MUTWE WAKULILONGESA 46
Yehova Kanatulakenya Paraisu Hano Hashi
“Yoze maliwahisa mu chifuchi, maliwahisa ni jina lia Zambi yamwenemwene.”—IZA. 65:16.
MWASO 3 Tachi Jetu, Ufulielo Wetu, Ujikijilo Wetu
CHIKUMA CHILEMUa
1. Sango jika Izaia asonekenene A-Izalele?
PROFETA Izaia kambile ngwenyi, Yehova kali “Zambi yamwenemwene.” Liji atongwele hano ngwo, “umwenemwene” linalumbunuka amene. (Iza. 65:16) Liji amene, linalumbunuka ngwo, chikapwe chocho, hanji ngwetu, chochene. Liji amene muze akulizachisa mu Mbimbiliya ha kuhanjika hali Yehova hanji hali Yesu, liakusolola shindakenyo ya chuma chize chamwenemwene. Kashika, sango ja Izaia kuli A-Izalele japwile zwalala ngwo, Yehova nyi malakenya kulinga chimwe chuma, chakulingiwa pundu. Kashika, umwenemwene uli ngwo, Yehova kakumanununa yuma yeswe yize akulakenya.
2. Mumu liaka mutuhasa kufuliela ha yilakenyo ya Yehova ya kulutwe lia matangwa, mba yihula yika mutukumbulula ha mutwe uno?
2 Shina mutuhasa kufuliela ngwetu, yilakenyo ya Yehova ya kulutwe lia matangwa, neyo muyikamanunuka? Ha kupalika cha miaka 800 kukatuka ha mashimbu ja Izaia, postolo Paulu yalumbununa mumu liaka mutuhasa kupwa ni shindakenyo ngwetu, yilakenyo ya Zambi nihindu yakumanunuka. Paulu yamba ngwenyi, “Zambi kechi kuhasa kulionga.” (Hepre. 6:18) Ngwe chizechene chapwa chikalu shima limuwika lia meya, lituhuke meya a mungwa ni waze keshi mungwa, Yehova Chishina cha umwenemwene, keshi kuhasa kulionga. Kashika, mutuhasa kufuliela ha yeswe yize akwamba. Yino yinachingi, yilakenyo yize anatulakenya kulutwe lia matangwa. Ha mutwe uno, mutukumbululaho yihula yaali: Yika Yehova analakenya kutwaha kulutwe lia matangwa? Shindakenyo yika Yehova anatwehe yize yinasolola ngwo, yuma yacho muyikamanunuka lume?
YIKA YEHOVA ANATULAKENYA?
3. (a) Chilakenyo chika cha Yehova chize chili ni ulemu kuli yetu? (Usolwelo 21:3, 4) (b) Yika atu amwe akunyonga muze twakuhanjika no hakutwala ku chilakenyo chino?
3 Tutalenu chilakenyo chimwe chize chikwete ulemu unji kuli yetu eswe. (Tanga Usolwelo 21:3, 4.) Yehova kanambe ngwenyi, tangwa limwe “kufwa kuchichi kapwako nawa, kukuchi kapwa nawa kunenganyana, chipwe miteto, chipwe yikola, ka.” Anji a kuli yetu twakutanga versu jino jipema hanga tutakamise atu mu munda, ni kwasolwela chize mwono muukapwa mu Paraisu. Mba kuchi atu akwo akunyonga muze twakwatangila versu jino? Ayo hanji mahasa kwamba ngwo, yuma ya mutapu au chikalu kulingiwa.
4. (a) Muze Yehova alingile chilakenyo cha kuneha Paraisu, yika iye anyingikine ngwenyi te muyilingiwa musono? (b) Kuchizako chilakenyo chino, yika nawa Yehova alingile?
4 Muze Yehova atumine postolo Yoano kusoneka chilakenyo chino cha Paraisu, iye kanyingikine ngwenyi musono te mutuzachisa versu jino hanga twambujole sango ja Wanangana kuli atu akwo. Yehova kanyingikine nawa ngwenyi, kuli atu anji, te muchipwa chikalu kutayiza ngwo, yuma muyalumuka kulutwe. (Iza. 42:9; 60:2; 2 Kori. 4:3, 4) Mba kuchi mutuhasa kukwasa akwetu hanga apwe ni shindakenyo ngwo, yilakenyo yize yili ha Usolwelo 21:3, 4 muyikamanunuka? Kuchi mutuhasa kukolesa ufulielo wetu hali Yehova ni ha yilakenyo yenyi? Yehova kanatusolwela yuma yinji yize yakutwaha shindakenyo ngwetu, yilakenyo yenyi muyikamanunuka. Yuma yika yenayo?
YEHOVA KANAMBE NGWENYI MAKAMANUNUNA CHILAKENYO CHENYI
5. Versu jika jinatukwase kujikijila ha chilakenyo cha Zambi, nawa yika versu jacho jinambe?
5 Ha Usolwelo 21:5, 6a, tunawaneho yimwe yuma yize yinatwehe shindakenyo ha chilakenyo cha Yehova cha Paraisu. Twakutangaho ngwetu: “Yoze te unatwama ha ngunja yamba ngwenyi: “Tala! Ngunalingi yuma yeswe yaha.” Yamba nawa ngwenyi: “Soneka, mumu maliji wano kali a ujikijilo ni a umwenemwene.” Mba yamba kuli yami ngwenyi: “Maliji wano hamanunuka! Yami nguli Alfa ni Omega.”
6. Mumu liaka maliji ali ha Usolwelo 21:5, 6, anatukwase kujikijila ha yilakenyo ya Yehova?
6 Mumu liaka versu jino jakukolesa ufulielo wetu ha yilakenyo ya Zambi? Mukanda wetu umwe unambe ngwo: “Chili ngwe Yehova mwene kasele chijikilo ha umwe mukanda hanga atu waze ashishika apwe ni shindakenyo ngwo, yiwape yino makayizuka kulutwe lia matangwa.”b (Clímax de Revelação). Usolwelo 21:3, 4, unatulweze yize Yehova anatulakenya. Alioze mu versu 5 ni 6, tunawanemo chijikilo cha Yehova chize chinatwehe shindakenyo ngwetu, chilakenyo chino muchikamanunuka. Haliapwila, tutalenu chize Yehova anatwehe shindakenyo ya kujikijila muli iye.
7. Maliji ali ha versu 5 a iya; mumu liaka chikuma chino chili chilemu?
7 Versu 5 yinambe ku uputukilo ngwo: “Yoze te unatwama ha ngunja yamba ngwenyi.” (Uso. 21:5a) Maliji wano kali alemu, mumu chili chisuho chamuchitatu chize Yehova mwene anahanjika mu mukanda wa Usolwelo. Hi mungelo ko hanji Yesu mwe wahanyine chilakenyo chino, alioze Yehova mwene! Chino chinasolola ngwo, mutuhasa kufuliela ni mbunge yeswe ha yize iye anambe mu maliji anahateho mu versu yamuchitano. Mumu liaka? Mu Yehova “keshi mahuza.” (Titu 1:2) Kashika, mutuhasa kujikijila ha maliji ali ha Usolwelo 21:5, 6.
“TALA! NGUNALINGI YUMA YESWE YAHA”
8. Maliji aka Yehova anazachisa waze anasolola ngwo, chilakenyo chenyi muchikamanunuka? (Izaia 46:10)
8 Maliji akwo a Yehova kali ngwo: “Tala!” (Uso. 21:5) Liji lia Ngregu lize akulumbununa ngwo: “Tala!” kakulizachisa chinji mu mukanda wa Usolwelo. Umwe mukanda unambe ngwo, liji lino hamwe ni lutope wa kukomoka, kakulizachisa hanga akwase akwa-kutanga ase shindakenyo ha maliji waze mahataho. Mba yika Zambi ambile hanyima lia maliji jacho? Iye yamba ngwenyi: “Ngunalingi yuma yeswe yaha.” Yuma yino, Yehova makayilinga kulutwe, alioze kali ni shindakenyo ngwenyi, makamanununa yize hanalakenya. Kashika, anahanjika ngwe yuma yacho kanayilingi.—Tanga Izaia 46:10.
9. (a) Maliji “ngunalingi yuma yeswe yaha,” yika analumbunuka? (b) Yika muyikalingiwa ku “lilu” litangu ni “hashi” hatangu?
9 Tuhengwolenu maliji waze anahateho mu Usolwelo 21:5: “Ngunalingi yuma yeswe yaha.” Yika maliji wano analumbunuka? Mu kapitulu yono, maliji wano kanatale ha yuma yaali yize Yehova makalinga. Chitangu, iye makanongesa hano hashi hapi. Chamuchiali, makaneha chifuchi chaha. Ha Usolwelo 21:1, twakutangaho ngwetu: “Lilu litangu ni hashi hatangu te hiyapalika.” “Lilu litangu” linalumbunuka manguvulu waze akusongwela kuli Satana ni andemoniu. (Mateu 4:8, 9; 1 Yoa. 5:19) Mu Mbimbiliya, liji “hashi” mahasa kulizachisa hanga ahanjike hali atu waze atwama hano hashi. (Uputu. 11:1; Samu 96:1) Hachino, liji “hashi hatangu” linatale hali atu api. “Malilu ni hashi” a musono, Yehova kechi kaalulieka. Shimbu achilinge, iye makanongesa yuma yacho, mba hanyima masa “malilu aha ni hashi haha,” hanji ngwetu, unguvulu waha uze muukayula atu angunu.
10. Mu mutapu uka Yehova makalinga yuma yeswe yaha?
10 Mu mutapu ukwo uka uze Yehova makalinga “yuma yeswe yaha”? (Uso. 21:5) Iye makalulieka hashi ni kukwasa atu apwe angunu. Ngwe chize ambile profeta Izaia, Yehova makalulieka hashi hanga hakapeme ngwe chize wapwile munda wa Endene. Kwalumuka chino, muchikalingiwa ni kuli atu. Yehova kanalakenya ngwenyi, makauka misongo yeswe ya atu. Tupuputa, afwa-matwi ni yitonji eswe makaauka chipwe afu makaahindwisa.—Iza. 25:8; 35:1-7.
“MALIJI WANO KALI A UJIKIJILO NI A UMWENEMWENE. . . . HAMANUNUKA!”
11. Yika Yehova alwezele Yoano hanga alinge; mba shindakenyo yika Yehova amuhele?
11 Yika nawa Yehova anambe yize yinatwehe shindakenyo ngwetu, mutuhasa kujikijila mu yilakenyo yenyi? Yehova kalwezele postolo Yoano ngwenyi: “Soneka, mumu maliji wano kali a ujikijilo ni a umwenemwene.” (Uso. 21:5) Kuchizako kumwita hanga ‘asoneke,’ Yehova yahana nawa shindakenyo kuli Yoano ha yize te malinga. Iye yawezela ngwenyi: “Mumu maliji wano kali a ujikijilo ni a umwenemwene”—chekwamba ngwo, maliji a Zambi kapwa a mbwende. Twakusakwilila chinji ha chize Yoano ononokene ha “kusoneka” maliji wano. Ha mukunda wa chino, mutuhasa kutanga ha chilakenyo cha Paraisu ni kupukuna ha yiwape yize mutukazuka.
12. Mumu liaka Yehova ambile ngwenyi, maliji “wano hamanunuka!”
12 Yika nawa Yehova ambile? Iye yamba ngwenyi: “Maliji wano hamanunuka!” (Uso. 21:6) Ha versu yino, Yehova kanahanjika ngwe yuma yize alakenyene hakutwala ku Paraisu hiyalingiwa kulu. Iye mahasa kuhanjika mu mutapu uno, mumu kukushi nichimwe chize muchikwika kumanunuka cha upale wenyi. Hanyima, Yehova yamba nawa chuma chikwo chize chakutwaha shindakenyo ngwetu, yilakenyo yenyi muyikamanunuka pundu. Chuma chika chenacho?
“YAMI NGULI ALFA NI OMEGA”
13. Mumu liaka Yehova ambile ngwenyi: “Yami nguli Alfa ni Omega”?
13 Ngwe chize hitwamba ku uputukilo, Yehova mwene kahanjikile ha yisuho yitatu, mu usolwelo wa Yoano. (Uso. 1:8; 21:5, 6; 22:13) Ha hita chisuho, Yehova kazachishile maliji wano: “Yami nguli Alfa ni Omega.” Liji Alfa, lili liji litangu ha sona ja Ngregu; alioze liji Omega, lili liji lia kasula. Ha kwamba ngwenyi: “Yami nguli Alfa ni Omega,” Yehova te kanasolola ngwenyi, muze akuputuka chuma, iye kakuchihetesa kusongo, ni kusa shindakenyo hanga chilingiwe kanawa.
Muze Yehova akuputuka kulinga chuma, iye kakuchihetesa kusongo (Tala maparagrafu 14, 17)
14. (a) Ha shimbu lika Yehova ambile ngwenyi, “Alfa,” mba ha shimbu lika makamba ngwenyi “Omega”? (b) Yika tunawane ha Uputukilo 2:1-3?
14 Hanyima lia kulinga Alama ni Eva, Yehova yasolola upale wenyi hali atu ni hano hashi. Mbimbiliya yakwamba ngwo: “Zambi yaawahisa, Zambi yamba kuli ayo ngwenyi, Semenu nukaliokese, nukazalise hashi.” (Uputu. 1:28) Muze Yehova asolwele upale wenyi, chapwile ngwe kanambe ngwenyi, “Alfa.” Upale wa Yehova muukamanunuka muze ana ja Alama ni Eva, waze akwononoka makapwa angunu ni kuzalisa hashi ni kupwisaho paraisu. Muze yino muyikalingiwa, muchikapwa ngwe Yehova kanambe ngwenyi, “Omega.” Muze Yehova ahwishile kutanga malilu, hashi ni yuma yeswe yize yatwamamo, iye yamba chimwe chuma chilemu. Chuma chacho, chili ha Uputukilo 2:1-3. (Tanga.) Yehova kambile ngwenyi, tangwa liamuchishimbiali lili lisandu. Yika maliji wano analumbunuka? Kanalumbunuka ngwo, upale wa Yehova hali atu ni hano hashi, muukamanunuka kusongo lia tangwa liamuchishimbiali.
15. Mumu liaka Satana anyongene ngwenyi, mahasa kukwika kumanunuka cha upale wa Yehova?
15 Muze Alama ni Eva avulumwine, ayo yapwa akwa-shili, chocho yapalikisa shili ni kufwa kuli ana jo. (Roma 5:12) Chasolokele ngwe, Satana kahashile kukwika kumanunuka cha upale wa Yehova, wakuzalisa hashi ni atu angunu waze akwononoka. Yino yasolwele ngwe Yehova kechi kuhasa kumanununa upale wenyi, mba ahase kwamba maliji akasula ngwenyi, “Omega.” Muchihasa kupwa ngwe Satana kanyongene ngwenyi, kwahwa Yehova kechi kuhasa kumanununa chilakenyo chenyi. Iye kota kanyongene ngwenyi, Yehova mashiha Alama ni Eva hanga alinge atu akwo angunu waze te makwasa kumanununa upale wenyi hali atu. Alioze nyi Yehova kachilingile, kachi Satana te mahasa kumwamba ngwenyi, kali mukwa-mahuza. Mumu liaka? Mumu kulita ni Uputukilo 1:28, Yehova kalwezele Alama ni Eva ngwenyi, ana jo mazalisa hashi.
16. Mumu liaka Satana kota anyongene ngwenyi, matwala Yehova ahone kumanununa yize alakenyene?
16 Chuma chikwo chika chize Satana anyongene ngwenyi hanji Yehova malinga? Iye kota kanyongene ngwenyi, Yehova mecha Alama ni Eva hanga aseme ana, alioze ana jacho kechi keza kapwa angunu. (Chilu. 7:20; Roma 3:23) Nyi chino muchilingiwa, Satana te masuma Yehova mulonga ngwenyi, keshi kuhasa kulinga yuma yize akulakenya. Mumu liaka? Mumu chino te chichi kumanununa upale wa Zambi wa kuneha Paraisu hano hashi, ni kuzalisaho ni atu ashishika nawa angunu?
17. Kuchi Yehova atalile ha mulonga wa Satana ni wa Alama ni Eva; mba yika muyikalingiwa kusongo? (Tala nawa chizulie.)
17 Satana kakahashile kunyingika yize te Yehova malinga. Yehova kahwishile yuma yacho mu jila yingunu hanga upale wenyi umanunuke. (Samu 92:5) Yehova yecha Alama ni Eva hanga apwe ni ana. Hachino, iye yasolola ngwenyi, hi mukwa-mahuza ko. Iye nawa yaneha umwe ‘mukwa-munyachi,’ yoze te makuula ana angunu a Alama ni Eva, ni kusa shindakenyo hanga upale wenyi umanunuke. (Uputu. 3:15; 22:18) Hachino, Yehova te kechi kuhasa kumwamba ngwo, keshi kumanununa yuma yize akulakenya. Mukwa-munyachi yoze Yehova alakenyene, te mahana mwono wenyi ngwe ukuule hanga alamwine atu. Pundu lume, Satana kakanyongene ngwenyi, Yehova mahwisa kapinda wacho mu mutapu uno. Mumu liaka? Mumu ukuule unakatuka ha zango lize Yehova akwete. (Mateu 20:28; Yoa. 3:16) Satana keshi zango, mumu kali mukwa-kuzo. Mba yika ukuule muukalinga? Kusongo lia kanunu ka miaka ya kuyula cha Kristu, ana ja Alama ni Eva waze makononoka ni kupwa angunu, makazalisa hashi ni kupwisaho paraisu ngwe chize Yehova alakenyene. Muze yino muyikalingiwa, muchikapwa ngwe Yehova kanambe ngwenyi: “Omega.”
CHIZE MUTUKOLESA UFULIELOWETU HA CHILAKENYO CHA PARAISU
18. Shindakenyo yika yitatu yize Yehova anatwehe? (Tala nawa mushete, “Yikuma Yitatu Yize Muyitukwasa Kufuliela ha Chilakenyo cha Yehova.”)
18 Ha mutwe uno, twamonaho yuma yinji yize yinatwehe shindakenyo ngwetu, hashi muhakapwa Paraisu. Mba yika mutulweza atu waze akuhamika ngwo, yino kuuchi keza kalingiwa? Chitangu, Yehova mwene mwe walingile chilakenyo chino. Mukanda wa Usolwelo unambe ngwo: “Yoze te unatwama ha ngunja yamba ngwenyi: ‘Tala! Ngunalingi yuma yeswe yaha.’” Yehova kali ni mana, ndundo ni zango lia kumanununa yize alakenyene. Chamuchiali, kuli Yehova, yuma yize alakenyene yili ngwe yinalingiwa, kashika ambile ngwenyi: “Maliji wano kali a ujikijilo ni a umwenemwene. . . . hamanunuka!” Chamuchitatu, kukushi nichimwe chize muchikwika Yehova kumanununa yize aputukile, kashika ambile ngwenyi: “Yami nguli Alfa ni Omega.” Kusongo lia yuma yeswe mutukanyingika ngwetu, Satana kali mukwa-mahuza yoze kechi kuhasa kukwika Yehova kumanununa yize akulakenya.
19. Nyi atu akwo chakwakalila kufuliela ha chilakenyo cha Zambi, chakuneha Paraisu, yika muhasa kulinga hanga wakwase?
19 Iwuluka ngwe hita shimbu muhanjika ni mutu mu munda, hanga afuliele ha yilakenyo ya Yehova, acho ni yena unakolesa ufulielo we ha yilakenyo yacho. Kashika, ha shimbu lieswalio mutanga chilakenyo cha Paraisu chize chili ha Usolwelo 21:4, mba mutu yoze unatangila mamba ngwenyi, “Yuma yino kuyichi kuhasa kulingiwa,” yika mulinga? Muhasa kutanga ni kulumbununa versu 5 ni 6 ni kumusolwela ngwo, maliji wano kali ngwe Yehova mwene kasa chijikilo chize chinasolola ngwo, makamanununa yilakenyo yenyi yeswe.—Iza. 65:16.
MWASO 145 Zambi Matwaha Paraisu
a Ha mutwe uno, mutumonaho shindakenyo yize Yehova anatwehe hakutwala ku kumanunuka cha chilakenyo cha Paraisu. Mashimbu eswe mutulianyina chilakenyo chino ni akwetu, acho tunakolesa ufulielo wetu ha yilakenyo ya Yehova.