cha mukanda uno, hi kukushinjilako hanga utayize ngwe tuli ha matangwa akalu. Mumu yena mwene unalimwena chize yuma yinapu musono. Alioze mukanda uno wapwa kusoneka hanga ukwehe kutalatala ni kukulweza ngwo, umanunuko wa uprofeto usambano, unasolola ngwo, kwasala hakehe “matangwa a kusula” songo lio kumuliza. Mukanda uno muusolola nawa kaleleso wa atu amwe hakutwala ku chikuma chino ni kutukwasa nawa kupwa ni shindakenyo ngwetu, yuma yipema yinakundama.

[Maliji mushi lia lifwo]

Uprofeto 1. Minyiko Yinene

“Kumukukapwa minyiko yinene.”—Luka 21:11.

● Winnie, wa mwaka 1 ni tukweji 4, kamuchijile kushi lia yiswaswa mu chifuchi cha Haiti. Akwa-sango ja TV e amuvwile kanatete kushi. Yisemi jenyi yafwa, alioze iye kafwile.

YIKA UMWENEMWENE WAKUSOLOLA? Munyiko unene uze walingiwile mu Haiti ha mwaka wa 2010, washihile unji wa atu kuhiana 300.000. Chikwo nawa unji wa atu kuhiana 1.3 milhões yasala chakuhona mazuwo ha tangwa limuwika. Chipwe ngwe munyiko uno wapihishile yuma yinji, nihindu yuma yino yakununga ni kulingiwa. Chize ha kakweji wa Abril 2009 ndo ha kakweji wa Abril 2010, kunakalingiwa minyiko yinene-yinene 18.

YIKA ATU ANJI AKWAMBA HA CHIKUMA CHINO? Chalumbunukine ngwo, minyiko kuyinaliwezela. Alioze, kulisa ni mashimbu a kunyima, sango ja yuma yacho jakutuheta ni kawashi ha mukunda wa tecnologia.

SHINA CHINO CHILI CHAMWENEMWENE? Tunyongenu ha umwenemwene uno: Mbimbiliya kuyishi kuhanjika ha unji wa minyiko yize te muyilingiwa ha matangwa a kusula. Alioze yakwamba ngwo, “kumukukapwa minyiko yinene kweka ni kweka.” Yino te muyisoloka ngwe chilayi cha matangwa a kusula.​—Marku 13:8; Luka 21:11.

KUCHI WANYONGA? Shina tunamono minyiko yacho ngwe chize Mbimbiliya yambile?

Atu amwe mahasa kunyonga ngwe minyiko ukawayo kuyishi kusolola ngwo tuli ha matangwa a kusula. Minyiko yili wika umwe wa ku uprofeto uze unamanunuka. Tutalenu uprofeto wamuchiali.

[Chikuma Chilemu]

“Etu [geofísicos] twakuyivuluka ngwetu, minyiko yinene. Atu akwo kakuyivuluka ngwo, yuma yipi.”—KEN HUDNUT, U.S. GEOLOGICAL SURVEY.

[Chizulie Chakutwaha]

©William Daniels/Panos Pictures

Uprofeto 2. Kapunga

“Kumukukapwa tupunga.”—MARKU 13:8.

● Umwe lunga yaya ni kufupa uchinyino mu chihunda cha Quaratadji mu Níger. Asonyi, anakwo ni mapangi jenyi, no yachinyina kweka mumu lia zala. Umwe lunga kali ukawenyi kanapombo ha chikanga. Mumu liaka? Sidi, umwe mwata wa mu chihunda chacho yamba ngwenyi: “Mumu keshi kuhasa kulisa [asoko jenyi] hachino kakwivwa sonyi ja kutala kumeso jo.”

YIKA UMWENEMWENE WAKUSOLOLA? Hashi heswe, hakachi ka atu 7, mutu 1 keshi kuhasa kuwana yize malia hita tangwa. Chipi-chipi mu Africa, hakachi ka atu 3, mutu 1 keshi kuwana yize malia. Hanga tunyingike kanawa yize tunambe, tunyongenu ha umwe usoko wa atu atatu, tata, mama ni mwana umuwika. Hita tangwa o katamba kusakula yoze mananga ni zala. Mumu nyi mama ni mwana malia, tato kechi kumona yize malia. Mumu kwasoloka wika kulia cha atu aali. Ayi ye yuma yakulingiwa mukachi ka asoko anji hita tangwa.

YIKA ATU ANJI AKWAMBA HA CHIKUMA CHINO? Hashi hakwima yuma yinji yize muyihasa kukumbana kuli atu eswe. Alioze atu e keshi kuhasa kufunga yuma yacho.

SHINA CHINO CHILI CHAMWENEMWENE? Chili chamwenemwene ngwo, musono njimi mahasa kulima kulia chinji kuhiana matangwa a kunyima. Manguvulu mahasa kufunga kulia chacho ni kuhwisa kapinda ni zala ya atu. Alioze, akatala kweseka, kenu keshi kuhasa kuchilinga.

KUCHI WANYONGA? Shina maliji ali ha mukanda wa Marku 13:8, kanamanunuka? Chipwe ngwe tecnologia yili kusuku, shina zala muyichinunga ni kupinjisa atu hashi heswe?

Kanji-kanji minyiko yinene ni zala yakukoka lamba likwo lize nelio liakusolola ngwo tuli ha matangwa a kusula.

[Chikuma Chilemu]

“Musono twanuke anji kakufwa hamukunda wa pneumonia, chipulukalo ni misongo yikwo nawa. Alioze misongo yacho yakushiha twanuke wano mumu keshi kulia kanawa”.—ANN M. VENEMAN, FORMER EXECUTIVE DIRECTOR OF THE UN CHILDREN’S FUND.

[Chizulie Chakutwaha]

© Paul Lowe/Panos Pictures

Uprofeto 3. Misongo

“Kumukukapwa . . . yilungo.”—Luka 21:11.

● Bonzali, yoze wakalakala ku shipitali mu chimwe chifuchi cha mu Africa muze mwapalikile jita yinji, kasele tachi jinji hanga awuke akwa-kufula upite waze apwile ni musongo wa kuhita manyinga hanji ngwetu Marburg.a Iye kechile ukwaso kuli atu akalakala ku nguvulu alioze kamukumbulwile. Hakupalika cha tukweji awana, ukwaso uze echile yiwuheta. Alioze, Bonzali te hafwa. Mumu neye kakwachiwile musongo wa Marburg uze amusambulwishile kuli akwa-kufula upite waze iye te anawuku.

YIKA UMWENEMWENE WAKUSOLOLA? Misongo yimwe ngwe misongo ya mbunge ni yihunguhungu, yikola ya mu jimo, HIV/aids, mukaka ni kachiki yili misongo yize yakushiha atu anji hano hashi. Kulita ni akwa-kuhengwola, kakwamba ngwo ha miaka yinoyene misongo yino yashiha unji wa 10,7 tununu a tununu twa atu. Mu maliji akwo, mutuhasa kwamba ngwetu hita mwaka, hakupalika cha mitulo yitatu, misongo yino yakushiha mutu umuwika.

YIKA ATU ANJI AKWAMBA HA CHIKUMA CHINO? Amu atu anayi ni kwoka hashi, kashika ni misongo yinoko chinji. Kuli atu anji waze mahasa kukwachiwa misongo.

SHINA CHINO CHILI CHAMWENEMWENE? Chamwenemwene atu kanoko chinji. Alioze, musono akwa-ciência hanalilongesa kupima ni kuwuka misongo. Mba ngwami kachi hanahase kukinda misongo yeswe, nyi kuchi? Alioze chino keshi kuhasa kuchilinga.

KUCHI WANYONGA? Shina atu kanamono lamba hamukunda wa misongo ngwe chize Mbimbiliya yambile?

Minyiko yinene, kapunga ni misongo yakushiha atu anji. Atu amwe kakumwesa akwo lamba. Eka nawa kakwamwesa lamba kuli atu waze te atamba kwafunga. Tala yize uprofeto wa Mbimbiliya wambile ha yize te muyilingiwa.

[Maliji mushi lia lifwo]

[Chizulie Chakutwaha]

“Chili chipi chinji kukulia kuli umwe ndumba hanji kashitu mukwo, alioze chili nawa chipi chinji kumona umwe musongo uze unakushihi hakehe-hakehe.”—EPIDEMIOLOGIST MICHAEL OSTERHOLM.

© William Daniels/Panos Pictures

Uprofeto 4. Kuhona cha Zango

‘Atu [kumakahona] . . . zango hali asako jo.’—2 TIMOTEU 3:1-3.

● Chris katwama mu chizavu cha akwa-kukwasa atu waze akwamwesa lamba kuli asoko, ku norte ya Gales. Chris yamba ngwenyi: “Ngunewuluka umwe pwo yoze wejile ni kutufupa. Kamulambile chinji ni kumujimbisa, kashika yitumujimbala chipwe ngwe te yitunamumono kama.” “Mapwo akwo kakuhonga chinji mu manyonga, kashika chipwe kukutala ku meso keshi kuhasamo.”

YIKA UMWENEMWENE WAKUSOLOLA? Mu chimwe chifuchi cha mu Africa, hakachi ka mapwo atatu, umuwika kamupihishile mu wanuke. Chimwe kuhengwola chalingiwile mu chifuchi chacho, chasolwele ngwo malunga anji kakumona ngwo, kulamba mapwo jo hi chipi ko. Alioze hi mapwo wika ko akwamwesa lamba mu usoko. Chakutalilaho, mu Canadá hakachi ka kumi lia malunga, atatu hanalambe kama kuli mapwo jo.

YIKA ATU ANJI AKWAMBA HA CHIKUMA CHINO? Chize ku mashimbu a kunyima, mu malo anji pwo ni lunga kakulilamba. Alioze te keshi kupala yuma yacho, ha miaka yino wika atu anase mbunge ku yuma yacho.

SHINA CHINO CHILI CHAMWENEMWENE? Chili umwenemwene ngwo, ha miaka yino atu kakusa chinji mbunge ha yuma yize yakulingiwa mu malo. Shina mbwanja mu malo yatepulukamo? Ka, ndo haliapwila, mu malo anji pwo ni lunga kakulilamba. Atu anji musono keshi kusolola zango.

KUCHI WANYONGA? Shina maliji ali ha 2 Timoteu 3:1-3 kanamanunuka? Shina wakutayiza ngwe, kuli atu anji waze keshi zango hali asoko jo ngwe chize te chatamba kupwa?

Uprofeto wamuchitano uze unamanunuka musono, unatale ha chihela haze twatwama, hano hashi. Tala yize Mbimbiliya yakwamba ha chikuma chino.

[Chikuma Chilemu]

“Kulilamba mu usoko uli umwe mulonga uze wakulingiwa chinji, alioze atu keshi kuuhanjikila chinji. Kanji-kanji mapwo kakuya ni kujimbula wika malunga jo kuli mapulisha hanyima lia kwalamba ha yisuho 35.”—MALIJI JA AKWA-CHIZAVU CHA AKWA-KUKWASA ATU WAZE AKWALAMBA KULI WAZE ALIMBATA NO MU CHIFUCHI CHA GALES.

Uprofeto 5. Kwonwona Hashi

‘[Zambi] makonwona waze akwonwona hashi.’—USOLWELO 11:18.

● Umwe lunga watwama mu Kpor mu chifuchi cha Nigéria yoze avuluka ngwo, Pirri kakukalakala ku mulimo wa kuteta yingaji hanga alinge vinyu. Alioze mulimo wenyi wapihile muze ku chihela chize apwile ni kukalakalila kwamwanganyinyine potololi kukatuka ku Níger. Iye yamba ngwenyi: “Potololi kuyinashihi yishi eswe, yinapihisa mujimba wetu ni kuvundula meya mu ngiji.” Iye yamba nawa ngwenyi, “Chishi nawa ni mulimo wakulikwasa nawo.”

YIKA UMWENEMWENE WAKUSOLOLA? Kulita ni akwa-mana amwe, kakwamba ngwo, hita mwaka atu kakumbila 6,5 milhões ya tonelada ya yiswaswa mu tulunga-lwiji. Chakusoloka ngwe, 50% ya yiswaswa yacho yili yize yakwazuka mu meya ha miaka yinji ndo haze muyifwenyokena. Atu keshi kupihisa wika hashi, alioze kanahwisa upite weswe watwamaho mu milali yakukomwesa. Chimwe kuhengwola chinakasolola ngwo, hashi hakufupiwa kuhwima mwaka umuwika ni tukweji atano mba hapwe nawa yuma yize atu akuchizaho ha mwaka umuwika. Mukanda wa sango avuluka ngwo, Sydney Morning Herald wambile ngwo: “Nyi atu manunga ni kupihisa hashi hamwe ni kuchizaho upite weswe ndo ha mwaka wa 2035, mutufupiwa kupwa ni hashi hamuchiali.”

YIKA ATU ANJI AKWAMBA HA CHIKUMA CHINO? Atu kakwete mana anji. Kashika mutuhasa kusa tachi hanga yuma yacho yihone kulingiwa.

SHINA CHINO CHILI CHAMWENEMWENE? Atu anji ni yizavu yikwo kakusa tachi jinji hanga akwase atu akwo ahone kupihisa hashi. Chipwe chocho, atu kananungu ni kupihisaho chinji.

KUCHI WANYONGA? Shina Zambi katamba kulinga chimwe chuma ngwe chize alakenyene hanga hashi hahone kununga ni kupiha?

Kuchizako uprofeto utano uze hitwashimutwina, Mbimbiliya yahanjikile nawa ha yuma yipema yize te muyilingiwa ha matangwa a kusula. Tala chimwe chilweza ha uprofeto wamuchisambano.

[Chikuma Chilemu]

“Yami napwile mwenya chihela chize chapwile ngwe yimwe paraisu yikehe, alioze musono nguli mwenya chihela cha kumbila yiswaswa.”—ERIN TAMBER, YOZE WATWAMA KU COSTA DO GOLFO MU ESTADOS UNIDOS, KANAHANJIKA HAKUTWALA KU KUMWANGANA CHA POTOLOLI CHIZE CHALINGIWILE KU GOLFO YA MÉXICO HA MWAKA WA 2010.

[Mushete]

Shina Zambi mwe Wakuneha Yuma Yacho?

Shina hamukunda wa Mbimbiliya kuhanjika ha yuma yipi yize twakumona musono, chinalumbunuka ngwo Zambi mwe wakuyikoka? Shina Zambi mwe wakutumwesa lamba? Muhasa kuwana makumbululo ya yihula ayi ha kapitulu 11 wa mukanda Yika Chamwenemwene Mbimbiliya Yakulongesa? wakutuhwisa kuli Yela ja Yehova.

[Chizulie Chakutwaha]

U.S. Coast Guard photo

Uprofeto 6. Mulimo wa Kwambujola Hashi Heswe

“Sango lino lipema lia wanangana kumakaliambujola mu yifuchi yeswe ya hashi.”—MATEU 24:14.

● Vaiatea katwama mu tungu lia Pacífico mu Tuamotu. Chipwe ngwe tungu lia Tuamotu likwete unji wa kilometro 802,900 ni matungu akahe-akehe 80, chikwo nawa tungu liacho mwatwama atu 16.000 a tununu, nihindu Yela ja Yehova kakuya ni kumeneka Vaiatea ni enyembo jenyi. Mumu liaka? Mumu Yela ja Yehova kakuzanga kwambujola sango lipema lia Wanangana wa Zambi kuli atu eswe, chipwe ngwe katwama ku yihela yeka-ni-yeka.

YIKA UMWENEMWENE WAKUSOLOLA? Sango lia Wanangana linahete kuli atu eswe a hashi. Ha mwaka wa 2010 wika, Yela ja Yehova kanakazachisa unji wa maola 1.6 milhões mu mulimo wa kwambujola mu unji wa yifuchi 236. Chino chinalumbunuka ngwo, hita Chela cha Yehova kanakazachisa 30 a minutu mu mulimo wa kwambujola hita tangwa. Ha miaka kumi yapalika, o kanakatuhwisa ni kuhana unji wa mikanda kuhiana tununu makumi aali a tununu hanga alongese atu Mbimbiliya.

YIKA ATU ANJI AKWAMBA HA CHIKUMA CHINO? Chize ku mashimbu a kunyima sango ja mu Mbimbiliya kakujambujola.

SHINA CHINO CHILI CHAMWENEMWENE? Chamwenemwene, atu anji hanambujola sango jimwe hakutwala ku Mbimbiliya. Alioze atu anji kakwambujola wika ha mashimbu akehe, chikwo nawa keshi kwambujola hashi heswe. Yela ja Yehova o kanambujola hashi heswe ni kuhanjika ni tununu a tununu twa atu. Chikwo nawa, o kananyongonona mu mulimo wa kwambujola chipwe ngwe maululikiso anji a ndundo hano hashi kakulimika no.a (Marku 13:13) Yela ja Yehova keshi kwafweta mba ambujole. Alioze kakulihana ene ni kuhana mikanda chawana. Mulimo uno wakupwa kukwasa ni milambu.

KUCHI WANYONGA? Shina “sango lino lipema lia wanangana” kanaliambujola hashi heswe? Shina kumona umanunuko wa uprofeto uno muchihasa kutwaha shindakenyo ngwetu yuma yipema yinatushimbwila kulutwe lia matangwa?

[Maliji mushi lia lifwo]

[Chikuma Chilemu]

“Shimbu Yehova machitayiza, etu mutununga ni kwambujola ni zango sango lipema lia Wanangana ha kuzachisa uhashi wetu weswe hanga tuhase kwambujola kuli atu eswe.”—MUKANDA WA MWAKA 2010 WA YELA JA YEHOVA.

Mashimbu Apema Kanakundama!

“Kwasala hakehe mba yingulungulu hi akuhi. . . . Alioze yimbovu kumakahinga chifuchi. Kumakawahilila mu kulumbama cha sambukila.”—SAMU 37:10, 11.

SHINA unazange kumona umanunuko wa uprofeto au uli helu? Kota unambe ngwe ewa. Kuli yuma yinji yize yinatwehe shindakenyo ngwetu yuma yino muyikamanunuka.

Mitwe yapalika yashimutwina uprofeto umwe wa mu Mbimbiliya uze wasolola pundu ngwo, tuli ha “matangwa a kusula.” (2 Timoteu 3:1-5) Zambi kakwashile akwa-kusoneka Mbimbiliya asoneke yuma yino hanga yitukwase kupwa ni kutalatala. (A-Roma 15:4) Umanunuko wa uprofeto wacho, unatwehe shindakenyo ngwetu kwasala hakehe lamba lieswe lize twakumona kumulihwa.

Muze matangwa a kusula maapalika, yuma yika muyilingiwa? Wanangana wa Zambi muuyula hashi heswe. (Mateu 6:9) Tala yuma yize Mbimbiliya yinambe ngwo, muyikalingiwa ha mashimbu jacho:

● Zala kuyichi kapwako nawa. “Kumukukapwa kulumbama cha mbuto mu mavu helu lia milundu.”—Samu 72:16.

● Yikola kuyichi kapwako nawa. “Niumwe watungako mamba ngwenyi, Ngunayiji”—Izaia 33:24.

● Hashi makaluliekaho.“Puya ni chifuchi chumu muyikawaha; kango muyikawahilila ni kutemuna yitemo ngwe kawalangaza.”—Izaia 35:1.

Au uli wika umwe wa ku uprofeto upema wa Mbimbiliya uze kwasala hakehe muumanunuka. Hanjika ni Yela ja Yehova hanga akulweze mumu liaka ali ni shindakenyo yipwahaha ngwo, matangwa apema kanakundama.