Mumu Liaka Umwe Ngana Ahichikile Yingeleja Yenyi?

Lisesa, tulweze kama hakutwala ku wanuke we

Nasemukinyine ku chifuchi cha Itália ha mwaka 1943. Ami ni anakwetu a malunga ni a mapwo, twakolele mu yimwe mbonge kuze te tata akukalakala ngwe njimi aku nawa karpinderu. Yisemi jetu katulelelele mu yingeleja ya Katolika.

Mumu liaka wazangile kupwa ngana wa mu yingeleja?

Muze napwile kanuke te nakuzanga kuhanjika ni kupanjika chinji mangana a mu yingeleja. Te nakuzanga chinji kupanjika maliji jo, chikwo nawa napwile ni kuwahilila ni mianda yo. Kashika ni yami nazangile chinji kupwa ngana. Muze napwile ni miaka 13, mama yangusonekesa ku yimwe shikola kuze te akufumbila twanuke waze anazange kupwa mangana.

Shina fumbu lize nwapwile ni kutambula te hakupwa nawa longeso lia Mbimbiliya?

Ka. Muze napwile ni miaka 15, umwe wa kuli longeshi wami yangwaha umwe mukanda wa Evanjelu—uze wapwile ni kuhanjika hakutwala ku mwono ni mulimo wa Yesu. Natangile mukanda wacho yisuho yinji. Muze nakumbanyishine miaka 18, yinguya mu chifuchi cha Roma ni kulilongesa ku mashikola anene-anene waze apwile ni kusongwela kuli ngana munene (papa). Yingulilongesa limi lia Latim, Ngregu, filosofia, história, psicologia ni teologia. Chipwe ngwe te twakutongwola yimwe yisoneko ya mu Mbimbiliya, ni kwivwa kutanga cha Mbimbiliya chize te akulinga mu shikola dominical Liayenga, nihindu te kutushi kulilongesa Mbimbiliya.

Kulutwe yiupwa longeshi. Shina chiteli chino te chinatale ha kulongesa lume?

Mulimo wami wapwile kusongwela milimo yikwo. Alioze napwile ni kulongesa nawa yuma yimwe hakutwala ku Concílio ya Vaticano.

Mba mumu liaka waputukile kuyambashana hakutwala ku yuma yimwe ya mu yingeleja?

Kwapwile yuma yitatu yize te yakungupinjisa chinji. Atu a mu yingeleja te yakulinjisa ku yuma ya mafwefwe. Kapwile ni kulengulula tupalia a mananga a mu mayingeleja jacho. Chikwo nawa, ni malongeso amwe te kakusoloka ngwe keshi kulita. Chakutalilaho, mumu liaka Zambi wa zango te mamwesa lamba lia mutolo atu waze te hanafu? Chikwo nawa, shina Zambi kakuzanga lume hanga tufunyene yilemba ha yisuho yinji ni kuzachisa mikosa?a

Yika walingile?

Yingulemba ni kulila ni kwita usongwelo. Hingulanda nawa yimwe Mbimbiliya ya Katolika Bíblia de Jerusalém yize atuhwishile mu limi lia italiano, hazehene yinguputuka kuyitanga. Limwe tangwa Liayenga chimene, muze te ngunasweke mazalo jami hanyima lia kukatuka mu yingeleja, amwe malunga aali yeza haze te tunakungulukila. O yalisolola ngwe Yela ja Yehova. Chocho hituhanjika ha maola anji hakutwala ku Mbimbiliya ni yize yakuhanjika hakutwala ku chize twatamba kunyingika uwayilo wamwenemwene.

Nyonga lika wapwile nalio hakutwala kuli atu jacho?

Nakomokene ha kumona chize apwile ni kuhanjika ni ushindakenyo, ni chize nawa apwile ni kuzachisa kanawa Mbimbiliya ya Katolika. Ha kupalika cha mashimbu, yikuputuka kwiza Chela mukwo wa Yehova avuluka ngwo, Mario. Iye kapwile chihumikiji chikwo nawa te keshi kulionga. Matangwa eswe lia Sambata ha ola 9 ya chimene, iye kapwile ni kwiza ni kungongwela ku chikolo chetu, chipwe muze te kuli mwala unji hanji kunanoko vula munji.

Yika mangana ni akwenu apwile ni kunyonga ha yuma yacho?

Napwile ni kwasanyika hanga akaula sango jize twapwile ni kulishimwinya, alioze niumwe wa kuli ayo wapwile ni kulemesa longeso lia Mbimbiliya wakuhi. Chipwe chocho, ami napwile ni kuzanga chinji longeso liacho mumu te ngunalilongesa yuma yinji yipema. Chakutalilaho, nalilongesele mumu liaka Zambi akwecha hanga lamba ni yuma yipi yilingiwe—chikuma chino te chakungupinjisa ha miaka yinji.

Shina tusongo je kazangile kukukanjisa kulilongesa Mbimbiliya?

Ha mwaka wa 1975, nayile yisuho yinji ku Roma hanga ngulumbunune nyonga liami hakutwala ku chikuma chino. Tusongo twami kafupile kwalumuna manyonga jami, alioze niumwe wa kuli ayo yoze te wakuzachisa Mbimbiliya wakuhi. Chocho ha tangwa 9 ya Janeiro ya 1976, hingusoneka umwe mukanda ku chishina cha Roma ni kwalweza ngwami chishi nawa wa mu Katolika. Hakupalika cha matangwa aali, hingukatuka ku chihela chize te natwama ni kukwata umwe kalela hanga nguye ku kukungulula chami chitangu ni Yela ja Yehova. Kukunguluka chacho chapwile kukunguluka cha mbonge haze hapwile yikungulwila yinji. Yuma yeswe te yalisa ni ya kuze te natwama! Mutu ni mutu kapwile ni Mbimbiliya yenyi ni kukaula yisoneko yize mukwa-kuhanjika pande apwile ni kutongola.

Mba yika asoko je anyongene ha yuma yino yeswe?

Asoko jami anji kalimikine ni yami. Alioze kulutwe hingunyingika ngwami umwe ndumbwami yoze watwama ku Lombardia, ku norte ya Itália neye te kanalilongesa Mbimbiliya ni Yela ja Yehova. Chocho yinguya ni kumumeneka. Chikwo nawa, Yela ja Yehova a ku mbonge yacho yangukwasa kuwana umwe mulimo ni limwe zuwo hanga ngutwamemo. Ha mwaka uzewene, yangupapachisa ngwe Chela cha Yehova.

Shina wakuliseha ha chiyulo chize wakwachile?

Ka. Haliapwila nakulivwa hakamwihi ni Zambi mumu yuma yize ngunanyingika hakutwala hali Iye yinakatuka mu Mbimbiliya hi ha filosofia ni mianda ya mu yingeleja ko. Chino chakungukwasa kulongesa akwetu ni shindakenyo yeswe.