Kutalatala Kuchishi Kukolesa Sonyi

1. Mumu liaka Apalahama apwile ni shindakenyo ngwenyi mapwa ni mwana?

YEHOVA kalakenyene sepa lienyi Apalahama ngwenyi, mapwa ni mwana; nawa mavungu eswe a hashi mazuka yiwape kupalikila muli iye. (Uputu. 15:5; 22:18) Apalahama kapwile ni ufulielo ukolo muli Zambi, kashika apwile ni shindakenyo ngwenyi, Zambi mamanununa chilakenyo chenyi. Alioze Apalahama te hapwa ni miaka 100; Sara 90, nihindu te kanda achipwa ni mwana. (Uputu. 21:1-7) Chipwe chocho, Mbimbiliya yakwamba ngwo: “Apalahama mu kutalatala wafulielele chize kechi kuhasa kuchitalatala hanga akapwe tato ya mavungu anji.” (Roma 4:18) Yetu tunanyingika ngwetu, yize Apalahama apwile ni kushimbwila yinakalingiwa. Ayo yasema Izake, mwana yoze apwile ni kushimbwila chinji. Mba, mumu liaka Apalahama apwile ni ufulielo uno ukolo muli Yehova?

2. Mumu liaka Apalahama apwile ni shindakenyo ngwenyi, chilakenyo cha Yehova muchimanunuka?

² Apalahama te kanyingika kanawa Yehova, kashika apwile ni shindakenyo ngwenyi, “cheswacho Zambi hanalakenya mahasa kuchilinga.” (Roma 4:21) Yehova yatayiza Apalahama, chocho yamutongola ngwe mukwa-ululi mumu lia ufulielo wenyi. (Tia. 2:23) Ngwe chize anasolola ha A-Roma 4:18, ufulielo ni kutalatala cha Apalahama, yeswe yaali yapwile ni kulita. Haliapwila tuhengwolenu A-Roma kapitulu 5 hanga tumone yize Paulu matulweza hakutwala ku kutalatala.

3. Yika Paulu ambile hakutwala ku kutalatala?

³ Paulu kanasolola yize muyihasa kutukwasa kupwa ni shindakenyo ngwetu, “kutalatala kuchishi kukolesa sonyi.” (Roma 5:5) Iye nawa kanalumbununa yize muyihasa kutukwasa kukolesa kutalatala chetu. Tuhengwolenu A-Roma 5:1-5, ni kunyonga chize kutalatala chetu chakukola hakupalika cha mashimbu. Yize Paulu asonekenene A-Roma, muyitukwasa nawa tumone majila akukoleselamo ufulielo wetu musono. Haliapwila, tuhengwolenu kutalatala chetu cha uhenya chize Paulu ambile ngwenyi, kuchishi kukolesa sonyi.

KUTALATALA CHETU CHA UHENYA

4. Yika mukanda wa A-Roma 5:1, 2, unambe?

⁴ Tanga A-Roma 5:1, 2. Paulu kasonekene maliji wano kuli Akwa-Kristu mu chikungulwila cha A-Roma. Mandumbu mu chikungulwila chacho, kalilongesele umwenemwene hali Yehova ni hali Yesu, chocho yapwa ni ufulielo ni kupwa Akwa-Kristu. Hachino, Zambi “yaapwisa akwa-ululi mumu lia ufulielo” wo ni kwawayisa ni spiritu yisandu. Ayo yapwa ni uhashi wa kuzuka chiwape chilemu ni kupwa ni shindakenyo ngwo, chiwape chacho te muchimanunuka pundu.

5. Kutalatala chika ali nacho Akwa-Kristu akuwayisa?

⁵ Kulutwe, Paulu yasonekena Akwa-Kristu akuwayisa mu Efwesu hakutwala ku kutalatala chize ayo atambwile. Kutalatala chacho, chinachingi, kutambula uhenya wa “chihinga muli asandu.” (Efwe. 1:18) Muze asonekenene A-Kolosu, Paulu yasolola kuze Akwa-Kristu akuwayisa te matambwila chihinga cho. Iye yavuluka chihinga chacho ngwenyi, “kutalatala chize hananutulikila mu malilu.” (Kolo. 1:4, 5) Kashika, kutalatala cha Akwa-Kristu akuwayisa, chili cha kwahindwisa hanga akatwame ni mwono wa mutolo mu malilu ni kuyula hamwe ni Kristu.—1 Tesa. 4:13-17; Uso. 20:6.

6. Yika umwe ndumbu wakuwayisa ambile ha kutalatala chenyi?

⁶ Akwa-Kristu akuwayisa kakulemesa chinji kutalatala chino. Umwe wa kuli ayo, kapwile ndumbu Frederick Franz. Tangwa limwe, yasolola chize te akwivwa ha kwamba ngwenyi: “Kutalatala chetu chili chamwenemwene. Chikwo nawa, muchikamanunuka hali Akwa-Kristu eswe akuwayisa 144,000 waze ali mu chizavu chikehe cha mapanga. Chino muchikalingiwa mu mutapu uze yetu kutushi ni kushimbwila.” Ha mwaka 1991, hanyima lia kukalakala ni ushishiko ha miaka yinji, ndumbu Franz yamba ngwenyi: “Yetu kutushi kutokesa ulemu wa kutalatala chino. Kushimbwila kutalatala chino chakutukwasa chinji kuchilemesa. Chili chuma chilemu chize twatamba kufunga chipwe ngwe mutushimbwila ha tununu a tununu twa miaka. Yami nakulemesa chinji kutalatala chetu haliapwila kuhiana kunyima.”

7-8. Kutalatala chika ali nacho tuvumbi anji a Yehova? (A-Roma 8:20, 21)

⁷ Mandumbu anji waze akuwayila Yehova musono, kali ni kutalatala cheka. Kutalatala chacho che apwile nacho Apalahama—kutalatala cha kutwama ni mwono wa mutolo hano hashi mu Wanangana wa Zambi. (Hepre. 11:8-10, 13) Paulu kasonekene hakutwala ku kutalatala chino chipema. (Tanga A-Roma 8:20, 21.) Yika yakukwachile ku mbunge muze walilongesele kutalatala chino mu Mbimbiliya? Shina yapwile ha kunyingika ngwo, tangwa limwe mukatusuka ku shili ni kupwa mungunu? Nyi hanji yapwile ha kunyingika ngwe, tangwa limwe mukamona nawa asoko ni masepa je waze hanafu? Chochene, mumu lia “kutalatala chino” tunashimbwila yuma yinji yipema.

⁸ Chipwe ngwe kutalatala chetu chili cha kutwama mu malilu ku miaka yeswe hanji mu paraisu hano hashi, yetu eswe mutuhasa kuwahilila. Kutalatala chino chipema muchihasa kukola chinji ku mbunge yetu. Paulu kanalumbununa chize chino muchihasa kulingiwa. Yize iye asonekene, muyihasa kutukwasa kupwa ni shindakenyo ngwetu, kutalatala chino muchikamanunuka pundu.

KUCHI MUTUHASA KUKOLESA KUTALATALA CHETU?

9-10. Ngwe chize twamona ha chilweza cha Paulu, yika Akwa-Kristu mahasa kushimbwila? (A-Roma 5:3) (Tala nawa yizulie.)

⁹ Tanga A-Roma 5:3, 4. Paulu kambile ngwenyi, lamba lize tunamono mulihasa kutukwasa hanga tukolese kutalatala chetu. Nyonga lino hanji mulihasa kutukomwesa. Alioze umwenemwene uli ngwo, tumbaji eswe a Yesu tangwa limwe mapalika mu yimwe yipikalo. Tutalenu chilweza cha Paulu. Iye kalwezele Akwa-Kristu mu Tesalonika ngwenyi: “Muze twapwile hamwe ni yenu, twapwile ni kunutoweza ngwetu, mutukamona lamba, mba yino ye yinalingiwa.” (1 Tesa. 3:4) Mba kuli A-Korindu, Paulu yasoneka ngwenyi: “Tunazange nunyingike mandumbu hakutwala ku lamba lietu lize liatuwanyine . . . Chocho yitunyonga ngwetu, kutuchi kumona mwono.”—2 Kori. 1:8; 11:23-27.

¹⁰ Ni musono, yetu eswe mutuhasa kushimbwila kupalika mu yimwe yipikalo. (2 Timo. 3:12) Yika mutwamba hali yena? Shina hanakuhungumiona mumu lia kufuliela muli Yesu? Shina masepa hanji asoko je kakukukekuna? Muchihasa kupwa ngwe ayo kakukulinga yuma yipi. Hanji muchihasa kupwa nawa ngwe ku mulimo we, akwenu kakukupinjisa mumu lia kuhanjika umwenemwene. (Hepre. 13:18) Chikwo nawa, mahasa kukuhungumiona kuli nguvulu mumu lia kwambujola sango jipema. Alioze, chipwe ngwe mutupalika mu lamba lieswalio, nihindu Paulu kambile ngwenyi mutuhasa kuwahilila. Mumu liaka?

11. Mumu liaka twatamba kununga ni kunyongonona, chipwe ngwe tunapalika mu yipikalo yeswayo?

¹¹ Mutuhasa kuwahilila muze tunapalika mu yipikalo, mumu chino muchitukwasa hanga tupwe ni chimwe chitanga chilemu. Mukanda wa A-Roma 5:3, unambe ngwo: “Lamba liakuneha kunyongonona.” Akwa-Kristu eswe makamona lamba, mba makafupiwa nawa kunyongonona. Kashika, tunafupiwa kunyongonona, chipwe ngwe tunapalika mu lamba lieswalio. Nyi twachilinga, mutukahasa kumona kumanunuka cha kutalatala chetu. Yetu kutwazangile kupwa ngwe atu waze Yesu atesele ni mbuto yize yaholokele ha mavu a mawe. Atu jacho, ku uputukilo katayijile umwenemwene ni uwahililo, alioze muze kwasolokele kapinda ni yihungumiona, o yahonga ni kuhichika ufulielo wo. (Mateu 13:5, 6, 20, 21) Tunanyingika ngwetu, hi chipema ko kutuhungumiona hanji kupalika mu yipikalo, alioze kunyongonona muchitunehena yiwape yinji. Mu mutapu uka?

12. Yika twakuzuka nyi twanunga ni kukumba yihungumiona?

¹² Tiangu kambile ngwenyi, kunyongonona mu yipikalo muchihasa kutunehena yiwape yinji. Yasoneka ngwenyi: “Echenu hanga kunyongonona chenu chilinge milimo yacho ndo ku songo, hanga nupwe angunu, kunushi chitela mu yuma yeswe.” (Tia. 1:2-4) Tiangu kambile ngwenyi, kuli chimwe chize chakututwala hanga tunyongonone. Chuma chika chenacho? Kunyongonona chetu muchihasa kutukwasa hanga tulihumikize, tupwe ni ufulielo ni kujikijila muli Yehova. Alioze, kunyongonona chetu muchihasa kutunehena chiwape chikwo chilemu.

13-14. Yika yakulingiwa nyi twanyongonona, mba yika yino yakulinga ha kutalatala chetu? (A-Roma 5:4)

¹³ Tanga A-Roma 5:4. Paulu kambile ngwenyi, kunyongonona chakuneha “utayizo wa Zambi.” Maliji wano kanasolola pundu ngwo nyi mutununga ni kunyongonona, mutupwa ni utayizo wa Yehova. Yino kuyalumbunukine ngwo, nyi tunapalika mu yipikalo hanji mu yihungumiona, acho Yehova kanawahilila, ka. Yehova kakuwahilila wika hali yetu, mumu kunyongonona chetu chakututwala hanga tupwe ni utayizo wenyi. Chino chili chiwape chinene!—Samu 5:12.

¹⁴ Tunanyingika ngwetu, Apalahama kanyongonwene chipwe ngwe kapalikile mu yipikalo yeka ni yeka, hachino Yehova yawahilila chinji. Yehova kapwile ni kumona Apalahama ngwe sepa lienyi ni kumwalwila ngwe mukwa-ululi. (Uputu. 15:6; Roma 4:13, 22) Yino muyihasa kulingiwa ni kuli yetu. Utayizo wetu kuli Yehova, kuwatalile ha yuma yize mutulinga mu mulimo wenyi, chipwe ha yiteli yize tukwete. Yehova kakututayiza mumu twakunyongonona mu ufulielo. Kashika, chipwe ngwe tuli ni miaka yeswayo, tuli ni mwono weka ni weka hanji utotombo, yetu eswe mutuhasa kunyongonona. Shina ha mashimbu wano, unanyongonona mu limwe lamba? Nyi chenacho, nyingika ngwe Yehova kanawahilila chinji. Nyi twanyingika ngwetu tuli ni utayizo wa Yehova, kutalatala chize tukwete ha kumanunuka cha yilakenyo yenyi, muchikola chinji.

KUTALATALA CHIKOLO

15. Yika Paulu ambile ha A-Roma 5:4, 5, mba yika amwe mahasa kulihula?

¹⁵ Ngwe chize Paulu ambile, yetu twakupwa ni utayizo wa Yehova, muze twakununga ni kushishika kuli iye, ni kunyongonona mu yipikalo. Talenu yize Paulu anungine ni kwamba ha mukanda uze asonekenene A-Roma, ngwenyi: “Utayizo wa Zambi wakuneha kutalatala, chikwo nawa, kutalatala kuchishi kukolesa sonyi.” (Roma 5:4, 5) Yino muyihasa kusoloka ngwe kalumbanganyiso. Mumu liaka? Mumu chitangu ngwe chize anasoneka ha A-Roma 5:2, Paulu kambile ngwenyi, Akwa-Kristu mu Roma te kali ni chimwe kutalatala—kutalatala cha “uhenya wa Zambi.” Alioze, umwe mahasa kulihula ngwenyi, nyi Akwa-Kristu wano te hapwa kulu ni chimwe kutalatala, mba mumu liaka Paulu anahanjika nawa hakutwala ku kutalatala?

16. Kuchi kutalatala chize tuli nacho muchihasa kukola? (Tala nawa yizulie.)

¹⁶ Mutuhasa kumona yize Paulu te anambe kwamba nyi twanyingika ngwetu, kutalatala chili chuma chize muchihasa kukola. Chakutalilaho, shina uneuluka ha chisuho chitangu muze wevwile hakutwala ku kutalatala cha Wanangana mu longeso lie lia Mbimbiliya? Ku uputukilo, hanji wanyongene ngwe kutwama hano hashi ku miaka yeswe kuchichi kuhasa kulingiwa. Alioze, hanyima lia kunyingika kanawa Yehova ni yilakenyo yenyi, kutalatala che ha kumanunuka cha yilakenyo yenyi yichikola.

17. Mu mutapu uka kutalatala chakununga ni kukola, chipwe muze hitwalihana kuli Yehova ni kutupapachisa?

¹⁷ Chipwe hanyima lia kukupapachisa, nihindu mununga ni kusa tachi hanga unyingike Yehova, mba zango lie hali iye likole. Nyi wachilinga, kutalatala che muchinunga ni kukola. (Hepre. 5:13–6:1) Hachino, mumona umwenemwene wa maliji ali ha A-Roma 5:2-4. Kota wapalikile mu yipikalo yinji, alioze yiununga ni kunyongonona mba yiupwa ni utayizo wa Yehova. Amu hiwanyingika ngwe Yehova kakukuzanga, haliapwila hiwapwa ni uhashi wa kununga ni kushimbwila kumanunuka cha yuma yize anatulakenya. Kutalatala che chinayi ni kukola chinji kuhiana muze waputukile kulilongesa Mbimbiliya. Haliapwila, kutalatala chino hichapwa chamwenemwene kuli yena, chili ni ulumbunwiso unene ni kusongwela mwono we. Chinakukwase kutwama kanawa ni asoko je, kukwata yiyulo yipema ni kumona chize muhasa kuzachisa kanawa mashimbu je.

18. Shindakenyo yika Yehova anatwehe?

¹⁸ Paulu kahanjikile nawa ha chuma chikwo chipema hakutwala ku kutalatala chize tuli nacho muze hitwapwa ni utayizo wa Yehova. Iye kanatwehe shindakenyo ngwenyi, kutalatala chetu muchikamanunuka pundu. Mumu liaka tuli ni shindakenyo yacho? Paulu kahanyine shindakenyo yino kuli Akwa-Kristu ngwenyi: “Kutalatala kuchishi kukolesa sonyi, mumu zango lia Zambi alizukwile mu mambunge jetu kupalikila mu spiritu yisandu, yize atuhele.” (Roma 5:5) Ewa, tuli ni yuma yeswe yize tunafupiwa hanga tufuliele ha kutalatala chize Yehova hanatwehe—chino che kutalatala chetu.

19. Shindakenyo yika muhasa kupwa nayo hakutwala ku kutalatala che?

¹⁹ Sako mashimbu hanga unyonge ha chilakenyo chize Yehova alingile kuli Apalahama, chize iye apwile ni utayizo wenyi ni chize Yehova amumwene ngwe sepa Lienyi. Yuma yize Apalahama apwile ni kushimbwila, kuyakayile mu meya. Mbimbiliya yakwamba ngwo: “Muze Apalahama hasolola uhumikizo, yazuka chilakenyo chacho.” (Hepre. 6:15; 11:9, 18; Roma 4:20-22) Apalahama kakevwile sonyi mumu lia kushimbwila. Ni yena nawa, nyi mununga ni kushishsika kuli Yehova kuuchi kevwa sonyi. Kutalatala che makachiwahisa. Kutalatala che chili chamwenemwene, kashika muchilita kuwahilila hi kunenganyana ko! (Roma 12:12) Paulu kasonekene ngwenyi: “Zambi yoze wakuhana kutalatala anuzalise ni uwahililo ni sambukila mumu nwakumufuliela. Chikwo nawa, ni ukwaso wa ndundo ya spiritu yisandu kumunutakama mu kutalatala chenu.”—Roma 15:13.